2008/12/26

أفتكرت وعدى


بمناسبة السنه الهجريه الجديده اللى هتهل علينا بالخير بهديلكم الكلمات دى
وأهداء خاص للناس دى
( زوزو _ ساره _ ملك _ مى _ سها _ يويو _ نور _ اميره _ شيماء .. وكل المدونين

بحبـــــك مهما طال البعــد
بحبــــــك حـتى منغــير رد
حتى لو صوره فـى خيالى
حتــــى لو كان وهـم جالى
دا مهما تكونى يا حبـيـبتى
مفيش غيرك علـى بـــالى
بحــب عنـيـكى تـنـاديـنــى
وهمسك فى الفضا يجينى
ويخــطـفـنى مـن الدنـيــــا
يـدوبنى يـا نـــور عـينـــى
فـى كـل مكان انـا شايفـــك
بضحـك عـنيكى وشفايفــك
ولمـا اروح ازور البـحــــر
يـطمنــى عشـــان عارفــك
وابعتـــلك جـوابـى معـــــاه
ولمـا تـغـيـبــــى يـسـتـنــــا
ويـوم ما تعودى فى مكانـا
يقـول موجـه وحشـتـيـنــى
ورد جــوابــى بـيـجـيـنــــى
يـفــرحـــــنى يـهــنـيـنـــــى

ويـسـعـدنـى يا نـــور عينى

2008/12/23

ساعات وساعات



معظمنا عنده المشكله ومنا اللي شاعر بخطورتها ومنا اللى مش منتبه ليها على الاطلاق , أدمان الانترنت او الكمبيوتر عامة
انا عنيت من المشكله دى كتير جدا , لكنى عارفه ومحدده انا عايزه ايه , انا بدخل للانترنت علشان اشوف ناس بحبهم , مبقدرش اتواصل معاهم بخارج الانترنت بحريه فبلجأ ليه علشان اشوفهم مده اطول , ولأنه أرخص كمان مقدرش انكر دا , وبما انى عاطله والحمدلله فعندى وقت فراغ هايل ودا اكبر سبب بيخلينى اسلى وقتى بالكمبيوتر , واخيرا توصلت للمدونه وحبيت اكتب واقرا لناس كتيره بيهمنى اعرف اخبارهم اكتر كمان ما أقرا هما كتبوا ايه او افكارهم ايه .
يعنى لو بطلت احب الناس ومش كل الناس طبعا منا مش مثاليه قوى كدا , مش هدخل للانترنت ولا اقعد علي الكمبيوتر , ولو هما كمان بطلوا يدخلوا للانترنت او بعدوا مش هيكون فى سبب يربطنى بالكمبيوتر , الا انى اكتب , لانى حاليا بستسهل اكتب علي الكمبيوتر بدل ما بكتب على الورق , بس تعرفوا انى لما رجعت امسك القلم تانى لقيت ان حتى الكتابه على الورق ليها سحر من نوع خاص , بالذات لو بتتمتع بخط جميل , هتشعر انك زى الرسام اللي بيتفنن فى أظهار جمال اللوحه اللى فى ايده .
الحكايه محتاجه اننا نقعد مع نفسنا فى حوار صريح وندور احنا عايزين ايه بالظبط وبندخل ليه وفين الهدف وهل وصلنا ليه او لا ولو لا طيب قدامنا قد ايه علشان نحققه .. فى مثل جميل عندنا بيقول كل شيء بيزيد عن حده بينقلب ضده .. مش هنقعد نعمل احصائيات علشان نفيد بعض ونعلم بعض ازاى نبطل أدمان .. عمر الاحصائيات ما بتغير لوحدها .. لازم نساعد نفسنا قبل ما نطلب مساعدة شخص تانى ..
أمبارح انا قعدت افكر مع نفسى .. بنقول معرفة الناس كنوز .. طيب لو الكنز زاد قوى وبقى اتقل من اننا نحمله معانا فى كل مكان .. هنضطر نحطه على الارض ونقعد جمبه نحرسه من الحاسدين والحراميه صح .. طيب والحل .. مش عارفه منا عقدتها بتصورى دا
محدش فاهم حاجه صح .. طيب متشغلوش بالكم بالتفكير .. كنت قريت مره لحد قال انه ندمان وحاسس بالغلط انه اظهر شخصيته قدام بعض الناس .. وامبارح كنت بتناقش مع صحبتى هل لو ظهرت نقاط ضعفنا قدام بعض الناس .. لازم نهرب ولا نواجه .. بالذات وهو بيحاول يستغل نقاط الضعف دى .. طيب مين فينا معندوش نقاط ضعف .. بتختلف من انسان للتانى .. لو حد تاه منى خلاص ميتمسكش بطوق نجاه يسيب نفسه مع التيار وزى ما تيجى وميخافش أبدا .. انا مش منتظره شيء دى بعض الفضفضات الملعبكه .. انا حتى مش متأكده انا كان المفروض هتكلم عن ايه وسرحت فكتبت إيه ....

ساعات أحس بشوق وساعات بالآهات
لكن اعرف طريقى .. يمكن ساعات وساعات
ساعات أسهر في ليلى اتآمل فلى فات
وساعات تجيلى ذكرى ممزوجه بالآهات
وأنسى بكره ايه .. يمكن ساعات وساعات
بفكر يحصل ايه لو روحت للأيمان
وأوقات تانيه افكر امشى ورا الشيطان
أفكار تقلب كيانى .. يمكن ساعات وساعات
بعينى شايفه حق والناس تقول دا باطل
واستغرب لكلامهم واسئل ايه اللي حاصل
وأوقات كتيره أسكت مهى ساعات وساعات
اوقات اكتب بقلمى واحكى عن الحاجات
واوقات اكسر قلمى وأفضل السكات
جايز ساعات وساعات
ساعات يخونى قلبى واشوف غلط ساعات
لكن لو صح فكرى تتبدل الحكايات
اهى دى ساعات وساعات

2008/12/16

قرار تقسيم الأنترنت


أعلنت العقول الجباره لمدمنى الانترنت بالذات اللى معندهمش غير كمبيوتر واحد
او اللى الكمبيوتر التانى خرب فمضطرين لأستخدام كمبيوتر واحد أنهم لابد وان يقوموا بتقسيم الأوقات
مما أدى الى نشوب خلافات عميقه بين الاخوات وبين الأمهات والأباء والكل كليله
فأعلنوا تقسيم الانترنت لفترات تتراوح بين ساعات و أيام علي حسب المخطط المجنون
وأصبح الكل سريعوا الحركه في تأدية كافة الاعمال الوظيفيه والمنزليه , للتفرغ بالوقت المتبقى لعدد الساعات

التى تقررت لجلوسهم علي الانترنت او للالعاب
وأدى هذا الانشغال الى أهمال الصحه العامه للفرد والأسره ,
هذا وبخلاف الأحقاد عندما ينقطع التيار الكهربائى عن المنزل
اوالنكد عندما يضطرون أسفين للذهاب الى الرحلات بخارج المنزل ولمدة أقصاها أسبوع ( زى المصيف )
ولتلاشى بعض الكوارث التى تنتج عن الأبتعاد عن الكمبيوتر , أخترعوا طبعا اللابتوب ( علشان ميبقاش لحد حجه )

مما أدى الى تداعى الأمور أكثر حتى وصل الأمر ببعض الأسر الى اللجوء للطلاق أحيانا والعلاج النفسى أحيانا أخرى

والأن اجتاز الأختبار لتعرف ان كنت من مدمنين الانترنت ام لا ( من الأخر علشان تلحق نفسك )

الاختبار يتكون من 10 أسئلة ، و الإجابة عنها إما ب (نعم) أو (لا) ، كالتالي :


1- حينما تكون خارج النت ، هل تشعر برغبة شديده لدخول الإنترنت ؟؟
( ) نعم ( ) لا
2- هل يتملكك شعور بالنشاط و النشوه حينما تبحر فى الإنترنت ؟؟
( ) نعم ( ) لا
3-تشعر بالآلام أسفل الظهر و في مفاصل أصابع اليدين ، أو بإجهاد فى النظر بعد تركك لجهاز الحاسوب أو أثناء جلوسك عليه؟؟
( ) نعم ( ) لا
4-إذا انتهى اشتراكك في الإنترنت ، هل تشعر بالضيق و العصبية لذلك وهل مستعد للاستدانة وقتها لإعادة النت؟؟
( ) نعم ( ) لا

5-هل تفكر بما جرى معك داخل الإنترنت من أحداث أو حوارات أو دردشات على الرغم من أنك تجلس خارجها ؟؟
( ) نعم ( )لا

6-هل يحدث منك إهمال لألتزامات أخرى كواجبات الدراسة أو العمل أو حدث تضرر لعلاقتك بمحيطك
كأفراد أسرتك أو أصدقائك بسبب النت؟؟
( ) نعم ( ) لا

7-هل تشعر بالميل للعزله و الابتعاد عن مخالطة اللآخرين؟؟
( ) نعم ( ) لا

8-هل تشعر بنوع من الاكتئاب بسبب منعك من الجلوس على الإنترنت؟؟
( ) نعم ( ) لا

9-هل تشعر بأنك تعيش أحلام اليقظه ، وبأنك غير واقعى فى بعض تفكيرك؟؟
( ) نعم ( ) لا

10-هل تأكل بشكل غير منتظم بسبب الإنترنت ، أو وجدت نفسك يوماً تأكل أمام الكيبورد؟؟
( ) نعم ( ) لا

وبعد أن تجيب عن هذه الأسئلة ، اجمع مجموع الإجابات بنعم ، و اضربهم بعشرة ، لتظهر لديك النسبة المئوية
لإدمانك على الإنترنت .
وبلغنى بيها ولنلحقك لمنلحئكش هههههههههههه ... وهتعلق يعنى هتقولنا النسبه لا مفر
واى شىء تانى تحب تضيفه ... وشكراً .

2008/12/07

خروف العيد بين القيل والقال

كلنا سمعنا طبعا عن انفلونزا الطيور بس أبدا انا بحب الفراخ عن اللحمه أذا هقضى العيد بالفراخ وليس باللحمه
وصلنى تاج من الجميله سالى صاحبة مدونه ( حاجات جوايا ) وبعتذر جدا لأنى هنزله في التوقيت دا بس أعمل ايه مشاغل قدوم العيد بقى فياريت تعذرنى
نقول بسم الله ونبدا التاج ..
ماذا يمثل لك العيد ؟ وما أكثر شئ يبهجك في مظاهر العيد ؟
العيد فرحه ماااء بيمثل ليا أجازه برغم ان كل أيامى اجازه اصلا ههههههه
أكتر شىء يسعدنى وقتها انى اسمع صلاة العيد واشوف الناس بتزور بعضها
اوصف لنا طقوسك في العيد .. من ليلة العيد لآخر يوم ؟
أحب انام بعد صلاة العيد واصحى الاقى البيت مش عايز يتروق ياااه فرحه كبيره ههههههههههه
احكي لنا أطرف موقف حصلك في العيد ؟
فى يوم قعدنا نشوى واللحمه طلعت مستويه من بره بس واتاكلت يعنى هتتساب انسو دا العيد
والموقف التانى لما سافرت اقضى العيد فى البلد ورجعت رجلى مجبسه بس دا كان موقف هباب
بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
طبعا دا واجب وطنى بس فى الأونه الأخيره بقيت بستندل وابعت للى يبعتلى وبس
( الكلام طبعا على اصحابى فقط لا غير هههههههههه )
مين أول حد تزوره أو تكلمه في التليفون /الموبايل عشان تهنيه بالعيد ؟
أخواتى وبعديها أصحابى والأقرب فالأقرب وهكذا ولو خرجت يبقى جيرانى
إيه الفرق بين العيد الحالي .. وعيد (أيام الطفولة )؟
لا طبعا الفرق كبير حتى فى فرحة القلب
العيد الحالى بتدفع اما في الطفوله بتاخد ههههههه
طبعا العطاء ليه رونق جميل بس لما كنت باخد كان الرونق أجمل
كلمنا عن ذكرياتك في العيد ؟
كنت لازم وانا صغيره اول شيء اصحى عليه هو الأيس كريم والبمب وكان دا بيجبلى التهزيق طبعا
تفتكر الحياة من غير عيد .. هتفرق كتير ؟؟؟
يااه هيبقى الفرق زي بين السما والأرض العيد نبض قلب وفرحه بتضم الأمه العربيه
إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟
أجمل رساله وصلتنى من لوله حبيبت قلبى ومرات أخويا
( مش بجاملها اصلا هى مبتدخلش للمدونه نداله بقى ههههههههه )
وانا بعتها لمعظمكم لأنى فرحانه بيها قوى اصلها مسخره بس بتظر للواقع الحالى
وكانت بتقول : كل عام وأنتم بخير .. نظرا للظروف الأقتصاديه وارتفاع الأسعار
هذه التهنئه صالحه لمدة سنه وتشمل: عيد أضحى _ تعيين _ ترقيه _ نجاح
_ سنه جديده _ مولود _ نقل _ زواج ... الخ
احم احم .. لسه بتاخد عيدية ؟؟ من مين ؟؟ وبتديها لمين ؟
والله الوحيد الذى مازال بيدينى عيديه هو أخويا وطبعا مبدهاش لحد لأنها بتكون محترمه
فبستأثر بيها لنفسى والفكه تطلع لأطفال العيله بقى هههههههههه
إيه رأيك في التاج ؟
جميل جدا بجد بس هيضيعنى ويبين جوانبى الشريره بس يلا كله بثوابه
تحب تمرره لمين من المدونين ؟ اذكر على الأقل 10
للأسف كنت هحب أمرره لناس كتيره بس مفيش وقت
نظرا لأن العيد بكره خخخخخخخخخخخخ .. كل سنه وأنتم طيبين

2008/12/05

الدنيا ربيع فى عز الشتا


أنا سعيده جدا جدا والسبب فى تاج السعاده من أستاذ محمد سكر زياده

انا مش بعاكسه عيب لا هههههههههه انا بس مبسوطه شويه أكتر من العاده

هذا التاج وصلنى من أستاذ محمد صاحب مدونة ( هل تبحث عن السعاده )

أكيد كلكم بتقولوا زيى كل ما تدخلوا عنده ردا عن سؤاله بكلمة طبعا وبسم الله نفتتح التاج

وللعلم بالشيء اللي مش هيقدر يكمل يتفضل يشرب شاى وقهوه وكركاديه علشان اللي ضغطه يرتفع ههههههههههههه

مهو مش أرغى انا وانتم تتعبوا لا برضوا انتم أخواتى واحبابى ولا يمكن أرضى بتعبكم

وأخيرا وليس أخرا أحب اشكره علي تاج السعاده وتعالو نرغى سوا بقى ونشوف ما هى السعاده من وجهة نظر الفلفسوفه نور

السؤال الاول : ما هى السعاده من وجهة نظرك ؟
السعاده هى أنى احس بالرضا أشعر انى مبسوطه منغير سبب , ووقتها أكون لا بفكر فى شيء ولا عايزه شيء من الدنيا بس راضيه وسعيده
السؤال الثانى : كيف تصل الى السعاده؟
صعب السؤال دا أصلى معرفش هى اللي بتصل ليا مش انا اللي بسعى ليها
يمكن لما ربنا بيكرمنا بحبه ورضاه وقتها نقدر نوصل للسعاده

السؤال الثالث : هل السعاده وهم ام انها حلم صعب ؟
بالنسبه ليا السعاده شيء قريب جدا أقدر اوصله بسهوله , لأن مليون شيء بيسعدنى وهى حاجات بسيطه بس لو نرضى بيها يعنى مهياش وهم ولا حلم صعب
السؤال الرابع : هل السعاده طريق للنجاح ؟ وضح ؟
بالتأكيد هى الطريق للنجاح لأنها هتخلينا نتقن أعمالنا وبسرعه أكتر ما كنا نتوقع
لما القلوب بتشعر بالسعاده بتزيد طاقتها وتقبل على الحياه بقوه

السؤال الخامس : ما هى اكثر اللحظات التى شعرت فيها بالسعاده ؟
كتيره اللحظات دى فصعب أتذكر موقف بعينه , لكن دايما اكتر شىء بيسعدنى اول ما عينى تلمح بحر أسكندريه وقدمى ترسى على أرضها
السؤال السادس : هل ممكن ان تحقق كل شيء ؟
اذا السؤال دا خاص بحياتى فأنا مش عارفه مفيش حد عامة بيقدر يحقق كل شىء بيتمناه , لأنه دايما بيكون طموح لأمل أبعد من كل اللي حققه .. وعامة مفيش شيء بعيد عن الله سبحانه وتعالى
السؤال السابع : السعاده تجعلك تقبل على الحياة أم لا ؟
طبعا .. تجعلك تقبل على كل شيء فى الحياه
السؤال الثامن : هل أحسست يوما انك وصلت لقمة السعاده ؟
كل لحظة سعاده بتمر بيا هى بالنسبالى قمة السعاده , كفايه انى أشعر بيها بوقتها او بعدها علشان اعرف انى كنت فى قمة السعاده
السؤال التاسع : لماذا تمر اوقات السعاده بسرعه ؟
لأن كل شيء جميل وقته قليل ودا سر جماله .. ودا اللى بيجعل الروح دايما متعلقه بيه لأنها بتخاف يمر وقته القليل دون ان تتشبع منه
السؤال العاشر : هل ترا السعاده فى التدين ؟
بالتأكيد كل السعاده فى التدين والا عمرك ما هتحس بالرضا ولا تشعر بلحظة سعاده حقيقيه .. لأن السعاده بجد فى رضا ربنا سبحانه وتعالى
السؤال الحادى عشر : هل انت متفائل وعندك أمل ؟ وضح ؟
بالنسبه لمتفائل فأنا متفائله جدا ومعنديش اكتر من الأمل لأنى مؤمنه بالله ومتأكده ان بكره أحسن .. أكتر شيء يخليك مطمئن ان بكره افضل أنك متوكل على الله وعارف انه خير من يرعاك
السؤال الثانى عشر : أذا شعرت بالحزن ماذا تفعل ؟
أكتب اى شيء يخلينى اخرج كل شىء جوايا وأبكى وأشكى لله فى مكان لا يرانى فيه الا الله
السؤال الثالث عشر : هل يستمر معك الحزن فتره أم ينقضى فى الحال ؟
أكتر حزن مر عليا فى عز كوارث حياتى كان أيام لكن الأحزان العاديه مبتاخدش وقت كتير يمكن سعات او دقايق او حتى لحظات وتنقضى بس فى أحزان بتخلف جرح فى القلب ألمه عمره ما بيختفى الا برحمة ربنا
السؤال الرابع عشر : ما رأيك في الافراد المتشائمين ؟
بجد مش عارفه أزاى نتشائم وفى ربنا سبحانه وتعالى مالك زمام الأمور , لو أحنا مؤمنين كان لازم نعرف ان ربنا سبحانه وتعالى مش ظالم ولا يكلف الله نفسا الا وسعها , يعنى مبيحملش حد اكتر من طاقته لأنه هو الوحيد الذى يعلم خبايا الصدور .. مينفعش أبدا نتشائم
لما تقابل أنسان متشائم بس فكره بأوقات السعاده علمه طريق الوصول إليها وهو طريق الرجوع لله

2008/11/24

عروستـــــــــى


تخيل لو دق جرس الباب وأنت بتفتح بكل سرور مرحب بأى ضيف سيأتى , تفاجىء ببنت هاديه بتتكلم بكل ثقه وعقل وبتطلب مقابلة والدك او والدتك او الأتنين سوا
تحاول كرجل أبداء شوية من السيطره على الأمور وتسئلها خير ؟!! حضرتك عيزاهم فى ايه؟!!
وبكل أدب وأحترام تبادلك أبتسامه خفيفه وترد تقولك كل خير بأذن الله , وتعيد صياغة طلبها بكلمتها , ممكن أقابلهم؟
فتعود أنت لطرح سؤال أخر , طيب أقولهم مين حضرتك ؟!! وبصمتها للحظات تسطرد قائلا أنهم بالداخل تفضلى !!
تزيد علامات التعجب بوجهك حين تدخل هى وكلها يقين أنهم بالداخل بالفعل وكأنها كانت تعلم وما سؤالها الا بمجرد شكليات , وتقف متحير ماذا تقول لأسرتك ؟ من هذه الضيفه التى رفضت الأفصاح عن شخصيتها الا أمام والديك !!
وتأتى المفاجأه بما لم تتخيل ...........
بعد أن عرفت عن نفسها , ومكانتها وسبب تواجدها
أنها تطلب أن تكون زوجتك , بمعنى أوضح تطلب يدك من أهلك
بعد أن سئلت الجيران والأقارب عن أخلاق أبنهم الوحيد
وتقف مذهول وتتسائل هل أنا أحلم أم انها حقيقه !!!!!!!!!!
والسؤال الأن هل تتخيلون ما هو رد فعل ذاك الشاب
هل يثور فيطردها , أم يضحك ويسخر منها
هل يقبل الأرتباط بها , أم يستنكر فعلتها بهذه الجراءه
هل يعتبرها وقحه أهدرت أنوثتها , أم يرا أنها ايقنت انه الرجل المناسب لها
أرجو ان لا يثير موضوعى هذا استياء البعض , فلقد طرحته لأنى قرأت جمله وأعجبتنى بشده
كانت تقول : عودوا رجالا ... كى نعود نساء .

2008/11/14

كابوسى القديم



كنت أعتقد ان ذاك الكابوس المرعب لن يراودنى من جديد , لقد انقضت عشرة سنوات , لماذا عادت من جديد تدوى صرخاتها بأحلامى , ماذا تريد منى ؟!!!
لماذا تركض ورائى ولما الأن ؟!! آآآه ألف سؤال يجتاح فكرى ليصيبنى بحيرة تزيد من جنونى .
حاولت أن اعتصر ذاكرتى لأستعيد صورتها الحقيقيه , فقد أستيقظت منهاره , وقد كان يساعدنى من قبل أن أتذكر ملامحها الرقيقه لأزيل أثار الخوف عنى .
قررت أن أنهى عذابى وأذهب لأراها من جديد , فمن الممكن أن تكون تغيرت بعد مرور كل تلك السنين .
لم أعرف يوماً لها أسماً فلقبتها بفتاة الشجره , لم أكن أسخر منها مثلهم , فقط كنت أراقبها من بعيد
لا أعرف لما كان يتملكنى الخوف حين أراها , لا أستطيع ان اجزم ان كان خوفً منها أم عليها
كنا أطفالاً نلهو ونمرح هنا وهناك وكان يتردد فى جلسات أهلنا سويا تلك القصه دائما , سر الفتاه المقيده بالشجره , ومن كثرة تلهفنا لنعرف خبايا ذاك السر , أجمعنا نحن الاطفال ان نذهب لنرا , هل ما يتحدثون عنه حقيقه ؟!!
وكانت الكارثه !! أن بذلك البيت فتاه بالفعل مقيده بالشجره , من النظره الأولى تلاحظ قدماها وتعلم أنها معاقه , لكن بعيناها نظره عجيبه , تبث الخوف بداخلك فلا تقترب منها , وكأنها تدافع عن نفسها بتلك النظرات .
أتذكر الأن كم كانت تثور وتصرخ حين يتجمع حولها الأطفال , وكأنها ترفض قيودها وسخريتهم .
كنت دائما أقف لأراها من بعيد , لا اعرف ان كانت تستطيع أن تتحدث مثلنا أم انها عاجزه حتى عن الأفصاح عما بداخلها , كل ما كنت موقنه منه إنها دائما ترانى , فلم أرا منها يوماً الا صراخها ونظراتها .
كانت تقاربنى بالعمر , أن تأملتها دون ثورتها ترا ملامحها الهادئه ويعجز العقل عن وصفها من فرط جمالها , فلا تقول الا سبحان الله , لقد حباها الله الجمال ولكنها مفتقده لنعم أخرى كثيره .
كنا نمر كثيراً من أمام بيتها , وذات يوم كنت أسير مع أبى وحين مررنا بها قال : لا حول ولا قوة الا بالله , فتنبهت إنه رآها , فبادرته بسؤالى : لماذا يقيدوها ؟!! فأجابنى بحزن : أنهم يخافون عليها أن تذهب فلا تستطيع العوده حين تبتعد عن البيت .
لقد كانت قيودها تمكنها من السعى بداخل أركان الحديقه , لكنها لا تصل للباب أبدا , وكنت أرا ملابسها دائما متسخه من محاولاتها للتأرجح هنا وهناك .
وذات يوم وقفت امام باب البيت أبحث بعينى هنا وهناك لعلى أراها , واذا بها تظهر أمامى أقرب من كل مره , ولم تكن مقيده , لا أعرف لماذا فزعت حيت رأيتها مقبله على , وأخذت فى الركض لمنزلى , وأنا أسمعها تصرخ وكأنها ترفض أبتعادى .
وحين وصلت لمنزلى أسرعت فى غلق الباب خلفى ووقفت ورائه أحاول أن التقط أنفاسى , لا أعرف لمذا تملكنى الفزع ولما كنت أركض بتلك السرعه برغم علمى أنها لن تستطيع اللحاق بى , ولكن صرخاتها كانت كشبح خفى يسعى للأمساك بى .
ومن يومها وأنا اعانى من تلك الكوابيس المفزعه , بأنها تركض خلفى وكانت ملامحها بشعه الى أقصى الحدود .
ومنذ هذه الحادثه توقفت عن زيارتها , ولقد زالت كوابيسى شيئا فشيئاً حين تركنا المنزل القديم وأنتقلنا لمكان أخر .
ماذا تريد بعد مرور تلك السنين ؟ لماذا عاد كابوسى القديم ؟
وقررت أن أنهى أحلام الطفوله وأواجه الحقيقه , فلقد صرت شابة الأن وبمقدورى أن استجمع شجاعتى وأذهب لهناك
وذهبت صوب بيتها وكل خطوه من قدمى على الأرض تشعر قلبى بالثقه وتؤيده , كم تمنيت ان ارا كيف أصبحت آية الجمال وكنت أرجو أن تسامحنى على خوفى منها وعدم زيارتى لها , دخلت من باب البيت فأذا بالشجره ذابله بمكانها بقلب الحديقه والهدوء يعم المكان , ولكن البيت خالى من أهله , أسرعت فى ذهابى للجيران لأعرف أين هم وأين هى , ودب الحزن بقلبى حين علمت انهم هجروا البيت وأنتقلوا بعد وفاتها , لقد ماتت منذ سنين واليوم ماتت شجرتها حزناً عليها , أنتهت قصتها ولكن هل ستنتهى كوابيسى .. حقا لا أعلم .
ملحوظة : سأتوقف عن الكتابه لفتره فلقد حاولت أن اقاوم لكنى لا أعلم هل سأصمد أم لا
وأعتذر عن تقصيرى فى زيارة كثيرا من المدونات التى لطالما أحببتها
أنا لا أبتعد بسبب موقف معين ولا حتى لأن أفكارى نضبت , أنا أملك الكثير من الموضوعات لكنى لا أريد نشرها فلقد صابنى شيء ما , أفقدنى توازنى , وسأحاول أجتيازه

2008/11/08

كل سنه وانتى حبيبتى

صحيح انتى عارفه انى بعانى من النسيان بفظاعه بجد
بس عمرى ما أنسى يوم عيد ميلادك

اذا انتى فى بالى وقلبى دايما

ولو نسى عقلى ... قلبى يفكره

صحبة ورد جميله من أول هدايا قلبى ليكى

تفكرنى دايما أنك أجمل شيء فى دنيتى



والشموع دى علشان تنور أيامك الجايه زى ما كنتى دايما منوره طريقى

والنهارده بعد السنه الجديده اللى أنضافت لأجمل سنين عمرى

وكبرت حبيبت قلبى سنه

بهديلها الكلمتين دول

( الطالبه عفو الله )

زينب

اعزب كلمة يقولها لسانى
لما تغيب
اكيد الحزن يهز كيانى
اه لو ترجع
تعود الفرحه معاها وتانى
تملى حياتنا امانى وشجن
تملي الدنيا سعاده يا زمن
احفظها خد بالك منها
اوعى الدمعه تمس عيونها
بدعي بقلبي وربي الحافظ
هتفضل غاليه عليها كحافظ
هيفضل حبك مالي كيانى
وأنتى وبس مش حد تاني
سهل كلامى .. اكيد فهمانى




دى بقى هديتى

منا مقدرش اهديلك الا شىء انا بحبه
انا عارفه هى قليله قووى عليكى

بس نعمل أيه بقى

وهنا نكون وصلنا للتورته بقى
شيفاكم عنيكم زغللت
ممنوع اللمس او الهمس او الأقتراب

ممكن التصوير مش هقولك لا
علشان منبقاش حرمناكم بس من حاجه





كل سنه وأنتى طيبه يا حبيبتى وبعوده الأيام

تفرحى وتتهنى و فى عيدك نغنى
بأجمل الألحان


وهنا وصلنا للنهايه
اللى عايز يسيب هديه يتفضل
انا عن نفسى اهدتلها قلبى
من زمان

2008/11/02

رحلت أبحث عن السعاده فعدت بدمعه


يبدو ان قلمى يأبى ان يكتب عن السعاده فلقد فشلت فى الحصول عليها لنفسى , نعم .. رحلت أبحث عن السعاده وعندما وجدتها أنتهت بدمعه حزينه , قبل أن تبدأ رحلتى طلب منى الاصدقاء الكتابه عن السعاده , فعزمت أن اجدها خلال رحلتى وكنت موقنه أننى سأصل , وبالفعل وجدتها وعدت ولكنها أنهدمت منى على أبواب الطريق .
أنهدمت حين رأيت بعينى اننا لن نسعد ونهنأ إلا اذا تغيرنا , ذهبت بذكر الله وعدت وأنا العن البشريه التعسه والقلوب الصدئه والعيون الذائفه , أعرف ان المسلم ليس بسباب ولا لعان , وأن كانت أمنيتى بينى وبين نفسى ستعد خطيئه فسامحنى يا اللهى فأنا لست بملاك , تمنيت أن أصرخ بكلماتى لتزلزل قلوب الناس , سحقاً لهذه الفئه من بنى أدم , سحقاً لقلوب فارقتها الرحمه وأذلها الكبر فلم تعد تميز بين حقوقها وحقوق الناس ودائما ترا انها فى المقدمه ومن بعدها الطوفان .
عندما جلست أستريح لكى أكمل نهاية طريقى , رأيتها وبرغم مرور السنين الا انها مازالت كما هى , تحمل بعينيها ذاك البريق الذى يجذبك لتطيل النظر إليها , وحينها فقط ستغلف فضولك بأبتسامتها فى تواضع يجعلك تنسحب ملقى ببصرك للأرض , أشرق وجهى حين لمحتنى وعزمت ان تصل الى , كم سعدت أنها استطاعت ان تتغلب على محنتها وعادت للحياه من جديد , وظل نظرى يسايرها حتى بدأت تعبر الطريق , وشيئا فشيئا بدأت أبتسامتى تختفى بين ظلال القلق فقد كانت السيارات مسرعه في جنون وعدم تنظيم , خفق قلبى بشده حين تعثرت , وقررت ان أذهب إليها واساعدها لكن أرجلى تحجرت فى مكانها حين فرملت سياره مسرعه , لا أعرف لماذا فعل السائق هذا برغم انه كان بعيداً عنها كثيراً , وأرتبكت هى بين دوى الكلاكسات من أكثر من سياره حولها , وتوقفت فى مكانها وهى تنظر ألى وكأنها تناشدنى أغاثتها , وسرعان ما توقفت بمحاذاتها سياره لتوقف باقى السيارات وتمكنها من اجتياز الطريق المتبقى , وقبل أن يطمئن قلبى ان تلك المأساه انتهت , أخرج قائد السياره رأسه ليكيل لها وابل من الأهانات وتجمع الناس وكأنه عرض لمسرحية كوميديه فمنهم من يضحك على ما يحدث ومنهم من يأيد لعنات السائق ومنهم من يشاور لها لكى تكمل طريقها ولا تهتم بكلماته ومنهم من يضحك ويزيد ألمها بكلمات السخريه , وقررت هى أن تصعد للرصيف وتغلق ستائر المسرحيه , وقفت أمامى ولم يعد بيننا كلمات تقال ثم أنصرفت مبتعده بعد ان رمقتنى بنظره حزينه وكأنها تقول لا مجال للمعاقين فى دنياكم ....

2008/10/20

زهقان..طهقان..متضايق



مش هقول كالعاده حاله من الأحباط صايبه المدونين ...لا
ناس من المدونين انقلبوا منافقين وزي ما بنقول عندنا في مصر ( كدابين زفه )

اللي معانا نهلل ليه واللي يفوتنا نلعن فيه
واللى بيكتب كلمه جميله نزهقه ونقضى عليه

المواضيع المهمه أصبحت تهمل لأن معليهاش تعليقات كتيره والمواضيع الغير مهمه نتهافت علي التعليق فيها
صحيح أن الانسان لما بيكون متضايق بيدور علي شيء يخرجه من شعوره بالأحباط ويقول هتفرج علي شيء كوميدى او أقرا شيء خفيف يرجعلى بسمتى من تانى يمكن أقدر أكمل
لكن مش كدا أبدا
انا دخلت للعالم دا وحبيته لأنه مكنش فى نفاق , عالم بسيط , غنى بالأفكار

أعتقدت ان كل انسان بيعلق , بيكتب تعليقه على اساس ان الموضوع عجبه او في الموضوع فكره حابب يناقشها

واتضحلى انى كنت مخدوعه في بريق العالم دا

والبريق خلانى اغمض عيونى فمقدرتش اشوف شكله كويس

لكن كل ما بنقرب للشيء ونبتعد عن وهج البريق والأنوار بنشوفه بعين تانيه
وانا شوفت العالم دا بعين ممكن تخلينى أكرهه واسيبه

يا جماعه ببساطه عايزه أقول يلا نبطل نفاق بقى في بعض

اللي عجباه الفكره او الموضوع ببساطه يقول كويس واللي مش عاجبه يقول وحش وأستمر يمكن تكتب شيء أحسن
نبطل ندخل علشان نقول كلام مجاملات مهما كانت بلاغته , فى النهايه ما هو الا كلام مبالغ فيه
وكل مدون بيشعر مين بينافقه ومين بيكلمه من القلب

انا مش بهاجم علي فكره الناس اللي بتكتب شيء بيدعو للابتسامه لا
لأنى بحاول اعمل زيهم واكتب شيء كويس يمكن مش متمكنه قوى من البلاغه لكنى بحاول ومبيأسش

أخر شيء هقولهولكم انا عن نفسى بطالب أى حد يعلق عندى يقولى رأيه بصراحه او يكتفى بمروره الكريم دون تعليق

ووالله وقسماً أحاسب عليه كل مدونه دخلتها وبحب ادخلها مش هتوقف عن زيارتها حتى لو صاحبها او صحبتها مدخلوش عندى أبدا

انا بس كان نفسى أسمع كتير من الناس كلامى دا
لأنى بجد مش عايزه أكره شيء حبيته لأن بعض الناس مش مقدره قيمته
يمكن النفاق من بعض الأسباب اللي بتزهق المدونين وتخليهم يقفلوا ابواب مدوناتهم
اللي ينافق ممكن يكون شخص جديد عايز يعلن عن مدونته لكن فى ناس أكبر من كدا مدونتها معروفه جدا طب بتعمل كدا ليه

كلمه أخيره أرجوكم راعو اللي بتكتبوه ومتعلقوش غير علي شيء حبتوه أو هتنقشوه ونبطل منفاقه او مجامله حتى
______________ وأدى البوست الجديد ____________

معقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

مع خالص أسفى وأعتذارى .... نـــــــــــور .....

2008/10/08

وصلك جواب يا قلبى


فى ناس كتير بتسئلنى ليه سميتى مدونتك تعالو نفكر سوا , سؤال جميل لكنه محرج لما مش بيلاقو شيء نفكر فيه سوا كلها افكارى فقط لا غير , بس تعالو نشوف الجانب المشرق للحكايه , انا قولت انى عملت المدونه لغرض ما ولكنى مش وصلت ليه لحد دلوقتى بس بحاول والله المستعان , بس كل فكره بتطرح حتى لو من وجهة نظرى وبس بقبل النقد عليها أو حتى معارضتها خالص ودا بيكون موجود في التعليقات ( ديمقراطيه طول عمرى ) , لذلك بحب جدا اللي بيدخل يتناقش , طبعا انا مش بكتب افكار عظيمه بس اهى بدايه محموده علي الاقل يكفينى شرف انى بفكر ( بجامل نفسى ههههههههه ) المهم مطولش عليكم المره دي انا عايزه بقى أرائكم ومشاركتكم وتعالو نفكر سوا وبجد

عارفين اسعد شيء لو ليك حد بيكتبلك جوابات , والله ليها سحر خاص غير ال sms والكلام في الموبايلات او علي النت , ياه يا قلبي يا فرحان , المشكله بقى في وسط كل الفرحه دى ممكن تصبنى سكته قلبيه
مش علشان فرحتى لا ... لو ليك حد بيوصل الجوابات زي الاخ اللي الله يباركله اللي بيوصلى الجوابات ساعى البريد طبعا
بيسرعنى كل ما يجبلى جواب , ابقي قاعده في امان الله علي الكمبيوتر والاقي شيء بيخروش في باب الشقه اقوم مفزوعه من مكانى الاقيه جواب حبيبتى وحياتى وصديقتى زوزو , صحيح بفرح بس كدا هيموتنى هو كل ما يجبلى جواب يعملى فيلم الرعب دا
احلى موقف بقى يوم ما كان بيحط الجواب فدخله تحت السجاده , جيت امد ايدي اجيبه معرفتش كان لازم افتح الباب , وبفتح الباب والاقى ساعى البريد تقريبا وشى فى وشه قاعد فى نفس مستوايا على الأرض , وقام الراجل رافع راسه ومسلملى الجواب في ايدى , بس بصراحه كان موقف محرج قوى , غير انى اتخضيت أصلا .
نيجى بقى للعالم وسرعته والتكنولوجيا اللي سيطرت ولغت عالم من السحر وصنعت عالم وهمى من اللى بيغر كتير من الناس
منكرش انى بحب النت جدا واستفدت منه كتير لكن منقدرش نغفل عن الناس اللي مقدرتش تستفيد منه او استخدمته غلط
وكل شيء يزيد عن حده بينقلب ضده لازم رقابه شديده على انماط ناس كتيره بتدخل للنت
نرجع لموضعنا من جديد
كانت فكرة صحبتى انها لما تسافر مش هنقدر نتكلم على النت ولا علي التليفون طبعا , هتبقى تكلفه هايله لو نحسبها , يبقى انسب شيء للموقف دا ايه ؟!! وكان الحل هو الجوابات
فى الأول كنت بضحك زى كتير من اصحابنا ونقولها ما فى الموبايلات وفي الsms ومش هننساكى , بس هى كانت فكرتها ان مهما اتكلمنا فى الموبايل مش هنقدر نطول ولا نقول كل شيء ولا حتى في الsms وعلشان تقـنعنا بقت تقول ان الرسايل هتتكون من صفحات الورق الكتيره اللي نقدر نكتب فيها كل اللى بنفكر فيه وكل أخبارنا وسلامتنا واشواقنا ليها وبصراحه محدش اقتنع غيرى وقولت أجرب , فى اول شهر بعت ليها حوالى أربع او خمس جوابات , لقيت ان الكتابه علي الورق سهله جدا وفعلا ليها بريق خلاب بالذات بقى لما حاولت اكتب باللغه العربيه الفصحى مش بالعاميه . اقولكم علي سر صحبتى لسه متعرفوش انا عندي نسخ لأول 3 جوابات بعتهم , اصلى في حياتى كلها مكتبتش شيء جميل بالشكل دا . الجواب كان عباره عن كلام لكن في نطاق الشعر او التنظيم زي الشعر
وبعد فتره بعد ما كنت بفرح بس لما يوصلنى جواب بقيت بنتظر بفارغ الصبر يوصلنى منها جواب , عارفين يعنى ايه يكون ليكم بريد بأسمكم ومن صديق بتتلهفو تعرفوا اخباره بالتفصيل
( انا عندي جوابات بتوصل بأسمى من اماكن معينه مش فرحانه علشان أسمى علي الجواب علشان متتريقوش بس )
أقولكم على موقف طريف كمان بسبب الجوابات , صحبتى بتحب تعطر الجواب ( فنانه بقى ) وفى مره عطرت جواب زياده شوية ولما تقريبا ساعى البريد فتحه لأنه وصلنى كأنه مفتوح , المهم فتحته وفجاءه لقيت البرفان كأنه عطر المكان كله , كان عطر نفاذ فعلا بس جميل , بقيت قاعده أضحك واقول زمان ساعى البريد فهمنى غلط , ولما رجعت صحبتى ورجعنا نتكلم ونسهر نرغى كالعاده , أحتفظت بأخر جواب ومبعتهوش لحد دلوقتى , وقلت هى خلاص رجعت , لكنى بفكر من وقت للتانى ابعتلها الجواب أصل فى كلام مقلتوش ومتستغربوش الكتابه اسهل وأبلغ من الكلام .
ودى قصتى مع الجوابات أنتم بقى أيه رأيكم وهل حد فيكم جرب سحر الجوابات او جرب يتبادل جواب مع أنسان بعيد عنه أو حتى بيحلم بكدا , دلوقتى لما صحبتى تغيب هتوحشنى وهخرج جواباتها اللي محتفظه بيها هقراها من جديد لأنها بقت ذكرى مسجله زى ذكرياتنا اللي على شرايط الفيديو او صورنا مع ناس بنحبهم ... ودلوقتى اللي ليه تجربه يقولهالى واللي معندوش يغمض عنيه ويحلم وتعالو نسمع لبعض أفكارنا
..


تـحـيــــــــــــ نـــــــــور ـــــــــــــــــــاتــى

2008/09/24

لحظه ساحره


استوقفتنى الحيره فتأخرت عن اجابة هاتفى حين رأيت أسمه .. وجال بخاطرى عدة اسئلة .. ولكن لما الحيره لأجيب واعرف لماذا يتصل
تظاهرت بالتجاهل برغم انى احفظ نبرة صوته عن ظهر قلب . وسئلت من المتصل .. فأجابنى بنبرت صوته المميزه وبضحكه الا تعرفينى . فقولت اعتذر انى اعانى من اثار برد قاتل يؤثر على اذنى من انت ؟!!
لاحظت بصوته شجن لم اعهده من قبل لا انكر انه اسعدنى ..وللحظه اعتقدت انه عائد الى وان خبر خطبته لأخرى غير صحيح .. فسئلته ان يأتى لزيارتنا مع خطيبته المزعومه .. فأنا لما ارها ولكن خبرونى عنها
فأجاب انه لن يستيطع ان يأتى بها وطلب منى الدعاء لهم .. بصفاء نيه دعوت لهم بالتوفيق فهى لم تختطفه منى ابدا فلم أكن أحبه .. ولكنى حلمت كثيرا ان ارتبط بشخص مثله وما كان يشجعنى على هذا الحلم حبه لى الذى كان يعلم به كل اهلنا ..
ولكن للاسف كلهم كانوا يرون حبه الا انا فقد رأيته متأخرا جدا .. وكنت اظن اننى مثل اى فرد يتعامل معه فهو بطبيعته حنون ودائما تطغو ضحكته على كلماته وحينها لا تفرق بين الواقع والخيال
أنه شخصيه ملتزمه جدا والحديث معه له مذاق خاص , حين يحاول ان يقنعك بسلاسه وبرغم عنادك تتفق معه وكأن كل ما يقوله صحيح
كان يتصل ليطمئن علينا , هذا ما قاله ولكنه عادة يتصل على الهاتف الأرضى , او على هاتف اخر , لماذا اختار هاتفى انا هذه المره
لماذا لم يطلب ان يتحدث مع أخوتى مثلما اعتاد , بل اكتفى بحديثه معى واغلق بعد السلام
اسندت ظهرى للحائط وكأنى اطلب مساندته فى محاوله لصمودى , ويعلو شفتاى ابتسامه وكأنها ابتسامة الأنتصار .. ثم اخفيتها وقررت ان امحوها , فتلك تعد خيانه وهذا ليس طبعى , فأنا لا أخون شخص اعرفه او لا اعرفه حتى فى خيالى .
وظللت اخبر نفسى انى اخطأت الفهم وان اتصاله الأن ليس له غرض الا الاطمئنان علينا بصفته من الأقارب , فهو ابن عمى ومن الطبيعى ان نتبادل الاتصالات .
ولكن عقلى لم يتركنى وظل يعيد كل موقف لنا سويا منذ الطفوله , فى محاولة لتشكيكى فى غرضه .. وتذكرت حين جلسنا وسط الحدائق ولم نكن سوا اطفال وذهب الجميع وظل هو بجابنى يتجازب معى أطراف الحديث فى محاوله لكسر صمتى وأضحاكى بعد ان عنفنى أخى
وحين لعبنا فى صبانا لعبة الاختباء وكان يعلم اين انا ويتظاهر انه لم يرانى
كان دائما يتدخل ويساندنى مهما كلفه الأمر , وحين اغضبه لا يأتى لبيتنا الا ان صالحته من جديد .. كنت فى البدايه آراه الأخ المتواجد بجانبى الذى لطالما حلمت به .
فأخى دائما مشغول , واخر شيء يعرفه هو المشاعر بين الأخوان
لم أنكر انى احببت فيه الأخ والصديق الذى ابوح له بأسرارى فيرشدنى
واتذكر الأن يوم فرح أخته , والافراح عندنا نحن المصريين تاخد طابع خاص من اقامة اكثر من ليله يتجمع فيها معظم الأهل لأعداد المراسم النهائيه لليلة الزفاف , وكان يومها ليلة الحنه . وقد اعددنا للعروسين كرسيين للجلوس وسط بهرجة الأنوار . ولكن العريس لم يأتى وقررت العروس عدم الجلوس فوق كرسيها وصعد أبن عمى ليجلس مكان العريس وكنت اقف بعيدا وظل يدعونى للجلوس بجانبه , حتى لاحظ كل الموجودين , واصبح كل شخص بكلمه يتحدث عن قصة حبه , فتعللت بتعب مفاجىء ودخلت للمنزل .
ويوم الزفاف حين جلس بجانبى فى كل صوره تم التقاطها , وحين صعدنا للعربات وانا احاول ان انادى على أخى وهو الذى نبهه لأنه كان يتابعنى بنظراته .. كنت اعتقد انا ان كل هذا هو ما يحدث بين الأخوان فكنت افسر كل تصرف منه انه شيء طبيعى .. ولكن عندما أيقنت من حبه لا اعرف ماذا حدث لى لم اعد اتعامل معه كالسابق , لم اعد اقص عليه اسرارى او اتواجد بمكان واحد معه كى لا يتحدث عنا الناس , وقد شعر هو بتغيرى المفاجىء معه , كنت اعلم انه يريد ان يحدثنى ليفهم ولكنى دائما اهرب منه بكل الطرق ... حتى استسلمنا للصمت نحن الأثنان
وبرغم صمتى كنت انتظر ان يتقدم لطلبى حين علم انى شعرت بحبه
ولكنه كان ينتظر ان ابادله المشاعر , حاولت جاهده ان احس قلبى على التفكير به كحبيب وزوج ولكنى لم استطع ان ارسم بخيالى حياة نعيشها سويا , وايقنت انى لا استطيع مجاراته فى الخيال فكيف يكون الواقع
وابتعدت عنه بكل قوتى فى حين انتظاره لقربى , لا اعرف لما صدمت حين سمعت خبر خطبته فانا لم اعد اراه او اذهب لبيت عمى , وقد سمعت الخبر من بعض الاقارب , لقد اختار أنسانه لا تليق به , كم حزنت على هذا الأختيار , ليس لأنى احبه ولكن لأنه يستحق من هى احسن من تلك الخطيبه
أدعوا الله الأن من كل قلبى ان تكون خير زوجه له وان يصلح لهما الله الحال
ويكفينى انا ذكرياتى مع الأخ الحبيب وحلمى الذى لن يتحقق
ولكن يظل بقلبى سؤال يحيرنى ... هل عــــــاد ؟!! ولـــمــــــــاذا ؟!!

2008/09/17

سارة البحر وzozo ونور الدين


يا ترى الدور علي مين عليا ولا عليك ولا على ناس تانيين
هو حصل ايه للمدونين ليه بيستسلموا بسهوله وميبقوش صلبين
لو كلنا سبناها مين هيدافع ويقاوم ويطرح البسمه والأمل على وشوش الملايين
خلاص كلكم زعلانين ومحطمين
سارة البحر وzozo و نور الدين
ازاى نسبهم لليأس مستسلمين
دول أعز الحبايب وأغلى المدونين
ازاى يبعدوا ويسيبوا أحبابهم حيرانين
مش قولنا انها بتنا
ومش عملنا منها جنتنا
ازاى تفتوها عطشانه من قلم يرويها ويغتنا
أرجعوا وبلاش هروب
والمصير سبوه لله والمكتوب
هتخسروا ايه
بتخافوا عليه
لو هتتخلوا عن كل حاجه تبقى فايدة اقلامكو ايه
معقول مش حاسين قيمتها
معقول تهدروا افكار حبتها
معقول تتقفل مدونه تبقى عشقتها وفى لحظه نستها
هدتها واهدرت كرامتها
ازاى تتخلى عنها وتفوتها
أرجعولها يا ريت ترجعولها
بالهمه تانى تضيئوا ساحتها
بالكلمه الطيبه
اللي ياما زمان نورتها
______
بعتذر لو كلامى هيذعلهم بس فعلا المدونين محتجينهم
مينفعش نسبهم يقفلوا مدوناتهم لو احنا متفقين ان هنا كلنا اخوات واصحاب واسرة
وكتير منا اتكلم عن اننا لازم نكون كيان واحد
يبقى لازم منتخلاش عنهم نحسسهم بقيمتهم الحقيقيه
هما مش اى حد قفل مدونته ولا اقلام ملهاش قيمه .. لا
ومليون لا
دول ناس رائعه واصحاب أقلام عظيمه
دا غير قلوبهم اللي ملهاش وصف
خلص كلامى لكن باقى في قلبى حديث طويل
وضم صوتك لصوتى وحاليا انا هكتفى بسكوتى

2008/09/12

أحسبوها صح وعيشوا ساكتين



احسبها صح من الوقفات المصريه اللي كلنا بنشوفها في التليفزيون
يا شعبى الحبيب .. احسبها صح واتعلم واوعى تشتكى الغلاء يا معلم
العيب فيكم يا شعبى الحبيب , في ايديكم وعقولكم في ولادك واحوالكم
وانا بريء من ذنبكم في الايام الكريمه ديا والاوقات الصعبه الجايه هقولهالكم
عيشوا فى صمت , لموا الفتافيت مش عايز قمص , تاكل ليه وتشرب ليه صوم يا حبيبى وصوم على طول
صبح وليل مش عايز اقول , هتاخد ثواب عظيم ومهول .. وتموت شهيد وليك الجنه
يلا نغنى ونحفظ عيالنا بدل حلو يا حلو ورمضان كريم .. أحسبوها صح وعيشوا ساكتين

بخرف انا مش كدا بس هو الوضع مش متحمل غير كدا , بيقطعوا كل دقيقه اى شيء شغال علشان يقولوا للشعب المصرى اخيرا التزم بالدين والعيب فيك كل العيب في تصرفاتك المبزره سبب الغلاء والبلاء منك لوحدك
واحنا مظلومين غير مقصرين علاوه وصرفنا بس نقول لمين
صحيح العيب فينا واحنا مبذرين !! حسبنها صح وعيشنها صح يا مصريين
ولا العيب فى مين
نقول أراء محايده منغير تعصب منغير فايده ونتكلم ونناقش ونشوف
هل احنا السبب في الغلاء


نقطة الميه اللي بنسبها سايله من الحنفيه فعلا دا تبذير لكن هل كل المصريين حنفياتهم خربانه , طيب دا فى مناطق الميه بتقطع فيها فى الايام دى فى رمضان وتيجى بس ساعتين ولا تلاته في الليل زى منطقة مكرم عبيد خير مثال اهو وفى مناطق مفيهاش اصلا ميه , وانت جاى تقول حاسبوا على نقطة الميه يا جناب المعلن ... احسبها صح ....
الادويه بنشتريها لما نمرض على حسب روشتة الدكتور ولا بمزاجنا واكتر من احتياجاتنا ونستنى لما معاد صلاحيتها تفوت ونرجع نجيب غيرها .. دا فى ناس بتفضل تستعمل فى الدواء لحد ما يخلص هو فى ناس بالعقل هتجيب دواء وتركنه سنه كامله ولا اكتر منغير ما تمرض , طيب يا ريت .. دا احنا بنمرض اكتر ما بناكل ونشرب .. الحل الأمثل يصرف فوق كل دواء دكتور يخلى المريض ياخد الدواء علي حسب احتياجه بس يا جناب المعلن .. احسبها صح ..
اسئلوا اى صيدلى الناس بتدخل تصرف مش شريط ... لا .... حبه واحده
محناش عايشين في رفاهيه وبنصرف ادويه فوق احتياجتنا بلاش نتطرق لموضوع ان الادويه الرخيصه اللي فئه منا تقدر عليها فعاليتها مفيش .. مظنش انه يقدر يجيب دواء مستورد ويرميه يا جناب المعلن .. احسبها صح ..
" أن المبذرين كانوا اخوان الشياطين " بس انا واحده من الشعب مش مبذره فمتحرقش دمى بقى بأعلاناتك أحنا اصلا مبقناش عارفين نحسبها اصلها ولا حسبة البرمه ملهاش حل لا صح ولا غلط
أن كنت عايز نتحاسب بجد ونحسب صح يبقى خد نصيبك من الحسبه يا جناب المعلن مش ترمى الحمل كله علي الشعب وتقول اقتصدوا وبلاش تبقوا مبزرين .. بتسكت مين بالكلام دا !! الغلابه اللي خربت منهم ومبقالهمش غير ربنا .. ولا بتقلبنا علي بعضنا .. ونلف وندور ونرجع نقول العيب مننا أحنا .. احنا اللي ادينا فرصه لجناب المعلن يتحجج بينا .. كسرنا كراسى المواصلات ورسمنا عليها الأهداءات ومش فى بالنا اننا كدا بنهدم فى مالنا .. رمينا الزباله فى الشوارع وقلنا وماله مهى خربانه خربانه .. لكن مهما كان دى مش افعالنا كلنا .. نيجى لجنابك ..
اديك مثال : الشوارع الجميله اللى حضرتك بترصفها وتسفلتها وتخليها تمام جدا وبعد أقل من أسبوع ترجع تهدها وتحفر قال أيه هنركب خطوط تليفونات ونقول طيب وترجع تصلح الشوارع وترصفها وتسفلت وشهر يمر وتتهد من جديد بتعمل ايه يا سيدى بركب مواسير مياه طيب .. ونعيد الكره ولا مليون مره وتهدر فلوس شعبك الحبيب لأنك مش عارف تحسبها .. طيب ما تيجى نحسبها صح

لو مكنتش حسست شعبك الحبيب انها خربانه خربانه كان خاف علي ماله لا كسر كراسى ولا رمى زباله في الشوارع .. كل أنسان فينا بيحافظ على بيته ولو أديته فرصه مره واحده يحس أن البلد دى بيته أكيد هيحافظ عليه بحياته وهيلتزم ... لو فعلا عايزنا نحسبها صح أحسبها معانا وأفضل ويانا .. وسعتها هنعيشها صح بسعاده جوانا

2008/08/29

ازواج بعد التعديل


كتبت عن الازواج واحب اقول ان في كل شيء في نوعين حلو ووحش , احنا عملنا تريقه مش اكتر علشان المدونين يلاقوا ابتسامه , وزى ما فى ناس شريره كتبت عن الزوجات ادينى بهديلها بوست عن الازواج
_______تعالو نلقى ظلاً أحمر ( ههههههههههههه)______

قبل الجواز يرسم جنه , يحلف لراح اعيش واتهنا
يخطب ويقعد يتشرط , يطلب ويقعد يتمنا
تقع فى شره الغلبانه , قال ايه وهتعيش سلطانه
واهو كلام ياما سمعتوه واخرها ترجع ندمانه
قبل الجواز حبى حياتى بعد الجواز بس مراتى
وقليل ما قال غلطة عمرى , يا رب عجل بوفاتى
خدها وقال السنيوره , رسم وعنين اجمل صوره
بعد الجواز يشوفها شبح ويقول مراتى كعبوره
برغم من انها هى , نفس العيون العسليه
لبساله اجمل جلابيه , جابها وقال لأم العيال
قبل الجواز كان عضلات ايه , فارس رهيب ولا الخيال
بعد الجواز وساب نفسه ربى فى كرش من الأهمال
قبل الجواز يجرى ويرمح ولا الخيول وسط الادغال
تقوله نخرج نتفسح , يقولها كان ياما كان
تقوله يلا نتمرجح , يقول يا ست بلاها جنان
سنه ومرت من عمره كأن مر عليه زماااااااان

.........................
محبتش اكمل عن كدا لناس تزعل بس اهى صوره بسيطه من اللي بيحصل من بعض الازواج بعد الجواز
وتمنياتى ليكم برمضان سعيد يمر عليكم وكل ذنوبنا مغفوره يا رب
وللى مقبل على الجواز أحب اقوله خلى حياتك جنه ومتتأثرش بكلامنا

2008/08/24

أربع كوارث مع الأعتذار



بعتذر جدا لأنى اخرت اجابة التاجات واتراكم عليا اكتر من تاج لدرجة انى شاكه انى نسيت شيء , بس عامة جل من لا يسهو سبحانه وتعالى ملك الملك
انتم اخواتى واصحابى وهتعزرونى اكيد
انا هقولكم مين اهدانى التاجات وهلخبط الاسئله والأجابات
بعتزر طبعا لو مجوبتش على كل شيء لأن في تاجات انا جاوبتهم من فتره قليله بتحمل نفس الاسئله
متوجينى الاعزاء على ما أذكر
( مياده رفعت zozo - أنسان بلا عنوان - Original Heart )
وبالله فليسامحنى من قد غفلت عن ذكر أسمه
التاجات اسئلها كتير هحاول اختصر على قدر أستطاعتى وربنا معاكم ويصبركم

من أنت
اجابة هذا السؤال تتلخص في القادم

البطاقه الشخصيه
الاسم : مها ... ( نور ) أسم من أشهر اسمائى يلقبنى بيه الأصدقاء
السن : 24
تاريخ الميلاد : 20 / 2 / 1984
مكان الأقامه : القاهره تحديدا ( شبرا مصر )
الديانه : مسلمه والحمدلله
الحاله الأجتماعيه : أنسه وخالية البال ( مش معناها أنى ببحث عن عريس )

متى بدأت التدوين ؟ ودخلت العالم دا أزاى ؟
بدأت تدوين من حوالى سنه أو اكتر بمدونه لن اتحدث عنها , كانت تجربه رائعه ولكنى بطلت اكتب لظروف معينه ورجعت تانى من حوالى شهرين ودى تعتبر بدايتى الحقيقيه مع عالم التدوين
ورجعت للتدوين بتشجيع من صديقتى العزيزه مى , لكنى منكرش عليكم مكنش الغرض من المدونه ما فيها حتى الأن , كان المفروض تاخد طابع تانى كتير منكم بيلاحظوه بسهوله بمجرد الدخول , ومش عارفه دا غلطتى ولا غلط اللي شجعتنى وفجاءة سابت ايدى وتركتنى اتخبط يمينا ويسارا .. واختفت تماما عن حياتى
ولها منى جزيل الشكر والمعزه حتى تعود او تصبح ذكرى مصيرها الخلود

وايه كان انطباعك في البدايه ؟
كنت خايفه ومازلت برغم حبى للتدوين وعالم المدونين

ايه أهم حاجة اتعلمتها من عالم التدوين ؟
اتعلمت انى اقدر اتكلم دايما كل اللى عليا انى امسك القلم واحطه على اول السطر

حاسس ان التدوين له تأثير ؟
بالتأكيد بس لو قدرنا نخلى كل الناس تقرى الافكار بتاعتنا , كدا هيكون ليه تأثير اكبر

مين اكتر واحد بتهتم بتعليقه علي بوستك الجديد ؟
والله ناس كتيره وطبعا مش هقدر اكتب كل الأسماء بس ناخد على سبيل المثال
( شهرذاد - حبيبه - rovy - نور الدين - غنيم – zizi - سهر - الملاك )

ايه أكتر حاجة كرهتها ؟
طيب انا هجاوب على اساس ان السؤال بيخص عالم التدوين لأنى بخلاف كدا مش بكره شيء والحمدلله
هغيرها شوية ونسميها مش بتحبه لأن كلمة الكراهيه بتحمل معنى شديد شوية
مش بحب اللي يدخل يعلق وكأنه معلقش ويقولى كتبتى كويس وخلاص
في ناس بتكتب انتى المره دى احسنتى وبكون مصدقاها وناس تانيه لا بحسها مجرد مجاملات , كان احسنلى ميعلقش خالص عن انه يجاملنى بكلمات هو شخصيا مش حاسسها ... دا غير اللى مبيقروش اصلا وبرضوا بيعلقوا


أذكر ثلاثة من مدوناتك المفضلة
هما اكتر من تلاته والله وانا ضايفه كتير منهم هنا علشان ادخل ليهم بسهوله
وعامة نقول مثلا
Zozo.... صاحبة مدونة نبضات قلب
ميادة رفعت .... صاحبة مدونة نداء الى الحياه
نونو .. صاحبة مدونة 8 بنانيت ( ط . ا . ل. ق )
بنت مصريه ... صاحبة مدونة مين فين ليه
رئيسة حزب الأحلام , مدينة الملائكه , blue Nile
........ وكتير

أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟
اطلع فى أعلى مكان في العالم واحدفهم واللي ياخدهم يبقوا من نصيبه بقى
انا لو عايزه اهدى مينفعنيش 3 وردات عايزه جنينه بحالها ههههههههه


لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟
لو حصل وحد أدانى ورقه وقلم هرسم مش هكتب حاجه الرسم ابلغ من الكلام
ممكن لو لازم اكتب ضرورى يعنى اكتب لا اله الا الله وهتوحشونى أو للذكرى

ما هو هدفك فى الحياة؟؟
إذا لم تعلم أين تذهب , فكل الطرق تفي بالغرض
الهدف الرئيسى انى أرضى ربى لكن لو بتسئلوا عن شيء لنفسى فعلا مش عارفه بس اللى بيجى على بالى بحاول انى احققه

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟
مش بصدقها بس لا بحبها جدا وهى اللي بتدينى سبب للتفائل , والسبب لأن ربنا رحمته واسعه وكريم قوى سبحانه وتعالى

أجمل مقوله سمعتها فى حياتك..
كتير أهمهم : ضاقت فلما استحكمت حلقاتها فرجت وكنت احسبها لن تفرج
وان الشيطان بيمنينا بالمفقود لننسى الشكر علي الموجود
وفى مقوله مش عارفه بتاعت مين تعتبر رمز ليا بتقول
قالوا البعيد عن القلب هو البعيد عن العين , والله بهذا المثل ما أمنت انا ساعتين , انا قولت هوفى لحبيبتى حتى ولو كان فين
بعتزر عن التغيير فيها لأن الروح ملك للى خلقها

من هو افضل رئيس عربى برأيك برر بسببين
حاليا مفيش ولا واحد كويس ودا يدينى حق مبررش لأنى اصلا مش لقياه
اما لو سابقاً يبقى الرسول عليه افضل الصلاة والسلام ومن بعده الصحابه

من المغنى اللى بتحبه أوى ؟ و إيه أحلى أغنية بتحبها ؟؟
بحاول مسمعش اغانى خالص بس بحب الأناشيد جدا وبسمع لمختلف من المنشدين

غزه..تمثللك ايه فى حياتك..؟
وطنى التانى بعد مصر , حبه جزء من شخصيتى بتمنى وبدعى من كل قلبى يتحرر فى اقرب وقت

إعطى لانتمائك لوطنك درجه من مائه..
لو علي حبها هاخد 100% اما لو علي قدمت ليها ايه يبقى هاخد صفر كبير قوى
هههههههههههههه

لو تزوجت وانجبنت..بنتين وولدين..هتسميهم ايه..؟
البنات : ملك , أميره , مريم , ساره واسماء كتير بموت فيها
الأولاد : مروان , سيف , محمود , أدهم

عمرك غشيت فى امتحان وانت صغير..؟
طيب ينفع كدا هو اللى ربنا ستره يسيح لنفسه يعنى وبعدين واضح انه سئل وانت صغير انا هفتكر ايه ولا أيه بقى هو انا عقلى دفتر

لو أتعرض عليك رشوة كبيرة و انت فى زنقة مالية هتعمل إيه؟؟
مش هقبلها طبعا ... وهدعى لله يفك الكرب

شئ فعلته وندمت ؟ شئ لم تفعله وبردو ندمت ؟
مش فاكره والله ولكنى مبعرفش أندم انا اتاثر شوية واقول خلاص ربنا عايز كدا بقى او لو شيء وحش بقول اهو حصل وخلاص ويمكن دا بيجى نتيجة التسرع لأنى ممكن افكر في سنه وفي لحظه اغير كل دا واختار شيء تانى وربنا ما يجيب ندم يا رب

قول 3 صفات بـ 3 كلمات بس توصف بيهم شخصيتك؟؟
شوفوا بقى انا مبعرفش اوصف نفسى مش تواضع لا بس هقول ايه عليها منا مش فهماها وكأنى برضوا مش شيفاها فلازم كنت ابص في مرايه ومرايتى اصحابى
وهما حاولوا يجاملوا ويدونى الصفات الاتيه
طيبه : بس لما بتقلبى خلاص عليا وعلى اعدائى وكرسى في الكلوب يا ريس
عاقله وصريحه وحالمه تقولولى ازاي حالمه مع عاقله اقولكم اسئلوا اللي قالت
بنت حلال ومش عارفه مصلحتك
وفى بقى مرحه وجدعه وخجوله وواحده صحبتى قعدت تغنى زي الملايكه وعامة كله كلام مجاملات متصدقهوش ما علينا بقى من السؤال دا

صفه عاوزاها فى شريك حياتك..
متدين وعلى خلق وبشنب بقى مليش دعوه , ابويا قالى زمان الراجل اللي ملهوش شنب مش راجل وعذراً دا كلام ابويا هههههههههههههه ويا سلام لو دقن وشنب يبقى ربنا أكرمنى بيه ( ادعولى الاقيه بقى )

إيه اللى غير دراستك وشايف نفسك فيه قوي ؟
للأسف هما طفوا النور فمبقتش شايف وعامة هى متغيرتش لأنى اصلا محلمتش بشيء

بتحب السفر ؟؟
طبعا

طب دلوقتى حالا ايه المكان اللى نفسك تكون فيه ؟
نفسى اكون في العجمى فى أسكندريه على شط البحر

من اقرب شخص ليك؟
كان والدى رحمة الله عليه

اية معنى السعادة من وجهة نظرك ؟ حاسس انك سعيد ؟
السعاده هى الحب وهو احساس جميل بيغلف قلب الأنسان يخليه راضى بكل شيء
بيجى من رضا الله
طول ما ربنا راضى عنى و قلبى بيدق بالحب بالتأكيد هكون سعيده

امتى حسيت انك ظلمت انسان ولية ؟ محتاج للحظة غفران منة ؟
مش عارفه بس لو ظلمت حد يا رب يسامحنى , لكن اللي لازم يكون الشخص اللي ظلمته متاكد منه أنى مكنش قصدى , لأنى لو زعلت حد , شوية وبسارع اصالحه فلا يمكن اكون قاصده اظلم حد وأسيبه

بتعمل اية لما تكون مضايق بعد ما تصلى ؟
لا يمكن افضل متضايقه بعد ما أصلى ابدا .. امال انا كنت بعمل ايه في الصلاة
لو فيا شيء وصليت وشكيت لله ونزلت دموعى بصدق .. مهما كان فيا هخلص صلاة وقلبى مرتاح

امتى حسيت انك اتظلمت ؟ ولية ؟
احس بالظلم لو اللي ظلمنى منعنى من حقى في الكلام , لأنى لو اتكلمت وسمعلى حتى لو منصفنيش هسامحه , لكن لو منعنى اتكلم هحس بالظلم الرهيب
وأكتر وقت حسيت فيه بالظلم لما يبعد حد بحبه منغير ما يقولى سبب

اية اكتر احساس بيراودك هذة الايام تجاة نفسك والاخرين ؟
احساس خوف بأن كل الناس اللي بحبهم هيضيعوا منى , وانى هتوه منهم
وأحساس بالخوف من ان ربنا ميتقبلش أعمالى وأصبح من الأخسرين

امتى ممكن تتنازل عن حق من حقوقك ؟ والسبب ؟
أتنازل لو اعترف اللي قدامى انه فعلا حقى وانه غلط , ساعتها مطالبش بيه
اتنازل لو أنسان بحبه أو بحترمه والسبب لأن حقى مش هيكون أغلى منه

وهنا تكون خلصت الاسئله ومقدرش أهدى كوكتيل التاجات دا لحد لأنه كارثه في حد ذاته برغم انه قاعده جميله مع النفس وكشف الخبايا
أتمنى مكونش زهقتكم بالكلام عن نفسى , واللى مش هيقدر يقراه عزره معاه , انا هتفهم جدا , لانه طويل قوى قوى

2008/08/14

أطلالة أمل

حالة اكتئاب وحزن مخيمه على المدونين قولت ابدأ انا بأضفاء أطلالة أمل لعل وعسى .. معلش هتلاحظوا حبه ان الكلام ملخبط بس من فرحتى مبكونش قادره اسيطر على القلم .. ومنغير تفكير وتسائل زي ما قلبى بيزعل لوحدوا برضوا بيفرح لوحدوا والحمدلله
سكوت ونسمع القلب الفرحان بيقول إيه

صعب تفتح باب ذكرياتك ومتدخلش الامل , بالذات لو الذكريات جميله وسعيده , يمكن الامل والابتسامه تضفى روح السعاده علي قلبك
غيرت مكان الكمبيوتر بتاعى ومن هنا الاطلاله اجمل , وبدل ما كانت اللوحات معلقه بجانبى أصبحت امامى , واصبح ظهرى متكئاً على كرسى وخلفى مكان استطيع ان استند برأسى إليه , وقبل ذلك كان خلفى فراغ , على الرغم بأن نفس المكان مازال بيتى , الا ان تغير المكان من الخارج الى الداخل جعلنى اشعر بانى في امان ...
للوصول للسعاده اتبع الأتى

1_ جرب تبتسم فى طريقك لحد متعرفهوش هترسم ابتسامه علي وشه هو كمان هيمشى يسئل نفسه هو انت فعلا تعرفه ولا بس انت حد سعيد هتخطفه من تكشيرته لدنيتك السعيده
2_ طيب بص للشجر شيء بيسعدنى عن نفسى ومين مينبهرش بجمال الطبيعه في ارق تكوين سبحان المبدع المصور شيء باللون الاخضر الجميل
3_ طيب اصحى بدرى وغير حياتك وشوف هتحس بشيء جديد فرحه تدخل قلبك لما تستقبل نسيم الصبح وانت مغمض عنيك , طيب بص من شباكك علي الشارع وهو فاضى لسه مغسول بندى الصباح او يا سلام لو عندك شجره بتطرح ورد بيعطر الشارع ويجعل المنظر خلاب لما يتناثر على الارض وكأنك هتخطى اول خطواتك في الجنه طبعا بلا اي وجه للتشبيه جنة ربنا شيء تانى فيها ما لا عين رأت ولا أذن سمعت , بس الارض هى جزء من الجنه اكيد , كل ما اشوف شيء ويعجبنى قوى اقول سبحان الله اقل شيء بيسعد القلب لو قلبك سليم معافى ومقولتش بأنه خالى من الهموم , اصل الهم جند من جنود الله شيء وصابك فأصبر انا قصدت بقلب معافى قلب علي الفطره طيب ورقيق كريم ووفى لو حب يخلص قوى لو زعل ميكرهش ابدا .. قلب من دهب .. مش مهم اذنب قد ايه يقدر يتوب وربنا غفار الذنوب بس يسارع ويتوب لأن اساسه صحيح .. في تلالأ الالماظ مش انعكاس الصفيح

رتوش بسيطه ممكن تغير حياتنا , نفسى اسئل سؤال للجميع كتتير سئلته لنفسى , امتى غيرت شيء في حياتك , وقت النوم والاستيقاظ مواعيد الخروج , هل عدى عليك وقت ملتزمتش بالقوانين , اصلى كان عندى عاده سيئه قوى انى التزم بالقوانين بالظبط وكأنى روبوت , لكنى لاحظت ان معظم اللى حوليا مبيلتزموش بشيء متهمهمش القوانين , فكرت ليه مجربش وبقى كل فعل قبله سؤال , يحصل ايه لو معملتش كدا , طبعا مكنش قصدى من كدا انى اغير حياتى للاسوء , لا طبعا , بس فى حاجات كتيره بنعملها بتكلف في حياتنا وسهل نستغنى عنها ومنفكرش الناس هتقول علينا إيه , طالما الحاجات دى مش غلط ولا هنجرح بيها حد , مجرد افعال واحنا حطينا أطار لنفسنا علشان منخرجش عنها , يبقى لازم احنا اللي نكسر البرواز الدهبى دا ونخرج نشوف هيحصل ايه بره البرواز يمكن ننجرح في الاول بأشلاء الزجاج اللى اتسببنا في انها تتناثر , لكن جرح طفيف هيزول مع الوقت وممكن نعدى بسلامه , ونبقى استفدنا نظره جديده من خارج البرواز لشيء عمرنا ما كنا هنشوفه . صحيح نور الشمس كان بيتخلل الزجاج ونشوفه لكننا مكناش بنحس بجمال لمسته بره البرواز مع النسيم الهادى , دى دعوه منى علشان نكسر البراويز ونخرج بره لنور الشمس عمر ما الدنيا بتفضل عواصف لو قلبك شديد قوى بالايمان الخوف مش هيدق فيه , ربنا سبحانه وتعالى هو اللي مسير الكون , كل شيء بأمره متخافش واكسر البرواز وشوف الدنيا بعيون طفل منبهر بكل شيء فيها , عمره ما كان هيخاف الطفل من صوت عالى الا لو احنا حطينا في عقله من البدايه ان صوت الرعد مخيف , لو قولنا لأطفالنا متخافوش دا صوت ربانى سبحوا لله لقدرته وجلاله هيرتبط عندهم صوت الرعد المخيف بذكر الله ويصبح القلب مع الصوت العالى وفى وسط ما بعض الناس خايفه , انت معاك اقوى قلب عامر بذكر الله

السعاده ملهاش ناس وناس السعاده حق لكل الناس بس اعرف طريقها واكتشف اسرع طريق ليها من قلبك ورضا ربك , صدقنى حاول وهتوصل للسعاده
افتح قلبك للسعاده تعرف طريقها للدخول
افتح قلبك وشوف دا الحب يلغى الخوف

2008/08/06

كلام فى سرك


كنت أسير فى تلك الأيام اتنقل من مكان لمكان

مع حرارة الصيف الشديدة والزحام فى كل مكان

قررت ان استريح واستظل بجانب بيت به حديقه سبحان من ابدع

تطلعت بعينى لأجد شاب متمدد على أرض الحديقه فخشيت ان يكون مغشى عليه فتوجهت نحوه

واقتربت منه وامسكت بيده فقام من مكانه وهو ينظر الى نظرات بدت لى حزينه

وكأنه كان على وشك الأنتحار وانقذته .. فطلبت منه تفسير لما أراه بعينيه

وبدأ يقص على وكأنه كان ينتظر سؤالى وحتى ان كان بدافع الفضول وكأنى صديق يعرفه منذ زمن

وقررت ان اتركه يتحدث ولكنه افصح عما بداخله واحرق قلبى , فلقد أخفى كثيرا حتى بات لا يستطيع الكتمان

فــقــــــــــــــال

كنت بلا هويه حين أتيت والأن ايضا اصبحت بلا هويه

مسافر بلا عنوان في رحلة النسيان

لا تنظر الى هكذا يا سيدى فأنا حطام لما كان

او شبحاً او ظلاً لشيء قد اطلق عليه قديما انسان

اعزرنى لتهكمى بالله احاول ان انتقى عباراتى قدر الأمكان

فلقد أمسى عقلى اقرب للكفر عن الأيمان

لم أشكو يوما ظروفى برغم ذلى والحرمان

نعم قد كنت اقص عليهم مختلف الروايات الا روايتى لأشتت الأذهان

كيف اصرح عما يجتاحنى وكيف اطلب منهم الحنان

بحثت في كل مكان يا سيدى حتى ادميت قلبى وضللت طريقى واضعت العنوان

كل الأبواب غلقت بوجهى حتى ابواى تناسو انى جزء منهم وبمشيئة ربى اصبحت كيان

فلما لم يطبقوا على انفاسى منذ ولادتى ليعيدونى الى الجنان

مع اول صرخة دوت لى يا سيدى في تلك الحياة كانت صرخة استغاثه الى الرحمن

وها انا يا سيدى ضائع شريد وايضا وحيد برغم كل من حولى فما العمل الأن
_________________________________________
( ليس اليتيم من مات والداه ولكن اليتيم حقاً من انشغل عنه امه واباه )
لم تأتوا بهم لتلك الحياة يا ساده ليعذبوا بوجودكم بجوارهم ولا تشعرون بهم وكأنهم غير موجودين
لقد انعم الله عليكم بطفل فأحسنا إليه حتى اذا قابلتم وجه الكريم تجدان ما تقولاه
وتجدوا من يدعوا لكم بالرحمه ويشتاق إليكم حتى تلقياه
وانتم الأن احياء يا ساده فحاولوا ان تستغلوا تلك الفرصه التى لن تعوض وعوضاه
عن انشغالكم عنه وتقصيركم في حقه استغلوا الفرصه قبل ان يضيع الوقت يا ساده
فالمال يزول والصحه تزول والجاه يزول
ولن يبقى لكم غير ابناء قد احسنتم تربيتهم
ولتذكروا جيدا الجمله التى نحفرها بعقول صغارنا" ازرع تحصد "
فأحسنوا الاهتمام بما تزرعون حتى لا تصدموا وقت الحصاد مما ستجدون


2008/07/28

دفوار ووصلنى " شفتونى وانا بتكلم لغات "


واجب ووصلنى واتأخرت شوية في عمله لكن ادينى بقدمه اهو فسامحونى
من اجمل زهرتين فى بستان المدونين ( شهرذاد و rara ) حبايب قلبى
الواجب :عبارة عن سؤالين ..
السؤال الاول ؟ أذكر 16 صفة من نفسك !!
والسؤال الثانى ؟ مرر الواجب لمن أحب !!
نقول بسم الله الرحمن الرحيم
واتعدل على الكرسى بتاعى واقولكم بقى على الصفات واستحملوا بقى انتم اللي عايزين تعرفوا
( 1 ) عصبيه جدا لكن لو الشيء او الشخص اللى معصبنى بعد عنى بروق بسرعه جدا
وان مبعدش بسيب انا المكان علشان مبحبش الصفه دى فى شصيتى
وبزعل جدا لما اتعصب على حد وارجع احاول اصالحه
( 2 ) بيقولوا طيبه باين بس انا شكلى شريره علشان تكونوا عارفين
واللى بيشفونى لأول مره بيفكرونى متكبره لكن بينصدمو بالهيافه فيما بعد
( 3 ) بحب الناس جدا واحب اساعد اى حد لو اقدر , بس بزعل قوى لما الاقى حد عايز يستغلنى
ويبقى جنى على نفسه ساعتها ( مش بقولكم شريره )
( 4 ) من طبعى الهدوء والسكوت وكتير من الناس بتضايق منى بسبب كدا , لكن لو مفيش كلام اقوله هخترع يعنى
( 5 ) بهزر كتير وبعمل قفشات بس ساعات بتجلى منى واقع في مطب وحش بسبب التهريج الزياده ,
ولو اقولكم بتصف بالوقار بعد اللى قولته دا مش هتصدقوا ههههههههه
( 6 ) لو حد بيحكى قصه قدامى لازم يكملها والا اقعد ازن عليه لما ازهقه , بموت في الحكاوى
اقصد القصص طبعا ( مش اجيب في سيرة الناس )
( 7 ) بحب النظام وبحترم دورى في اي مكان وعندى صبر والحمدلله استنى ليومين
بس اكون شايفه ان في الاخر هيكون في فايده للشيء اللي بستناه والا ازهق بسرعه وامشى من المكان
( 8 ) بحب ربنا قوى قوى واتمنى يكون راضى عنى ودلوقتى بقيت في كل حركه أو كلمه افكر هل ترضى ربنا
( 9 ) بحب استكشف اى شيء جديد ولكن لما اعرف كل شيء عنه خلاص بيكون زى اي شيء عادى تانى
(10) بزهق بسرعه لو بكلم حد ويفضل يطلب منى اعيد عليه الكلام مره تانيه , واعرف انه مكنش مركز
معايا وساعتها ابقى مش طايقه اكلمه اصلا
(11) مبحبش حد يغير مكان حاجات بتاعتى او يحرك شيء من مكانه علشان بنسى كتير وساعتها افضل ادور لما اغلب
(12) مبحبش حد يعمل ذكى عليا , لأنى شكاكه شوية فأقل غلطه بتكشفه
(13) مبحبش الكدب ومبسامحش بسهوله حد يكدب عليا الا انى بينى وبينكم منغير ما نسيح يعنى بضطر اسفه اكدب احيانا
(شريره بقى )
(14) مش اجتماعيه الى حد كبير ومبحبش الاماكن اللي بيكون فيها صخب وناس كتير وبتوتر كل ما اضطر
احضر فرح ( شكلى مش هحضر فرحى ), لكن اليوم بيعدى عليا عادى بمجرد ما بروح واكون فى وسط الناس
ببدا اتحرك ويزول التوتر وارجع مبسوطه جدا , وبرغم انى مبحبش اكون موجوده في اماكن زي كدا الا
انى بحب الم اصحابى ونخرج يمكن لأن اصحابى عرفاهم كلهم مش عارفه بقى , شكلها حالة جنون يمكن عالجونى بقى
(15) خجوله شوية ومبحبش ابص في عنين حد مباشرة , وممكن يكون حد بيكلمنى وانا عامله مش معاه لكنى بكون منتبهه جدا ليه
(16) بخاف من الملاهى ومبحبش اركب اى لعبه ولو بسيطه بتوقع قلبى , شكلى قلبى ضعيف ( مقدرش اقول جبانه عيب )
لكن لو شوفت حد تانى خايف بحاول اخليه ميخافش برغم انى بكون ميته من الرعب اصلا بس بتظاهر قدامه بالصمود
وجينا للسؤال التانى : امرر الواجب لمين
طيب ممكن ادبس مين يا ربى في الدفوار دا مين مين آآآآآآه
الطالبه عفو الله
yoyo
انى احبكم فى الله
miada ref3at
بطوط حبوب
ولهنا نكون وصلنا لنهاية الدفوار انا حاسه ان دمى تقيل فيها بس هعمل ايه بقى مهو محدش يقعد يقول 16 صفه عن نفسه
ويكون دمه خفيف وبيهزر دا بيسيح لنفسه في كامل قواه العقليه بس علشان انتم غاليين عليا فمش خساره فيكم تعرفوا الفضايح ديا
مع أرق تحياتى وربنا يديكم الصبر وانتم بتقروأ اصلا هههههههههه

2008/07/24

اعتبره عوو وراح اعتبره قصر اشباح وانهد ع.اللى فيه


أوقات بنحب ونخلص قوى ونعيش فى قصة حب جميله , اوقات تكمل ونفرح وأوقات تسبب لينا احزان طويله

في وقت من الاوقات كنت بحب اسمع اغنية صابر رباعى بتاعت ضاقت بيك , وكان بيعجبنى الجزء اللى بيقول

قالوا ان اللي يحب بجد لو فاض بيه ملى يحبه ميحبش بس ميكرهش وانا فاض بيا تعبت بجد قد ما بتعب لكرهتك

ولا عارف حتى محبكش

ضاقت بيك تبقى عايزنى اكون حواليك ضحكت ليك اخلاصى يكون حمل عليك فى الحالتين ساكت لا بنساك ولا عايز انساك

بس في حكايتى هخلى الحبيب ينسى ويعتبرها قصه وانتهت وعوضه على الله بقى ههههههههههههه

وتعالو نقرأ سوا كتبت إيه وبعدين افجعونى برأيكم وكل واحد يقول اللى يجى على باله ( نرحب بالرأى والرأى الاخر )

وبعتزر لأن في ناس بعتالى تاج وواجب وانا بأذن الله هجاوب واكتب الاتنين لكن شوية بس

__________

علي ايدي كان في طير بديع وقلبه اخضر
علمته ازاى يطير كان جمبى يتمخطر
وكان بيخاف يغيب أنساه او اتغير
حاول يعلي ويعلي رفرف فرد جناحيه
خد السما في احضانه بعد ما قالى ليه
قولت اكيد هيعود دا بس بيجرب
فضل يغيب ويغيب بقي منى يتهرب
عليت صوتى وناديت من بعده ما سمعنى
وتفوت ايام كتتير وقولت قاطعنى
صحيح بكيت عليه وحزنت لفراقه
قولت اكيد دا نصيب لحباب بيتلاقوا
فضلت استنى يوم يعود يطمنى
فاتت سنين وسنين والحلم تاه منى
فجأه رجع مغلوب بجراحه متأثر
رمي نفسه بين احضانى وجناحه متكسر
صعب عليا حاله واخدته داويته
معرفش في ايه وماله وفي حضني ضميته
صحيح حنيت عليه وداويت بأيدى جراحه
لكن ولا يوم يعود تانى زي اللى راحوا
استنيتك كتير يا طير يا متغرب
متقولش انك راجعلى ولقلبى تتقرب
وادينى داويت جراحك عود تانى وطير بعيد

رفرف افرد جناحك خليك عايش وحيد
وهنا تكون انتهت قصتى الصغيره يارب تكون عجبتكم
والسلام اجمل ختام

2008/06/30

" أعلان هام "أو " الى من يهمه الأمر

الى اصدقائى وجميع المدوونين كلاً بأسمه
ستبدأ فترة غيابى الفعلى من اليوم واعتزر عن أنى مردتش على التعليقات في البوست الاخير
بس أوعدكم بأذن الله بأنى لما ارجع ارد عليهم واود ان اوجه اعتزارين
واحد ل zozo لأنى رديت عليها بعصبيه مبالغ فيها بسبب زعلى
والتانى لصديقه ليا ردت علي البوست الاخير بغير معروف
وعامة انا البوست دا او الكنفرنس دا كان قديم شوية بس لما نزلت موضوع احلام في مهب الرياح
محبتش اسيب المدونه لفتره وانا تاركه انطباع الحزن على المدونين والاصدقاء وحتى الغرباء او الزوار
وبالنسبه للجزء اللى زعلها وانا عرفاه منغير ذكره يا ريت لو انتظرتنى وانا افهمها
ومش هبرر لأنى مش هكدب فى شيء والحمدلله
رسالة لأى حد مزعل صديق حاول تصالحه الأصدقاء غاليين قوى ولا يمكن تعويضهم
ورسالة لصديقتى : أنا مش وحشه قوى وبرضوا مش ملاك "
وتكملة رسالة صديقتى أن كنتى تحبى تتكلمى في حاجات شخصيه فأعرضى الصوره كامله
مش معنى أنى اكون مكسوره واضحك يبقى انا مكنتش مجروحه او نسيت بسرعة الصاروخ
بس لازم نسيب بسمه على وشوش اللى حوالينا حتى لو مش قادرين نبتسم من القلب الناس ملهاش ذنب وكذلك الأصدقاء
لو وقفوا جنبنا فعلا , لازم منحسسهمش باليأس بأننا نفضل متضايقين , ممكن التظاهر يقلب في النهايه بصدق فعلا
وبوجود الأصدقاء جمبنا ننسى أى هم وأى حزن .
تقبلوا تحياتى واحترامى لجميع الأصدقاء والمدونين وهتوحشونى طبعا ويا ريت اكون قدرت اسبلكم بسمه بعد الأحلام اللي كسرتها
نور شاهين

2008/06/29

كرسى الأعتراف في حوار صريح جدا جدا


بعد استأزانهم قررنا نذيع ... قعدة تهييس غير معتاده
قررت انا واصحابى نلعب لعبة جميله كلنا بنعرفها واحنا بنلعبها من وقت لأخر كل ما بيكون في نفوسنا شيء من بعض , مبنقصدش شر طبعا لا , بس مجرد رتوش بنخاف تسيب جرح في القلب وبنعترف بيها ما بين ضحكتنا وعتابنا لبعض بتدوب الرتوش اللى ذادت على الصوره الجميله وترجع الصوره لأبهى ما تكون لامعه مضيئه براقه بها من كل تعبيرات الجمال كل الحروف وكل المعانى
بدأت اعدل قواعد اللعبه وقولت هيكون لكل منا سؤالين , كنا تلات افراد( بوبا وشهرتها في وسط الحديث عبده المعقد, يويو وشهرتها حريقه.. اصلها عسوله بس المره دى كانت بتهدى النفوس بزياده ) , بحيث لو جه الدور على حد مش هو اللي يتسئل لا هو اللي يسئل الطرفين التانيين سؤالين وهكذا
وبدأت انا وفي وسط سيل من الضحك والتهريج جه الاحوار الاتى

نور : قوليلي بقي يا يويو دعينى اقتبس السؤال المعتاد
طبعا اكيد عرفاه بس مجوبتيش عليه قبل كدا وهو

يويو : متقوليش انتى حبيتى قبل كده ؟

سؤالى هو : ايه بيضايقك فيا او منى
( بصراحه كنت بسعى من اللعبه للوصول لحد بوبا وابطلها تعمل برب وتبقى قاعده قدام الكمبيوتر ومتعبرش )

يويو : انتى بترديلى اسئلة امبارح؟
نور : جاوبى يا قلبي

يويو : ممممممممممممم
بسم الله الرحمن الرحيم

بوبا : هههههههههههههههههه
( قضتها ضحك بس استنوا لما الاسئله توصل عندها .. هتشوفوا اللى بتضحك دى هتعمل ايه )

نور : يلا يا يويو هتقرى القرأن كله

يويو : بأختصار
أما بعد

بوبا : هههههههههههههههههههههههه

يويو : اللى بيضايقنى من الاخت نور
انها دايما ............
وساعات ببتبقى ............
واخيرا

نور : يا مصبرنى يا رب

يويو : ههههههههههههههه

نور : يعنى انا حياتى كلها نقط
كدا ينفع

بوبا : هههههههههههههههه

نور : طيب ركبيلى جلده
علشان ابطل انقط

يويو : يا حبيبتى
هو الأنسان ايه غير شوية نقط فوق الحروف

نور : اه يا انااااااااااااااااا
هتتكلمى جد ولا اسبكم وامشى

بوبا : هههههههههههههههههه

يويو : ههههههههههههههههه
لالا خلاص , اوكى
مقدرش على بعدك ثوانى

بوبا : يويو اتكلمى بجد عيب بقى
( اخيرا بطلت ضحك ونطقت كلمتين )

يويو : طيب اقول ايه

نور : انا مالى
يويو : انا مفيش حاجة فيكى مبتضايقنى

نور : شوفى بتتضايقى من ايه وقوليه
( يا رتنى ما بدات هتيجى علي راسى حالا )

يويو : غير انك بتتكسفى منى لما بتكلمينى فى التليفون
ولما قابلتك

نور : لا انا قولت قولى مش تحدفى طوب
هههههههههههههههه

يويو : بحس انك بتكلمينى غصب عنك ومستنية المكالمة تخلص بفارغ الصبر
مش عارفه

بوبا : هههههههههههههههه

يويو : علما انى اقصد تليفون البيت
الموبيل بتكلمينى فيه عادى

نور : لا عيب يا قلبي ازاي تقولى كدا
طيب وهل هناك فرق
الاتنين تليفونات
اكيد احساس مشوش دا اللي بتحسيه

بوبا : يمكن عشان الموبيل ملكية خاصة
و تليفون البيت ملكية عامة

يويو : انا قلت اللى بحسه وخلاص

نور : والتليفون بتاع البيت في ميدان عام يعني ولا ايه
ههههههههههههههههه

يويو : ويا بوبا مكانتش بتبص فى وشى يوم ما اتقابلنا
حسستنى ان فيه حاجة غلط؟

نور : خلاص بقى
( أصله موضوع قديم وكنا اتكلمنا فيه وربنا ستار حليم بقى هههههههه )

بوبا : مفكراكى عريس يمكن

نور : اتريقى يا ام سحلول انتي راخره بقى

يويو : دا لو عريس هتبص فى وشه

بوبا : ههههههههههههههههههههه
( شغلتها في الحياه بتضحك , زي اسماعيل يس شغلته علي المدفع برروم )

بوبا : لا هتقف جنبو وتفيس الطول
هههههههههههههههههه

يويو : هههههههههههههههه

نور: ماشى ماشى
أهو دا اخرة اللى يحكى لصحابه

وبدأو الاتنين يضحكوا بهستيريا لمدة دقايق بلا انقطاع , وبصراحه انا اتنرفزت قوى بقى

نور : يا سلام عجبتكم قوى
بتتسلوا عليا يعنى , أوكى

يويو : هفطس من الضحك مش قادره
أصلى متخيله الموقف
لو سمحت قوم اقف

بوبا : هههههههههههههههه

نور: لو سمحتى هو كان خارج أصلا

يويو : لا متنفعش
بطنى وجعتنى خلاص

بوبا : مسخره وربنا

نور : انكد بقى شوية
خلاص اسئل بوبا بقى بقى

بوبا : اسئلى يا اختى

نور : مش بتفكري في اصحابك ليه لما بتعملي برب مش يمكن يزلعوا منك ومن كتر زعلهم تخسريهم وانتى مش حاسه

بوبا : يابنتى لما بعمل برب اكيد مش بكون موجودة او مشغولة وبعدين سعات بكون مش قادرة اتكلم مع كل الجمهور الاون لاين فابتكلم مع حد او حدين والباقي يبقي المرة الجاية بقي يعنى اقطع نفسي

يويو : ايوه ايوه
وعامة بيبقوا المزز

نور : عذر اقبح من ذنب

بوبا : وبعدين السنة دة انا كونت بقعد اشتغل علي الثري دى مكس والاتو كاد وبفتح اميلي فمابشوفش الناس الي موجودة اية

يويو : البت مشهورة يا عينى
والناس هتموت وتكلمها مثلا
امشى امشى

بوبا : طبعا يا بنتى
دا الطبيعى بتاعى
وبعدين مفيش مزز
المزز عندك كلهم اكوام اكوام
خلينى ساكته

يويو : مكنتيش لقتينى معاكى
ههههههههههههههه

بوبا : ما انتى طفشتيهم

يويو : كان زمانى متجوزه ومعايا 2 نونو
طب الحمدلله
يعنى مفيش

نور : اوكى كملوا كملوا

بوبا : يويو انتى اخرك تجيبى اتنين كيمو كونو

يويو : والله احسن من اتنين لوليتا

نور: انا كدا هسقع منكم
يلا يا يويو معاكى سؤالين بقى

يويو : نور
انتى ايه اللى مبعجبكيش فى بوبا

نور : ايه التوريطه دى هههههههههه
حد يسئل كدا في الدنيا

بوبا : جاوبى يا اختى

نور : مهو مفيناش من زعل

بوبا : عكى عكى

نور : دا حوار صريح جدا جدا

يويو : عك عك ربك يفك

بوبا : صرحى صرحى
اخرتها اية هجيلك بيتك اتغدى معاكم وتمام التمام واشدك من شعرك وامشي

وبدأت اقول تانى موضوع برب ( brb ) في الياهو والهوتميل
وبدأت تتعصب وتزعل قوى .. اقرب تشبيه ليها زي الطفل الصغير لما يقف يخبط برجله في الارض ويقول لا

وبرغم ان الكلام دا انا قلتلها قبل كدا ولا مليون مره يعنى بقت حفظاه عن ظهر قلب الا انه زعلها
حتى انى سئلتها قالتلى برغم انى عرفاه زعلت ليه مش عارفه ( ان كانت هى مش عارفه هعرف انا ههههههه )
ومن زعلها بدأت اوضح ليها ان السؤال كان ايه اللي بيزعلنى منها وبس ودا مش معناه انى مش بحبها
ويويو تقولها انها لعبه وكلامنا صريح اه بس هزار يعنى متستاهلش تزعل قوى كدا
وبدأت تقول قد ايه بتحبنا وبتتكلم علينا ازاى في غيابنا ( بصراحه قلبها مفيش منه وفعلا بتحبنا بس عليها حركات اطفال تغيظ )
وبعد ما خلصت عتاب لينا قامت مسيحه انى بمعرفش اطبخ , وردت عليها يويو بكل فخر كلنا عارفين ان نور فاشله في الطبيخ , وانا فاشله في الطبيخ , وبوبا اعترضت انا مش فاشله ( شكلها نسيت الكنافه امو موز , اللي طعمها كان يععععع , بس يلا ربنا حليم ستار )
وجه الدور علي بوبا تقول ايه مضايقها منى

وسئلتها يويو وكالعاده جريت
وتفوت دقايق وبوبا مردتش , وعمالين ننادى فينك.. روحتى فين ..بتكتبى ايه , وقامت حدفالى الكلام كله مره واحده

بوبا : الي مدايقنى في نور انها بتفهمنى غلط معرفش لية مع انها سعات بتبقي فهمانى اكتر من نفسي ونفسي العبيطة دى تعرف انى بحبها موت بس طز فيها طبعا يااامى بس بجد نور كلها علي بعضها شخص مميز بالنسبالي جداا وحد بحب اخد رأية وبثق في كلامة بغض النظر انى كتير مكونتش بسمع كلامها هبل بعيد عنك بس برجع اندم بقي بس مش شايفة ان فيها عيوب بتضايقنى بس الي بيزعلنى سعات لما بتكون مضايقة ومقوقعا مع نفسها بخاف لتجن ولا حاجة ووقتها مبتسمعش كلامى ولا حتى بتففضفض ليا بسهولة عايزة ضرب الدزمة راسها صعيدى

وحاولت اعترض على الكلام لكن يويو قيدتها للأسف , وبدأت تعمل شغل عبدو حريقه وتقولها وبكده احنا منحكلهاش اللي مضايقنا احنا كمان

نور : مين قال انى مبفضفضش هنكدب بقى
بوبا : ايون انتى مش بيفبفضف
وللو فضفض
بيكون بطلوع الروح
بعد تحايل شهر ولا حاجة
واياك تنطقي بقي
( طبعا ملاحظين ان حتى نطقها للكلام زي الاطفال مكدبتش انا اهو هههههههه )

نور : قولت بضحك ... ايون لازم تعزمى بقلب

يويو : ايون مش بتفضفض
انسانه كتومه

نور : بس مش تسخنيها يا حريقه

بوبا : هسئل انا بقى نور
ايه اللي بيضايقك في يويو

نور : الحساسيه الزياده والرقه الشديده اللي هتخليها تنكسر قدام كتتير من المشاكل
بوبا : اه هى روهيفة كدة , تحسيها غوريبة وبتيفور

نور : وكنت بقولها مبتسامحيش بسرعه علي ما اعتقد لكنى مش متأكده من دى
بس اللي اكتشتفه امبارح بقى انها مش متفائله

بوبا : يا نهار ودا علاجه ايه
اقراص ولا شرب

نور: تاخد حبتين احلام من بتوعى ههههههه
( وفي وسط كلامنا وضحكى انا وبوبا كانت يويو اختفت خالص مالص , وقلنا كالعاده مصدومه من الكلام , اصل دى عادتها تسكت خالص لفتره لو قولنا شيء وصدمها ) ثم ظهرت وقالت

يويو : نو كومنت ( لا تعليق , مهى قعدة تهييس بقى عك )
وفجاءه ضحكت وقالت لبوبا يا بنتى
ده عندها بلكونه وانا شباكى فاتح علي المنور
( بوبا استغربت وبدأت تدينا في كلام عن فنون العماره والهندسه , انا فاهمه يويو بتقول ايه لأنه تشبيه قولناه امبارح عن التفائل والاحلام , بما انى احلامى كتتير وكنت متفائله قوى فقالتلى انتى على البلكونه وانا شباكى علي المنور )
وللأسف بالعافيه على ما سكتنا بوبا وبطلت كلام في الهندسه المعماريه , وقالت انا غلطانه انى عايزه افهمكم بس انتم اللي فتحتوا السيره . خليكم جهله .
نور : الجهل نعمه يا بنتى وكل واحد حلو في مجاله

وبدات بوبا تسئل اخر سؤال ليويو
ايه اللي بيضايقها منها وقالت نفس كلام نور بس مش بنفس الدرجه
وبدات تحدف طوب بقى
يويو : على الاقل البنوته ( بوبا ) لما بتتضايق بتيجي تحكيلى وتشكيلى مش زى واحده صحبتنا ( الكلام ليكى يا جاره وانا منفضه ههههههههه )
نور : طبعا الاختلاف في الأراء لا يفسد للود مشروعيه او قضية
وبصراحه بوبا فرحت فيا قوى وقعدت تضحك
وبما انهم كانوا مطبقين ومش نايمين بدأنا ننسى حروف واحنا بنكتب والكلام بقى غريب الشكل ( انا شخصيا كنت قاعده في الضلمه ومش شايفه الكيبورد )
وقعدوا الاتنين يغنوا اصلهم كانوا بيكلموا مزز ( شباب ) قبل ما ادخل وبما انى مهيسه ( لسه صاحيه من النوم ) فمكنتش مركزه بيقولوا ايه , وكل ما بوبا تحاول تقولى يويو تسكتها , وفجاءه قومت وسبتهم ودنى تعبتنى ( مش من رغيهم ههههههه دى لظروف صحيه عاديه جدا )
ولما روحت ورجعت قعدت يويو تقولى اعمل ايه في ودنى ( دكتوره شطوره ) والحجه بوبا تفتى ( اسئل مجرب ولا تسئلش طبيب )
وبعدين قولتلهم الحلقه دى اتسجلت لو تحبوا تتذاع قولولى ذيعى , في الاول بوبا اعترضت لكنها عرفانى كنت هعرضها برضوا ههههههههه , فقبلت برضاها احسن برضوا ولكنها طلبت حذف بعض المقاطع وقد قمت بحذف بعض الاجزاء ( اصلها كانت هتبقى فضايح قوى ) ودى فايدة كرسى الاعتراف يدوب الخلافات ونفضل حبايب واصحاب
وسلمنا على بعض وروحنا ننام كلنا وتصبحوا على خير جميعا


" كلامنا كله حتى لو كان صريح وصحيح فهو من القلب للحب مش للتجريح "