واجب ووصلنى واتأخرت شوية في عمله لكن ادينى بقدمه اهو فسامحونى
من اجمل زهرتين فى بستان المدونين ( شهرذاد و rara ) حبايب قلبى
الواجب :عبارة عن سؤالين ..
السؤال الاول ؟ أذكر 16 صفة من نفسك !!
والسؤال الثانى ؟ مرر الواجب لمن أحب !!
نقول بسم الله الرحمن الرحيم
واتعدل على الكرسى بتاعى واقولكم بقى على الصفات واستحملوا بقى انتم اللي عايزين تعرفوا
( 1 ) عصبيه جدا لكن لو الشيء او الشخص اللى معصبنى بعد عنى بروق بسرعه جدا
وان مبعدش بسيب انا المكان علشان مبحبش الصفه دى فى شصيتى
وبزعل جدا لما اتعصب على حد وارجع احاول اصالحه
( 2 ) بيقولوا طيبه باين بس انا شكلى شريره علشان تكونوا عارفين
واللى بيشفونى لأول مره بيفكرونى متكبره لكن بينصدمو بالهيافه فيما بعد
( 3 ) بحب الناس جدا واحب اساعد اى حد لو اقدر , بس بزعل قوى لما الاقى حد عايز يستغلنى
ويبقى جنى على نفسه ساعتها ( مش بقولكم شريره )
( 4 ) من طبعى الهدوء والسكوت وكتير من الناس بتضايق منى بسبب كدا , لكن لو مفيش كلام اقوله هخترع يعنى
( 5 ) بهزر كتير وبعمل قفشات بس ساعات بتجلى منى واقع في مطب وحش بسبب التهريج الزياده ,
ولو اقولكم بتصف بالوقار بعد اللى قولته دا مش هتصدقوا ههههههههه
( 6 ) لو حد بيحكى قصه قدامى لازم يكملها والا اقعد ازن عليه لما ازهقه , بموت في الحكاوى
اقصد القصص طبعا ( مش اجيب في سيرة الناس )
( 7 ) بحب النظام وبحترم دورى في اي مكان وعندى صبر والحمدلله استنى ليومين
بس اكون شايفه ان في الاخر هيكون في فايده للشيء اللي بستناه والا ازهق بسرعه وامشى من المكان
( 8 ) بحب ربنا قوى قوى واتمنى يكون راضى عنى ودلوقتى بقيت في كل حركه أو كلمه افكر هل ترضى ربنا
( 9 ) بحب استكشف اى شيء جديد ولكن لما اعرف كل شيء عنه خلاص بيكون زى اي شيء عادى تانى
(10) بزهق بسرعه لو بكلم حد ويفضل يطلب منى اعيد عليه الكلام مره تانيه , واعرف انه مكنش مركز
معايا وساعتها ابقى مش طايقه اكلمه اصلا
(11) مبحبش حد يغير مكان حاجات بتاعتى او يحرك شيء من مكانه علشان بنسى كتير وساعتها افضل ادور لما اغلب
(12) مبحبش حد يعمل ذكى عليا , لأنى شكاكه شوية فأقل غلطه بتكشفه
(13) مبحبش الكدب ومبسامحش بسهوله حد يكدب عليا الا انى بينى وبينكم منغير ما نسيح يعنى بضطر اسفه اكدب احيانا
(شريره بقى )
(14) مش اجتماعيه الى حد كبير ومبحبش الاماكن اللي بيكون فيها صخب وناس كتير وبتوتر كل ما اضطر
احضر فرح ( شكلى مش هحضر فرحى ), لكن اليوم بيعدى عليا عادى بمجرد ما بروح واكون فى وسط الناس
ببدا اتحرك ويزول التوتر وارجع مبسوطه جدا , وبرغم انى مبحبش اكون موجوده في اماكن زي كدا الا
انى بحب الم اصحابى ونخرج يمكن لأن اصحابى عرفاهم كلهم مش عارفه بقى , شكلها حالة جنون يمكن عالجونى بقى
(15) خجوله شوية ومبحبش ابص في عنين حد مباشرة , وممكن يكون حد بيكلمنى وانا عامله مش معاه لكنى بكون منتبهه جدا ليه
(16) بخاف من الملاهى ومبحبش اركب اى لعبه ولو بسيطه بتوقع قلبى , شكلى قلبى ضعيف ( مقدرش اقول جبانه عيب )
لكن لو شوفت حد تانى خايف بحاول اخليه ميخافش برغم انى بكون ميته من الرعب اصلا بس بتظاهر قدامه بالصمود
وجينا للسؤال التانى : امرر الواجب لمين
طيب ممكن ادبس مين يا ربى في الدفوار دا مين مين آآآآآآه
الطالبه عفو الله
yoyo
انى احبكم فى الله
miada ref3at
بطوط حبوب
ولهنا نكون وصلنا لنهاية الدفوار انا حاسه ان دمى تقيل فيها بس هعمل ايه بقى مهو محدش يقعد يقول 16 صفه عن نفسه
ويكون دمه خفيف وبيهزر دا بيسيح لنفسه في كامل قواه العقليه بس علشان انتم غاليين عليا فمش خساره فيكم تعرفوا الفضايح ديا
مع أرق تحياتى وربنا يديكم الصبر وانتم بتقروأ اصلا هههههههههه