2008/08/24

أربع كوارث مع الأعتذار



بعتذر جدا لأنى اخرت اجابة التاجات واتراكم عليا اكتر من تاج لدرجة انى شاكه انى نسيت شيء , بس عامة جل من لا يسهو سبحانه وتعالى ملك الملك
انتم اخواتى واصحابى وهتعزرونى اكيد
انا هقولكم مين اهدانى التاجات وهلخبط الاسئله والأجابات
بعتزر طبعا لو مجوبتش على كل شيء لأن في تاجات انا جاوبتهم من فتره قليله بتحمل نفس الاسئله
متوجينى الاعزاء على ما أذكر
( مياده رفعت zozo - أنسان بلا عنوان - Original Heart )
وبالله فليسامحنى من قد غفلت عن ذكر أسمه
التاجات اسئلها كتير هحاول اختصر على قدر أستطاعتى وربنا معاكم ويصبركم

من أنت
اجابة هذا السؤال تتلخص في القادم

البطاقه الشخصيه
الاسم : مها ... ( نور ) أسم من أشهر اسمائى يلقبنى بيه الأصدقاء
السن : 24
تاريخ الميلاد : 20 / 2 / 1984
مكان الأقامه : القاهره تحديدا ( شبرا مصر )
الديانه : مسلمه والحمدلله
الحاله الأجتماعيه : أنسه وخالية البال ( مش معناها أنى ببحث عن عريس )

متى بدأت التدوين ؟ ودخلت العالم دا أزاى ؟
بدأت تدوين من حوالى سنه أو اكتر بمدونه لن اتحدث عنها , كانت تجربه رائعه ولكنى بطلت اكتب لظروف معينه ورجعت تانى من حوالى شهرين ودى تعتبر بدايتى الحقيقيه مع عالم التدوين
ورجعت للتدوين بتشجيع من صديقتى العزيزه مى , لكنى منكرش عليكم مكنش الغرض من المدونه ما فيها حتى الأن , كان المفروض تاخد طابع تانى كتير منكم بيلاحظوه بسهوله بمجرد الدخول , ومش عارفه دا غلطتى ولا غلط اللي شجعتنى وفجاءة سابت ايدى وتركتنى اتخبط يمينا ويسارا .. واختفت تماما عن حياتى
ولها منى جزيل الشكر والمعزه حتى تعود او تصبح ذكرى مصيرها الخلود

وايه كان انطباعك في البدايه ؟
كنت خايفه ومازلت برغم حبى للتدوين وعالم المدونين

ايه أهم حاجة اتعلمتها من عالم التدوين ؟
اتعلمت انى اقدر اتكلم دايما كل اللى عليا انى امسك القلم واحطه على اول السطر

حاسس ان التدوين له تأثير ؟
بالتأكيد بس لو قدرنا نخلى كل الناس تقرى الافكار بتاعتنا , كدا هيكون ليه تأثير اكبر

مين اكتر واحد بتهتم بتعليقه علي بوستك الجديد ؟
والله ناس كتيره وطبعا مش هقدر اكتب كل الأسماء بس ناخد على سبيل المثال
( شهرذاد - حبيبه - rovy - نور الدين - غنيم – zizi - سهر - الملاك )

ايه أكتر حاجة كرهتها ؟
طيب انا هجاوب على اساس ان السؤال بيخص عالم التدوين لأنى بخلاف كدا مش بكره شيء والحمدلله
هغيرها شوية ونسميها مش بتحبه لأن كلمة الكراهيه بتحمل معنى شديد شوية
مش بحب اللي يدخل يعلق وكأنه معلقش ويقولى كتبتى كويس وخلاص
في ناس بتكتب انتى المره دى احسنتى وبكون مصدقاها وناس تانيه لا بحسها مجرد مجاملات , كان احسنلى ميعلقش خالص عن انه يجاملنى بكلمات هو شخصيا مش حاسسها ... دا غير اللى مبيقروش اصلا وبرضوا بيعلقوا


أذكر ثلاثة من مدوناتك المفضلة
هما اكتر من تلاته والله وانا ضايفه كتير منهم هنا علشان ادخل ليهم بسهوله
وعامة نقول مثلا
Zozo.... صاحبة مدونة نبضات قلب
ميادة رفعت .... صاحبة مدونة نداء الى الحياه
نونو .. صاحبة مدونة 8 بنانيت ( ط . ا . ل. ق )
بنت مصريه ... صاحبة مدونة مين فين ليه
رئيسة حزب الأحلام , مدينة الملائكه , blue Nile
........ وكتير

أعطيتك ثلاث وردات .. من هم الثلاث أشخاص اللى هتعطيهم الورد اللى معاك..؟
اطلع فى أعلى مكان في العالم واحدفهم واللي ياخدهم يبقوا من نصيبه بقى
انا لو عايزه اهدى مينفعنيش 3 وردات عايزه جنينه بحالها ههههههههه


لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟
لو حصل وحد أدانى ورقه وقلم هرسم مش هكتب حاجه الرسم ابلغ من الكلام
ممكن لو لازم اكتب ضرورى يعنى اكتب لا اله الا الله وهتوحشونى أو للذكرى

ما هو هدفك فى الحياة؟؟
إذا لم تعلم أين تذهب , فكل الطرق تفي بالغرض
الهدف الرئيسى انى أرضى ربى لكن لو بتسئلوا عن شيء لنفسى فعلا مش عارفه بس اللى بيجى على بالى بحاول انى احققه

المقولة" إن شاء الله بكرة هيكون أحسن من النهاردة" هل تصدق هذه المقوله ولماذا؟؟
مش بصدقها بس لا بحبها جدا وهى اللي بتدينى سبب للتفائل , والسبب لأن ربنا رحمته واسعه وكريم قوى سبحانه وتعالى

أجمل مقوله سمعتها فى حياتك..
كتير أهمهم : ضاقت فلما استحكمت حلقاتها فرجت وكنت احسبها لن تفرج
وان الشيطان بيمنينا بالمفقود لننسى الشكر علي الموجود
وفى مقوله مش عارفه بتاعت مين تعتبر رمز ليا بتقول
قالوا البعيد عن القلب هو البعيد عن العين , والله بهذا المثل ما أمنت انا ساعتين , انا قولت هوفى لحبيبتى حتى ولو كان فين
بعتزر عن التغيير فيها لأن الروح ملك للى خلقها

من هو افضل رئيس عربى برأيك برر بسببين
حاليا مفيش ولا واحد كويس ودا يدينى حق مبررش لأنى اصلا مش لقياه
اما لو سابقاً يبقى الرسول عليه افضل الصلاة والسلام ومن بعده الصحابه

من المغنى اللى بتحبه أوى ؟ و إيه أحلى أغنية بتحبها ؟؟
بحاول مسمعش اغانى خالص بس بحب الأناشيد جدا وبسمع لمختلف من المنشدين

غزه..تمثللك ايه فى حياتك..؟
وطنى التانى بعد مصر , حبه جزء من شخصيتى بتمنى وبدعى من كل قلبى يتحرر فى اقرب وقت

إعطى لانتمائك لوطنك درجه من مائه..
لو علي حبها هاخد 100% اما لو علي قدمت ليها ايه يبقى هاخد صفر كبير قوى
هههههههههههههه

لو تزوجت وانجبنت..بنتين وولدين..هتسميهم ايه..؟
البنات : ملك , أميره , مريم , ساره واسماء كتير بموت فيها
الأولاد : مروان , سيف , محمود , أدهم

عمرك غشيت فى امتحان وانت صغير..؟
طيب ينفع كدا هو اللى ربنا ستره يسيح لنفسه يعنى وبعدين واضح انه سئل وانت صغير انا هفتكر ايه ولا أيه بقى هو انا عقلى دفتر

لو أتعرض عليك رشوة كبيرة و انت فى زنقة مالية هتعمل إيه؟؟
مش هقبلها طبعا ... وهدعى لله يفك الكرب

شئ فعلته وندمت ؟ شئ لم تفعله وبردو ندمت ؟
مش فاكره والله ولكنى مبعرفش أندم انا اتاثر شوية واقول خلاص ربنا عايز كدا بقى او لو شيء وحش بقول اهو حصل وخلاص ويمكن دا بيجى نتيجة التسرع لأنى ممكن افكر في سنه وفي لحظه اغير كل دا واختار شيء تانى وربنا ما يجيب ندم يا رب

قول 3 صفات بـ 3 كلمات بس توصف بيهم شخصيتك؟؟
شوفوا بقى انا مبعرفش اوصف نفسى مش تواضع لا بس هقول ايه عليها منا مش فهماها وكأنى برضوا مش شيفاها فلازم كنت ابص في مرايه ومرايتى اصحابى
وهما حاولوا يجاملوا ويدونى الصفات الاتيه
طيبه : بس لما بتقلبى خلاص عليا وعلى اعدائى وكرسى في الكلوب يا ريس
عاقله وصريحه وحالمه تقولولى ازاي حالمه مع عاقله اقولكم اسئلوا اللي قالت
بنت حلال ومش عارفه مصلحتك
وفى بقى مرحه وجدعه وخجوله وواحده صحبتى قعدت تغنى زي الملايكه وعامة كله كلام مجاملات متصدقهوش ما علينا بقى من السؤال دا

صفه عاوزاها فى شريك حياتك..
متدين وعلى خلق وبشنب بقى مليش دعوه , ابويا قالى زمان الراجل اللي ملهوش شنب مش راجل وعذراً دا كلام ابويا هههههههههههههه ويا سلام لو دقن وشنب يبقى ربنا أكرمنى بيه ( ادعولى الاقيه بقى )

إيه اللى غير دراستك وشايف نفسك فيه قوي ؟
للأسف هما طفوا النور فمبقتش شايف وعامة هى متغيرتش لأنى اصلا محلمتش بشيء

بتحب السفر ؟؟
طبعا

طب دلوقتى حالا ايه المكان اللى نفسك تكون فيه ؟
نفسى اكون في العجمى فى أسكندريه على شط البحر

من اقرب شخص ليك؟
كان والدى رحمة الله عليه

اية معنى السعادة من وجهة نظرك ؟ حاسس انك سعيد ؟
السعاده هى الحب وهو احساس جميل بيغلف قلب الأنسان يخليه راضى بكل شيء
بيجى من رضا الله
طول ما ربنا راضى عنى و قلبى بيدق بالحب بالتأكيد هكون سعيده

امتى حسيت انك ظلمت انسان ولية ؟ محتاج للحظة غفران منة ؟
مش عارفه بس لو ظلمت حد يا رب يسامحنى , لكن اللي لازم يكون الشخص اللي ظلمته متاكد منه أنى مكنش قصدى , لأنى لو زعلت حد , شوية وبسارع اصالحه فلا يمكن اكون قاصده اظلم حد وأسيبه

بتعمل اية لما تكون مضايق بعد ما تصلى ؟
لا يمكن افضل متضايقه بعد ما أصلى ابدا .. امال انا كنت بعمل ايه في الصلاة
لو فيا شيء وصليت وشكيت لله ونزلت دموعى بصدق .. مهما كان فيا هخلص صلاة وقلبى مرتاح

امتى حسيت انك اتظلمت ؟ ولية ؟
احس بالظلم لو اللي ظلمنى منعنى من حقى في الكلام , لأنى لو اتكلمت وسمعلى حتى لو منصفنيش هسامحه , لكن لو منعنى اتكلم هحس بالظلم الرهيب
وأكتر وقت حسيت فيه بالظلم لما يبعد حد بحبه منغير ما يقولى سبب

اية اكتر احساس بيراودك هذة الايام تجاة نفسك والاخرين ؟
احساس خوف بأن كل الناس اللي بحبهم هيضيعوا منى , وانى هتوه منهم
وأحساس بالخوف من ان ربنا ميتقبلش أعمالى وأصبح من الأخسرين

امتى ممكن تتنازل عن حق من حقوقك ؟ والسبب ؟
أتنازل لو اعترف اللي قدامى انه فعلا حقى وانه غلط , ساعتها مطالبش بيه
اتنازل لو أنسان بحبه أو بحترمه والسبب لأن حقى مش هيكون أغلى منه

وهنا تكون خلصت الاسئله ومقدرش أهدى كوكتيل التاجات دا لحد لأنه كارثه في حد ذاته برغم انه قاعده جميله مع النفس وكشف الخبايا
أتمنى مكونش زهقتكم بالكلام عن نفسى , واللى مش هيقدر يقراه عزره معاه , انا هتفهم جدا , لانه طويل قوى قوى

هناك 63 تعليقًا:

yoyo يقول...

هييييييييييييه
مش ليه دعوة بقى هاحجز اول تعليق الاول
هاستفقض المكان كدا وارجع اعلق تانى
فاصل ونواصل
يويو

philippine lottery يقول...

Thanks to the blog owner. What a blog! nice idea.

nour shahen يقول...

انا لسه بعدل فيه يا كارثه انتى هتعلقى علي ايه بس ههههههههههه
بعدين بتكتبى يويو علي اساس انى مش عرفاكى يعنى

green card lottery يقول...

that's really cute..wish i had one too.

yoyo يقول...

امال اكتب ايه يعنى فتاكات ولا ايه الله بقى
والله ما انا كاتبة ولا يويو ولا حتى يوكو

nour shahen يقول...

philippine lottery
لا شكر على واجب
بس هل يا ترى لحقت تقراه وانا لسه حطاه هههههههههههه

nour shahen يقول...

green card lottery
خلاص لو عاجبك خديه وجاوبى عليه بمعرفتك بقى
هديه منى ليك

nour shahen يقول...

yoyo
اكتبى يا حياتى اللي يعجبك
انا كنت بهزر والله
ثم اسم يويو غالى قوى قوى ولازم ينور كدا دايما

yoyo يقول...

بالعند فيكى يا قلبى هاعلق يالا بقى هيه
اممممم وادى قعدة بقى يالا قومى يا بت اعملى لينا كوبيتين شاى كدا يالا
ههههههههههه
بت يا نور هو انت لكى اسماء حركية ولا ايه امممم اه يا خوفى يا بدران ههههههههههههههههه
ماشى يا عم يا بتاع شبرا انت ومش قولنا محل الميلاد ليه يالا ما علينا ربنا امر بالستر انا مش قولت حاجة اهوا ههههههههههههههههه
هناخد ايه من الردالة (الرجالة) يعنى يا اختى بلا خيبة
ماشى يا عمى الوطنى بقى ادولوا سلاح وتحيا مصر وبالاحضان يا سينا

كل دى عيال هو انت هتجيبى فريق كورة ولا اقولك اعمليها انت بس وانا ادربهم لك ونعمل احلى فريق ههههههههههههه ربنا يسعدك يارب ويوعدك بابن الحلال اللى يستاهلك انت تستاهلى كل خير

بشنب يا خراشى ولو شنب عبد الجبار اللى ياكل الولعة ويتعشى بالنار ههههههههههه ماشى يا عم الحاج

اه ربنا امر بالستر مش شافهم وهما بيغيشوا بقى ههههههههههههههه ينفع الكلام دا يعنى

اجابتك كلها تلقائية يا نوارة قلبى انت كدا بالفعل انسانةفى منتهى الجمال فيكى حاجات حلوة كتير ة بجد ربنا يسعدك يارب وتحققى كل اللى تتمنيه يارب وتلاقى الاخ ابو شنب دا ولا كان فى دقن بقى هتبقى مانجة يعنى ههههههههههههه
كل سنة وانت طيبة يا نور
رمضان كريم
ربنا يتم علينا وعلى الامة الاسلامية كلها بالف خير يارب

طبعا انا عارفة الشرف والسعادة اللى انتى فيها دلوقتى طبعا امال ايه مش انا علقت على الكوارث اقصد التاجات دى هههههههههههه والله احسن يالا بقى فرحانة فيكى مع انى مدبسة فى كام تاج كدا ربك يكرم واقدر احل الهوم وركات دى المس شكلها بليدة كدا ولا ايه يا فضيحتى شعبى يقول عليا ايه بس
يالا بقى اسيبك انا بقى
انت بقيت بترغى كتير كدا ليه يا نور الله
كل دا كلام
معليش طولت عليكى يا قمر
وبالعند بقى يعنى انت عارفنى برضه هاقول يويو ههههههههههه
تحياتى
يويو

nour shahen يقول...

yoyo
ينفع التشريد اللي انتى عملهولى دا يا مس طيب لما اشوفك بس
وبعدين انا عايزه شنب برستيج كدا مش بتاع الولعه والنار دا
شوفتنى وانا رقيقه ههههههههههه
والله ما هو نافع استنى نقعد جمب بعض ونتكلم
يعنى مكنتيش بتغشى يا مس وانتى صغيره بلاش نسيح علشان التلاميذ بس
وبعين طبعا انا وطنيه مصر هى امى ومرات ابويا في ذات نفس الوقت يعنى
وانا لو ربنا اكرمنى وجبت عيال انتى اخر حد هخليه يعلمهم يا مس هيطلعوا لمضين ويجننونى بقى انا
ونورتينى يا حياتى في تلك الكوارث اقصد التاجات

أكون او لا أكون يقول...

السلام عليكم ورحمة الله وبركاته...
البنوتات سهرانين...هههه
بكل صراحه ... اجوبه جااامده... واجمل شي قربك من الله سبحانه وتعالى ... وده اللي مديكي قوة شخصيه... ماشاء الله
اما جواب الوردات... جواب دوبلوماسي بحت... حلو
اما اسماء بناتك مستقبلاً ان شاء الله ... واحد فيهم اسمي... بس ده سر بيننا... ههه

سؤال الرشوه ده داهيه... اللي سألك ايا عايز يورطك ... هههههه

ان شاء الله تتحقق صفات شريك المستقبل يااارب... لانه لو كان متدين حتعيشي متطمنه...
ربنا يوفقك... صراحه اعجبت بشخصيتك... باين عليكي واثقه من حالك... وعارفه عايزه ايه...
شكرا على زيارتك مدونتي...
وان شاء الله بقينا صحاب...
تحياتي.

nour shahen يقول...

اكون او لا اكون
هما شكلهم كانوا مترقبينى لما انزل البوست
بنوتات شريره بقى ههههههه
قوليلى بس اى اسم فيهم بتاعك ومش هقول لحد
هو التاج كله توريطه يا بنتى ان جينا للحق بقى
ربنا يكرمك حبيبتى دايما كدا منوره المدونه وبالفعل اسعدنى تعليقك
ويشرفنى جدا نكون اصحاب بجد

شهرزاد يقول...

"أربع كوارث مع الاعتذار"
أنا شوفت العنوان وجيت أجرى بسرعة
خضيتيني فعلا..
الحمد لله مش كوارث تيجان
ههههه

وشكرا للصديقة مي اللي كانت سبب في تعرفنا إلى شخصية جميلةو قوية ..
وحتى لو كان غرضك من المدونة شيء وما كتبتيه شيء آخر.. هذا يعطي تنويع للمدونة ويبعد الملل مع الاحتفاظ بالغاية الأساسية للتدوين..

إجاباتك جميلة جدا ودبلوماسية
وقوية..
ولقيت اسمي مكتوب في قائمة أسماء البنات..
هههه
ربنا يرزقك الزوج الصالح والذرية الصالحة أنت تستاهلي كل خير والله

متدين وعلى خلق وبشنب بقى مليش دعوه , ابويا قالى زمان الراجل اللي ملهوش شنب مش راجل
....
ايوه لازم يكون بشنب علشان يكون راجل بحق وحقيقي فالرجولة في هذا الزمن قليلة إن لم تكن مفقودة

رمضان على الأبواب
كل رمضان وأنت بخير
وأسال الله العلي القدير أن نعطه حقه من العبادة وان نخرج منه وقد أعتقنا من النار
اللهم آمين

ألف تحية وسلام
حبي وأشواقي
شهرزاد

zizi يقول...

السلام عليكم و باسم الله
مش عارفة ليه من البداية كدة حاسة ان ردي حيكون طويل عريض ربنا يستر
ايه الجمال دة يا ختي يا خراشي على الرقة و النعمومة يا سلام يا سلام
نجي بقى لكل اجابة على حدا
سيبينا من من انتي منا عرفاكي و عجناكي حتقوليلي هههه
مرسي اوي انك بتهتمي بتعليقاتي يا جميل و يا رب يكون يعجبوكي فعلا
اكثر حاجة كرهتيها اه هي نفسها الامر الي مبحبوش فعلا
اذكر ثلاثة من مدوناتك المفضلة ايه دة انا مش شايفة اسمي لالالا مش ممكن
ايه بتقولي ايه اسمي موجود هو فين
ااااه يعني هو داخل في كلمة وكثير الي جات في الاخير دي يلا مش مشكلة عديها ناس لي بعضيها
ثلاث وردات بوصي انا حخطف وردياي و عميلي في الاتنين لي حيبقو لانتي عاوزة بس اضمن وحدة ليا اه يا ختي طماعة في حاجة كل واحد يبص قدامه يلا
لو أعطيتك ورقه فيها 3 سطور وقلتلك اكتب فيها اللى انت عاوزه هتكتب ايه..؟ طيب حترسمي اوكي بس حترسمي ايييييييه
هدفك جميل ربنا يحققهولك و يكون ربنا راضي عنك و عنا يا رب
اجمل مقولة يا سلام قالوا البعيد عن القلب هو البعيد عن العين , والله بهذا المثل ما أمنت انا ساعتين , انا قولت هوفى لحبيبتى حتى ولو كان فين ابقى انا المقصودة مش كدة هههههههه ربنا يخليلك احبابك و يحفظهملك اينما كانوا
افضل رئيس عربي ايه دة هو دة سؤال برضو ههههههه انا مليش في سياسة و بريئة و الله مقلتش حاجة
الاغنية المفضلة ايوة كدة خليكي شاطرة و اثبتي على الاناشيد طيب ايه الانشودة المفضلة بقى انا شكلي في تعليقي دة بديكي تاج قص
ي كارثة تانية
غزة جزء من حياة كل مسلم ربنا يحررها و يفك اسرها يا رب
هو دة الانتماء للوطن و الا فلا كفاية عليه بقى شرف حبك ليه هههههههه
انتي حتخليفي كومة العيال دي كلها حتساليني كومة يعني ايه مش عارفة هي الكلمة كدة صح و لا لا بس يعني كمية كبيرة
ربنا يزيد و يبارك يا ختي و انا مليش دعوة انتي تزودي عليهم وحدة عشان تسميها باسمي اه غلاسة هههههه
عمرك غشيتي في الامتحانات بوصي يا نور بيني و بينك حعمل نفسي مشفتيش السؤال و حمر مرور الكرام نجي للبعده
ايوة كدة يا قلبي هي دي الاخلاق رشوة ايه يا عم ربنا اكبر من اي رشوة الله يرضى عليكي يا بنتي

جميل اوي فهلا الواحد ميسمحش لنفسه تندم فعلا ربنا ما يجيب ندم على شيء و ححاول فعلا ابقى اعمل زيك و ماندمش على حاجة و افتكر فعى اننا انا كمان مبندمش كل الي بقولو قدر و مكتوب و الحمد لله على كل حال
نجي بقى لثلاث الصفات انا شايفة يا ختي عشر صفات مش ثلاثة بس يلا ادينا نعرفك كمان و كمان
تعالي هنا كتبتي الي قلتلك انا استني اشوف كويس
ايوا كدة يا طيبة انتي
جميلة اوي الصفة بنت حلال و مش عارفة مصلحتك ههههههههه
ايه دة دة لسة كلام كثير انا اسفة حزهقك بردي استحملي منا قريت يا حتي البوست اكثر من مرة و استحملت

صفة عوزاها في شريق حياتك يا سلام ربنا بقى يرزقك الزوج الصالح الي فيه الصفات الي انتي تتمنايها
المكان الي دلوقتي حالا تتمني تكون فيه خديني معاكي انا برضو بمووت في البحر
بس خلاص دنا تكلمت كثير الله المستعان بس خلاص
ربنا يسعدك يا قلبي و لا يحرمنيش منك
اسفة بجد على الاطالة
دمتي في حفظ الله

فارس بلا جواد يقول...

أزيك يا نور
تصدقي ان انا واقع في نفس الورطة عندي حوالي 7 تاجات لسه ما جاوبتش عليهم .. من غير التكرار يبقو 4 .. هاحاول أعمل زيك كده وربنا يعني
اجاباتك كانت حلوة ودمها خفيف كمان .. وزعلتيني قوي علي موضوع الشنب ده ههههههههههههه
بالتوفيق دايما
تحياتي

نور الدين يقول...

الاخت الكريمة نور
..
خالص تحياتى لك
وكم اعجبتنى اجاباتك البسيطة التى دلت على شخصيتك الهادئة المتصالحة مع نفسها بدأ من أمنياتك وانتهاءا برأيك فى السعادة
واتمنى من الله ان يحقق لك كل امنية وان ييسر لك كل عسير
وعحبنى جدا الجملة اللى نقلتيها بان الشيطان بيخلينا نفكر فى المفقود عشان ننسى شكر الموجود
انا عن نفسى ساهتم بهذا الامر لانه يفوتنى احيانا
حفظ الله قلبك وادام قلمك
تحياتى لك متواصلات
.....
نور الدين محمود

ســـهــــر يقول...

انا جيت على فكرة وبعدين منزلة البوست قبل منام لية بقا كنت عاوزة اعلق الاول :( يرضيكى ابقا السبعتاشر يا نور ههههههه

بصى يا ستى انا قريت البوست اكتر من مرة فى كذا حاجة كدة عاوزة اقولك عليهم

وصف صحابك ليكى مش مجاملة يا حبيبة قلبى لان الصاحب اللى بجد بيكون مراية صاحبة واعتقد انك احلى من الوصف بمراحل ومش مجاملة والله العظيم بكلمك بكل صدق

وحاجة تانية بقا موتتنى من الضحك بقا عاوزة تتجوزى راجل بشنب وياحبذذا لو بدقن كمان ههههههههههههه

يارب بحق الايام المفترجة يرزقك باللى يصونك ويقدرك يا رب

وربنا يرحم والدك ووالدى وكل اموات المسلمين اجمعين


وفرحانة انا لاقيت اسمى فى البوست مع شهروزة حبيبة قلبى
ربنا يكرمك يارب وانا بحب مدونتك وبحبك اوى انتى حد جميل ويستاهل كل خير

وعجبنى اوى قربك من ربنا يارب ينور قلبك دايما

دايما بقول ان احلى حاجة فى التاجات انها بتعرفنا اكتر بشخصية الناس اللى بنحبها وكاننا شيفنهم من جواهم

بحب تلقائيتك واسلوبك يا نور

ربنا يوفقك يارب وتشوفى الخير فين متكونى
وكل سنه وانتى طيبة يا حبيبة

وياريت مش تتأخرى علينا كدة كتير بتوحشينا بقا

بحبك انا اد كدةةةةةةةةةةة

ســـهــــر يقول...
أزال المؤلف هذا التعليق.
الملاك يقول...

السلام عليكم ورحمة الله وبركاته
اولا كل عام وانت بخير اختى وحبيبتى فى الله نور بمناسبة قرب حلول شهر رمصان الكريم اعاده الله علينا جميعا وعلى الامة الاسلاميه باليمن والبركاته

نور بصراحه كان نفسى اعرف اول مدونه انت كتبتى فيها لان عندى فضول جامد انى اطلع على كل حاجه كنت بتكتبيها لكن مادمتى لا تريدى التحدث عنها خلاص ولا يهمك وربنا يبارك فى صديقتك مى الى خلتك رجعتى تانى فتم تعارفى بيك
--------------------------
اختى اما عن الطابع الذى كنتى تتمنين ان تصبح مدونتك عليه فهذا يمكنك القيام به فى اى وقت ولكنى اعتقد انه من الصعب علينا ان يغلب طابع بعينه على مدوناتنا لانها تعبر عن مشاعرنا ومشاعر الانسان دائما فى تقلب مستمر ولا يمكن ان تاخذ طابع واحد وبمعنى ادق ان تبقى على حال واحد

-------------------
كنت خايفه ومازلت برغم حبى للتدوين وعالم المدونين

ده شعور طبيعى جدا لاننا لما بنحب حاجه بنخاف نفقدها لاى سبب وخاصة لو نتج عن تصرف منا حفظنا الله جميعا من هذا وادام التواصل بيننا فلقد اصبحت مدونة كلا منا مثل ببيته الذى صنعه بيده ليلقى فيه كل من يحب
----------------------

اتعلمت انى اقدر اتكلم دايما كل اللى عليا انى امسك القلم واحطه على اول السطر

بسم الله ما شاء الله
يا بختك مش بحسدك والله
بس انا بعانى قوى من المشكله دى بحس بعجز غريب فى بعض الاحيان عند محاولتى للكتابه ولا اعرف السبب الحقيقى لذلك هل لانى ليس لى فى الكتابه اصلا ولا ده خوف ولا ايه بالظبط مع انى لما ربنا بيفتح عليه بحاجه بحس انها كويسه يله بقى انا سيبها على ربنا انا هدوشك بمشكلتى
ربنا يستر ومتقوليش انى باين عليه مش دخله اعلق على التاج لا دخله احل مشكلتى هههههههههههههه
-----------------------
قدرنا نخلى كل الناس تقرى الافكار بتاعتنا , كدا هيكون ليه تأثير اكبر

صدقتى اختى ان صدقت قلوبنا واقلامنا
--------------------
إذا لم تعلم أين تذهب , فكل الطرق تفي بالغرض

فعلا اختى بارك الله فكى ووفقك الى كل ما يحب ويرضى
----------------
الشيطان بيمنينا بالمفقود لننسى الشكر علي الموجود

جزاكى الله خيرا يا نور
اللهم احفظنا جميعا واشغلنا باصلاح انفسنا
-------------------
وبدعى من كل قلبى يتحرر فى اقرب وقت
اللهم امين
اللهم منا علينا بالنصر القريب

------------------
مش هقبلها طبعا ... وهدعى لله يفك الكرب

ربنا يزيدك ويثبتك
-------------------------
السعاده هى الحب وهو احساس جميل بيغلف قلب الأنسان يخليه راضى بكل شيء
بيجى من رضا الله
طول ما ربنا راضى عنى و قلبى بيدق بالحب بالتأكيد هكون سعيده

صدقتى اختى لذلك علينا الدعء دائما بان يوفقنا الله الى كل ما يحب ويرضى
--------------------------
احس بالظلم لو اللي ظلمنى منعنى من حقى في الكلام , لأنى لو اتكلمت وسمعلى حتى لو منصفنيش هسامحه , لكن لو منعنى اتكلم هحس بالظلم الرهيب

صدقتى اختى والله فلقد شعرت بهذا الاحساس من قبل وكاد ان يقتلنى لولا انى توجهت الى الله بفضله واحتسبت اجرى عنده
------------------------------
احساس خوف بأن كل الناس اللي بحبهم هيضيعوا منى , وانى هتوه منهم

ليه بس كده تفائلى خيرا
ربنا يحفظك ليهم ويحفظهم ليكى دايما

وأحساس بالخوف من ان ربنا ميتقبلش أعمالى وأصبح من الأخسرين

ربنا كريم قوى يا نور وارحم بنا منى فاطمئنى اختى الحبيبه
--------------------
أتنازل لو اعترف اللي قدامى انه فعلا حقى وانه غلط , ساعتها مطالبش بيه
اتنازل لو أنسان بحبه أو بحترمه والسبب لأن حقى مش هيكون أغلى منه

بارك الله فى قلبك وحفظه عليكى
-----------------------
نور اعذرنى على الطاله بس انتى عارفه طبعى معرفش اعلق على حاجه قبل ما اقراها واحس بيها

دمتى اختى وقلبك برعاية الله

Habiba يقول...

حبيبتى يانور الله وانت عارفه مش مجامله

اسفه لان تعليقى من الناس اللى بتهتمى بيهم اتاخر عليكى كده
بس الله لا يوريكى اللى كنت فيه

نسيتى تقولى ان دمك عسل ياسكر بجد ومش مجامله
كل سنه وانتى طيبه

mohamed ghalia يقول...

بجد إجابات مثالية (مش مجاملة) ربنا يحفظك ويرزقكك العريس .ويكون بشنب ودقن)
ربنا يحققلك كل أحلامك
كل سنة وحضرتك طيبة
دمتى بود
تقبلى تحياتى وإعجابى

spower يقول...

رمضان كريم

أنا أنا عصفور
وموطني رمضان
مع الأذكار أطير
وأحمل الأطياب

كل سنة وانت طيبة

هييييييييييييييه
ايه كل ده
الله يكون في عونك وقدرتي تجاوبي علي كل ده
علي ما خلصت قراية البوست كانت رحي طلعت

طارق الغنام يقول...

نور
اولا كل سنه وانتى طيبه
وياربيحقق كل احلامك وامانيكى
ماشاءالله عليكى شخصيه رائعه
من اجابتك احسست انى امام شخصيه راقيه
تقبلى تحياتى
ودمتى بود

nour shahen يقول...

شهرزاد
هو لازم اعمل كارثه يعنى علشان اشوفك يا شهروزه ههههههههه .. خلاص عرفت نقطة الضعف فين واستغلها بقى وانا شريره استغلاليه في المواقف اللى ذى كدا
والله يا عزيزتى الرجوله مش بالشنب وبس ولكن انا مالى بقى هو حلمى كدا
ربنا يخليكى ليا يا قمرتى يا رب
ويباركلى فيكى ويكرمك
وكل رمضان وانتى بألف خير وسعاده وأطمئنان
نورتينى وأسعدتينى

nour shahen يقول...

zizi
وعليكم السلام ورحمة الله وبركاته
ولا يهمك يا قلبى طولى في التعليق زي ما تحبى
ايه الكلام دا كسفتينى وانا وش كسوف انتى عارفه هههههههههه
جميله قوى عجناكى دى أحنا بنبهت عليكى بعبارات غريبه بس اشك انك سمعتى دى منى اصلا
يا حياتى شوفى جمال التعليق وانتى تعرفى لازم اهتم بيه مش علشان احنا اصحاب
دا الاجمل اننا اصحاب وانك بتقولى رايك بس لو نبطل مجاملات انتى اسمك فى قلبى مكتبوش علي ورق انا
( حبه مسمره اهو منا اتورطت بقى )
عيب يا قلبى تخطفى الورد مش بتعنا , وعامة لو عينك فيهم خديهم كلهم بقى
مش عارفه هرسم ايه بس اللي يجى في بالى وقتها بقى
ربنا يباركلى فيكى يا زوزو يا رب

انتى عارفه الانشوده المفضله ليا أحن
وهاخدها منك تانى لأنها ضاعت منى
ادينى جاوبت على الاسئله اهو شطوره انا
لا يا قلبي كتبتى كومه صح هههههه احنا شكلنا جايين عليكى بخساره بقى
ازود واحده واسميها بأسمك واهديهالك تربيها هقطع نفسى انا بقى هههههههه
بالنسبه للصفات انا مالى انتم اللي انهمرتوا عليا بالوصف ( مش عسوله انا بالله )
طيب انتى قريتى البوست اكتر من مره جايه تعقبينى انا علي كدا هههههههه
لا مش هاخدك للبحر هتقعدى ترغى وانا بحب اقعد فى هدوء , طيب متضربيش اقصد اقولك هتنورينى في الرحله دى بس دا كلام من ورا قلبى ههههههههههههههه
وتبطلى بس خلاص احسن ما اقتل همسه
ربنا يخليكى ليا يا قلبي ويباركلى فيكى ويديم بنا المحبه فى الله
كل رمضان وانتى طيبه

nour shahen يقول...

فارس بلا جواد
الله يسلمك ازيك يا فارس , عاش من شافك
غلط فعلا ان الواحد يأجل التاجات لانه بيكون صعب تجاوب عليهم مره واحده كدا
وبتكون اصعب في القراءه اكتر علي حبايبنا المدونين
ربنا يوفقك ويقويك
انا مالى بقى وعامة بسيطه اللى عايز يتقدم يروح يربى شنب ودقن هههههههههههههه
نورت المدونه واسعدنى تعليقك

nour shahen يقول...

نور الدين
اهلا نور ازيك
متشكره جدا لمجاملتك الرقيقه
ربنا يبارك ليك ويكرمك يا اخى العزيز
فعلا الشيطان دايما يدخلنا من كلمة لو وننسى اننا في نعم كتير بنغفل عن اننا نشكر ربنا عليها
بس سبحانه وتعالى رحمن رحيم بيمهلنا
وفقك الله لما يحبه ويرضاه
نورتنى واسعدنى مرورك

nour shahen يقول...

سهر
انتى نورتى علي فكره يا سهوره , واعزرينى انا قولت علي ما انزله واعدل فيه وتانى يوم يكون جاهز للقرأه
وبعدين انتى ال 17 ال 30 مش مشكله دايما منوره كدا ووجودك مميز عندى وبيسعد قلبى بروحك الجميله دى وربنا العالم انها مش مجامله
وطبعا يا قلبي زوجى العزيز لازم يكون بعلامة الجوده ههههههههههههه
ربنا يرحم موتى المسلمين جميعا يا رب
ويجعل قبورهم روضه من رياض الجنه
انتى حد اجمل وتعبيرك اجمل واجمل ربنا يرزقك بكل الخير يا رب
كل سنه وانتى طيبه وبألف خير وسعاده
أحبك الذى أحببتنى فيه
نورتينى واسعدتينى

nour shahen يقول...

الملاك
وعليكم السلام ورحمة الله وبركاته
كل عام وانتى اقرب لله وبألف خير وسعاده يا رب
المدونه السابقه لا تستحق الذكر بجد
اعرف من كدا انى حد بتحبى تقريله واااو
لو علي كدا انا اقعد اكتب ليكى بقى , بس هتزهقى صدقينى ههههههههه
افكارى مش بنفس الجوده اللي كتير منكم عليها ولكنى بحاول
بتعانى من مشكلة انك مش بتقدرى تتكلمى لا مصدقش ابدا بكل الابداع اللي بشوفه في مدونتك دا
يمكن بتخافى متطلعيش افكار منظمه بس
لكن احنا بنشوف عندك افكار رائعه
لالا ابدا ولا دوشتينى ولا حاجه انا بحب جدا تعليقك وكأننا في مساحه نتكلم فيها مش بس بنعلق علي الموضوع وخلاص
ربنا ينصفك دايما اختى الحبيبه ويبعد عنك الظالمين وينير طريقك بالأيمان
ربنا يحفظك ويرعاكى يا رب
وفعلا انتى اسم على مسمى
نورتينى واسعدتينى

nour shahen يقول...

habiba
حبيبه الحبوبه روح قلبى
ولا يهمك التأخير المهم انك جيتى بألف سلامه
الله يعينك يا رب ويقويكى ويبعد عنك الشر ونشوفك دايما سعيده ومبسوطه
كل سنه وانتى بألف خير وطيبه وسعاده يا رب
نسيت اقولك عندك فانوس ولا اجبلك واحد هديه هههههههههه
ربنا يبارك فيكى حبيبتى ويسعدك يا رب

nour shahen يقول...

mohamed ghalia
متشكره جدا على الدعوه الجميله دى
ايون لازم تحط في بند الدعوه الشنب والدقن الله يكرمك هههههههههههه
ربنا يحقق لينا كلنا كل احلامنا يا رب
كل سنه وحضرتك طيب وبصحه وسلامه
دايما منور المدونه بمرورك كنسمة ربيع

nour shahen يقول...

spower
الله اكرم
خطيت اجمل الكلمات بقلمك بارك الله فيك
كل سنه وانت بألف خير يا رب
ربنا اعانى وكتبته والحمدلله
معلش معلش المره الجايه هراعى مكتبش كتير ولا اكوم الواجبات كدا بس نعمل ايه انا تلميذه مش شطوره شويه
نورتنا يا زعيم الثوره

nour shahen يقول...

طارق الغنام
استاذى العزيز
كل سنه وانت بألف خير يا رب
ربنا يوفقك لما يحبه ويرضاه
متشكره جدا علي المجامله الرقيقه دى
اسعدنى تواجدك وتعليقك

سلطان الغرام يقول...

انا بشكر الناس اللي بعتت التاج دا ليكي عشان عرفونا عليكي بكل صراحه

وبحييكي علي الرودود واتمني دوام التواصل بينا

وكل عام وانتي بخير

Mustafa Şenalp يقول...

çok güzel site. :)

zOzO يقول...

فعلا التاجات دي كارثه
ههههههههههههههههههههههه


بس برده حلوه لانها عرفتنا ان نو دي حد حلو
كلنا بنحبه


كل سنه وانتي طيبه

معلشي بجد انا جهازي لسه بايظ
وانا متطفله ع جهاز عمي
ههههههههههههههههه


في رعايه الله

انسان بلا عنوان يقول...

ازيك يانور

الاول متتخضيش !
التعليق ده لازم يكون طويل فخدى نفس وسمى الله واقرى بالراحه..

- انا على فكره كنت هبعت لك تعليق فى البوست اللى فات اطلب منك انى اغير أسئلة التاج بتاعى وانى كتب اسئله جديده اكون انا اللى سائلها
يعنى قلت الحقك طالما انك لسه مجوبتيش على التاج....
بس الحمد لله كوكتيل التاجات ده تقريبا ماسبش حاجه كنت ممكن اسألهالك.

-المفاجأه الأولى نور طلعت مش نور وطلعت مها !

-"أنسه وخالية البال ( مش معناها أنى ببحث عن عريس )"
هههههههههه اللى على راسه بطحه !

"( ادعولى الاقيه بقى )"
ههههههههههه يارب تلاقوا بعض .

-هربتى من سؤال الورود بس اجابه هايله وانتى حبيتى تكونى مختلفه وقد كان!

-احلى ما فيكى...
"الهدف الرئيسى انى أرضى ربى"
اتمنى لك التوفيق وربنا يرضى عنك ويرضيكى

-السؤال بتاع من افضل رئيس عربى ، انا فكرت انى اجاوب انه الرسول عليه الصلاه والسلام ...بس قلت اكيدالسائل يقصد رئيس معاصر ...حتى ده احترت هل هو يقصد رئيس حالى ولا سابق ؟...ما علينا
- جميل انك "بتحاولى" متسمعيش أغانى ربنا يثبتك ...انا كمان بحاول بس احيانا بدندن بأغانى وارجع اخد بالى وكده.
-عندك حقك ان الواحد يوصف نفسه فدى حاجه صعبه جدا اولا ورخمه ثانيا.

-شريك حياتك متدين وعلى خلق شىء جميل ...يا ستى ربنا يكرمك بزوج صالح..
بس بشنب !
اول مره اشوف بنت بيعجبها الشنب!
انا كنت على طول بسيب شنبى واعمل دوجلاس بس كتير قالى ان الشنب شكله مش حلو ...ومتفهمنيش غلط انا بوصلك رأى الناس فى الشنب !.
الله يرحم ابوكى بقى ..هوالله يرحمه كان منين ؟

-"طول ما ربنا راضى عنى و قلبى بيدق بالحب بالتأكيد هكون سعيده"
= طول ما هنا ابيض وبتاع ربنا ...


-"وأكتر وقت حسيت فيه بالظلم لما يبعد حد بحبه من غير ما يقولى سبب"
طب سؤال ...هل انتى بتبقى حاسه او متوقعه السبب ده؟...على الاقل من وجهة نظره هو (الحد ده) يعنى بتحسى بالظلم لانك حاسه انه بعد لسبب هو معتقده ومش موجود؟..انتى فاهمانى ؟

-احساسك بالخوف بالنسبه للاعمال وقبولها
وانك تكونى من الاخسرين اكيد ليه اسبابه...ومعروفه طبعا الذنوب فمن منا لا يذنب؟
مش هقولك طريقه تتخلصى بيها من الاحساس ده لانه متهيألى مفيش..!
بس بموازنه بين حسن الظن بالله وانه رحمن وبين عدم الغرور به وانك متشكريش نفسك...ممكن ...ممكن تتعايشى مع الخوف ده.

-"اتنازل لو أنسان بحبه أو بحترمه والسبب لأن حقى مش هيكون أغلى منه"
عجبنى اوى الرد ده.

اخيرا: حاسس ان اجاباتك خدت منك مجهود كبير ،وحاسس برضك ان المجهود ده لم يذهب هدر
فاجاباتك اشعر فيها بالصدق مع النفس امام الله ...او هكذا اشعر !

اعذرينى ان طال التعليق بس هما برضو اربع تيجان!


وبعفيكى من الرد على التعليق ...

وكل عام وانت الى الله اقرب
ويحقق لك كل ماتتمنى من الخير.

Blue Nile يقول...

نووووووووووور
ايه ده
انا اسمي مكتوب مش مصدقة
ربنا يكرمك يارب
عارفة
اسمك جميل جداااااااااا وبعشقه
نفسي اجيب بنت واسميها مها
كل سنة وانتي طيبة وبجد انتي انسانة جميلة وشخصيتك ماشاء الله

أكون او لا أكون يقول...

الهم يسر... ولا تعسر

ازايك ياقمر...

انى احبكم فى الله يقول...

الموضوع رائع

وحاسبى على العصفور

شكرا على الموضوع الجمل وتفتعلك معى

nour shahen يقول...

سلطان الغرام

بشكرك جدا علي كلامك الرقيق
نورك المدونه واسعدنى تعليقك

nour shahen يقول...

Mustafa Şenalp
بصراحه مبعرفش تركى :)
لكن نورت المدونه برغم انى مش فاهمه مكتوب ايه هههههههههههه

nour shahen يقول...

zozo

يا رب جهازك يتصلح بسرعه بقى يا زوزو وترجعى تنورينا من جديد
وربنا يبارك ليكى في جهاز عمك علي ما جهازك يرجع يشتغل قريب ههههههههه وبعديها مش مشكله
كل سنه وانت بألف خير يا رب
ووحشتينا شوفى مشكلة الجهاز بسرعه وارجعيلنا تانى

nour shahen يقول...

انسان بلا عنوان

الله يسلمك ولا يهمك انا اتخضيت من اول ما قولت متتخضيش اصلا

انا هجيب كوباية كابشتينو ونقعد نشوف بقى ... نقول بسم الله .. هاه

لو عايز تسئل اي سؤال مش محتاج تاج انت قول كل اللي انت عايزه وانا بأذن الله ارد عليه يلا علشان مبقاش ضيعت عليك الفرصه بس
ناقص عنوان بتنا هبقى اقوله في بوست خاص ميدخلهوش حد هههههههههه
شوفت بقى الى حصل يلا .. هو مها وحش يعنى مش دول تلات حروف ودول تلات حروف
بالنسبه لأنسه باينه خالص اهو انى في رحلة البحث عن العريس ههههههههههه
بس بشنب ودقن مليش دعوه
منا قولت مينفعنيش تلات وردات انا مبحبش ازعل حد لو اهدتونى جنينه ممكن اقولك هديها لمين نفر نفر بس هى تكفى
أجمل ما فى كل قلب انه يحب ويرضى ربه
استنى هنا انت كنت مربى شنبك وقالولك مش حلو شلته يا نهارك الابيض ينفع كدا
دنا كنت حاطه عينى عليك بس كدا بقيت متنفعش خالص ههههههههههههههههه
لا برضوا مش مقتنعه دايما الراجل بشنب اجمل حتى لو رفضو كل الناس , دا حتى في ناس بتكون اوحش منغير الشنب والدقن
الله يرحمه كان من الأرياف من المنوفيه يلا بقى اخر الاسرار اهو بس دى فضايح مش اسرار
بس كان عايش في القاهره من زمان وانا من القاهره ولكن اصولى منوفيايه مقدرش انكر يعنى تحاسبوا من الاخر

بص انا اقولك واعزرنى للتطويل بقى انت اللي حابب تعرف
انا اوقات بكون بحب حد قوى وفجاءه يحصل طاتش بينا واقول كلام عن غضب وبسببه الحد دا يخرج من حياتى نهائى
منكرش ان بيكون رد فعلى اقوى من اللي حصل , بس دايما برجع افكر هل في زعلى الناس تتخلى عنى لدرجة انها تبطل تعرفنى خالص .. عامة هما لو سابونى لضميرى وصبروا ساعات مش ايام كانوا هيلاقونى رجعت بعتزر لانى مبحبش لحظات غضبى
ولو فكروا يعقبونى لازم يعرفواان عتاب ضميرى بيكون اقوى عقاب ليا
ربنا يهدينا جميعا
اعزرنى انا ان اطلت فى رد التعليق
وكل عام وانت بخير ووفقك الله لما يحبه ويرضاه
نورتنى واجهدنى تعليقك ولكن اسعدنى تعليقك

nour shahen يقول...

blue nile
اهلا اهلا بلو القمرايه
طبعا اسمك لازم يتكتب بالبنط العريض كمان
مدونتك جميله فعلا وكلماتك دايما رائعه ولو حد دخل مدونتك مره ميقدرش الا انه يداوم علي زيارتها بجد
ربنا يرزقك ببنوته زي القمر وسميها مها يا قلبى ولا يهمك
كل سنه وانتى بألف خير يا رب
وحشتينى ونورتينى ومتغبيش كتير عننا

nour shahen يقول...

اكون او لا اكون

اللهم يسر ولا تعسر

الله يسلمك يا قمر انا بخير والحمدلله في احسن الاحوال

يا رب تكونى انتى كمان بخير وفي اتم صحه واحسن حال

nour shahen يقول...

انى احبكم في الله

العصفور في عنيا بس اى عصفور اعزرينى انا بنسى بسرعة الصاروخ ههههههههه

الحمدلله انه عجبك وموضعاتك جميله ولازم كلنا نفكر فيها ونتفاعل معاها

نورتى المدونه واسعدنى مرورك

انسان بلا عنوان يقول...

عصفور طل من الشباك
وقالى يا نور
خبينى عندك يانور
خبينى يانور...

اكيد هى تقصد العصفور ده

ـــــــــــــــــــــــ

انا عارف ان الرد على التعليق هيتعبك عشان كده قلتلك مترديش

بس بجد اسعدنى ردك ، وضحكنى كمان !

صحيح هو فى بطاقه شخصيه مفيهاش عنوان؟
وبعدين انتى تلاقيكى فكرتى ميت مره قبل ما تكتبى حكاية المنوفيه دى

انا امى واخده بالك من امى دى
امى من المنوفيه اصلا بس عايشه فى مصر من زمان
عادى يعنى ..مش كل المنايفه رافعين شعار مصلحة الضرايب
( مصلحتك اولا )..فى منايفه كويسين جدا

معلش تعبتك فى الرد
وكل سنه وانتى بالف خير

MeMe يقول...

أجابتك ع الاسئلة حلوة أوى .. وبتبين شخصيتك الجميلة ماشاء الله ..
كان لى الشرف انى ادخل البلوج دى النهاردة وشكرا لزيارتك ويارب تتكرر كتيـــر ..
وفعلا زى مانتى قلتى فى حاجت مشتركة كتير بينا ودى حاجة تزيدنى شرف بجد
تقبلى مرورى يافندم
MeMe

nour shahen يقول...

انسان بلا عنوان
عصفور بيقول خبيبنى .. طيب شوف انا برغم انى بحب العصافير جدا وكنت بربيهم كمان
الا لو ان عصفور دخلى الدخله دى هرزع الشباك واجرى هههههههههههه
انا بخاف من الحاجات المفجأه
بس عامة ينور العصفور البيت بيته يعنى
شكلها هتضربنى انا وانت علشان قاعدين نتريق ومش فاهمين وبنألف
يخص عليك بقى المنايفه تبع مصلحة الضرايب كدا اصحابى يكرهونى
وبعدين بما ان والدتك منوفيه متتريقش
وعامة انا بفتخر انى منوفيايه برغم ان فى حتت مثل بيقولوه عليهم يهلك من الضحك , بيقول
حطينا المنوفى والحيه في كيس , الحيه طلعت تستغيث ههههههههههههههههه
وعامة كل مكان فى الكويس والوحش
منور المدونه دايما بمرورك وتعليقك

nour shahen يقول...

meme
اولا منوره المدونه جدا جدا
واسمك غالى عندى قوى وربنا العالم
دا بجانب انه اسم جميل او أسم دلع جميل

شوفتى مش قولتلك فينا من بعض اهو
انا اللي ليا الشرف يا فندم

واجمل ما فينا كلنا فعلا اننا متشابهين بس اختلافنا جميل

أسعدنى جدا مرورك وتعليقك

أسير الجراح يقول...

اختى الغالية نور


ازيك اخبارك اية

اشكرك على سؤالك يا اجمل قلب

كل سنة وانتى ارق قلب


كل سنة وانتى اجمل روح


كل سنة وانتى بالف خير


كل سنة وانتى اغلى انسانة


كل سنة وانتى طيبة


اسير الجراح

blue-wave يقول...

ياااااااااااااااة
تحفه يا نور
بجد اجابات روعه
بس تعالى هنا
ولا جبتى سيرتى بكلمه؟
ماشى يا نور
مردودالك
وعايزاة بشنب؟
ههههههههههههههه
ماشى يا ستى
عموما ربنا يارب يرزقك باللى بتتمنيه
وكل سنه وانتى طيبه

انسان بلا عنوان يقول...

عصفور طل من الشباك
وقالى يا نوووور
خبينى عندك يانور
خبينى يانور...

عصفور طل من الشباك

اغنيه !!

لمغنيه اعتقد لبنانيه اسمها نور !!

هههههههههه

انتى افتكرتينى الفت الكلمات !

لالالالالالالا صحصحى معانا بقى

انا كده صدقت انك مش بتسنعى اغانى

الامثله على المنايفه يوووووووووووووه
عايزه بوست بحاله ويمكن ميكفيش كمان

بس كل مكان صحيح زى ماقلتى فيه الحلو وفيه الوحش واظنك من النوع الاول

نور الدين يقول...

وبعدين يا استاذة نور
كل يوم ادخل اشوف الجديد الاقى نفس الموضوع
..
الناس الشاطرين مبيتاخروش كدة
قولى للقلم يشد حبره شوية
..
كل عام وانت طيبة
المرة الجاية نلاقى الجديد بقى ان شاء الله
تحياتى
نور الدين محمود

nour shahen يقول...

انا اسفه عن تأخيرى في الرد بس لظروف صحيه
بشكر المدونين الاعزاء اللى بعتوا رد ويا ريت محدش منهم يزعل
اكيد هتجمعنا تعليقات اكتر نتناقش فيها ونتكلم نورتونى جميعا وبيسعدنى دايما مروركم

رومانسى مشاكس يقول...

ناااااااااااااااااااايس تااااااااااج

بجد اجبات روووووووووعة


تسلم الايادى يا قمر


مع خلاص تقديرى واحترامى


رومـــــ مشاكس ـــــانسى

رومانسى مشاكس يقول...

اه نسيت

يريت يا قمر تشرفينى بزيارة لمدونتى المتوضعة واتمنى يكون فيه تواصل


تحياتى

nour shahen يقول...

رومانسى مشاكس
..............
بشكرلك مرورك بمدونتى وبأذن الله يكون في تواصل من الزيارات بينا
نورت المدونه

غير معرف يقول...

福~
「朵
語‧,最一件事,就。好,你西...............................................................................................................................-...相互
來到你身邊,以你曾經希望的方式回應你,許下,只是讓它發生,放下,才是讓它實現,你的心願使你懂得不能執著的奧秘

Jojo Ayman يقول...

شركة تنظيف مساجد شمال الرياض
شركة تنظيف مساجد شرق الرياض
شركة تنظيف مساجد غرب الرياض
شركة تنظيف مساجد جنوب الرياض
شركة مقاولات بالرياض
شركة تنظيف مجالس بالرياض
شركة تنظيف مجالس شمال الرياض
شركة تنظيف مجالس شرق الرياض
شركة تنظيف مجالس غرب الرياض
شركة تنظيف مجالس جنوب الرياض
شركة نقل عفش بالرياض
شركة نقل عفش شرق الرياض
شركة نقل عفش شمال الرياض
شركة نقل عفش غرب الرياض

Jojo Ayman يقول...

شركة نقل عفش جنوب الرياض
شركة تخزين عفش بالرياض
شركة تخزين عفش شرق الرياض
شركة تخزين عفش شمال الرياض
شركة تخزين عفش غرب الرياض
شركة تخزين عفش جنوب الرياض
شركة تنظيف سجاد بالرياض
شركة تنظيف سجاد شرق الرياض
شركة تنظيف سجاد شمال الرياض
شركة تنظيف سجاد غرب الرياض
شركة تنظيف سجاد جنوب الرياض
شركة تسليك مجاري بالرياض
شركة تسليك مجاري شرق الرياض

Jojo Ayman يقول...

شركة تسليك مجاري شمال الرياض
شركة تسليك مجاري غرب الرياض
شركة تسليك مجاري جنوب الرياض
شركة تسليك مجاري المطبخ
شركة تسليك مجاري الحمام
وايت شفط بيارات بالرياض
وايت شفط صرف الصحي
شركة تسليك المجاري بالضغط بالرياض
شركة تنظيف أنابيب الصرف الصحي بالرياض
شركة تنظيف بالبخار بالرياض