2015/04/22

أشتهى رحيلاً

صعب جدا تشوف فى المنام انسان مات وكان روحك ، تحلم بأنه عايش معاك ومماتش وحتى وانت فى حلمك بتكون مرعوب انه يرجع يموت تانى ، فيرجع الالم ويكون اقوى من اول مره تفقده ..

ويا سلام لما تصحى وانت متلغبط مش عارف هو انت كنت فعلا بتحلم ، ولا انت كنت فى واقع ونمت فصحيت فى حلم انه مبقاش موجود جنبك خلاص يعنى مات .


ماذا لو ؟!!


ماذا لو ؟!! ...
ماذا لو زهقت من اهلك ودعيت عليهم يختفو وصحيت الصبح لقيت بيتك فاضى مفيهوش أهلك ؟!!
بتفكرنى بفيلم .. Home Alone .. هفرح واتنطط من الفرح واعمل كل اللى نفسى فيه وبعدين افتقدهم جدا ..
طيب يا عم سربهم شوتين بدل ما تدعى عليهم يختفو وبعدين ترجع تعيط عليهم .

ماذا لو ؟ّ!!
صحيت الصبح لقيت نفسك حد تانى .. جيت تبص فى المرايه لقيتك وش اختك .. اخوك .. أبوك .. أمك ، اهو اتقلبت لشخص تانى من بره وخلاص ، لكن من جواك أنت نفس الشخص .. يا ترا تستغل موقفك ؟!!
استغله يا نهار ابيض .. دنا هستغله اسوء استغلال ^ـــ^ .. اعيش اشخط وانطر واعمل اللى نفسى فيه مهو أنا مش أنا بقى .. لكن هو انا هرجع لنفسى تانى ولا هتدبس اعيش فى الشخصيه دى علي طول .. مش تقولى علشان اظبط احلامى .. لو هتدبس اعيش بنفس الشخصيه لأجل غير مسمى هتعامل بطريقتى واسلوبى واعيش بشخصيتى .. لكن لو شوية وارجع لنفسى وبشكلى الطبيعى هرتكب جرايم .


طيب نقول تانى .. ماذا لو ؟!!


صحيت الصبح ..


بس بقى يا عم أنت .. هو كله صحيت الصبح صحيت الصبح .. انا مبحبش اصحى بدرى اصلا .. مفيش صحيت الظهر صحيت بليل ولا أذ فجاءه لقيت كذا ..

والله يا أبنى انا عندى مليون سؤال يحمل عنوان ماذا لو .. لكن شكلك عيل رخم ومش هتعرف تجاوبنى .. طيب خلينا نسأل الناس ..

ماذا لو حلت القناعة مكان الطمع ؟!!

ماذا تفعل لو أمتلكت آلة الزمن ؟!!

ماذا لو صحيت الصبح برضو عادى يعنى ^ـــ^ ؟!!


2015/04/17

عواقب الصمت




الفـكـــر مـليـان بالكــــلام ..
خــلـى اللســـان ساكــــت ..
وحاجات كتير ليها اهتمام ..
خـلت حـاجـــات ضاعــت ..

2015/04/10

عالم السحر

قعدت افكر فى تدوينة الاسبوع ( التدوين ) يا ترى أكتب ايه ، أكتب دخلت للانترنت ليه ؟!! لأ .. مش دا السؤال .. طيب إيه السؤال .. السؤال هو انا فى الاصل بكتب ليه ؟!!

السؤال صعب اجاوبه ، او كأن اجابته هتطول قوى .. طيب نبدأ من الاول .. انا بدأت التدوين من 2008 تقريبا ، اعتقد انى بدأت من قبل كدا فى مدونه مجهوله (علي اساس ان المدونه دى بقت مشهور ^ـــ^) مش موضعنا اساسا ..

الموضوع بدأ ازاى ( كنت دايما فى موضوع التعبير بجيب 7 من 10 مهما حاولت وغيرت طريقة الكتابه ، ودا عادة كان ينرفزنى ) يمكن علشان كدا جيت لعالم التدوين .

ليه مستمره ؟!! برغم مش شايفه انى اتقدمت عن 7 من 10 ؟!!

مش عارفه فعلا ، يمكن لأنى بحاول اعبر عن الطاقة اللى جوايا بالكتابة علي قد ما اقدر يمكن اتخلص منها .. اهو احسن ما اتجنن .


إيه رأيى فى التدوين والمدونين ؟!! فيما يخص التدوين ، بعتبرها حاله ، الكاتب بيحاول يوصل فكره 

وفى نوعين من المدونين نوع بيفرض سيطرته وتكون فكرته متسلطه جدا ولا يقبل النقاش فيها ولكنه يقبل بجمل مثل ( هايل _ رائع _ انت اصلا فنان .. وما شابه ) ولو حاولت تخرج عن النص اللى هو راسمه .. يسلط عليك لعنات اللغه .. اما النوع التانى نوع لطيف مسالم (غير سام ) يقبل النقد بأسلوب محترم ولا يهتم الا بالتعليقات المثمره أو التى تحمل النقاش الى ساحة المبارزه بالكلمات .. وكل واحد يحاول يساند فكرته ويدافع عنها وهكذا حتى يستسلم أحدى الطرفين .

فى المجمل تحسه عالم خيالى من الافكار الطايره فى الهوا ، حاول تحمى ودانك وعنيك ، لأنك ممكن تصاب بأفكار صنعت لتعبث بعقلك .

اما المدونين دول كلهم بقى سواء المسيطر او المسالم فهما صحبة عمر ، بعز منهم ناس كتيره جدا وسعيده بمعرفتهم حتى أخر العمر .


علي هامش الحوار قبل ما اقفله . كنت معتقده وانا بكتب انى هكتب سطرين وشكرا . إلا ان عالم التدوين بيسرق منك الكلمات بدون ما تشعر ويوصلك لشعور صعب انى اوصفه بالكلمات لأنه شعور جميل يتحس وبس .

2015/04/04

قلم مكسور


بقيت بخـــــاف امسك قلـم ..
هربت منى كـل الخطـوط ..
ولا دا بس فـــرق الزمـــن ..
الرســـم مبقاش بالمظبـوط ..
ابداعى أصبح شىء معدوم ..
وهــــو بـــس إيـــه بيــدوم ..
حلمت فى يوم أكون رسام ..
وخلــص الحلـــــــــــــــــم ..
بمجرد ما صحيت م. النوم ..