2019/08/27

بعد السقوط

لو كل اهل الكون حاولوا يقنعوني ان الشخص بيلاقي راحته في البعد عن الناس هقولهم انهم كدابين
لأني كنت هناك وملقتش الا الشر في الوحده
في الاول بتشعر بهدوء وراحه نسبيه نتيجة ان الضجيج اللي حواليك بيبدأ يقل أكثر فأكثر ثم ينتهي
مع توقف صوت الضجيج دا بيبدأ الألم
لما تنادي ميردش عليك الا صدى صوتك
وتبدأ تمل من الوحده مهما قولت عكس كدا
اذا زادت من بعد كدا تدخلك في مرحلة بتكون فيها انت ونفسك وكأن روحك اتقسمت اتنين غير متفاهمين
ومرحله ورا مرحله في السقوط في بئر الوحده
لحد ما تبص حواليك ماتلاقيش الا الظلام
بتخاف تحاول ترجع فتكتشف انك فقدت كل طاقتك في النزول


2019/03/16

حب ظالم


كل مره كنت بسكت 
كنت اداري دموع عينيا
كنت اقول ماهو دول حبايبي
مايقصدوش الجرح فيا 
كنت بغفر كنت اسامح 
كنت اقول ماهو كله رايح
يوم بنفرح يوم بنزعل 
بعد الخصام لازم نصالح
كنت ابدأ بالكلام 
وانهي بسرعه الخصام 
وكل مره بعد مره 
يقل فيها الاهتمام
كنت بخسر غصب عني 
حبي ليهم كان ظالمني
لما صرخت وقولت حقي
كان جزاتي اتخلوا عني

2019/03/15

ولا حاجه


  شعور موجع جدا انك تشعر بال ( ولا حاجه ) ان الانسان الوحيد اللي ممكن تكلمه مش عايز يسمعك فتفهم انك عنده ( ولا حاجه ) ...

الواحد لما بيزعل من حد بيعزه بيقوله انا زعلان من كذا وكذا ، لكن تسكت وتبعد المفروض هو يفهم ايه من رد فعلك الا انه يلاحظ تغيرك ، فيسألك مالك فتجاوبه ( ولا حاجه ) ...

تبقى بتحارب قرف الدنيا وبتحاول تكمل وفاهم ان اتجاه الحرب قدامك بس لأن وراك ناس بتحبك هتحميك وفجاءه تتلفت تلاقي ( ولا حاجه ) ...

تتكوم جواك مشاعر ملخبطه ، عايز تصرخ وتبكي ، غضبان عايز تهد الكون علي فيه ، او على الاقل تهز نفسك فتخرج منها كل الاوجاع وترتاح ، بس في نهاية صراعك الداير جواك بينتهي على ( ولا حاجه ) ...


2019/03/06

قليل البخت

قليل البخت يعمل إيه
وليه أيامه جايه عليه
دا حتى أحبابه جارحين فيه
وهو يقول هتتعدل
صبر ياما على المقسوم
وكان متعشم إنه في يوم
هيفرح والسعادة تدوم
وكل أحواله تتبدل
وعاش ومصدق أحلامه
وناس على حاله ياما لاموا
وقالوا عايش بأوهامه
دا او مجنون وبيمثل
سمع فى كلامهم اتأثر
وبقى على حاله متحسر
لا خاف ولا شاف إيه هيخسر
عمل بكلامهم اتبهدل
ما كانوا سابوه على حاله
يغيروا ليه كان ماله
ما كان صابر هنياله
عجبهم لما استندل

#مها_شاهين




خارج أسوار القلب

ونقول كمان ..
خد بالك يا ولدي من النوايا
لو هترخي حصن قلبك
عشان تدخل حد قال إنه يحبك
وانت بتعديه لبوابة الأمان
قوله حبك مش كفايه
لابد تظهر النوايا
النوايا بتبان ف الوشوش
جوا العينين أبحث ودور
اوعى تخدعك المظاهر
الكدب للصادقين واضح وظاهر
وأوعي تتغر في حلاوة اللسان

#مها_شاهين

2016/04/06

اتحملت منك كتير

اتحملت منك كتير وفضلت اعافر فى الزمن
قولت بكره هيجى الخير ومعلش غالى التمن

خدت منى الأمان خدت حبى وكان كبير
والنهارده دار الزمان مسبش فيك ليه اى خير

قدمت ليك كل اهتمام ونسيت حياتى وعشت ليك
واما وصلت بر الأمان دوستنى وهونت عليك

مش صعبان عليا جرحى وجعنى بس إنه منك
يا رتها تتغير ملامحى او ياريت مادافعت عنك

مش عايزه منك حاجه تانيه مش عايزه شىء يربطنى بيك
مش هتخطر على بالى ثانيه عندى اموت ولا اعود إليك

هدمت بنا كل حاجه طب افتكرلى اى خير
وبقت واضحه مش محتاجه مبقاش عندك اى ضمير


2015/11/28

the missing part is you


وحشتينى يا عمرى الجاى وسنينى

وحشتينى ووحشنى الضى فى عنيكى

وحشنى بجد اقول تانى وحشتينى

وبحن لكل شىء فيكى

بحن لضحكه تجمعنا

لوقت راح وودعنا

بحن للهفة الصحبه

وقد ايه بقت صعبه

نلاقى حد يشبهنا

ونتجمع ولو صدفه

..