2010/12/19

مشروخ يا ناى متغنليش



مشروخ يا ناى متغنليش

بتقول كلام ميهمنيش

حب وخداع هتفرق إيه
خاين وباع كدبت عنيه
حزين وضاع همك فى إيه

مشروخ يا ناى متغنليش

بتقول كلام ميهمنيش

غبى انا صدقت ليه
ببكى وقال خايف عليه
عزفلى لحن وفرحت بيه

مشروخ يا ناى متغنليش
بتقول كلام ميهمنيش




2010/12/05

لا تندم


لا تندم على خطأ ارتكبته واخبرت به شخص قريب لقلبك ثم استغله هو يوماً للسيطره عليك او حتى للتأثير عليك لتغيير قراراتك , لا تندم لأنك اعطيته حق ان يجرحك , اعطيته صلاحيه ليست من حق اي بشر , لقد سترك الله واخفى بعض مما اصابك ليقبلك الناس بدلا من ان ينفرون منك بسبب اخطاء قد تتجاوزها يوما لتصبح شخص اخر جديد ...

أرجوك لا تندم مهما حدث ولا تتسرع او تخاف وتحاول ان تتفادى موقف بشع بالسقوط فى الاسوء منه ...

ولا تندم لأنك ازلت حجاب الغموض عن شخصيتك واختصرت قصتك وصنعت ملخص صغير عن من انت فتضاءلت بنظر المستمع ...

لا تندم ان تحدثت معه بتلقائيه حتى وان ابتعد فأنت لم تخدعه ..

كن صادق القلب ولن تندم , كن كما انت لا كما يريدون , فهم احبوك كما انت بكل مميزاتك وعيوبك لا كما يتصورون ..

لا تترك لهم حرية تغييرك , فتفقد اشراقة نفسك بما كانت تتميز به حين عرفوك , لتصبح مسخ من احلامهم ..

ولا تندم لأن سبب كل هذا الندم انك اقترفت خطيئة الحب فأغمضت عيناك ثم استيقظت من اوهامك علي ضياع حلمك

2010/10/29

يبقى كش ملك



اتخنقت لا زهقت من الحياه ومن اللي فيها والبيت واللي فيه
حظى زفت لا قرفت هو ليه الفقر مصاحبنى وملازمنى ليه

شكلى كدا هلبس شكاره وامشى ازقل بالحجاره
والعيال يخافو منى بس اصل غصب عنى

لما المذيع يسأل الضيف .. دى بنتك ؟
ويرد الضيف اه بنتى أن شاء الله !!!

لما يبقى كيلو الطماطم يعمل دقيقة دولى بعد الرخص
وصنية البطاطس هتتعمل بالجوافا اوفر طبعا


لما اعرف واحده علي النت لسنين وتبقى من اعز اصحابى

وتنسى تقولى ان عندها تلات عيال وابوهم

الدنيا مشاغل بقى هههههههه


لما الدكتور يكتب الروشته بالعربى علشان اللي فى صيدلية
التأمين مش صيادله يبقى العيب فى عنيا

لما البرتقان يبقى بطعم الخيار برغم ان البرتقانه قد دماغى
يبقى عصير البرتقان هيصبنا بالبرد دا لو لقينا العصير

لما دكتور الاسنان يقولك تدخل جمعيه معانا
جمعيات الحكومه اضمن اكيد

لما نضحك نقول خير اللهم اجعله خير طبعا مش مصدقين
ولما نفرح نعيط من قمة السعاده اللي احنا فيها


لما يمرو علي البيوت يعملو استفتاء للمرشحين للانتخابات
كان لازم يكون اول سؤال .. هل تسمع عنهم ؟!!
وبخمسين جنيه
يكون ردك اكيد بسمع كل خير ان شاء الله


لما طفل فى تالته ابتدائى يبكى بعد المذاكره انه مش فاهم الدراسات
وتقوله اخته بالصف السادس امال لو تشوف الدراسات بتاعتنا ؟
فيرد يقولها ... ابقى قابلينى لو طلعت للصف السادس !!

لما قلة الادب تبقى شعر علشان مش عاجبنا الحج ابو علاء
يبقى ننشر علي الفيس بوك سلامتك يا ريس وسلامة *** أحمد فؤاد نجم



ضربو الاعور علي عينه قال خسرانه خسرانه

2010/09/12

قصة دمعه


غريبه قصه الدمعه ساعه تصبر على الالم واوقات تحيى الجراح والندم
مش عارفه ليه لقيت نفسى بقارن بين الدمعه والدم الاتنين طعمهم مالح ودافى
اوقات تشعر ان قلبك بيموت برغم ان انفاسك داخله وطالعه بتأكد انك حى
واوقات بتبكى وانت فاكر انك بتهون علي نفسك برغم ان صراخك وحرقتك باينه فى التنهيده
اضطراب انفاسك بصدرك زى صخره بيعصف بيها موج البحر
عيونك اللي بيصعب انها تركز علي مكان وكأنك فى طريق فقدانك لحاسه البصر
وبتلمح طيف من كل صوره كأنك بتودع ذكرياتك وبتعلن الرحيل
ومحاولاتك للسيطره علي الدموع وفشلك فى ردعها وكأنها سيل قرر يغرق مدينة الاحزان
اللى دايما تروى اراضيها بدمك , مدينة الاحزان اللي ساكنه بين ضلوعك
مدينة اخلتها من البشر لكن كل انسان حب يسيب ذكرى ليه بمكانه القديم
اللي حفر حرف اسمه بالنار علي الجدران , واللي كتب قصته بالدم علي بابها
واللي ساب ورقه طيرتها رياح الخوف , واللي زرع ورده داستها رجلين الظلم
مآسى ومدينة مهجوره هتطهرها امواج السيل
وتتركها تحى نفسها من جديد بأبهى صوره كانت عليها اول مره اتشكلت
غريبه قصه الدمعه لما تبدأ بهدوء وتشتعل زى ثوره ومع ذلك تنتهى فى سكون وصمت

2010/08/07

افتح قلبك

حين يعتريك الألم فتقرر ان تريح جفونك او تختبىء وراء نومك , حين تصير أحلامك كوابيس فتنتفض من مكانك وتبتعد عن سريرك , محاولا التخلص من الشعور بالفزع الذى أصابك وبعد لحظات تنتبه أن مخاوفك تكمن بعقلك وحدك وحين تبصر سكون كل شيء حولك كما كان تعلم أن خوفك أبعد ما يكون الأن ولكنه ينتظرك حين تغمض جفونك من جديد , فتهلل غير مبالي عندما تتأكد انه كان مجرد كابوس وليس واقع مرير تحياه , وتلتقط يداك أقرب كتاب لتسعد عقلك بالأفكار الجديدة لتختزن لنفسك كم هائل من رحيق الأمل , و تبحر بعيناك خلف سطور الكلمات , وتسبح وراء فكره , وحين تطمئن بأنك تجاوزت خوفك تعيد التفكير بكابوسك المخيف وتبدأ المقارنة بينه وبين الألم الذى كنت تختبىء منه بالنوم , ثم تتضارب الأفكار بعقلك , فتقرر أن تتخلى عن الخوف والألم وتتمسك بتلك الفكره التي أسعدتك حتى وان كانت ستدوم بضع لحظات فقط , فتستفيق من معاناتك ويتجلى الكون امام عينيك بجماله , وترتسم علي شفاهك ابتسامه خبيثه وكأنك تريد ان تصرخ انا من قهرت الاحزان والالم , وتسكن لحظه دون تفكير ويذهلك ان عقلك اصبح كصفحة بيضاء خاليه من أي شيء , فتعيد ترتيب أولوياتك بكل هدوء ممكن , حينها فقط تعلم أنك مجرد انسان يصيب ويخطىء يؤثر ويتأثر , لست قلعه حصينه ولا انت ببرج هائل من المستحيل إختراقه , تضعف بكلمه أمام جند من جنود الله سبحانه وتعالى , وتيقن ان ما كنت تهرب منه شيء محتمل يسهل التعامل معه فهناك كثيرا من الاشياء قد يصعب عليك تحملها , فلا تكتئب او تقف عند شيء وتعتبره المستحيل بعينه , ولا تتعجب لكن اصبر , حتى يقضى الله امرا كان مفعولا, واحتمى بالله وتضرع إليه بالدعاء , فأنه رحمن رحيم كريم قريب سميع بصير مجيب لدعوة الداع أذا دعاه , فلا تبخل علي نفسك بالدعاء
" كل سنه وكل العالم الأسلامى بخير وكلكم بألف خير يا رب "

2010/07/18

دايرة الحب


اللي تحبه ميحبكش واللى يحبك متحبوش
تسأل ليه ازاى معرفش قدرك كان ومتستهلوش

اللى تحبه توفى إليه تنسى الناس وتجرى عليه
يغدر بيك ويخونك ليه يمكن ذنب اللي مشفتوش
اللى يحبك يفرح بيك يهمل ناسه يعيش حواليك
وقت ما تيجى عنيه فى عنيك تمشى كأن متعرفهوش

اللى تحبه ميحبكش واللى يحبك متحبوش
تسأل ليه ازاى معرفش قدرك كان ومتستهلوش


ذنبك ذنبه ميهمكش كل غلطه وليها أصول
بص بعينك شوف حواليك وقت ما تلقى حبيبك قول
قوله بحبك بص عليه وأسأله راضى بحبك ليه
وان قال لأ سيبه وخليه واوعى تعيش عاشق مذلول


اللى تحبه ميحبكش واللى يحبك متحبوش
تسأل ليه ازاى معرفش قدرك كان ومتستهلوش

2010/07/10

مقتطفات المصايف


شىء من بعيد ندانى واول ما ندالى جرالى ما جرالى


الشىء البعيد هو البحر , ومين فينا مبيحبش يروحله , بس انا ليا احلام وكلام كتير معاه , دلوقتى كمان بقى فى احداث وضحك مبقاش يفارق الرحلات ليه والحمدلله




ومها اغيب وارجعله بلهفه برضو يلقانى واضمه فى حضنى واسمعله يقولى تانى وحشانى .. دا وصفى للبحر ..




لما بشوفه بحس ان موجه هيخرج من اراضيه علشان يرحب بيا بيروح ويجى زى طفل بيدور من شدة فرحته بزوار لبيته , ايه بقى مالكم مذبهلين ليه كدا المدونه مدونتى والاحلام احلامى واتخيل براحتى ههههههههه ايون هى بلطجه

طيب متزعلوش هبطل رغى واحكيلكم عن مقتطفات المصيف , اعيرونى انتباهكم , يا سلام علي اعيرونى دى جامده منى صح , انا مالى رجعت رخمه ليه كدا , اعوذ بالله , شكل الميه زى ما بهتت على شكلى بقيت شبه عبده وعثمان عارفينهم طبعا , انا اصلا اول ما رجعت اصحابى بقو يقولولى ادريس رجع هو اللي بيروح للبحر بيرجع اسود كدا , كان لونى ابيض او مكدبش عليكم اصفر يعنى قبل ما اسود فى المصيف , بينى وبينكم انا معرفش رجعت لونى ايه شكلى نسيت لونى الاصلى كان ايه , ديتها شهر ونص وشوية أريال وغسيل ومكوى وارجع كما كنت بأذن الله

طبعا انا سافرت يوم جمعه وكلنا عارفين رحلات اخواننا الاعزاء رحلات اليوم الواحد يوم الجمعه والاحد فيعتبر انى تنازلت عن حقوق اول يوم وتانى يوم كان جميل اما تالت يوم بقى وكان يوم الاحد نزلنا للبحر متأخرين , وبعدين فوجئت ببنت صغيره بتصرخ من ورايا , ففكرتها بتغرق لفيت ناحيتها لقيتها بتقولى يا طنط من فضلك ابعدى الواد دا عنى عايز يغرقنى , بصيت بعيد شوية لقيت فى شاب بيقولها طيب لما ترجعى بس فقمت عامله دايره كدا انا واللي معايا حواليها وكل ما يحاول يغطس ويدخل ما بينا نخرجه تانى , لحد ما بعد وقالها طيب ماشى , فسألتها مين دا قالتلى دا ابن خالتى وعايز يغرقنى فقولتلها طيب خليكى معانا ومتخافيش وشوية والاقى ولد تانى جاى وهى بتقولى الحقى الواد دا كمان عايز يغرقنى , فقالها تعالى قالتله لا فحاول يدخل ما بنا قام ابن اخويا زعقله فرجع , فبنسألها مين دا كمان قالت دا اخويا , فسألناها هو انتى جايه مع مين قالت مع امى وخالتى واولادها فقولنلها وفين مامتك وخالتك ولا يكنوش عايزين يغرقوكى هما كمان هههههههه , فقالت لا هما قاعدين بره ومن لهجتها قولنا شكلها من دمياط وسألناها هو انتى من دمياط قالت لالا انا من ديكردس باين كدا اصل الكلمه صعبه وانا عمرى ما سمعت عن البلد دى المهم قولنا نطلب شوية توضيح قولنلها فين ديكردس دى قالت في ميت مجاهد , فضحكت وقلتلها لا كدا عرفنا , قوليلى مكان مشهور طيب اكون سمعت عنه , فبصتلى كدا وكأنى جايه من المريخ وقالتلى فى مصر فى مصر , مقدرتش امسك نفسى من الضحك ساعتها وقلتلها منا عارفه انتى شيفانى من السنغال , فهى زعلت ولسه هتبعد عننا ظهر قنديل كبير فرجعت لينا تانى وابن اخويا راح يشيله ويخرجه , اه نسيت اقولكم ان المصيف كان فى راس البر , مكان كويس بس يا الله علي كمية القناديل اللي فى الميه , المهم بعد ما رجع ابن اخويا فبقوله لا فى اسكندريه مكنش فى كدا ولا حتى جمصه الاقى البنت بتقولى لا جمصه فيها وكتير قوى كمان , فقولتلها لا انا روحتها كتير ومفيهاش بالشكل دا قام صوتها على عليا وقالتلى بقولك فيها وكتير كدا كدا كدا وهى بتشاور بأيديها لقيت اختى خلاص ميته ضحك وبتقولى شوية وهتضربك بالقلم فيها فيها يا بنتى خلاص انتى ادرى وهنا خلاص البنت انسحبت من وسطنا وبعدت
منكرش عليكم انا حسيت انى الغبيه الوحيده فى مصر اللي مسمعتش عن ان راس البر فيها قناديل بالشكل دا كل اللي اقوله معقول كدا يقولى هو انتى متعرفيش , ولو كنت اعرف مكنتش عملت فى نفسى كدا , اه والله


الأنكت بقى فى يوم قولت مش هنزل وهقضيها علي الشط اسلم , اصلى قبلها كنا لسه هننزل وعلي ما مشينا شوية فى الميه وانا لسه بستعد اغطس لقيت فى حاجه تحت رجلى قولت زوباله عاتى بقى وهب بضربها برجلى علشان اشيلها اترفعت لفوق لقتها قنديل ملقونيش جمبهم جريت ههههههه , المهم جبت كرسى وحطيته علي حرف البحر قال يعنى البحر ليه حرف صنية بسبوسه هى ما علينا , ورميت رجلى فى الميه وقولت هيبقى لا عوم ولا استمتاع بالموج كمان , وقاعده بنفخ انى مش عارفه انزل شبعت قرصات من بيض القناديل علي ما اعتقد , هو فى حاجت بتقرص هى ايه الله اعلم بس بتوجع وبتعلم مش زى قرصة القنديل نفسه لالا دى حاجه كدا تفاريح يعنى , وفجاءه الاقى حد رزع كرسيه جمبى وكويس انه مجاش علي رجلى ولقيت الست بتقولى البحر عالى النهارده قولتلها اه فعلا وانا لا شيفاه عالى ولا واطى بس اهو تقفيل حديث وخلاص فقالتلى عارفه انا كنت جايه يوم واحد بس لما لقيت المكان جميل كدا قولت لجوزى يأخدلنا شقه ونكمل الاسبوع الف شمال يمين هو ايه اللي حلو , بقى نفسى اقولها تاخديش الشقه بتاعتنا وارجع انا هههههههه


وافتكرت فى اللحظه دى الديك لهيطه , هو المصيف دايما بيفكرنى بيه , فاكرين الديك لهيطه اللي كان فى فيلم اونكل زيزو حبيبى , انا شوفته حقيقى , بس مش بتاع الفيلم , دا كان ديك فعلا فعلا عملاق ما شاء الله حاجه كدا متتوصفش , بس بيخوف والله , تحسه بيشوفك عدوه لهيطه بقى وشايف نفسه , وبيخوف الناس تطلع فوق السطوح , السطوح سطوحه بقى , دا كان سطوح البيت اللي أجرنا فيه , انا شوفته بالصدفه طلعنا بنسأل صحبة البيت عن حاجه فهى دايما تقعد تتشمس اتاريها بتأكل لهيطه الله يحرقه قطع خلفى , وافتح الباب الاقى شىء مؤذى والله فكرته كلب لولا صوته قفلت الباب ونزلت جرى , قولت هو مصيف باين من اوله


اه نسيت اقولكم من البوست الاخير قررت احقق احلامكم اقصد احلامى انا واركب عجل , وركبت ويا رتنى ما ركبت ايه دا بتسوقوه ازاى رجلى وجعتنى منا خلاص حسن الختام بقى


لقيت اولاد اخواتى كلهم رايحيين قولتلهم طيب يلا احاسب انا بس اركب معاكم طبعا ما صدقو خدعتهم العزومه ميعرفوش انهم هيحتاسو بيا , واخويا يقولى معقول هتركبى عجل اقوله اه يقولى ولا عمرك عملتيها هتركبى ازاى , واغمزله انه يفهم ابدا , بيحرجنى قدام جمهور الاطفال , بعدين حطيت ايدى علي كتفته وقلتله ربنا يخليلنا العجل ابو اربع عجلات الله , امال هما عملوه ليه هههههههه
وبت ليله اجاركم الله اقول يا رجلى , ودى نهاية اللي يفكر يحقق حلم غيره , ويا رب يكون صيف سعيد عليكم وتقضو فيه اجازه حلوه زى بتاعتى


اه نسيت اقولكم انى زورت هناك مكان اسمه اللسان اخدته منه الصوره اللي فوق خالص وصور تانيه المنظر روعه هناك هبقى اعرض عليكم الصور ببوست تانى , سبحان المبدع دا المكان اللي ذكرت فيه الايه الكريمه , بسم الله الرحمن الرحيم ( مرج البحرين يلتقيان بينهما برزخ لا يبغيان ) صدق الله العظيم

2010/06/11

حلم طفل كبير



سألتها الطفوله جميله صح
طيب ليه مبنقدرش نعمل اللي كنا بنعمله زمان نسيناه ؟!!
قالتلى لا بس منقدرش نعمله ..
قالت كمان يعنى انا مثلا نفسى امشى اتحنجل فى الشارع زى ما كنت بعمل زمان
فأنا ضحكت قوى تتحنجلى قالتلى اه بس مش فاهمه ايه كان حبى فى المشيه دى ..
قولتلها انا كنت بمشى عادى بس وقت ما كنت احب اجرى بجرى
دلوقتى مينفعش ابقى ماشيه بعقل كدا وبعديها اقوم جاريه
هتلاقى الناس بتبص عليك وكأنك اتجننت
انا افتكر اليوم اللي كنت باكل مصاصه فى البيت وكان لازم اروح لصحبتى وخرجت ونسيت المصاصه فى بوقى وطول الطريق الناس بتبصلى بنظرة تجبنى من فوق لتحت كدا
دا علشان المصاصه , لا وانا بقى اول ما لقيت نظرات الناس كدا قولت يا ترا بيبصو علي ايه افتكرت المصاصه اللي فى بوقى قولت طيب ماشى مهى مش عيب مسكتها بايديى وبقيت الفها فى بوقى زى الاطفال , خليهم يتفرسو بقى
يلا خليها تكمل هما هيحرمونا من الطفوله كمان او حتى الحلم بيها
امال اشمعنا لما بنبقى فى رحله مبنشعرش بجمالها الا واحنا بنجرى وبنلعب وبالذات فى الجناين المفتوحه وتلاقى الصغير بيجرى والكبير بيجرى , امال انا بحب جنينة الحيوانات من شوية , مش بس بصور فيها مناظر طبيعيه مشوفتش حد صورها قبل كدا لا وكمان محدش بيبص عليك ويعلق لما يشوفك برغم سنك الكبير بتجرى ولا بتلعب , واى العاب بقى مبتفرقش , هو احنا علشان نستمتع بحياتنا لازم نروح مكان بتتفق فيه الناس علي نفس الفكره , زى المصايف انا بحب انزل الميه بكامل الملابس الرسميه هههههههه وتلاقى البلاجات اللي فيها ناس بتنزل كدا لو نزل حد بالمايوه يقلوله معلش روح البس هدومك او متنزلش زى بعض المدن اللي كلنا بنعرفها زى شرم الشيخ يقلولك معلش روح اخلع وبعدين تعالى انزل للميه ( حرر عقلك ) اما لو فضلت كدا متنزلش ...
يعنى احنا بنخنق بعض بأفكارنا وتعليقاتنا وان مكنتش تبقى بنظراتنا , شوفت فيلم بيعملو فيه اعلان للالبان وبيقولو ان الاطفال بتكره ريحة اللبن بسبب الزفاره بس عارفين انا مكنتش من الاطفال اللي مبتحبش اللبن انا اصلا فطمونى بالعافيه هههههههه ويمكن نسيو يفطمونى , يعنى انا لحد النهارده بحب اللبن جدا , بس عارفين ان اللبن اللي موجود دلوقتى هو اللي وحش انا اصلى شربت اللبن بخيره زمان مقصدش نوع اللبن اللي اسمه بخيره لا انا قصدت انى كنت دايما بشرب اللبن فى البلد عندنا يعنى من الجاموسه علي بوقى ههههههههه
بعد الغلى طبعا برغم انه بيجى من الجاموسه دافى يتشرب بس لا انا مشربهوش الا لما يتغلى الاول , مكنش عمرى اشم ريحه وحشه فى اللبن بالعكس كنت بستمتع جدا بطعمه وريحته المميزه اللي كنت بعرف بسببها اى نوع من الالبان حلو ولا وحش مغشوش ولا لا
يااه زمان كان فى مليون حاجه جميله مرينا بيها وحبيناها , يا ترا مش كلها بنقدر نعملها دلوقتى ليه , ودايما بنقول عيب علي حاجات مش حرام اصلا , الا هو احنا جبنا كلمة عيب منين بأفكارنا الغريبه دى , ان مكنتش حرام ومهياش غلط ليه قولنا عليها عيب
تصدقو المجتمع بتاعنا دا عايز فرمته واعادة ترتيب زى الكمبيوتر , مهو اللى فيه ده افكارنا وافكار اللي سبقونا ونقدر نغيرها بس عايزه دراسه علشان يبقى تغيير محمود ومدروس ....
كل واحد بقى يحكيلى عن حاجه كان بيحبها وهو صغير ولسه معاه او سابها علشان مكسوف منها برغم انها مش غلط ,,

2010/05/01

الوحده


الوحده شعور فظيع ممكن يدق بقلبك بألم ملهوش مثيل , خليط عجيب بيجمع ما بين الحزن والشجن وصمت يخطفك حتى وانت فى وسط الناس , شعور يقطع كلامك ويعجز افكارك , يمحى البسمه من جذورها ويترك لمحه من الحيره على جبينك وتسائل ؟!! الجأ لمين اشكيله طيب هشكى من ايه , شعور غريب ساكن جواك بيخليك مخنوق .
تقول لازم اتكلم مش مهم هقول ايه بس المهم الاقى حد يسمعنى ويكون مهتم , طيب مين , تمد ايدك وتمسك موبايلك وتقلب بين الاسماء , اكلم فلانه لالا مش هتكون فاضيه اكلم فلان لا بلاش هيتخض اكلم دى محناش اصحاب قوى طيب صديقتى المفضله لا بلاش مقدرش اتكلم هتفكرنى بشكيلها مش هتفهمنى , وتفضل ايدك تقلب بين الارقام وتتوه عينك بين الاسماء وتنتهى بتركه جنبك منغير ما تكلم حد , كترت الاسماء وكتار جدا اللى قولنا عليهم اصحاب لكن مين فيهم فى وقت زى دا ممكن يلم شتاتك يريحك بكلامه لما يرتب افكارك ويهديك لبدايه الطريق من جديد ويمشيه معاك خطوه بخطوه ويحسسك بالامان , وتنصدم ان مفيش حد فعلا ممكن يسمعك منغير ملل او ممكن يبديك على نفسه او يخليك تشكى حالك لو هو حاله مش تمام , وساعتها هتقول يا ريت كان ليا حبيب هو دا الانسان الوحيد اللى ممكن يسمعك ويصبر عليك مهما قولت ومهما كنت متلغبط , لا هيفهمك غلط ولا هيزهق من شكواك لأنه بيتمناك تتكلم بيحب يسمعك حتى وان كان صوتك حزين , اكيد كل واحد فينا عنده اصحاب ويمكن يكون منهم الاوفياء جدا كمان وعنده اهل واخوات وجيران وحواليه العالم بأكمله , لكن لما يسيطر عليه شعور الوحده مش ممكن يبعده عنه الا حبيب , لو كان ليك حبيب متفرطش فيه بسهوله مهما كانت الظروف صعبه متحسش بيأس , ولو مكنش متدورش علي الحب لأنه مش عمله ممكن نجتهد للحصول عليها , لكنه عباره عن عمله مفقوده ممكن نلاقيها واحنا ماشيين علي الأرض , ودا مش لعدم اهميتها ولا لأهمالها ابدا , دا بس ممكن يكون لبساطتها وسهوله وجودها منغير جهد يمكن لصدق القلوب اللي كانت بتتمنى تقابل الحب .

2010/03/29

الريس مواطن

قعدت مع نفسي كدا وفكرت وانتم عارفين طبعا ان عقلي تاعبنى شوية ومش بيبطل تفكير بعيد عن السامعين بالذات لما الموضوع يخص الريس متقال بذات نفسه , سمعت عن رحلة علاجه وزي باقي البشر كنت بتتبع الموقف بس فى لحظه جه علي بالى حاجه بتقول الريس مواطن ؟!! أه طبعا الريس مواطن زيه زيينا الفرق انه بيغنى لينا او علينا مش هتفرق , ما علينا من الفرق خلينا فى وجه التشابه اللي بينا وبينه , طيب لما يبقى الريس مواطن اكيد رحله علاجه كانت علي نفقة الدوله ؟!! مش هو مواطن برضو , تصدقو سؤال نفسى اعرف اجابته , طيب لو كان اتعالج علي نفقة الدوله ودا حقه مبقولش لا , هو برضو استنى الموافقه بعد ما قدم الاوراق وقعد فتره يا حرام مش جاله رد ولا اتمضاله بالموافقة الفورية , الا حد يقولى هو لما بنقدم طلب للعلاج علي نفقة الدوله الرد بيجى منين , مين فى ايده يقول فلان يسافر فورا وفلان لسه شوية خليه لما يستوى اقصد يموت اهو يبقى وفر , لما كبار الدوله بكل فلوسهم ونفوذهم ( اللهم لا حسد ) يتعالجو علي نفقة الدوله امال احنا نتعالج علي نفقة مين , هى الدوله هتتحمل تعالج مين ولا مين وكلنا خربانين , ما علينا من النفقه دلوقتى , فكرت فى حاجه كمان معلش تعباكم معايا ركزو شوية , هو ليه الريس متقال سافر يتعالج بره مصر هو ميقدرش يجيب اكبر دكاترة العالم لحد عنده (بفلوسي يا كلا.... ) ولا علشان جو بره يساعد علي الشفاء اسرع , نقى بقى بعيد عن السامعين لحسن حد من اخوانا البعده يقول احنا كمان سنطالب بجو نقى بعد الشر علينا منه , يلا ما علينا اصلا من كل دا المهم الحمد لله انه رجع بخير فلله الحمد علي السراء والضراء , وغنوا معايا أغنيته المفضلة .....
طويل العمر يطول عمره ويزهزه عصره فيخرب بيتنا وينصره علي مين يشتكيه هاى هئ .

2010/03/26

تفاءل


التفاؤل إحساس رائع هو الأمل فى الوصول للسعاده , التفاؤل بدايه تقدر تسميها نور الطريق , التفاؤل هو الايمان بالقدر خيره وشره , التفاؤل هو التحمل فى وقت الأزمات أملين فى تغيير للاحسن بإقتناع رهيب أنه اكيد هيكون الجاى شيء مختلف هيرضينا , التفاؤل شعور بيغمرك ويصبح كهالة نور محيطه بيك وكأنك لو لمست أنسان ممكن تسعده زيك , مش بيقولو الضحك معدى والحزن معدى اكيد التفاؤل برضوا معدى , كمان يا اعزائي الابتسامة معديه ( الأبتسامه فى وجه أخيك صدقه ) يعنى خدمه متعددة الفوائد ممكن تقدمها بدون تكلفه لا منك ولا من مستقبلها , كل المطلوب منك انك تتفاءل وتكون صاحب قلب صادق , صدقني مش وحش انك تزعل لكن بعد الزعل تصفى ودا هيكون اجمل ما فيك , ممكن تبكى لكن بعد ما تجف دموعك وتعود الشمس تنور بعد أمطار الشتا .. أبتسم .
التفاؤل هو النغمه التي لا تمل شفاهك من ترديدها بحب وشجن وانت مطرب لسماعها وتتمنى ان تشاركها مع كل من حولك , فسعادة الانسان ليست فقط أسعاد نفسه ولكنها تكمن فى أسعاد كل من حولك أن استطعت , دايما بقولها فى نهاية الحوار
( تفاءل يا آخى ) , لقد قال الله سبحانه وتعالى فى كتابه العزيز" فأن مع العسر يسرا أن مع العسر يسرا " وهذا تأكيد من الله سبحانه وتعالى ان الفرج أت لا محاله فلماذا لا نتفاءل !!
ومع كل عسر يأتى اليسر فسبحانك اللهم وبحمدك
أشهد ان لا اله الا انت استغفرك واتوب اليك

2010/02/27

ألم المشاعر

حيرنى التفكير فى احوال الناس وقلوب البشر , ايه القلوب الحجر دى ازاى قسيت كدا , طول عمرى بسأل نفسى ازاى نقسى علي حد بيحبنا , ازاى نجرح ونعذب ونقول أسفين دا قدر , بيبقى نفسى اصرخ واقول القدر مش ظالم احنا اللي بنظلم نفسنا , احنا اللي بنختار غلط , احنا اللي مبنحاربش , لأن الحكايه فى نظرنا متستاهلش , نحارب علشان مين وليه علشان مجرد صديق , وكأن سهل فى الدنيا دى تلاقى صديق ووفى , نحارب علشان حبيب , عريس مشى يجى الف غيره , الاستسلام تفكير سلبى ومحبط , دا احنا حتى مبنحافظش علي صورت الحبيب فى خيالنا وبننساه بمرور وقت قليل جدا , ازاى نكون النهارده بنحب حد ومتعلقين بيه وبكره عادى جدا مجرد انسان بيمر من جنبنا , ايه القلب دا , احنا بنهرب ولا بنتجاهل الذكريات , وبنخاف حتى تمر بعقولنا لحظات فبنختار ننساها للأبد , فى يقين جوايا بيقول اللي يخون حبيب هيندم أشد الندم , بس هل يا ترا وقت ندمه دا هيفكر دا ذنب مين ولا هيقول الدنيا جت عليا , يمكن مش شرط دايما ان الجرح يبقى تخليص ذنوب , بس اكيد فى ناس رحمة ربنا بتلحقها فى الدنيا يمكن لأنهم مكنوش وحشين قوى كدا زى ما اتصورنا , وساعات بقى بنريح عقولنا خالص ونقول مقلب القلوب هو الله النهارده بنحب فلان بكره مش حاسين اننا بنحبه يبقى من عند ربنا لا معلش معتقدش , يبقى انتم اصلا فى الاساس مكنتوش بتحبو فلان دا , واللي يحيرنى اكتر الناس اللي بتنسحب من حياتك بدون ذكر جمله لا خير ولا شر كدا بدون اسباب , ألم فراق الناس دى ملهوش مقياس علشان اقولكم مدى قسوته وعذابه من الحيره والحنين , عارفين لو شخص مات بنكون مرتاحين نفسيا اننا عارفين هو فين وعارفين بعد عنا ليه وساعتها بس بنقول قدر الكلمه وهى بتخرج من قلوبنا بتصحبها تنهيده تسليم للرحمن سبحانه وتعالى , لكن اللي بعد بدون سبب واضح لينا , بنمشى ندور بعنينا عليه فى كل طريق وكل مكان جمعنا سوا او حتى كنا بنفكر نروحه سوا بتبقى ذكرياته عذاب والتخلص منها محال , بنقول ساعات بينا وبين الناس لا خلاص احنا نسينا ومبنفكرش اللي بعد هو اللي اختار , مش عارفه بنحسن صورتنا فى عيون الناس ولا بنحاول نحسنها فى نظرنا احنا يمكن علشان نقدر نكمل قال يعنى قلوبنا قسيت خلاص وبقينا زى باقى الناس قلوب بتنبض علشان تعيش والسلام .
اعتقد مفيش غير اننا نقدم تحيه للناس اللي مشاعرها ماتت , الناس اللي اصبحت حجاره بتمشى بقدرة ربنا , الدنيا بتلف ومبتقفش عند حد وزى ما خونت هيجى يوم وتتخان هى كدا يا عزيزى يوم ليك ويوم عليك , نصيحه منى احتفظ بالذكريات ولو فى سرداب محدش يوصله ولا يتفتح يمكن الذكرى دى تصحى قلوبنا فى يوم تانى ترجع بتدق بأحساس يمكن وقتها تكون طوق نجاه لينا من تحول القلوب للاسوء , اسقى مشاعرك دايما بالطيبه وكون انسان مهما اتغير الزمن .
( انا مش هقول كالعاده اعذرونى انى مبردش علي التعليقات بس والله يا جماعه انا بفرح بيها جدا وبجد بتغير كتير فى نفسيتى كل ما احس انى قدمت شىء وعجب ولو انسان واحد , يمكن انا بطلت اعلق علشان زهقت من المجاملات والناس اللي بتمر وخلاص ويمكن بطلت اكتب كتير او اعلق فى المدونات التانيه علشان ميبقاش الرد مجرد مجاملات وبكتفى بالقرايه الا ما ندر يعنى انى اعلق , برضوا مش متأكده فعلا لكنى احيانا بحب لو ارد علي كل تعليق بس بحس انه واجب تقيل وانا طول عمرى مبحبش الواجب بقى برغم انى بكتبه ههههه بس هنا بقى فى مدونتى برخم شوية كتير عليكم لازم ارجع اقول اعذرونى *

2010/01/23

كلمه واحده


مهانش عليك تقولى كلمه واحده تطمنى عليك
مهانش عليك تريح قلبى مره دا انا قلبى دايب فيك
منايا اطمن بكلمه واحده حتى لو هتغيب سنين
ويوم ما ترجع هتلاقى قلبى زى ما هو دايب حنين
وبعتلك ولا ميت جواب ولا مره جالى رد السؤال
وازاى راح اكدب على قلبى تانى واقوله احلم بالمحال
طيب جاوبنى رد عليا خلاص مبقتش بتحبنى
طب حتى رد بكلمه واحده هقبل تقول كرهتنى
بس لا بلاش السكات إياك تسبنى للآهات
تجرحنى مره تقتلنى مره ومعاها أندم على فات
دا اللي فات من عمرنا أجمل سنين مرت بنا
ازاى نسلم نقبل تضيع ومعاها يدبل حلمنا