2015/11/28

the missing part is you


وحشتينى يا عمرى الجاى وسنينى

وحشتينى ووحشنى الضى فى عنيكى

وحشنى بجد اقول تانى وحشتينى

وبحن لكل شىء فيكى

بحن لضحكه تجمعنا

لوقت راح وودعنا

بحن للهفة الصحبه

وقد ايه بقت صعبه

نلاقى حد يشبهنا

ونتجمع ولو صدفه

..

2015/11/04

خوف الشتاء


شعور غــريب ومش معــــروف ,,
ويا الشتــاء ليه صايبنى خــوف ,,
بيــــن الضلـوع القـلـب يرجـــف ,,
مــــــع حنين فــى القلب يعصف ,,
حنين لشــــىء مـش مألـــــــوف ,,
دايمـــــا بحس بشعــور غـــريب ,,
وكـــأنــــى بفـقـــد 100 حــبيـب ,,
والشمـــــس ليه عــايزه تغـــيب ,,
سيبانى وحــدى فـى ليل عجـيب ,,
مبينتهيـش ولا قـــادره اشـــوف ,,
حـاجــات كـتير بتروح وترجـــع ,,
فيها اللى ضاع منها اللى يوجع ,,
والبــرد مـبيرحـمــش خــــــوف ..

2015/09/07

متقولش ليه


متقولش ليه حتى أن زعلت 
من الزمن متجيش عليه
..
متقولش ليه حظى قليل 
ولا ليه الليل دا طول 
ولا بكره كان جابلى إيه ولا إيه 
لا جاب كتير
لكن أنت بس تحمد عليه
..
زعلان علي الحلم اللى ضاع
ولا علي القلب اللى باع
ولا حلمت بشىء كبير 
أكبر من اللى تقدر عليه
..
#جزء

2015/08/20

قسمة ونصيب


ســعـيده أنا بكــل اللــى فعــلا وصلت ليه 
وسعيده اكتر علي ضــــــاع من بين ايديا 
لو كان نصيبى حقيقى فيه _ مكنش ضاع 
ولا يـــــوم بكـــــت عـليه عـنيا 
افرح يا قلبى بلى جاى مهو بكـــره أحلى 
صدقى يا قلبى اللى ضــــاع مكنش أغلى 



2015/07/19

لعبة الأشتياق


انطلق الغائب إلى حيث كان

وأنا إلى نقطة البداية 

لنبدأ لعبة الأشتياق من جديد .


2015/05/09

ميزان الصبر


انا اكتر حــــــد صبــور بيمل ..
متقولش جنان ومعــــايا الحـل ..
وميزان الصبر دا امتـى اخـتل ..
لو تعرف جرى إيه متلومنيش ..
هحكيلك بس أصبر ــ مـا تمـل ..
عندك واحـــد ياما شاف الــذل ..
فكـــر ينطــــق فـ.لسانه أتشـل ..
طـالــع نازل بس علي مفـيش ..
...

2015/04/22

أشتهى رحيلاً

صعب جدا تشوف فى المنام انسان مات وكان روحك ، تحلم بأنه عايش معاك ومماتش وحتى وانت فى حلمك بتكون مرعوب انه يرجع يموت تانى ، فيرجع الالم ويكون اقوى من اول مره تفقده ..

ويا سلام لما تصحى وانت متلغبط مش عارف هو انت كنت فعلا بتحلم ، ولا انت كنت فى واقع ونمت فصحيت فى حلم انه مبقاش موجود جنبك خلاص يعنى مات .


ماذا لو ؟!!


ماذا لو ؟!! ...
ماذا لو زهقت من اهلك ودعيت عليهم يختفو وصحيت الصبح لقيت بيتك فاضى مفيهوش أهلك ؟!!
بتفكرنى بفيلم .. Home Alone .. هفرح واتنطط من الفرح واعمل كل اللى نفسى فيه وبعدين افتقدهم جدا ..
طيب يا عم سربهم شوتين بدل ما تدعى عليهم يختفو وبعدين ترجع تعيط عليهم .

ماذا لو ؟ّ!!
صحيت الصبح لقيت نفسك حد تانى .. جيت تبص فى المرايه لقيتك وش اختك .. اخوك .. أبوك .. أمك ، اهو اتقلبت لشخص تانى من بره وخلاص ، لكن من جواك أنت نفس الشخص .. يا ترا تستغل موقفك ؟!!
استغله يا نهار ابيض .. دنا هستغله اسوء استغلال ^ـــ^ .. اعيش اشخط وانطر واعمل اللى نفسى فيه مهو أنا مش أنا بقى .. لكن هو انا هرجع لنفسى تانى ولا هتدبس اعيش فى الشخصيه دى علي طول .. مش تقولى علشان اظبط احلامى .. لو هتدبس اعيش بنفس الشخصيه لأجل غير مسمى هتعامل بطريقتى واسلوبى واعيش بشخصيتى .. لكن لو شوية وارجع لنفسى وبشكلى الطبيعى هرتكب جرايم .


طيب نقول تانى .. ماذا لو ؟!!


صحيت الصبح ..


بس بقى يا عم أنت .. هو كله صحيت الصبح صحيت الصبح .. انا مبحبش اصحى بدرى اصلا .. مفيش صحيت الظهر صحيت بليل ولا أذ فجاءه لقيت كذا ..

والله يا أبنى انا عندى مليون سؤال يحمل عنوان ماذا لو .. لكن شكلك عيل رخم ومش هتعرف تجاوبنى .. طيب خلينا نسأل الناس ..

ماذا لو حلت القناعة مكان الطمع ؟!!

ماذا تفعل لو أمتلكت آلة الزمن ؟!!

ماذا لو صحيت الصبح برضو عادى يعنى ^ـــ^ ؟!!


2015/04/17

عواقب الصمت




الفـكـــر مـليـان بالكــــلام ..
خــلـى اللســـان ساكــــت ..
وحاجات كتير ليها اهتمام ..
خـلت حـاجـــات ضاعــت ..

2015/04/10

عالم السحر

قعدت افكر فى تدوينة الاسبوع ( التدوين ) يا ترى أكتب ايه ، أكتب دخلت للانترنت ليه ؟!! لأ .. مش دا السؤال .. طيب إيه السؤال .. السؤال هو انا فى الاصل بكتب ليه ؟!!

السؤال صعب اجاوبه ، او كأن اجابته هتطول قوى .. طيب نبدأ من الاول .. انا بدأت التدوين من 2008 تقريبا ، اعتقد انى بدأت من قبل كدا فى مدونه مجهوله (علي اساس ان المدونه دى بقت مشهور ^ـــ^) مش موضعنا اساسا ..

الموضوع بدأ ازاى ( كنت دايما فى موضوع التعبير بجيب 7 من 10 مهما حاولت وغيرت طريقة الكتابه ، ودا عادة كان ينرفزنى ) يمكن علشان كدا جيت لعالم التدوين .

ليه مستمره ؟!! برغم مش شايفه انى اتقدمت عن 7 من 10 ؟!!

مش عارفه فعلا ، يمكن لأنى بحاول اعبر عن الطاقة اللى جوايا بالكتابة علي قد ما اقدر يمكن اتخلص منها .. اهو احسن ما اتجنن .


إيه رأيى فى التدوين والمدونين ؟!! فيما يخص التدوين ، بعتبرها حاله ، الكاتب بيحاول يوصل فكره 

وفى نوعين من المدونين نوع بيفرض سيطرته وتكون فكرته متسلطه جدا ولا يقبل النقاش فيها ولكنه يقبل بجمل مثل ( هايل _ رائع _ انت اصلا فنان .. وما شابه ) ولو حاولت تخرج عن النص اللى هو راسمه .. يسلط عليك لعنات اللغه .. اما النوع التانى نوع لطيف مسالم (غير سام ) يقبل النقد بأسلوب محترم ولا يهتم الا بالتعليقات المثمره أو التى تحمل النقاش الى ساحة المبارزه بالكلمات .. وكل واحد يحاول يساند فكرته ويدافع عنها وهكذا حتى يستسلم أحدى الطرفين .

فى المجمل تحسه عالم خيالى من الافكار الطايره فى الهوا ، حاول تحمى ودانك وعنيك ، لأنك ممكن تصاب بأفكار صنعت لتعبث بعقلك .

اما المدونين دول كلهم بقى سواء المسيطر او المسالم فهما صحبة عمر ، بعز منهم ناس كتيره جدا وسعيده بمعرفتهم حتى أخر العمر .


علي هامش الحوار قبل ما اقفله . كنت معتقده وانا بكتب انى هكتب سطرين وشكرا . إلا ان عالم التدوين بيسرق منك الكلمات بدون ما تشعر ويوصلك لشعور صعب انى اوصفه بالكلمات لأنه شعور جميل يتحس وبس .

2015/04/04

قلم مكسور


بقيت بخـــــاف امسك قلـم ..
هربت منى كـل الخطـوط ..
ولا دا بس فـــرق الزمـــن ..
الرســـم مبقاش بالمظبـوط ..
ابداعى أصبح شىء معدوم ..
وهــــو بـــس إيـــه بيــدوم ..
حلمت فى يوم أكون رسام ..
وخلــص الحلـــــــــــــــــم ..
بمجرد ما صحيت م. النوم ..

2015/03/30

قصاد عينى

شايفك قصـاد عينى ومش عـارف أقولك إيـه
زعــلان ليه احكيلى لـو اتكلمت خسران إيــه
عارفنى هسمعـلك وهتحـمـل كلامى معـــاك
وكأنى برجعلك هكون جنبك وأكــون ويـــاك
ولحــد مــــــا أشوفــك بتتبســم مقولـش عتاب
لــو حتى بعديهـا رجـعـنا مــن تانى أغـــراب
أنا بس كـــان نفســى اخــفـف عنك الأحــزان
وإن ربى قـدرنى تحــس بلحظـه واحـده أمـان


2015/03/25

عم عشم


المعـــاملــه خــــد وهات 
اصل العشم دا زمانه فات
عـم عشم من القهر مات

كان عنده حلم جايز كبير
إن البشـــر شيـلالـه خير
فتح قلوبهم يشوف مكانته
ومن اللى شافه قتله السكات

دى قلوب بشر مليانه شر
والغـــدر فيهم دا طبعه مر
حـــاول يغير قــد ما يقــدر
قال الحكايه محتاجه صبر

فى كل مره عشمه يزيد
لكن دا ايــه يفــل الحديد
الا الحــديد

عم عشم فى الهم عاش
حلـــم بيـوم يجى ومجاش
ومن يوميها صبح حكــــايه
عشان مفيش حاجه ببلاش

بقت المعامله خـد وهـات 
اصل العشم دا زمانه فات
عم عشم من القهر مات

2015/03/21

أمى




انا مش لقياها وهى فقداها وغيرنا بتدور عليه 
بسكت واتحمل هى تتألم وغيرنا ليه رافضها ليه 
بقول هيجى يوم واشوفها وهى قالت هعيش معاها 
وغيرنا ليه دايما ناسيها كارهها هارب من لقاها 
دا حكم ربى انك تصونها وتراعيها بأهتمام 
غيرك بيتمنى يلاقيها يشوفها مره واحده كمان 
بتهرب ليه من حضنها وتبعد ليه عنها 
بتهمل ناسى ودها وهى صابره يا قلبها 
دى كل مناها انك تكون احسن من كل البشر 
قاست كتير واتحملت وصبرت ياما ع. القدر 
من حقها تفرح براجل وجنبها دايما يكون 
من حقها تفرح ببنت حمتها من كل العيون 
من حقها تقولها كلمة شكر بأبتسام 
من حقها بعد السنين تحس لحظه بالامان 
مش هقولك هات هدايا هى مش منتظره شىء 
بس والله حرام تهملها وفى اخر الطريق 
اخرت تعبها وحبها بالهجر ليه بتصدها 
ولا تنطق بكلمه واحده تأذى ويسيل دمعها 


أبوك وامك ليهم حقوق ..
واللى بتعمله النهارده اولادك هيردهولك بكره
.. ازرع ... تحصد .. 
من زرع خيراً حصد خيراً ومن أهمل فى زرعه لم يحصد شيئاً

2015/03/19

معادله ملخبطه


جواه معادله ملخبطه 
بنقول أمل ويا الملل على الفراق تخلق حياه متشلفطه
متدمره متكسره مش ذنبه حتت سكره 
مش قادره تلغى طعم صبر
والصبر طال بلغ المحال وحالته حاله مدهوره
والمسخره لما عطش جمع فى ميه مقطره
لما شرب حلقه نشف لقاها ميه معكره


2015/03/07

صديقى


عارف لما تصادف أتنين أصحاب قوى ، وكلامهم وهزارهم يفكرك بصديق عمرك اللى انشغل فمبقتش تلاقيه ، وتنخطف ابتسامتك من حوارهم ويمحيها ألمك علي فراقه ..

طيب عارف لما تشعر انك مبقتش تفرق عند حد ، برغم أن حواليك ناس كتير مهتمه بيك ، لكنك مفتقد لشخص واحد ، أهتمامه بيك بيرجعلك فرحتك ..

عارف لما كنت بتقول زمان إن صديقك بالنسبالك زى أشهر الممثلين ، لا دا هو أفضل من كدا ، شايفه قد ايه شخصيه جميله ، مبهور بعقليته وأخلاقه وثقافته بتكلم كل الناس عليه ودلوقتى مبقتش بتجيب سيرته ..

فاكر لما قالك متبقاش ورايا ولا قدامى وخليك بس جنبى ، وفجاءه بدأ يجرى وانت بتحاول تسايره لكن مقدرتش تلحقه .. وقولت لنفسك أفضل فى مكانى يمكن يبص وراه وينتبه انى مبقتش قادر أكون جنبه ..

عارف أنت ليه وقفت فى مكانك ، مش قادر تطالبه إنه يهتم بيك أو يرجع ليك أو .. أو .. 

علشان الأهتمام مبيتطلبش .. والصداقه ليها حقوق كتير .. هو نسيها وأنت سكت .


2015/03/02

البطاقة المصرية


كنت رايحه اركب النهارده ، وقفتنى واحده ست وسألتنى بجديه أنا شكلى حلو كدا ، فبصيت عليها وهزيت رأسى بأبتسامه وانا مذبهله بمعنى أه ، ولفيت وشى تانى ، ورجعت تخبط علي كتفى من جديد ، انتى متأكده انى حلوه ؟!! .. يعنى شكلى حلو ؟!! .. بصيلى كويس .. فزاد ازبهلالى وبأبتسامه اقرب للضحكه هزيت راسى مره تانيه بمعنى أه .. وانا عماله افكر مالى انا .. حلوه ولا وحشه .. قاطعت ظنونى وقالتلى اصلى رايحه اعمل البطاقه وعايزه اطلع حلوه ، وهنا نطقت بصوت عالى مع الضحكه متحاوليش ^ــــ^ ..

( قصة عذاب لا يفهمها سوا المصريين )

2015/03/01

أما آن لك أن تعرف ..



كل ما أحاول ادعى عليـــه 
قلبى يقولـى إيــاك تأذيــه
واسـأل قلبى يخونك ليــه
يسكت قلبى ويسرح فيه
واعــرف أنــه باقـى علـيه
شـب القلب ميعرف غيره
غصبن عنـــه يحـــــن إليه

2015/02/26

أهلك لتهلك



لازم تحب أهلك اكتر من اى حد تانى فى حياتك .. وتديلهم الاولويه
والاهتمام ..
متستغربش ^ــــ^ .. أقولك ليه ....
أهلك هى الناس اللى بتقدر تستوعب يوميا منظرك وأنت صاحى منكوش ومعمص ^ــ* 
أهلك هى الناس اللى بتصحالهم برجل بنطلون مرفوعه وواحده نازله وتبتسملك وتقولك صباح الخير يا موكوس ( دا أسم الدلع بتاعك ) 
أهلك هى الناس اللى لما تيجى خارج وانت عامل شعرك شبه القنفد وموقفه لفوق (سبايكى ) تقولك متشيك ورايح علي فين ( القرد فى عين أهله غزال ) 
أهلك هى اللى لما تتأخر بره مع اصحابك تتصل تقولك أنت فى انهى داهيه دلوقتى وتطالبك انك ترجع ( وحشتهم أكيد ^ـــ* ) 
اهلك برضو يا أنسه هى اللى تقعد تتحايل عليكى تستحمى وتقعد أمك تسرح شعرك الليفه 
أهلك يا باشا هى الناس اللى هتتحمل أهمالك وشرباتك المرميه شمال ويمين وترتب غرفتك , صحيح هتعايرك فى بعض اللحظات بس دا من غلبها ( تلاقيك طلعت عنيهم عفانه ) 
أهلك برضو يا أنسه هما اللى لما تدخلى للمطبخ وتجربى فيهم اكلاتك العبقريه وتطلع تقرف ياكلوها وهما ساكتين ويقلولك بكره تعملى الاحسن ( صحيح بيشردوكى فيما بعد بس دا من باب الدعابه ^ـــ^ ) .. 
أهلكم برضو هى اللى بتكون شايفه كسرتك ودموعك وبتعمل إنها مش واخده بالها علشان متزودش همك وتحاول تكلمك عادى وتهتم بيك 
علشان تخرجك من الحاله دى .. 
أهلك بيشوفو مزاياك قبل عيوبك بيطبطبو عليك بيهمهم أمرك عايزينك سعيد ودايما بيحبوك حتى لو مكنوش قادرين يوصلو دا ليك .. بلاش تأذيهم وخليهم أحق الناس بأهتمامك . 

2015/02/09

داست علي جراحى


داست علي جراحى وسألتنى سرحتى في مين !!
وضحكت من همــى وقـولتلهـا فـى شـــوق وحنين
كـان لــى حبيب سـافـر وراجــع ليا بعـــد يوميـــن ..
فقالتلى أحكيلـى ،، إيه القصـة ،، وفين بقى راح ؟!!
فضحكــت مــن تانــى عشـان أدارى الألـم وارتاح ..
قولتلهــا أحكيلى ،، عن أخبارك ،، وصلتـى لفين ؟!!
فقالتلى انا عارفــه طريقتـــك دى بقـــى وبعـدين ..
أذا كنتى راح تحكى ،، أنا سامعه ،، وبقولك إيـــه !!
لــو كنتـى هتخبـى ،، راح أعرف قلبك إيه مداريـه ..
بتبص علـي وشى ،، مـا بالبسمه رسمــت أفـــراح
لــو تعـــرف إيــــه بقلبى كانت شافت بعينها جـراح


2015/01/24

كــــ لــــى ـــان حبيب

 


ليــــــــه سيرتك لمـا تيجى بتلف الدنيا بيا
ليه اسمك لو سمعته علي طول تدمع عنيا
واقـول كـــان لى حبيب كان كل الدنيا ليا
وفرقنا النصيب ولا اقـولــش غـدرت بيا
الجرح فى قلبى بان مبقتش قادره اخفيـه
وسألونى بملامــــه ليـه باقيه لسـه عليـه
فـــأكدب واقــول نسيته مبقتش افكر فيه
يعـــودو ويسألونى كـان أسـم حبيبك إيه
يــا ناس حــرام عليكــم سـبونى بلى فيا
جـايـيـن تصبـــرونى ولا جايـيـن علـيـا

2015/01/21

أحسنلك تنسينى


هــو: هيجوزوكى غيرى

هى : معقوله دا مصيرى

هـو : طب يلا بينا نهرب

هى : مقدرش .. افهمنى
      ايوه بحبك .. لكن

هــو: افهم إيه 
  
هى : اسمعنى
       ايوه بحبك .. لكن
       صدقنى غضب عنى

هــو: تبقى انتى اللى هزمتينى

هى : مصيرى مش بأيدى

هــو: علشان كدا بعتينى

هى : هفتكرك طول عمرى

هــو: احسنلك تنسينى

( مشهد عن مسرحية أنت حر )

2015/01/18

مازلـ بقلبى ــت

والله ما اتخلى عن حد بحبه مهما عمل ولا لحظه
ما دام حبى فى قلبه لسه


2015/01/17

مش بعيد



بتحسده على إيــــــه وليــــــه ؟!! ...................

مش بعيد قلبه يكــون مخنــوق حـزين مليان بهـم

واللى أنت شايف انــه لازم يفرحـــه دا بـس وهم 

مش بعيد قلبـه يكـون بيحب ناس مش حاسه بيه

ويامــــا قــــال بكـــره تهـــون والسنين جايه عليه 

مش بعيـــد ضحكتــه بيـــدارى بيهـــا اللــى فيــه

ويخاف يقولك أنه عايش فى العذاب تضحك عليه

2015/01/15

مجرد أراجوز


جايز يكون أراجوز 
وتمــر بيـه أوقــات
هيكشـــر الأراجـوز 
ما يبيع لكم حكايات


2015/01/04

أخر أحبتى على وجه الأرض

  
معقول تنسانى وازاى هنساك

ساكن وجدانى والروح وياك

قلبك لو سابنى انا قلبى معاك

مهو حتى فى بعدك بستنى لقاك

وتهون أحزانى والله فداك

بس ما تنسانى دى الروح عشقاك

عايش علشانك لو حتى بعيد

طيفك بيزورنى منغير مواعيد

وقالولى انساك ويا ريت بالايد

ما حاولت كتير والقلب عنيد

وصفولى الصبر قالو يقويك

منا دوقت المر وباقى عليك

وبكل مشاعر كانت جوايا

كتبت كتير ولا أثر فيك