2015/02/26

أهلك لتهلك



لازم تحب أهلك اكتر من اى حد تانى فى حياتك .. وتديلهم الاولويه
والاهتمام ..
متستغربش ^ــــ^ .. أقولك ليه ....
أهلك هى الناس اللى بتقدر تستوعب يوميا منظرك وأنت صاحى منكوش ومعمص ^ــ* 
أهلك هى الناس اللى بتصحالهم برجل بنطلون مرفوعه وواحده نازله وتبتسملك وتقولك صباح الخير يا موكوس ( دا أسم الدلع بتاعك ) 
أهلك هى الناس اللى لما تيجى خارج وانت عامل شعرك شبه القنفد وموقفه لفوق (سبايكى ) تقولك متشيك ورايح علي فين ( القرد فى عين أهله غزال ) 
أهلك هى اللى لما تتأخر بره مع اصحابك تتصل تقولك أنت فى انهى داهيه دلوقتى وتطالبك انك ترجع ( وحشتهم أكيد ^ـــ* ) 
اهلك برضو يا أنسه هى اللى تقعد تتحايل عليكى تستحمى وتقعد أمك تسرح شعرك الليفه 
أهلك يا باشا هى الناس اللى هتتحمل أهمالك وشرباتك المرميه شمال ويمين وترتب غرفتك , صحيح هتعايرك فى بعض اللحظات بس دا من غلبها ( تلاقيك طلعت عنيهم عفانه ) 
أهلك برضو يا أنسه هما اللى لما تدخلى للمطبخ وتجربى فيهم اكلاتك العبقريه وتطلع تقرف ياكلوها وهما ساكتين ويقلولك بكره تعملى الاحسن ( صحيح بيشردوكى فيما بعد بس دا من باب الدعابه ^ـــ^ ) .. 
أهلكم برضو هى اللى بتكون شايفه كسرتك ودموعك وبتعمل إنها مش واخده بالها علشان متزودش همك وتحاول تكلمك عادى وتهتم بيك 
علشان تخرجك من الحاله دى .. 
أهلك بيشوفو مزاياك قبل عيوبك بيطبطبو عليك بيهمهم أمرك عايزينك سعيد ودايما بيحبوك حتى لو مكنوش قادرين يوصلو دا ليك .. بلاش تأذيهم وخليهم أحق الناس بأهتمامك . 

هناك 4 تعليقات:

موجة يقول...

كلام حلو جدا
وفعلا الواحد مش بيعرف قيمة اهله الا فى حالتين
الاولى انه يتجوز
التانيه انه يفقدهم

ربنا يحمى اهالينا ويجعلنا اهل للخير ليهم ولاولادنا

تحياتى

nour shahen يقول...

موجة :
........
اللهم امين يا رب ، ربنا يباركلك فى احبابك
تعرفى انا أكتشفت ان اهلك مش بس اهلك فى اصدقاء برضو بيكونو اوقات اكتر من الاهل . يمكن ربنا بعتهم علشان يعوضو ويكملو النقص اللى اوقات بيحصل

والاولاد والزوج برضو اهل ، واولاد الخاله والعمه وما شابه اهل بينقصنا بس نرجع روح اللمه من جديد وميبقاش اهلنا هما بس اللى عايشين معانا فى نفس البيت وبس
منورانى واسعدنى تواجدك

موجة يقول...

ربنا يباركلك فى كل ذويك واهلك

الظاهر كده ان مبقاش حد يعبر البلوجر فنقعد انا اعلقلك وانتى تعلقى لى وبس
هههههههههههه
بس يلا ادينا لسة عندنا امل

ممكن اسال سؤال
ايه سر الاسم (عندما تعشق المكرونة) ؟

nour shahen يقول...

موجة :
.........
مجرد أسم بس يمكن علشان بحب المكرونه ^ــ^ .. انا مكنتش مسمياها الاول كدا بس عدلته علشان يبقى هو والفيس بوك واحد . أصبح اسم بعتز بيه

بعدين تنورينى انورك احنا ملناش الا بعضينا