2015/03/07

صديقى


عارف لما تصادف أتنين أصحاب قوى ، وكلامهم وهزارهم يفكرك بصديق عمرك اللى انشغل فمبقتش تلاقيه ، وتنخطف ابتسامتك من حوارهم ويمحيها ألمك علي فراقه ..

طيب عارف لما تشعر انك مبقتش تفرق عند حد ، برغم أن حواليك ناس كتير مهتمه بيك ، لكنك مفتقد لشخص واحد ، أهتمامه بيك بيرجعلك فرحتك ..

عارف لما كنت بتقول زمان إن صديقك بالنسبالك زى أشهر الممثلين ، لا دا هو أفضل من كدا ، شايفه قد ايه شخصيه جميله ، مبهور بعقليته وأخلاقه وثقافته بتكلم كل الناس عليه ودلوقتى مبقتش بتجيب سيرته ..

فاكر لما قالك متبقاش ورايا ولا قدامى وخليك بس جنبى ، وفجاءه بدأ يجرى وانت بتحاول تسايره لكن مقدرتش تلحقه .. وقولت لنفسك أفضل فى مكانى يمكن يبص وراه وينتبه انى مبقتش قادر أكون جنبه ..

عارف أنت ليه وقفت فى مكانك ، مش قادر تطالبه إنه يهتم بيك أو يرجع ليك أو .. أو .. 

علشان الأهتمام مبيتطلبش .. والصداقه ليها حقوق كتير .. هو نسيها وأنت سكت .


هناك 4 تعليقات:

المشخصاتية صولا يقول...

عارفة

انا يمكن ما بقيتش قادرة أفتكر أحداث كتيرة في حياتي من ضمنها صداقات كانت غالية علي وراحت

بس حسيت بالبوست اوي كأني عايشاه في اللحظة دي دلوقتي

جميل يا نور
تحياتي :)

nour shahen يقول...

مكنتش احب افكرك بلحظه حزينه فاتت ، لكن يا رب ما تعود

انا مع الاسف مبنساش صداقه كان غاليه حتى لو راحت بيفضل اجمل ما فيها حتى وان كان هيفضل معاها شوية ألم

منورانى دايما يا قلبى

رحاب صالح يقول...

مساء البنفسج
مكنتش احب ان اول تعلق في المدونة يكون عن الموضوع ده
مشكلة ان يكون الاقرب ليكي هو الي ظالمك
مش عايزة اتكلم في الموضوع ده عشان متألمش

nour shahen يقول...

رحاب صالح :
............
صباح الفل بقى نسبة لانى لسه صاحيه ^ــ^
وحياتك ولا انا كمان كنت اتمنى ان اول زيارة يجى قدامك الموضوع دا بس اعمل إيه حكم القوى اللى طلب موضوع عن الصديق فى المخطوطه .. يلا ربنا ييسر ونكتب شىء افضل
ربنا يكفيكى كل ما يؤذيكى يا رحاب
ومنورانى اكيد