2009/08/18

زهقت والله يامصر


كسبت نص عمرك يلى ما شوفت مصر
لا عاد فيها سماحه ولا كرامه فى مصر
مصر مبقتش مصر
كل حته فى بلدى مفيهاش ملامح مصر
ونص الشعب فيها مبقاش من اهل مصر
ضاعت روحها الجميله ضاع كل شىء فى مصر
مصر مبقتش مصر
لا عادت مصر امى ولا نيلها زى دمى
شوارعها اتكسرت وترابها اصبح يعمى
وهقولها وانا مش خايفه ومراره فى قلبى تدمى
مصر مبقتش مصر
اه يا بلدى الحبيبه اه يا نبع الحنان
مبقتش احس فيكى الا بعدم الامان
مقدرش انطق برأيى ولا سمعت الادان
مهى شوية موسيقى غطت علي الايمان
ولما أحزن يا بلدى مقدرش اقول كمان
ولو اكتب بأيدى وانشرعلي الحيطان
يخدونى ويحبسونى ويقولى انى جبان
طب فين عدلك يا مصر
زعلانه انى بغلط وبقول رأيى فى جنابك
وانا مزعلش ليه وانا متهان من ترابك
قالو ليكى فيها ايه غير كلمه فى الشهاده
طب افضل فيكى ليه وازاى القى السعاده
زهقت والله يا مصر


" كفايا الحوادث اللي بتحصل كل يوم من اغتصاب وسرقه وأهانه علشان تخلينا نكتب اسوء من كدا .. لو حد مضايقه الكلام فأرجوه ميعلقش لأنى برغم اللي كتبته لسه بحبها لكن من حقى أزعل منها لما تأذينى .. وسكت الكلام

هناك 25 تعليقًا:

blue-wave يقول...

كلام يوجع
بس حقيقى
تسلمى

ماما يقول...

برافو عليكى
عرفتى تعبرى صح عن كل اللى فى قلبى
ويمكن فى قلبى اكتر من كدا
نسيتى الحراميه..والمنتفعين
ونسيتى ونسيتى
!!!!!!!!!!!!!!
مين يقدر مايعلقش
مين يقدر يحبس رايه فى بلد ضاعت على ايد شوية قطاعين طرق
نهبوا البلد وبعتوا فلوسهم لبنوك سويسرا
الهى يحرقهم بيها فى نار جهنم
قولى امين

الازهرى يقول...

سكت الكلام وانتهى ما فاضلش غير كلمه
مكتوبه فى ضعفنا
رغم اننا قلنا
قالوا الكلام على الورق وما عادش له معنى
............
مش فاكر باقى النص
لكن المهم ان العيب عندنا احنا
وبداية التغيير برضه مننا احنا
لكن ايه ذنب مصر نحملها كل اخطائنا
وايه ذنب النيل

خلونا نواجه المخطىء الحقيقى لان ده اول مشوار الحل

تحياتى دوما

عاشقة القمر يقول...

سلام عليكم
مافيش حاجه صعب عشان تعرفي انا بتعذار عشان مدونه مش شغاله
ثانيه بقول لي اخوايا كل سنه انت طيبه عشان هو مش معناه في ماليزيا
ثالثا بارك لي همس عقد القرا لي اختها
يهننئبه باقين لي عيد ميلادهم
ايه صعب
غربيها

yasmina يقول...

السلام عليكم اسفة على الاقتحام دة بس حقيقى عجبنى عنوان المدونة اوى . واحب اقول لحضرتك ان دايما كدة الحقيقى بتوجع بس احلى حاجة ان حضرتك بجد خفيفتيها علينا شوية بالكلام الجميل دة. وياريت تقبلى مرورى وكمان تنورينى فى اى وقت

آخر العنقود يقول...

حقيقة مرررررررة
وللأسف بقت أكتر حاجة بتوجع هيا الحقيقة

بس بردوا بنحبها وهنفضل نحبها

تحياتى
وكل سنة وانتى طيبة
:)

شمس النهار يقول...

ازيك
مين اللي قال ان الانسان اللي بيحب ما يقدرش يعاتب حبيبه بشده او يلفت انتباهه للغلط
وللأسف هي دي الفكره المسيطره علي ثقافتني المعوجه لو انت لفتي نظر حد لحاجه مش لطيفه فيه اول عملها ضايقتك تبقي انت مش بتحبيه هي الام وهي بتعاقب ابنها والا تزعق فيه او حتي تضربه بالرغم اني ضد سياسة الضرب دي
بتكون كده بتكرهه الانسان مابيعملش كده غير مع اللي بيحبه بس
ولما ييأس منه خلاص .......
وبعدين كلامك كله صح
بس تفتكري الحال ده هيتغير ازاي لازم احنا نتغير الاول وياريت كل واحد يغير من نفسه ويؤثر في اللي حواليه لحد ماتوسع الدايره ونبتدي نرجع زي زمان
تاني درة الشرق
تسلم ايدك
وكل سنه وانت طيبه وبخير وصحه وسعاده

حياه بلا عنوان يقول...

السلام عليكم ورحمه الله وبركاته
نور ازيك عامله ايه كل سنه وانتى طيبه وكل سنه الكل بخير
كلمك صح على فكره اى قناه دلوقتى تلقى فيها الموضيع دى وتلقى الخطف والسرقه والتحرش ليه مصر مبقاش فيها امان فعلا بجد بقت حاجه صعبه قوى ربنا ياستر يارب
تحياتى

محمد عبدالرحمن شحاته يقول...

ان كان هناك اشياء يزدري منها الناس في مصر ويوجد شيئ مازال يحمل الخير فهناك امل
فالامل في هذه البلده اهما كثر فسادها
تقبل مروري

nour shahen يقول...

blue-wave:
..........
كنت اتمنى ميكونش حقيقى لأنى تاره بزعل منها وتاره ادافع عنها
نورت المدونه

.........................

ماما :
.......
لو باقى فى قلبك كلام حاولى تكتبى , أننا نخرج زعلنا بالكلام احسن ما نطق ونلاقى نفسنا فى لحظه ضاع من قلوبنا حبها بل واتقلب كره
طيب خلى باقى الكلام فى سرك احسن انتى لو كتبتيه بالثوره دى هنبقى انا وانتى فى زنزانه واحده ههههههههه
بس امين يا رب العالمين
رمضان كريم عليكى ونورتى المدونه

................................

الازهرى :
........
يا ريت كنت كتبتها كلها لأنى بصراحه مسبقش وسمعتها بس يمكن لو قرأتها افهمها اكتر
تعرف انى لفتره قريبه كنت بقول زيك تمام العيب فينا مش فى مصر
طيب تعالى نفكر إيه هى مصر
للأسف يا عزيزى مصر ما هى الا كلمه ونحن اصلها وتكوينها فلما اقول انا زعلانه منها مقصدتش غير اهلها وحكامها وقوانينها
هتقولى زعلانه ليه هقولك لما تشعر انك الوحيد اللي بيطبق القوانين بحزافيرها وفى الاخر متلاقيش وجود لكرامتك ولا لأدنى معنى للأنسانيه هتقول ساعتها انك زعلان
علي الاقل مقولتش انى كرهتها انا قولت انى زهقت
أنا مش من نوع الناس اللي بتطلع للاتوبيس وتشخبط علي الكراسى ولا تقطع فيها ولا انا من الحبيبه اللي بتحفر علي الشجر والحيطان اسمائهم للذكرى ولا انا من المهملين اللي بترمى فى النيل اكياس وعلب وهى قاعده بتملى نظرها منه
انا مجرد شخص تأذى من كل أولائك الاشخاص اللي بيكونوا كلمة مصر

نورت المدونه

................................
عاشقة القمر :
.............
وعليكم السلام ورحمة الله وبركاته
ان شاء الله بكره ترجع تشتغل واحسن من الاول ربنا يرجعلك اخوكى بالسلامه يا رب
وربنا يبارك لأخت همس الاحباب عقد قرانها وانا تقريبا بقول نفس اللي انتى قولتيه ههههههههه
نورتى المدونه

..................................

yasmina :
..........
وعليكم السلام ورحمة الله وبركاته
لا أسف ولا حاجه انتى نورتى المدونه
لو عجبك اتفضليه والله ما يغلى عليكى
بس تشوفيلى عنوان غيره بقى
وبعدين بلاش حضرتك بتحسسنى بحاجات غريبه اولها انها بتحسسنى بأنى كبرت ومحدش بيحب يبقى كبير السن برغم اننا هنكبر بس شكلى مش مقتنعه انى بكبر ما علينا
مشيها اخويه قولى انتى علي طول
الحمدلله انى قدرت اعمل شىء مفيد على الاقل التخفيف شىء مش وحش
نورتى المدونه بتواجدك وتعليقك

nour shahen يقول...

اخر العنقود :
.............
أتمنى متكونش آلمتك قوى لأنها مش صدمه
اعتقد كتير منا زهق بس مش عارف يقول حاجه

وحبها اكيد فى قلوبنا لأنه اتولد معانا من يوم ميلادنا

كل سنه وانتى بألف خير يا رب
ورمضان كريم والله اكرم
نورتى المدونه بمرورك العطر

.................................

شمس النهار :
...........
الله يسلمك يا شموسه انا بخير والحمدلله ازيك انتى يا رب تكونى بخير حبيبتى
اهو تعليقك قال اللي كان تايه منى مقدرش اعبر عنه بالكلام
اعتقد لازم نفوق ونتغير علي الاقل نعمل اللي علينا بس انا شكلى زهقت من كتر ما عملت اللي عليا لدرجة انى ملقتش فايده زهقت
كل سنه وانتى فى عز وهنا برضا ربنا
واكيد نورتى المدونه كعادتك

.............................

حياه بلا عنوان :
...............
وعليكم السلام ورحمة الله وبركاته
الله يسلمك حبيبتى انا بخير ولله الحمد
اتمنى تكونى انتى كمان بخير وصحه وسلامه
ليه دى كلمه صعب الرد عليها لأنها هتاخد صفحات وصفحات وفى النهايه ممكن منوصلش كمان الله المستعان
ربنا يسترها لحد ما نمر منها علي سلام
نورتى المدونه ومشكوره علي التعليق

..................................

محمد عبد الرحمن شحاته :
.....................
محدش قال أن الامل راح لكن فى لحظات يأس الانسان بيشعر ان الكون كله بقى مظلم
ولكن الأمل فى الله كبير
نورت المدونه واسعدنى مرورك وتعليقك

mohamed ghalia يقول...

معاكى حق
بس هى برده بلدنا

rovy يقول...

رغم حزنى و مرارى و صعبانه عليا بلدى
رغم الاهه المكتومه و اللى بتقطع صدرى
مش قادره اقول غير تسلم ايديك حبيبتى و اختى ..
عندك حق فى كلامك و معاكى فى كل كلمه
بلادنا فينك يا حلوه طول عمرك كنتى صبيه
و ليه كده شيبوكى قبل الاوان بأوان
يمكن علشان سكتنا و طال سكوتنا كمان
و يمكن يكون علشان .. تاه فيكى و ضاع الانسان

.........
لو فضلت اكتب مش حيخلص الكلام
تسلم ايديك يا نور و كل سنه و انتى طيبه حبيبتى و يارب بكره احلى من النهارضه ..
ارق تحياتى

موناليزا يقول...

واضح اننا كلنا زعلانين:)
---
كل سنة وانتى طيبة يا جميلة بمناسبة قدوم شهر رمضان واعاده الله علينا بالخير واليمن والبركات

عاشقة القمر يقول...

شكلو كده انتي بتستهر عليه اوك شكرا بس مافيش حاجه كانت صعب بس ناس كده سودانيه معناها كلام صعب قبل مايقراء خطت ف ينفسو مش فاهم

الملاك يقول...

السلام عليكم ورحمة الله وبركاته
أختى وحبيبتى فى الله نور

كل ما عبرت عنه جميعنا نشعر به ونعيشه ونألمه فهو أصبح واقع على الجميع إلا من رحم ربى لكن أختى الحبيبه بلادنا ليس لها اى ذنب فيه بل على العكس نحن من أذنبنا فى حقها فهى أرض الله التى حبها بإسمها هذا وكرمهاووهبها لنا لكننا لم نحافظ عليها وجعلنا الجميع ييهينها وينظر إليها بهوان فرجاء ان نكتفى بذلك فلا تلقى أيضا الإهانه على إيدينا

أختى الحبيبة أرجو أن تتفهمى كلامى فشتان بين العبد وما وهبه الله من نعمه فهى فى الأصل نعم والعبد هو من يحولها إلى نقم

تقبلى دعواتى الصادقه لك بأن يحفظك الله ويحفظ قلبك

دمت برعاية الله

صدفة جميلة يقول...

السلام عليكم ورحمة الله وبركاته
ليه بس كده ايه خلا ص مش خايفه يابنتى كولى عيش ومش جنب الحايط بدل متكليه بحلاوه جو الزنزانه
خلا ص مشربتيش من نيلها منعسطيش من طينها مشفتش باه خربها المرسوم على جدرانها يعينى على شبابها واهلها وصحابها خنتهم ورمتهم فى سجونها
ولا يقول كلمة حق ولئه مش منها دا عدو مش ابنها فمشى جنب الحيط ورضى وكفايه انك لسه على ارضها بتمشى يخوفى بكره يطلعوا قرار على المشى اليمشى اكتر من تلاتين خطوه يدفع غرامة خطاوى
ههههههههههههههههههههههههههههههههه
ياله سلام

صدفة جميلة يقول...

السلام عليكم
الصوره دى جميله قوى
بس مش شايفه حاجه الواد دا مش مصرى نضيف وكمان الجريده اجنبيه مش الوفد او الاهرام ياترى لو طلعت السبع اخطاء هاكسب ايه
كل سنه وانتى طيبه

عاشقة الأحزان يقول...

السلام عليكم

مش تزعلى حبيبتى ده مش حالك انتى لوحدك ده حال شعب بحاله

رمضان كريم وكل سنه وحضرتك طيبه

مودتى

ahmed_k يقول...

طبعا من حقك تزعلي منها وتعبري عن زعلك ده
ولكن هل ذنب مصر أن من ابناءها من أساء لها؟
وهل ذنبها سنوات وسنوات ودعاة هدم كل فضيله وخلق يهدمون في قيم ابناءها بسينما هابطه وإعلام فاسد ومفسد
لأ طبعا مش ذنبها
والدر لا يضيره تراكم التراب فوقه فسوف يظل له قيمته ونفاسته

وفي الختام كل سنه وأنتي طيبه
وكل رمضان وأنتي واسرتك بخير وسعاده وبعوده عليكم وعلينا بالخير والأمن والبركات

شهرزاد يقول...

نور ... إزيك وحشتيني؟
كل سنة وانت طيبة
رمضان كريم

بوست جميل ومؤلم لكنه واقع للأسف
تعجبني طريقة التعبير بالعامية فهي عفوية جدا

ليس لنا في هذا الشهر إلا أن ندعو أن يصلح الله حالنا لتصلح أمتنا وجميع احوالنا

تحياتي

الملاك يقول...

السلام عليكم ورحمة الله وبركاته

كل عام وأنت بخير أختى وحبيبتى فى الله نور بمناسبة حلول شهرنا الحبيب أعاده الله علينا وعلى الأمة الإسلامية جميعها بالخير واليمن والبركات وجعلنا جميعا من عتقائه من النار .
اللهم أنك عفوا تحب العفو فاعفو عنا

تقبلى خالص دعواتى لك بأن يرزقك الله بكل عمل صالح يرضى به عنك

دمت برعاية الله

كيــــــــــــارا يقول...

كل اللي قولتيه دا لان مش في عدل والعدل اساس الحكم

كان في مره راعي غنم في عصر عمربن الخطاب وماشي وورا الغنم ديب او اسد مش متذكرة بالضبط فواحد بيقول للراعي انت مخلي ورا الغنم ديب قاله ايوه لانه مش هياكلها لان في عدل وبرده مش تسمعى صوت نباح الكلاب اما لما بيغييب العدل من الحكم بتلاقي الكلاب ونباحها والكبير بياكل الصغير

العصرين المكان واحد لكن الحكام اتغيروا يبقي مصر ملهاش ذنب في كل الهجاء دا
الخطف والاغتصاب و.و.و.و. موجود لغياب العدل لو كل شاب بيتخرج بيشتغل شغله كويسه بيجيله راتب مناس هيجوز مش هيحتاج انه يغتصب بنت
لو كل شاب لاقي مكان للرزق ومش اتهان مش هيحتاج ينصب
لو لولو كله بيتلخص في كلمتين غياب العدل يبقي مش نقول مصر لان دا مش حل الحل هو ازاي يرجع العدل نفكر وهنوصل للحل
انا متاكده مليون في الميه انك بتحبيها وهتنهشي في اي حد يقول عليها حرف من برا

وحشتييييني ياقمر

كل سنة وانتي طيبه :)

غير معرف يقول...

نور السلام عليكم ممكن يانور تسلمى على صدفة اجمل وتقولى لة انى كنت مريضة للغاية شعرت باعياء شديد وتعافيت منذ يومين الحمد للة مش عارفة افتح مدونته خالص ثقيلة جدااا كل اللى شفتة الشكل الجديد فقط...........

nour shahen يقول...

بشكر كل اللي ابدى تعليق سواء اعجاب او رفض للموضوع وبجد برغم انى اقتنعت بكلام كتير منكم سواء اللي قال كدا والا اللي قال كدا لأنى برغم انى زعلانه الا انى بحبها جدا بالفعل
واكتر تعليق اثر فيا بجد هو تعليق اختى الملاك لأنى مقدرش اقول اى شىء قدام هبه ربنا ادهالنا ومقدرش كتير منا يحافظ عليها
فبشكركم جدا علي مداولة افكاركم معايا علشان اعرف اشوف الطريق كويس
وبقدم الكلمات دى كأعتذار لمصر يمكن تكون هى دى الفكره الصحيحه فعلا

............................

تحيا الحكومه تحيا ونموت احنا وتحيا
وتعيش بلادنا حره في كل بيت وناحيه
ويزيد الدعم لينا وتعيش يا ريس يحيى
قصدت اقول مبارك أعزرنى لسه صاحيه
مبارك ليك ولينا والخير يعم علينا
في عهدك ما قسينا وفى خيرك بنحيا
سنه خضرا عليك يا ريس دا انت راجل كويس
على رأى الحج عادل ريسنا احلى ريس
شد الحزام تمام خلاه قد القوام
وأروح اقبض معاشى من كتر الفكر اهيس
طبعا كفى وفاض لفيت بيه البلاد
وأكلت احلى أكل ونمت احلم يا ريس

................................

وبقدم أعتذار لأخر تعليق بغير معروف
لأنى روحت فعلا اوصل كلامها لصدفه جميله ملقتش مكان للتعليق وكمان هى مش قالت اقوله هى مين بس عامة فى اقرب وقت لو لقيت مكان للتعليق هبعتله التعليق زى ما سبتهولى بأذن الله

وكل سنه وانتم طيبيين ورمضان كريم والله اكرم