2009/08/12

فاضى تحكى طيب قول جيت ازاى عندنا على طول


جميل دخول الانترنت لما تكون محدد هدفك , والاجمل منه انك تدخل للعالم دا بالصدفه كدا , مش عايزه اقول بالعافيه لا نسميها صدفه
يااه مر يجى 8 سنين واكتر علي دخولى للنت بالصدفه البحته , وكنت لسه اصلا بتعلم ما هو الكمبيوتر , ومن عاداتى السيئه انى احب اتعلم كل شيء بسرعه , ولازم اتعلم مفيش شيء يرجعنى ولا حد يقولى بعدين أشرح ليكى , مبستناش انا ودا عيب كبير فيا بس يلا بقى ما علينا دلوقتى منه
حكتلكم انا دخلت للنت أزاى وانا مكنتش بعرف في الكمبيوتر اكتر من انى اشغل فيلم ولا أغنيه , لا ... طيب تعالو احكيلكم
طبعا مرحله الدخول كان يسبقها اعداد ايميل وقعدت بعدها سنه احاول الاقى حد يشرحلى الايميل بيتعمل ازاى ههههههههههه
وبيكون سؤال رخم لما حد يقولك لو سمحتى عملتى الايميل ازاى تقوله الله اعلم هو اتعمل لوحدوا كدا
احلى ما فيها لما تلاقى الناس بتكلمك وانت مش عارف فى ايه دخلت جوه !! ازاى ؟!! ضغطت انا علي ايه يا ربى
فى البدايه كنت بقعد بالساعات جنب أخويا واشوفه بيكلم ناس ونضحك ونهزر وعجبتنى الحكايه وطلبت منه يعلمنى لكنه مع شغله مكنش بيفضى كتير للأسف , وكان يقولى دايما اتعلمى بعنيكى , طبعا انا عرفت معظم الحاجات من خلال قعدتى جمبه لكنى مكنتش بعرف الأيميل بيتعمل أزاى وكنت مندهشه من شغل الكمبيوتر كله أصلا , كان بالنسبالى علبه سحريه كأنى لسه مكتشفه أختراع أسمه الكمبيوتر حالا وكنت أفضل قاعده علي الالعاب من ساعة ما أصحى لحد قبل ما يجى أخويا من الشغل علشان كان بيستولى عليه وأقعد انا فى دكة الأحتياطى
لحد متحولت والحمدلله وهبقى أحكيلكم موضوع الحول بقى فى يوم تانى ( وانا من منبرى هذا بقول للأطفال اللي أقل من سن ال 18 متقعدوش علي الكمبيوتر اكتر من 6 ساعات ههههههه مقدرش أقلل يضربونى )
مسبتش لعبه علي الكمبيوتر وقتها الا لما جبت أخرها , وحتى الالعاب الجديده اللي كان ينزلها مكنش حد فى البيت يعرف طريقة لعبها الا أنا , واقعد بغتاته أشرح ليهم بتتلعب ازاى وازاى يوصلوا لحد نهايتها , بس دا فادنى فيما بعد لأنى طبقت نفس الشعف دا علي البرامج
نرجع لموضوع الأنترنت تانى , أول حد اتعرف عليه كان شاب سعودى محترم جدا طبيب أعصاب فادنى لما أتحولت ايون اتحولت فعلا عنيا سلمت علي بعضها , بس النداله ليها ناسها أول ما علمنى كل شيء عن الأنترنت مبقناش نتكلم , أشوف نفسى بقى واتعرف علي العالم لوحدى , فى البدايه كنت زى الأطفال محتاجه حد يمسك أيدى علشان مقعش لكن أول ما ثبتت خطوتى جريت لوحدى , فى أقل من سنه كنت بعرف يجى 100 شاب وبنت ( خلوها فى سركم مكنش أخويا أنصدم لسه انى عرفت كيفية الدخول )
افتكرت دلوقتى كمان الأعلان اللي كنت بكتبه بأن اسمى كذا وعمرى كذا ومنين وبأن عندى ميك وعايزه اتعرف علي بنات , شكلهم كانوا بيفهمونى غلط ههههههههه , بس اعز اصحابى عرفتهم بالطريقه دي لقونى محتاسه وتايهه قالو يشوفوا مين التحفه دي وطلعت من قسمتهم , بس بجد كسبت أجمل اصحاب من هنا وذاد تعارفنا فى الحقيقه ودا كان هدفى الأول من دخولى للنت
اكتر شيء بيتغير عندى هو الكيبورد والسماعات وكرسى الكمبيوتر تقولولى طيب الكيبورد والسماعات وفهمنا مالك ومال الكرسى اقولكم معرفش يمكن علشان بقعد اتمرجح عليه فبقصر عمره الافتراضى بس اجمل شىء ان اللمسه الاخيره فى كسره مبتكونش علي ايدى ههههههههه ودا اهم ما فى الامر
يا ريت كل واحد فينا يدعبس كدا فى ذكرياته ويقولنا دخل النت ازاى وليه

هناك 15 تعليقًا:

ABOALI يقول...

هههههههههههههههه
وانت كنت غاوى وانت كنت ناوى يلا نحكى حكاوى وبلاوى وافراح وامانى

النت معرفة تاءتى اليكى وتنادى
فيها مميزات وفيها سلبيات زاى اى شيىء

انا دخلت النت لما اشتريت الكمبيوتر كان وفتها على كارت الفاكس وشغلانه وكمان بكارت تشترية بفلوس
والميجا تحملها فى ساعة او اكتر على حسب السرعة

وتقريبا كده انا زيك

علمت نفسى بنفسى
وعرفت ناس اكن ليهم كل احترام والباقى اكن ليهم كل الوان
الفضول دائما بيكون قاطرة انك تعرفى اكثر

وده اللى كان بيشجع فى الاندماج مع الشبكة العنكبوتية


النت صديق من لا صديق له
وونيس من لا عاشق له


تحياتى لك ورمضان كريم

وحلو صيغة البوست ده جدا وعجبنى التلقائية فيه اووووووووووى

غير معرف يقول...

يامانا متغاظة منك وعايزة اعضك بس مش طايلة ممكن تدينى يديكى اعضها واعمل لك فيها ساعة او واوافس الكلام كان حاجة غريبة ادخل اضحك واتكلم واعمل حظر بعد كدة لحد لما واحدة بنت دخلت وعجبنى كلامها واهم حاجة التعريف كانت كاتبة مبكلمش شباب من فضلكم راعوا اللةعجبنى ادبها وبقيت استنى كلامها...لحد ماكتشفت انها راجل هههههههههه بطلت افتح الاميلات خالص الا علشان متتقفلش ثوانى واقفل بس ايىة رايك...........

nour shahen يقول...

ابو على:
.........
حلوه الدخله بتاعتك يا ابو على والله هههههههههه بتفكرنى بشىء كان بيقول وانت كنت غاوى وانت كنت ناوى تعالى يلا شوف الحكاوى باين يعنى كانت كدا
منور عالم المعتمدين علي نفسهم ويا رب تكون طلعت من النت بأصحاب بجد وفوايد وربنا يبعدنا عن سلبياته يا رب
دايما منورنى يا رب وكل رمضان وانت بألف خير وسعاده والأمة الاسلاميه يا رب


................................

غير معروف:
..........
وليه طيب كدا هو انا هخلص من كلوكات بنت اخويا تطلعيلى انتى دنا حتى غلبانه والله
شوفى لو مش بعرف نفسى كويس كنت قولت انك بتقصدينى اصلى كنت كاتبه فى البروفيل ذات يوم مبكلمش شباب وراعو ربنا بس الحمدلله انا متأكده انى مش راجل وعندى اثبات بيقول انى انثى وتشهد عليه الحكومه وأكيد الحكومه بتعرف أكتر ولا ايه هههههههههه
ومش محتاجه تفتحى الايميل كل شوية ليضيع ولا شىء سبيه وانسيه طالما مش بيهمك مين موجود عليه او اعملى جديد وقت ما تحبى ترجعى للنت عادى يعنى
شرفنى وجودك ويا ريت المره الجايه الاقى اسم او رمز يدل علي صاحب التعريف

الملاك يقول...

السلام عليكم ورحمة الله وبركاته

اختى وحبيبتى فى الله نور أتمنى من الله أن تكونى بأفضل حال

جميل قوى قوى يا نور أنك تقعدى تفتكرى ازاى ممكن تكونى بدأت رحله طويلة معبنة فى حياتك والأجمل أنك تقدرى تكتبي الذكريات دى فعلا


انا لما دخل النت عندنا فى الأول مكنتش اعرف فى اى حاجه ولا كنت بهوى أصلا لحد ما أخوية فى يوم جابلى عنوان موقع الأستاذ عمرو خالد وفضلت مدة طويلة جدا معرفش حاجه غيره فى النت كله لحد ما أشتريت جهاز خاص بيه وده كان قبل دخولى عالم التدوين بعدة شهور تقريبا ومن هنا بقى بدء فضولى عفانى الله منه وعرفت ساعتها ان النت اد ما فيه من مميزات فيه من مساوئ حفظنا الله منها

اللهم أعطنى خيره وامنع عنا شره فكفاه ما ناله منا

تحياتى لك نور

دمت برعاية الله

الازهرى يقول...

لالالالا
طيب بعيد عن كل ده
الحاجات اللى بتتغير دى على حساب مين ؟
اكيد على حساب اخوكى الغلبان
ايوه انا عارف لان عندى ولله الحمد تلاتة زيك كده
ربنا يعينى عليهم

انما ازاى دخلت النت دى فقصه اجمل من بتاعتك بكتييييييير
لانى دخلته بالعكس مش زى الناس

انما القصه بقى هتبقى حقوق ملكيه فكريه لذكريات عندى

تحياتى دوما
وكل سنه وانت واخوكى وكل احبابكم بخير وسلام

كيــــــــــــارا يقول...

اممممممممممم البدايه مؤلمه بالنسبالي فبالتالي مش هقدر اقولها

كل سنة وانتي طيبه ياقمر

nour shahen يقول...

الملاك:
......
وعليكم السلام ورحمة الله وبركاته
كل سنه وانتى بألف خير وسعاده يا قلبي يا رب
اكيد أنتى عندك حق هو فيه خير وفيه شر بس الاهم نعرف بجد احنا عايزين ايه وربنا الحافظ
بس اجمل ما قدمه النت لينا انك دخلتى لعالم التدوين علشان نقابلك ونسمعك ونتعرف عليكى
وهدفك كان ومازال البحث عن الخير ربنا يوفقك دايما
بجد نورتينى واسعدنى جدا مرورك وسؤالك

..............................

الأزهرى:
.......
ظلمنى والله انت كدا جدا
وبعدين اخويا ربنا يخليه ليا
بس مش هو اللي بيدفع تمن الحاجات اللي بتتكسر لأنه طفش منى بكل بساطه ههههههه
دلوقتى اتجوز وبيدفع لأولاده بقى
طلعنلى أصلهم
طيب انا هستنى نشر القصه بمدونتك وهنحافظ علي حقوق الملكيه بس يهمنى اعرفها
كل سنه وانت بألف خير ورمضان كريم عليك وعلينا والله أكرم
نورت المدونه

................................

كيارا:
......
ازيك يا قمرايه
عاش من شافك يا بنتى
طيب قوليها فى ودنى ومش هقولها لحد
بس هنشرها فى مجلة يا خراشى
ههههههههههههه
ربنا يسعدك دايما حبيبتى دنيا وأخره
كل سنه وأنتى بخير وسعاده ورمضان كريم يعود علينا برضا ربنا اللهم امين
نورتى المدونه واسعدنى مرورك بعد غياب

محمد عبدالرحمن شحاته يقول...

كبير اوي الكلام ده

كل سنه وانت طيبه

mohamed ghalia يقول...

ذكريات ذكريات
يااااااااااه فكرتينا بحاجات عدت
يمكن بحب أحتفظ بيها لنفسى
دمتِ فى سعادة

mohamed ghalia يقول...

كل سنة وانتى طيبة

nour shahen يقول...

محمد عبد الرحمن شحاته :
......................
طيب قولنا رأيك فى الكلام دا ولا إيه!!
كل رمضان وأنت بخير وسعاده يا رب
نورت المدونه بمرورك وتعليقك

..............................

mohamed ghalia :
..................
يا رب اكون بس فكرتك بذكريات كويسه
ربنا يسعدك دايما
كل رمضان والأمه الاسلاميه بخير وسعاده ورضا ربنا
اسعدنى مرورك وتعليقك

نـــــــــــــور يقول...

ازيك يانوووور

وحشانى كده ياقمر عامله ايه

انا متأكده ان لسه فى جعبتك عن حكايات النت كتير ;)
اعترفى بقى:)

اما عن دخولى النت فكان بسبب شغلى فى الكليه وفضلت حوالى 3سنين بشتغل كمبيوتر ونت ومعرفش حتى افتح الميل اعمل شات مع حد ومكنتش افتح الا الميل بوكس عشان ابعت او استقبل ميلات D:

وبعدها عرفت شغل الماسنجر من صحبتى ودخلت الشات روومز من باب الفضول من اكتر
دخلتها فى حياتى كلها بتاع اربع خمس مرات كده ومش حبيت القرف اللى بيحصل جواها والالفاظ البزيئه اللى بتتقال جواها
وعنها وقفلت حكايتى معاها :)

اخبارك ايه بقى؟

rovy يقول...

السلام عليكم
ازيك يا نور .. وحشانى ..
ما شاء الله عليكى واضح انك خبرة نت ..
و الله انا جه عليا وقت كنت كارهه النت من اللى بأسمعه من اصحابى انه بيقتل الوقت و بيخلى الاسره افرادها اغراب ما بيكلموش بعضهم .. لكن كان لازم اعمل اميل علشان اكلم عمتى بالخارج و كمان صديقات ليه بعد زواجهم سافروا واحده فى امريكا و اخرى فى هولندا .. كنت فى البدايه بكتفى من النت بكده لغايه ما بدأت افهم انى ممكن ابحث عن معلومه او استفسر عن سؤال و لكن كان تعاملى ما زال بسيط لحد ما عرفت المدونه بالصدفه من احد البرامج و اخذت بناتى يشجعانى ان اكتب ما اكتبه فى مذكراتى او اجنداتى عموما فى مدونه .. المهم انى فعلا اقتنعت و عملت مدونه و بعد مده اتانى اول تعليق و فرحت به جداا و عرفت يعنى ايه تعليقات و تواصل و كده .. و بصراحة من وقتها لم استغنى عن النت خصوصا ان اصبح فعلا فيه ناس و اصدقاء بحبهم جداا و يهمنى امرهم جدا .. و صدقينى لو حأقولك انك واحده من الناس اللى حبيتهم و بجد انتى حد جميل و متميزه جداا ..
ياااه انا رغيت كثير جداا
كل سنه و انتى طيبه حبيبتى يا رب و رمضان كريم عليكى و على كل اسرتك ان شاء الله
تحياتى دوما

nour shahen يقول...

نور:
....
الله يسلمك يا قلبي
انتى اخبارك ايه
انا عن نفسى بخير والحمدلله فى احسن حال
يا رب تكونى بخير انتى كمان وبطلى تختفى

والله هو فى فعلا لكن مش كلها سعيد يا قلبي مش دايما بنقابل بس البسمه هنا
وبعدين منغير ضرب انا لو تسألينى هعترف علي طول هههههههههه

مهو مش علشان تعملى شات تدخلى غرف وكمان غرف الياهو يا بنتى انتى كدا قديمه قوى هههههههههه بغيظك بقى منا خبره متعوده دايما
زمان كانت غرف الياهو تتدخل دلوقتى لا
نصيحه منى ليكى لو عايزه تتعرفى علي ناس بجد وتكون محترمه اتعرفى علي صحاب اصحابك وهكذا اعملوا وقت تتجمعوا فيه كلكم وكل حد فيكم يجيب اصحابه وهتخرجى منهم بأصحاب ومعارف بس علي الاقل هيكونوا مضمونين واى خدمه

اما عن اخبارى فلا جديد يذكر تحت ضوء الشمس
ونشكركم لحسن الاستماع وزورونا تجدوا ما يسركم ونورتى المدونه يا قمرتى

.................................

rovy:
.......
وعليكم السلام ورحمة الله وبركاته
ازيك يا اجمل روفى انتى كمان وحشانى جدا
اها شوفتى وطلعت خبره علي اخرة الزمن هههههههههههههه خليها فى سرك طيب مش تشردينى كدا
شوفى هو دايما الشىء اللي بيزيد عن حده بينقلب ضده والنت سلاح ذو حدين لو مقدرناش نسيطر عليه فهو اللي بيسيطر علينا
احنا كدا لازم ندعى لأفراد اسرتك انهم شجعوكى تدخلى لعالم التدوين وتمتعينا من ابدع ما كتبتيه وبعدين كنتى عايزه تحتفظى بكل دا لوحدك يا شريره نهون عليكى طيب
والله انى من كل الناس اللي بحب اقرا ليهم بحس بصدق حروفك جدا بطلع من بين سطورك مستمتعه جدا مهما كان الموضوع اللي مطروح , لأنك دايما بتحطى لينا شىء مميز بين السطور يفيدنا مش بس بتكتبى لمجرد الكتابه او لأظهار الابداع
ربنا يحبب فيكى خلقه يا رب وانا كمان بحبك جدا جدا جدا
وتعالى دايما وارغى زى ما تحبى اللهم كتر من رغيها معايا وعندى وعندها يا رب
كل سنه وانتى بألف خير وسعاده ورمضان كريم والله اكرم علي الامة الاسلاميه والعالم بأسره .. اللهم امين
نورتى المدونه وشرفتينى واسعدتينى

mahasen saber يقول...

فكرتينى بجهلى مع البلوجر زمان واازى الكوبى والبيست كان بيستعصا عليا

رمضان كريم يا نور
وكل رمضان وانتى وكل من تحبين بالف خير وسلام