2008/12/23

ساعات وساعات



معظمنا عنده المشكله ومنا اللي شاعر بخطورتها ومنا اللى مش منتبه ليها على الاطلاق , أدمان الانترنت او الكمبيوتر عامة
انا عنيت من المشكله دى كتير جدا , لكنى عارفه ومحدده انا عايزه ايه , انا بدخل للانترنت علشان اشوف ناس بحبهم , مبقدرش اتواصل معاهم بخارج الانترنت بحريه فبلجأ ليه علشان اشوفهم مده اطول , ولأنه أرخص كمان مقدرش انكر دا , وبما انى عاطله والحمدلله فعندى وقت فراغ هايل ودا اكبر سبب بيخلينى اسلى وقتى بالكمبيوتر , واخيرا توصلت للمدونه وحبيت اكتب واقرا لناس كتيره بيهمنى اعرف اخبارهم اكتر كمان ما أقرا هما كتبوا ايه او افكارهم ايه .
يعنى لو بطلت احب الناس ومش كل الناس طبعا منا مش مثاليه قوى كدا , مش هدخل للانترنت ولا اقعد علي الكمبيوتر , ولو هما كمان بطلوا يدخلوا للانترنت او بعدوا مش هيكون فى سبب يربطنى بالكمبيوتر , الا انى اكتب , لانى حاليا بستسهل اكتب علي الكمبيوتر بدل ما بكتب على الورق , بس تعرفوا انى لما رجعت امسك القلم تانى لقيت ان حتى الكتابه على الورق ليها سحر من نوع خاص , بالذات لو بتتمتع بخط جميل , هتشعر انك زى الرسام اللي بيتفنن فى أظهار جمال اللوحه اللى فى ايده .
الحكايه محتاجه اننا نقعد مع نفسنا فى حوار صريح وندور احنا عايزين ايه بالظبط وبندخل ليه وفين الهدف وهل وصلنا ليه او لا ولو لا طيب قدامنا قد ايه علشان نحققه .. فى مثل جميل عندنا بيقول كل شيء بيزيد عن حده بينقلب ضده .. مش هنقعد نعمل احصائيات علشان نفيد بعض ونعلم بعض ازاى نبطل أدمان .. عمر الاحصائيات ما بتغير لوحدها .. لازم نساعد نفسنا قبل ما نطلب مساعدة شخص تانى ..
أمبارح انا قعدت افكر مع نفسى .. بنقول معرفة الناس كنوز .. طيب لو الكنز زاد قوى وبقى اتقل من اننا نحمله معانا فى كل مكان .. هنضطر نحطه على الارض ونقعد جمبه نحرسه من الحاسدين والحراميه صح .. طيب والحل .. مش عارفه منا عقدتها بتصورى دا
محدش فاهم حاجه صح .. طيب متشغلوش بالكم بالتفكير .. كنت قريت مره لحد قال انه ندمان وحاسس بالغلط انه اظهر شخصيته قدام بعض الناس .. وامبارح كنت بتناقش مع صحبتى هل لو ظهرت نقاط ضعفنا قدام بعض الناس .. لازم نهرب ولا نواجه .. بالذات وهو بيحاول يستغل نقاط الضعف دى .. طيب مين فينا معندوش نقاط ضعف .. بتختلف من انسان للتانى .. لو حد تاه منى خلاص ميتمسكش بطوق نجاه يسيب نفسه مع التيار وزى ما تيجى وميخافش أبدا .. انا مش منتظره شيء دى بعض الفضفضات الملعبكه .. انا حتى مش متأكده انا كان المفروض هتكلم عن ايه وسرحت فكتبت إيه ....

ساعات أحس بشوق وساعات بالآهات
لكن اعرف طريقى .. يمكن ساعات وساعات
ساعات أسهر في ليلى اتآمل فلى فات
وساعات تجيلى ذكرى ممزوجه بالآهات
وأنسى بكره ايه .. يمكن ساعات وساعات
بفكر يحصل ايه لو روحت للأيمان
وأوقات تانيه افكر امشى ورا الشيطان
أفكار تقلب كيانى .. يمكن ساعات وساعات
بعينى شايفه حق والناس تقول دا باطل
واستغرب لكلامهم واسئل ايه اللي حاصل
وأوقات كتيره أسكت مهى ساعات وساعات
اوقات اكتب بقلمى واحكى عن الحاجات
واوقات اكسر قلمى وأفضل السكات
جايز ساعات وساعات
ساعات يخونى قلبى واشوف غلط ساعات
لكن لو صح فكرى تتبدل الحكايات
اهى دى ساعات وساعات

هناك 21 تعليقًا:

AHMED SAMIR يقول...

كتير قوي بأقعد افكر مع نفسي هم الناس اللي مش غاويين نت او بيدخلوا على الكومبيوتر بيقضوا حياتهم ازاي؟
انا لست من دعاة ادمان الانترنت بس فعلا بدون انترنت او كومبيوتر بيبقى الانسان ناقصه حاجات كتير قوي على الاقل على مستوى الثقافة والمعرفة
تحياتي

Kiara يقول...

انا مش شيفاه ادمان

بالعكس احنا بنتصل بالعالم كله

يعني لو عندك اي مشوار هتسيبي المشوار عشان النت مش اعتقد

ولا ايه ياقمر

ghorBty يقول...

السلام عليكم والرحمه

بجد سعيده جدا اني دخلت مدونتك واتعرفت عليها النهارده

كلماتك جميله جدا ربنا يبارك لك يا رب

في عصر التكنولوجيا اللي احنا فيه والانترنت وغيره بجد الواحد بيحس انه بقا عايش مش في عالم واحد لا دا عايش في كذا عالم عالم الواقع وعالم النت اللي هو عالم افتراضي الا ان الواحد ساعات كتير بيلاقي نفسه فيه وبيعمل وبيتكلم بحريه اكتر من عالمه الواقعي طيب ليه احنا بنضيق علي نفسنا القضيه ونسميه ادمان فالانسان دائما يسعي الي الشئ اللي بيشعره بالسعاده ولعل الله عز وجل جعل ما نفعله من تدوين واتصال ومعرفه ناس مش موجوه في عالمنا الواقعي بس حسينا ان وجدهم في حياتنا فعلا كنز دا كله نعمه ورزق اكيد لازم نقول عليه الحمد لله ما دام مستخدمين الشئ دا لنفع انفسنا ونفع الاخرين يبقي خير

تعرفي ساعات كتير لما اقعد كدا وكتب في مدونتي بحس ان كل شئ مضايقني طلع وبشعر بالراحه ودا في حد ذاته شئ كويس لو دا ما كنش موجود كان ايه هيكون شعوري ساعتها غير الكبت والحزن


يارب شكلي طولت اوووووي بس بجد ما شاء الله اسرحي كتير واكتبلنا كلمات حلوة كدا سعدت جدا بيها

تقبلي مروري الاول وان شاء الله ليس الاخير


غربتي

*الطالبة عفو الله *زوزو يقول...

الكلام يحتاج تركيز اصلك دوختيني بس ايه مناسبة الصورة ربطتيها بالنت الصورة بقى ليها طابع خاص عندي و عقبال ما ترجع السمكة للمة و نفرح بيها شكلي انا التانية خرفت

موناليزا يقول...

جميل ان الواحد يقعد مع نفسه شوية ويشوف هو بجد رايح على فين

فارس القمر يقول...

كلام حلو قوى ومفيد كمان وانا متضامن معاكى فيه الانترنت ادمان حقيقى ومش معنى ان الانترنت موجود فيه كل حاجه يبقى حجه نقعد بالساعات والساعات

لا الكمبيوتر هيطير ولا النت هيقفل

عن نفسى انا ايام الادمان كنت بفضل النت على الشغل وكانت ايام الله لايرجعها تانى وخصوصا لما بتعمل علاقات اصحاب وصداقات كتير على النت وفجاة لما كل دا يختفى تحس بنفسك انك ماعملتش حاجه وضيعت وقتك فى كلام فاضى
لولا ان الاستاذ صاحب مدونه مجنون ارشدنى للتدوين انا كنت محيت النت خالص من تعاملاتى ونظام حياتى وخصوصا الفترة المقبله
والحمد لله انا فى عالم محترم اسموا

عــــالــــم المدونيــــــــــــن

تحياتى

yoyo يقول...

صباحك سكر يا سكر

و حشتنى اوى والله وهجيب من الاخر كدا فى الاول مش هتنازل عن القصب هههههههه اه أنا قولت لك اهوا شغل المنافية دى مش معايا هههههههههه

اجى للبوست بقى انا بتفق معاكى طبعا لانى مريت زى اغلبنا بالتجربة دى و خصوصا طالما ان فى وقت فراغ يبقى مش هتلاقى قدامك الا النت و صدقنى حتى لو وقتك بدا يتشغل اوى هتبداى انك تخصصى وقت للنت على اد ما تقدرى طبعا زى حضرتى كدا انت عارفة ال ( مس ) و الدروس ( الله اكبر اللهم لا حسد )ههههههههههه

رغم انه مش فى وقت بس انا بعتبر النت هو و سيلة ليا طبعا اصحابى الا بتواصل معهم من خلال النت و عالم التدوين بصراحة اخدنى اوى وطبعا الفضل لكى فى معرفتى بيه
من الاخر المفروض كل واحد يحدد هو عاوز ايه من النت بكدا هيقدر انه يتحكم فى نفسه على اد ما يقدر
عارفة الكتابة عن الورق لها سحر خاص انا مش بعرف اكتب الا على الورق اولا و بعدين انقل على الكمبيوتر الورق و القلم له سحر خاص جدا

( ساعات و ساعات ) عبرت باسلوب حلو اوى عن اللى بيدور جوا اغلبنا لما تحسى انك مش عارفة انت الصح والا الغلط فين الحيرة دى رغم متاعبها الا انها مفيدة اننا نحاول نصلح على اد ما نقدر

يالا بقى لينا ايميل عند عمو ياهو يلمنا بقى هههههههههههههههه اشوفك على الف خير يا قمر

تحياتى
يويو

romansy يقول...

الصراحه يا نور
انتى اتكلمتى فى حاجه جميله هى ادمان النت
بس نعمل ايه
النظام حلو

اما بالنسبه لساعات
وساعات

فدى الدنيا
احوالها كتير

بس مش عارفين ايه
هدوينا فين
ولا واخدانا لمين

mohamed ghalia يقول...

ساعات يخونى قلبى واشوف غلط ساعات
لكن لو صح فكرى تتبدل الحكايات
اهى دى ساعات وساعات
كلمات فى منهى الروعة
أكيد الإنترنت ليه دور مهم فى حياتنا بس مش لحد الإدمان
دعواتك عشان إمتحناتى
متوقف لفترة

ليكوريكا يقول...

تحليلك للمشكله كان نسيط جدا لدرجه ان البعض ممكن ميفهموش

وده قمة الابداع علي فكره

بس رايي ان كل واحد ادرى بنفسه

ومفيش حد يقدر يحل مشكلتك غيرك

دمتي بخير

Ahmed Mohamed يقول...

مشكلة النت وخصوصا في عالم التشاتات وكمان البلوجات انه بيعملك عالم تانيه افتراضي بتبنيه بنفسك
والمشكله هنا ان العالم الجديد يلهيك عن العالم الاساسي وده الخطر منه
قبل ما ادخل عالم التدوين كان في حاجات تانيه بتاخدني من العالم الاساسي بتاعي ولو بطلت تدوين انا متاكد ان في حاجه تانيه هتاخدني من العالم الاساسي
والمشكله كلها في اوقات الفراغ سواء كان فراغ جوانا وعايزين نملاه باي حاجه كتابه قرايه .ونلاقي نفسنا بنحب كده
او فراغ وقت وعايزين ننهي في اي شئ
ونلاقي نفسنا بردو بنحب كده والاتنين بيعملو ادمان

سنووايت يقول...

حلو اوي ان الواحد يقعد مع نفسه كل فترة ويفكر ويعيد حساباته

السؤال اللي في الاخر انا عن نفسي احب دايما ابص لنص الكباية المليان حتي لو اظهرت شخصيتك ونقط ضعفك واللي قدمك استغلها ما تقعدش تبكي وتندم علش شيء فعلته بدل ما تعمل كدة خد خطوة للااحسن حاول تحسن من نفسك حاول تصلح نقطة الضعف دي وساعتها اللي قدامك مش هيلاقي حاجة يمسكها عليك ولا يستغلها

بسبوسة يقول...

فعلا ساعات وساعات

شمس النهار يقول...

دخلت اسلم لاقيت موضوع جميل
المهم الوسطيه مانتطرفش في تناول الاشياء عشان ماندمنهاش
لكل شئ وقته وبالمعقول
هنعمل كل حاجه وهنلاقي الوقت قضي كمان
خير الامور الوسط والسيطره علي الامور بالنظام

SHAPE YOUR LIFE (ABOALI) يقول...

الوووووووووووووووووووو
نحن هنا
هاااااااااااايل
انى الواحد يقول كده
نحن هنا
ليعرف اين موقعه من الرفع والضم والكسر
ويعرض نفسه على الدكتور المناسب لحالته
ومن يعرف نقاط ينميها فى نفسه
فقد عرف نفسه
ليس لدينا نقاط ضعف ولكن نقاط للتقويه وزيادة صمودها

وتحياتى على تلك الثوانى المعبرة

وميض ابتسامة يقول...

انا شايف ان الفضفضة ساعات مع من نحبهم شئ جميل ... وساعات الواحد بيبقى زهقان وده بيأثر بطريقة أو بأخرى على اسلوب المشاركة الفعالة
وانا معاك ان الحنين لمسك القلم والكتابة على الورق له سحر غريب وهذا ما افعله دوما ...
اما عن احتياجنا لادارة حوار صريح مع انفسنا فهذا يحدث دائما ولكن المهم المحصلة النهائية... وتحديد الاهداف

تحياتى

نور الدين (محمد الجيزاوى) يقول...

اهلا نور
اكثر ما يعجبنى بمواضيعك انها حيوية تناقش مشاكل كلنا نعانيها
وانا اوافقك الراى بان ادمان النت اصبح مشكلة مؤرقة لى شخصيا ولكن بحاول دايما انى امتنع عن دخوله ايام عشان الامر ميستفحلش
..
كلماتك دائما رائعة وحددة وقوية كعادتك
لى ملحوظة نور حاسس ان فى مشكلة واضحة فى الفترة الاخيرة وطبعا انت عارفة ما اقصده ارجو لو فى حاجة تبلغينى فانت من اهم رفاق القلم واخت عزيزة كريمة ولذا اقلقنى موقفك وارجو توضيح الامر هنا او عندى
..
تحياتى لك دائما
نور الدين محمود

غير معرف يقول...

كل سنه وانتى طيبه يانور وديه تهنئه بأثر رجعى علشان العيدوتهنئه مقدمةعلشان السنه الجديدة يارب سعيدة عليكى ..عايزة اقولك كل موضوعاتك جميله ولو مفيش ناس بتحبيهم وبتقعدى علشان تعرفى اخبارهماكيد مش حترطبتى بالنت ومش حيفرق اذا عدت ايام من غير نت...ولا ايه؟

*الطالبة عفو الله *زوزو يقول...

طبعا انامفهمتش حاجة لما قريت البوست اول مرة و لما قريته تاني و تالت برضو مفهمتش حاجة ههههه بس بعدها لما قابلتك يا حبيبتي و دردشنا مع بعض فهمت المغزى من البوست و ايه الي خلاكي تكتبيه و خلاص مش حرد عليكي هنا عشان رديت عليكي مباشرة و تناقشنا في الموضوع و كمان ان هنا بتعذب في كتابة العربي انتي عارفة
على فكرة انتي وحشاني اوي انتي فين اختفيتي
طمنيني عليكي

غير معرف يقول...

السلام عليكم و رحمة الله و بركاته

اولا احب اقولك ان دي اول مرة اشوف مدونتك وانا في الغالب بقرأ لكتير بس قليل لما بعلق بس دا لاني حسيت بتشابه شوية ما بينا...24 الحمدلله برده عاطلة

والحمدلله
لااسف مدمنة الانترنت وبعترف انه علي الفاضي لعب و بس.....

يعني اعتقد بل انا متأكدة انه زي كذا حاجة في حياتي محتاجة مجاهدة نفس وعزيمة و ارادة و..و...

في حاجات كتير في الحياة بتخلي البني ادم يضيع عليها وقته من حياته القصيرة سواء الانترنت...التليفيزيون...التليفون...القهاوي...الاصحاب و خاصة الصحبة السيئة...

بس فعلا الحياة جهاد جهاد جهاد يعني


اه واحيانا برده اجيب كشكول مذكراتي اللي بقاله سنين ولية فيه يدوب بتاع 10 ورقات و اجي اكتب خواطر ولا اي حاجة وقبل ما احط القلم علي الورقة...يكون في خيالي الخط الجميل اللي بتقولي عليه ...وبس
يطلع اول حرف و التاني يليه والتالت...واكتشف ان خطي تقريبا ماتغيرش كتير من ايام الاعدادية...

فلجأت مؤخرا للكمبيوتر...


عجبني البوست جدا...عجبني اهدافك و افلامك وكتببك المفضلة....حسستيني بالامل....
ماشاء الله
ربنا يبارلك
ويرزقك الثبات

معلش علي الرغي


*****
واحدة بتحاول تجاهد..
**********

Maha Shahen يقول...

لازم تعزرونى بقى انا عارفه انى بقيت بخيله قوى فى الرد علي التعليقات بس معلش الشتا داخل علينا ببرد شديد مكنتش متوقعاه
وبما انى من الناس اللي مبتحبش تحس بالبرد فتلاقونى مستخبيه شوية معلش
بشكركم لأرائكم ومساعدتى على فهم وتدعيم بعض الأمور
وللى سئلوا الله يكرمهم .. متقلقوش
انا بس زى ما تقولوا كدا بعمل بيات شتوى
دايما منورين المدونه وبالاخص الاتنين اصحاب تعليق غير معروف
وبشكر من قلبى كل قلم علق على الموضوع دا