2008/06/21

عجايب المخلوقات ( أغيثوا عقلى )

صوره بفضل اشوفها كل يوم ساعه تسيب في قلبى ضحكه وساعه تصبره ولكن دايما بيبقى جوه قلبى سؤال محيره
حيرتى دامت يومين وسهرت اللف بين بلوجرات المدونين وكنت بحلم بجزيرة القطن ( السرير ) بس مين يوصلنى مين
ساعات من كتر السهر وقعدتى قدام الكمبيوتر ابقى حتى مش قادره اقوم انام , ولو حد رسملى مخده على الحيطه هنام , اليوم كانت بدايته عاديه وانتهى بقصه طبيعيه
في اليومين دول فعلا بقت شيء عادى , استنوا هعملكم فيلم هندى ...... عقارب الساعه تشير للساعه الثامنه صباحاً , قال يعنى انا شيفاها اصلا ساعة الكمبيوتر دايما مخرفه , برغم ان بيتى كله ساعات ومن عوايدى احب اعرف الوقت دايما الا ان مكان الكمبيوتر مش بيمكنى اشوف اى ساعه حواليا , بيسرق الوقت واحيانا بيطير النوم من عنيا , هبطل اهو واكمل حاضر , قبل ما تملوا هقولكم اهو, اصل دا تقريبا بينى وبينكم هيكون بوست مطول حبتين تلاته عشره قولوا شهر( خليكم كرام يا بلوجرايه) , عقبال عندكم هنشغل مووت اليومين الجايين , شهر كامل هدخل للنت تخاطيف دا ان قدرت ادخل اصلا ( اخويا جاى من السفر ورافعين حالة طوارىء جيم في البيت ), وادى اعلانى للأخوه المدونين ( اعمل مشهوره بقى قال يعنى , استنوا بس سبونى اعمل برستيج لنفسى ) واستنونى اوعوا تنسونى والله بحبكم قد عيونى
وهقول القصه واعزرونى لو طولت حبه معلش اعزرونى
كنت مطبقه يومين وفعلا دا بسبب المدونين بطلت اكلم اصحابى زي الاول وارغى كتتير لكنى بحافظ دايما ادخل للمدونات واقرأ كتتير , مدونات بهرتنى ومدونات ازعجتنى ومدونات جننتنى ومنهم فعلا اللي فرحتنى , ومشيت اطوف بين كل بستان من هنا اقرأ شعر ومن هنا الحان وفجاءه وقفت هناك عند اخر البستان , لقيت مدونه ومنتبهتش للعنوان ( قصه بدايتها عاديه حديث بين صديقتين , قريت القصه للأخر ممتعه بلا شك فى حب بنت لشاب صدمت في النهايه بأنها بتحب فتاه ( فتاة الاحلام على حد تعبير الكاتب ) مش شاب , دخلت اعلق كعادتى لأن القصه عجبتنى جدا وبصراحه احتارت اقول صاحبة الفتاه كانت قويه وحازمه وجريئه لما سابتها لما عرفت انها شاذه او بمقولتها مثيليه تقريبا , وسبت تعليق بأنها لو كانت صديقتى كان لازم اقف جمبها متخلاش عنها وان كانت على غلط اصحح افكارها يمكن من الحب اللي بنا اقدر اصلح الاحوال او على الاقل اقبل بيها زي ما هى وخلاص بقى مهو بنا ايام ومعرفه طويله و ربنا الهادى
انك لا تهدى من احببت ولكن الله يهدى من يشاء
يضل من يشاء ويهدى من يشاء
لا والادهى انى كتبت اخر سطرين ابداء اعجابى بموقف صحبتها لما انسحبت بالوادع مغلقه باب العوده على الصديقه الاخرى ( المثيليه ) وحين فرغت من ارسال التعليق ويا رتنى ما ارسلته بدأت اقرا التعليقات الاخرى برضوا كعادتى ( فعلا المره دى ندمت علشان بحب القراءه )
وحينها صدمت كانت القصه لصاحبة المدونه و الجميع بيواسيها بأن صحبتها اتخلت عنها , اظن انها هتلغى تعليقى هههههههه بس انصدمت , اذاى تكتب شيء خاص كدا عن نفسها ( اذا بليتم فأستتروا )
التعليقات فورت دمى بجد , واحد من العاقلين ( هقول عليه ايه بس غير عاقل ربنا يجازيه ) قال ولو كانت الدنيا كلها مثيليين ( شواذ ) وكانوا المختلفين ( الطبيعيين ) قله قليله مش كانوا يحسوا انهم بيعملوا غلط وعك وكلام غريب وعقول اغرب , وخرجت يلف بيا عقلى هو حصل ايه في الدنيا دى , هو الصح بقى غلط والدنيا بقت تمشى بالمشقلب للدرجادى , هى الناس دى اكيد بتستهبل وسورى في التعبير بقى , انا اكون عارفه فين الصح لكن معملوش وهقول ماشيه بعقلى اوكى بس منكروش كمان ولا اغيروش , ولا اقول ان الشواذ حقهم في الاعلان والظهور طبيعى وشرعى لا طبعا , على فكره انا بقول ان الناس دول مرضى , فعلا دا رأيى , لكن المرض في قلوبهم واخلاقهم , اااه مش قادره ابطل لوم في نفسى ليه علقت منسحبتش من اولها , في اول صدمتى من نهاية القصه ( مش عارفه اضحك ولا اطفى الكمبيوتر واقوم يلا حصل خير ان شاء الله ) دا كان اخر اللى جه فى بالى قبل ما اليوم ينتهى بنومى , اقصد يبتدى ( اعزرونى منا سهرانه النهارده برضوا )
هتوحشونى وانتظرونى لو في معزه ( اللي في القلب مش امو اربع رجلين ) وفعلا بتحبونى وهرجعلكم صدقونى
وخلص البوست ومخلصش الكلام وليكم منى احلى سلام

هناك 32 تعليقًا:

Maha Shahen يقول...

اول تعليق اخطفه لنفسى واحب اقول شيء بسيط
انا دايما بتكلم بنفس الطريقه فى العادى ( اى طريقة كلامى العاديه بين الناس )
كتتير اتأثر بأسلوب حد لكنى عمرى ما اكتب نفس كلامه او طريقته بدى لنفسى وقت علشان اكتب بطريقتى انا مش زى حد
( وجزء صغنن اخر تشهد جوباتى لصحبتى وحببتى انى دايما انهيها بخلص الجواب ومخلصش الكلام وسلام )
منعاً للأحراج وتشابه الافكار
صحيح انا بتعلم من المدونين لكنى مقدرش مهما عجبنى اسلوب حد اخطفه منه وربى على ما اقول شهيد ودمتم بخير

spower يقول...

السلام عليكم
حقيقي اسلوبك رائع
والبوست جميل

لكن مش لازم نستسلم
الدنيا دي بتاعتنا
هما فعلا مرضي ولازم يتعالجوا
واكيد لازم حد يقف جابهم

تحياتي sayed
واتمني تزوريني
http://myfreedom-spower.blogspot.com

شهرزاد يقول...

نور
يا أجمل صديقة
بوست هايل
وكلام جميل يشد القارىء..
أنتي صحيح هتسيبينا شهر؟؟
كتير والله هتوحشينا جدا وهنشتاق لكلماتك.. انا عارفة الصيف ومشاغله
كثيرة.. والمناسبات والحفلات والاستقبالات.. وهادعيلك بسلامة أخوكي..
ربنا يرجعه بالسلامة..
كلماتك جميلة وصادقة جدا..
موضوع الشواذ موضوع بدأ ينتشر بشكل غريب وأكيد هؤلاء هم مرضى بحاجة إلى علاج.. اللهم عاف مرضانا واعف عنا وعنهم..
تحياتي لك يا قمر
هتوحشينا جدا
حبي واشواقي

فارس بلا جواد يقول...

بجد يا نور بوست رائع
شدني وماكنتش عايزه يخلص .. بالنسبة لموضوع الشواذ .. فاسبابه ممكن تكون عضوية .. ودي بيبقي اصحابها مالهمش ذنب .. لكن ربنا أراد ليهم أنهم يكونو كده بيحملو جينات الجنسين ..وبالتالي بيكون عندهم اعضاء تناسلية مختلطة بين للجنسين
أما النوع التاني بيكون بسبب مرض نفسي أو حادث اتعرضوله من زمان زي الاغتصاب .. ودول ممكن يرجعو طبيعين بس محتاجين تأهيل نفسي
عشان كده بلاش نظلم حد ولازم نقف جنبهم .. ونحمد ربنا انه عافانا مما ابتلي به غيرنا
بالتوفيق وارجعيلنا بسرعة

سارة البحر يقول...

بجد هتغيبي علينا
انا كمان هغيب بس عارفه الصدفه فين انه انا كمان اخويا هيرجع من السفر ومجربه الطوارئ كويس ههههههههههههههههههههه
بس بجد هتوحشينا

اما على موضوع البوست الشواذ بصي اوقاات كتير بيكون الامر مش في ايديهم ولا باختيارهم عشان كده ممكن نحاول نساعدهم
صدقيني انا مش بدافع عنهم لاني عارفه ومتاكده ان هما اللي غلط واحنا اللي صح
بس يلا اصلا مش في ايدينا غير الدعاء لهم
وبجد طريقتك في الكلام بتعجبني جدا وهتوحشيني موت

نونو يقول...

بوست اكتر من رائع
طريقتك حلوة اوى فى الكلام وعجبانى جداااااا
ان شاء الله هزهقك فى البوست الحلو جداااا دة بس اوعى تزهقى من نونو

نـــــور يقول...

مساء الفل ياجميل ..اول زيارة ليا لمدونتك وجت بصراحه فى الصميم وعلشان كده تعليقى هيطول واتمنى انك تستحملينى.

اولا انا شايفه انه ميزة مش عيب اللى حصلك ده لانه خلاكى تتصرفى بحياديه وتقولى رايك دون اى اعتبار مين الشخصيه اللى بتقولى رايك فيها

ثانيا بقى يااختى فموضوع اخوانا دول -اللازبيان والزاى- فهو انا بصراحه شفت عنه حلقه فى التليفزيون شعرى واقف من ساعتها وعماله اقوله سيت داون مش راضى ....
والله يانور اللهم احفظنا كانوا مستضيفين ولد وبنت بس ولد جنتل مان موووت وبت انما ايه !!- مزه مزه يعنى-

والله يانور انا اول صدمة كانت ليا هى انى اكتشفت ان الولد اللى انا بقول عليه جنتل ده طلع صوته حريمى شويه اتاريه هو البنت فى الحقيقة والبت اللى انا قصدت اقول عليها مصلح حقير وهو مزة طلعت هى اللى فى الحقيقه ولد صعقت لانى اصلا مكنتش اعرف ان فى ناس كده- براءة بقى- المهم الدكاترة قالوا على كلامهم اللى كان بيبدو وقاحه مش جرأة انهم مش غصب عنهم اللى بيعملوه ولا حاجه دى بس حكاية تعود نتيجه مواقف حصلتلهم هى اللى دفعتهم لكدا ...
على اى حال اللهم عافنا يارب
دمت بكل خير

غير معرف يقول...

الموضوع تحفة جدااااااااااااا بجد يا نور وده مش غريب عليكى طبعا..
انا بس ليه تعليق صغنن ان الليسبيان والجايز دول مش مرضى ولا حاجة وان فى فرق بين الناس اللى بيحتاجوا عمليات تعديل جنس عشان بيبقى عندهم فعلا الجينات الذكورية والانثوية وبين الشواذ ده غير ده خالص الناس اللى بيتعملها عملية تعديل جنس وليس تحويل دول مرضى فعلا وكان الله فى عونهم وشافاهم..لكن الناس الشواذ انا رايى انهم بيستهبلوا وده مش مرض ولا حاجة دول قوم لوط وربنا وضح كده تمام فى القران وربنا لعنهم يبقى اكيد لو كانوا مرضى كان ربنا غفرلهم لكن دول حاجة تانية..

معلش طولت عليكى..استحميلنى بئة مانا صاحبتك....

Maha Shahen يقول...

spower
وعليكم السلام ورحمة الله وبركاته
بما انك نورت مدونتى فأحلامك اوامر
وهنا اقدر اقول زعيم الثوره براحتى بلا اي مخالفات من بتوع التاريخ انا حره مدونتى بقى . لكن الدنيا زي ما فيها منا فيها منهم ربنا يهدينا ويهديهم, وعلي فكره مدونتك رائعه بتمنالك دوام الحماس

Maha Shahen يقول...

شهرذاد
صديقتى العزيزه
للأسف فعلا شهر كامل هيكون لكنى هخطف شوية دقايق زي كدا واشوفكم واطمن عليكم
انا كمان هشتاق جدا ليكم
ربنا يخليكى ليا يا قمر
وان كانوا مرضى فربنا يعافيهم وان كانوا غير كدا ربنا يهديهم
نورتى يا أرق زهور الربيع

Maha Shahen يقول...

فارس بلا جواد
انا بصراحه معرفش البنت كانت مشكلتها ايه لأنها عرضت القصه مش اكتر
لكنها مذكرتش اسباب , لكن اظن انه مش مشكلة هرمونات , لأنها انجذبت لتلك الفتاه علي حد تعبيرها فتاة الاحلام من كلامهم سوا علي النت , يمكن دا انا معرضتوش في البوست لأنى كنت مستعجله وبعد ما رخمت عليكم بكلام كتتير قولت اقول قصه مختصره
على فكره انا مظلمتهاش انا كنت بقول رأي عام , واهى جات فيها بقى ههههه
وعامة الاختلاف في الآراء لا يفسد للود قضيه
وادينا استفدنا بمعلومات كتيره من طبيبنا العزيز
دايما منور المدونه بتعليقاتك
وبأذن الله ميطولش الغياب

Maha Shahen يقول...

ساره
بصره يا قلبى , المفروض البلوجرايه يعملولنا حفلة لما نرجع , امال لا امال طبعا هههههههههه
مهم هيترحمونا من حد بيرخم عليهم اللي هو انا وحد تانى بيخطفنا لدنيا الاحلام ومش عايز يكتب حاجة عن الفرحه ابدا الا هو انتى يا حياتى
انتى كمان بالتاكيد هتوحشينا يا قمر
ويمكن في كتتير منهم يكونوا مرضى لكن في منهم مدعين او عجبتهم اللعبه واستمروا فيها وضيعوا نفسهم للأسف
اكيد في ايدينا اكتر من الدعاء لو نعرف حد بالشكل دا يمكن نكون سبب في انه يرجع عن الطريق دا
دايما منورانى يا قمرايه في ليل سهرى

Maha Shahen يقول...

نونو
انا عمرى ما ازهق من نونو ابدا ابدا
وعلي فكرة مدونتك اجمل من هنا بكتتير قوى
بتمنى كل الاصدقاء تزورها ومش هيندموا
فيها من الذكريات الجميله اللي تسعد القلب وتبهجه
نورتى يا اجمل نونو

Maha Shahen يقول...

حبيبه
مسائك سكر يا قمر , يا رب متكونش الزياره الأولى والاخيره واكون تركت انطباع يخليكى دايما منورانى في المدونه
لو الموقف المحرج دا كان ميزه فمتمناش تحسى بنفس شعورى بعد ما خرج الامر من ايدك بعد ما تركتى التعليق واللى حصل حصل هههههههههههه
والله انا هلكت من الضحك علي الموقف اللي جه في التليفزون دا اصعب من اللى قريته , بس ادى اخرة اللي بنطلق عليهم كلمة ( مزه ) قلبوا
والحكايه بقت سمك لبن تمر هندى خالص
اللهم عافنا واهدنا يا رب
وانتى مطولتيش عليا ولا حاجه
ونورتينى واسعدنى مرورك يا قمر

Maha Shahen يقول...

يويو حبيبتى
طبعا مظنش انه غريب عليا
منا مصدعاكى ليل ونهار براغيى هههههههههه
وبصراحه الموضوع دا عايز دراسه شامله ووافيه يمكن نقدر نفهمهم او نعالجهم لو كان الامر يستدعى او نرشدهم للطريق الصحيح
ولو طولتى عليا طيب يا رب دايما تكونى كدا , بيسعدنى كلامنا سوا يا قلبي وانتى عارفه ما انتى صحبتى وحبيبتى
بس بريء يا بيه صداقه اخويه طبيعيه هههههههههههههههههه
اصل الواحد بقى يشك في نفسه دلوقتى

نونو يقول...

مش قولتلك هزهقك
مرسى جداااااا على التعليق اللى اكتر من رائع
بحب مدونتك جدااااااااااا
وبحبك شخصيا فى الله

RaRa يقول...

نــــــــــور
ليه هتغيبى عنا ان شاء الله يكون غيابك عنا خير ومش تتأخرى علينا
بوست جميل وهايل
واكيد هما مرضى واحنا ممكن نساعدهم عشان مش يحسو بكدا

وفقكى الله دائما وابقى طمنينا عليكى

تحياتى

zOzO يقول...

نور انتي حد حلو

واحساسك حلو

ونضيف

تسلم ايديك

واسفه اني اتاخرت عليكي لان النت عندي كان بايظ

ghoneem يقول...

السلام عليكم

أهلاً بحضرتك
أنا حبيت بسأشكرك علي مرورك وكلماتك اللي نورتي بيها المدونة

أنا هلف براحتي كدة وأرد علي مواضيعك اللي واضح ان شاء الله انها هتكون مفيدة ...

تحياتي

بالتوفيق...............

نور الدين (محمد الجيزاوى) يقول...

استاذة نور
للأسف دى اول زيارة ليكى
واظنها ان شاء الله لن تكون الاخيرة
قرأتك البوست اكثر من مرة
وانا اقول لك لا تندمى لأنك قدمتى النصح فى تعليقك
وهولاء وامثالهم هم نتاج الفوضى التى نعيشها لاننا اصبحنا مثل المسوخ لا الى الشرق ولا الى الغرب
لاننا فقدنا التمسك بسر حياتنا وهويتنا وهو اسلامنا
...
فلا تندمى لانك شاهدت الخطا ما مدتى قلت بصوت عال هذا خطأ
تقبلى مرورى
...
نور الدين محمود

rovy يقول...

السلام عليكم
بوست رائع احيكى عليه .. الحكايه دى مع الاسف زادت ببجاحه و بقت منتشره
اللهم احفظنا ..
ربنا يلطف بينا و يرحمنا ..
خاص تقديرى و تحياتى

rovy

سنووايت يقول...

ترجعي بالسلامة وم اتغيبيش كتير
هوني عليكي
أكيد فيه منهم مرضي وأغلهم مرضي نفسيين , بس فيه بيلجأوا للعلاج وفيه بيتركوا انفسهم وبيرضوا بالأمر الواقع
ربنا يشفيهم ويهديهم
دمتي بخير وعقل

Maha Shahen يقول...

نورتينى يا نونو ومش هتزهقينى ولا حاجه يا قمر بالعكس انا هكون سعيده بوجودك الدايم
احبك الذى احببتنى فيه , انا كمان بحب مدونتك جدا وبحبك في الله

Maha Shahen يقول...

rara
منوره المدونه يا فراشه يا جميله
وانا هحاول والله مغبش قوى ربنا يسهل
ربنا يوفقك ويقويكى انتى كمان يا رب يا قمرتى

Maha Shahen يقول...

زوزو
انتى كمان حد حلو قوى واحساسك جميل قوى قوى ومدونتك اجمل وتسلميلى يا رب
وانتى متأخرتيش ولا حاجه ويا رب النت يتظبط عندك وميفصلش ابدا
نورتى البوست بمشاركتك فيه

Maha Shahen يقول...

غنيم
وعليكم السلام ورحمة الله وبركاته
اديك رديت الزياره وبقينا خالصين
ويارب تكون الموضوعات عجبتك
أسعدنى مرورك

Maha Shahen يقول...

نور الدين محمود
أولا لو هتناديلى الله يكرمك اكتب نور وبس
بأذن الله متبقاش الزياره الاولى والاخيره
بس بصراحه اخاف تكون قريت البوست اكتر من مره لأنه ملعبك يعنى ههههههه مش اعجاب بيه
عامة في كتتير من اصحابى اشتكوا انه مكروت كدا بس حقكم عليا , هما مش حبوا يحرجونى وقالولي الكلام بينى وبينهم وانا بسيح لنفسى بقى الله المستعان
وبالنسبة للموضوع
انا فعلا قولت هذا خطأ ولكن بصوت واطى وجريت ههههههههه
أسعدنى مرورك ومدونت حضرتك رائعه جدا
واتمنى من الاصدقاء زيارتها

Maha Shahen يقول...

روفى
وعليكم السلام ورحمة الله وبركاته
هى فعلا بقة مشكلة منتشرة , لدرجة ان في ناس بتنسب نفسها لطائفة الشواذ للتسليه مش اكتر , سبحان الله مش بيفيدوا ولا بيستفيدوا بس بيجمعوا ذنوب علي الفاضى
أسعدنى مرورك وتعليقك

Maha Shahen يقول...

سنووايت
الله يسلمك من كل شر يا رب
مش عارفه ليه الناس مش بتلجأ بسهوله لطبيب نفسى لو في مشكلة كبيره زي كدا
أعتقد ان اللي هما عليه كارثه لا يمكن السكوت عنها وغير كدا,ان كانت ميولهم غير طبيعيه وفي منهم بيغلطوا فعلا مظنش دول هيشعروا بحرج من الطبيب
ان اتوقفت الحكايه في التفكير بأنه ازاي يروح يحكى لأنسان غريب عنه شيء زى كدا بس هما بيعملوا الاسوء فبدل ما يدوروا علي حد يواسيهم يحكوا لطبيب يعالجهم وربنا الشافى
وعامة ربنا يهديهم ويشفيهم
أسعدنى مرورك يا قمر

أمل فتحى عزت يقول...

السلام عليكم بكل الحب والاحترام
ادعوك لمتابعة الحلقة الرابعة من حكاية عمى رمزى وعم عمارة فى الحارة
تعالوا نسمع ونشوف العفاريت بتقول ايه عن الحارة
مع خالص تحياتى

أمل فتحى عزت يقول...

لقد كتب التاريخ أسمك فى دايرة الحارة
يلا وتعالى معانا الى الحلقات فى دايرة عمى رمزى


مع خالص تحياتى

Maha Shahen يقول...

عزيزتى امل الجميله
اسعدنى تعليقك وضحكت من قلبى ولكنى مبتريقش والله ولا بسخر من التعليق ابدا
بس فعلا التعليق فرحنى جدا وهاجى واتابع والله بس اعزرينى الفتره دى ملغبطه قوى عندى
بس اوعدك هاجى واكون من احسن المتابعين ودائمى الحضور
واسعدنى ان التاريخ ذكرنى وما اجملها كتاباتك
وانا لا املك الان ان ادعوا الاصدقاء لدخول مدونتك فهى من اروع المدونات التى صادفتها حتى الان