2008/06/15

اسعد يوم في حياتى


أظن ان اجمل يوم في حياتى هو النهارده , انا دايما اقول كدا لما اكون سعيده , صحيت بدرى قبل صلاة الفجر بساعه منكرش انى صحيت على ازعاج شخص ما , بس ربنا يباركله ازعاجه خلى يومى سعيد , أعتقد ان اجمل شيء بحس بيه وقت لما اصحى وانا مكتفيه من النوم ومنتظره الفجر يأذن علشان اجرى اصلي , وانا شاعره بقمة النشاط والحيويه , بعد ما صليت والحمدلله واجمل وقت تدعى فيه هو الوقت دا , أو يمكن لأنى بحس ان محدش سامعنى وكل الناس نايمين وانا مع الله وبس لا شاغلنى شيء ولا بفكر غير فيه وكل تركيزى في صلاتى ودعائى يااه مهما اوصف مش هقدر اوفى جمال الشعور اللى جالى في اللحظات القليله دى , طبعا فتحت النت وقعدت اكلم اصحابى وبدأنا نقول مين صحى بدري ومين لسه منامش , اجمل ما فى الاصحاب لو ليك اصحاب زي اصحابى بيرنوا عليك يصحوك وقت الفجر يسندوك لو حسيت انك قصرت وضلمت الدنيا في عينك بأن ربنا مش هيغفر ليك ودى بتكون وسوسة شيطان مش اكتر عمله انه يخليك تيأس من رحمة ربنا , ربنا يباركلى في اصحابى يا رب لو بصينا لكل شيء في الدين هنعرف ليه اتطلب منا نعمل كدا , كلنا عارفين الحكم من اننا لازم نختار الصديق قبل الطريق , ونصاحب الاخيار وما الى ذلك , سبحانك يا رب كل شيء وليه حكمه , عقولنا دايما متفهمش كل شيء في وقته يمكن لو ادينا نفسنا فرصه نفكر في عظمة الخالق وسلمنا امرنا لله , وقتها هينور بيصيرتنا ويخلينا نشوف سبب كل امر من اوامره , وان محصلش مترجعش وتسيب طريقك لا كمل اكيد دى حكمه من ربنا برضوا , اجمل ما في التوقيت دا بقى ان بعد ما الناس بتصلى اكيد بترجع تنام ,وادى وقع خطوات ولاد الجيران وهما راجعين من المسجد اخر شيء بسمعه , قبل ما انتبه علي زقزقة العصافير على شجرة قدام شباكى , النهار بيشقشق واحساس جميل اللي انا حساه هبدا بيه يومى يا رب كل الناس تحس بيه

هناك 15 تعليقًا:

Tamer Nabil Moussa يقول...

بوست مميز

وقت صلاة الفجر وقت راحة واحساس جميل بجد

الصديق وقت الضيق ومعاكى اهمية اختيار الاصدقاء

تحياتى

Maha Shahen يقول...

فعلا يا تامر الصديق وقت الضيق
في مقوله بتعجبنى جدا بتقول لو مت وانا ليا خمس اصدقاء فأنا عشت اكيد حياة عظيمه , نورت المدونه

شهرزاد يقول...

نور
ربنا ينور طريقك يا رب..
بوست جميل
وجعلتيني أتخيل ذلك المشهد الجميل
وقت آذان الفجر
وبعده شروق الشمس
أجمل مشاهد الطبيعة
وفعلا الصحبة الصالحة
نعمة من الله عز وجل

بوست جميل يا نور
انا نزلت بوست جديد
وأهديتك تاج
يا ريت تاخديه من عندي
وتجاوبي عليه
هيكون شرف كبير لي

شكرا لزيارتك وردك الجميل

تقبلي تحياتي
يا اجمل صديقة

سارة البحر يقول...

نور بجد البوست ده ازهلني اوي خلاني احس بحاجات كتير جوايا
مش عارفه اوصفلك ايه اللي حصلي وانا بقراءه
بجد ربنا يديكي على اد عملك الصالح وكلامك اللي بياثر في الناس
وفعلا الاصدقاء الصالحين كنز بجد
تحياتي ليكي ودمتي بخير

Unknown يقول...

مدونتك حلوة اوى وذقها راقى
وبوستك رائع ان شاء الله اجى تانى

انا كمان خدت منك صورة

شكرا لك مرورك بمدونتى
كل الاحترام

Maha Shahen يقول...

والله ردودكم فعلا هى اللي اسعدتنى اكتر ما انا سعيده كدا انا هقضى كل يوم في حياتى سعيد قوى قوى ربنا يباركلى فيكم
وشهرذاد حبيبتى بصراحه انا موضوع التاج مش فهماه قوى لأنى جديده بالمدونات لكنى هقرا تانى واحاول افهمه واكتب حاضر واتمنى متمنعيش اتطفل كل شوية واقرا في المدونه بتاعتك لأنها جميله فعلا
وساره طبعا انتى شوفتى الصوره اللي في البوست بس كرم منك معلقتيش ربنا يخليكى ليا ومدنتك برضوا رائعه بس بلاش حزن وتبدأى تكتبى للسعاده
ونهر الحب طبعا يسعدنى مرورك مره واتنين ومليون ودايما منورانى يا رب وعلى الاقل بستفيد من زوقك الخلاب في اختيار الصور
والله اسعدنى مروركم جميعا بجد فرح قلبى بتمنالكم تشعروا بنفس السعاده يا رب

RaRa يقول...

السلام عليكم ورحمة الله وبركاته
بوست مميز بجد
وفعلا احساس جميل اوى بصلاة الفجر فى وقتها وطلوع الصبح منظر جميل اوى

ربنا يوفقك دايما ودمتى بسعادة وخير

تقبلى تحياتى

Maha Shahen يقول...

وعليكم السلام ورحمة الله وبركاته
rara
نورتى المدونه وربنا يكرمك حبيبتى
ودايما منورانى أسعدنى مرورك

شهرزاد يقول...

نور.. شكرا على ردك يا قمر
أولا التاج زي ما فهمتي أيوه صح
أنتي تشوفي الأسئلة اللي عندي
وتجاوبي عليها بطريقتك
يعني تذكري خمس أحلام من الماضي كنتي تتمنى تحققيها في الماضي
وخمس أحلام للمستقبل
وشخصين في حياتك الآن كنتي تتمنى وجودهم
في حياتك من قبل
وشخصين مش موجودين في حياتك
وتتمني وجودهم
أربع أسئلة مش صعبين أبدا
ولكن يحتاجون لأجابتك الجميلة
وصراحتك يا قمر
تقدري تنقليهم من مدونتي

وتانيا المدونة تحت امرك وقت ما انتي عايزة تشرفيها جدا بوجودك يا قمر
وتنوريها نور على نور

ومستنية البوست الجديد
ونشوف أحلامك عاملة إزااااي؟

تحياتي لكي يا قمر

غير معرف يقول...

بوست جميل من اجمل بنت عرفتها ربنا يخليكى لى
حبيبتك مرام

Maha Shahen يقول...

ربنا يخليكى ليا يا شهرذاد حبيبتى وهبدا كتابة البوست اهو بس طبعا مش هيكون بجمال كتابتك

ومنوره المدونه يا مرام يا حبيبتى وربنا يخليكى ليا انتى كمان يا قمرتى ويسعدنى دايما اعرف رأيك

Teef@ يقول...

حقيقى اجمل وقت بحس فيه بالهدوء الشديد و ان دماغى صافية و مافيهاش اى مشاكل هو وقت الفجر
و اكتر وقت بحس فيه انى مركزز اوى ف العبادة او فى اى عمل بعمله .. لما بكون لوحدى ف هدوء
و اجمل اصوات بحب اسمعها هى اصوات زقزقة العصافير الصبح بدرى و الكروان لما بيفكر يعدى من فوق بيتنا
ربنا يباركلك و يبارك ف اصحابك و اتمنى الانضمام لقائمة اصحابك ان شاء الله
____________
teefa

Maha Shahen يقول...

تيفا
يا رب الكروان دايما يفكر يعدى من فوق بيتكم هههههه
ربنا يبارك فيك ويرزقك أصدقاء زى اصدقائى واحسن يا رب
اسعدنى مرورك فأنت من المدونين المتميزين
ومنساش ابدا انى بقيت اخاف من مترو رمسيس بسبب البوست اللى كتبته

Blue Nile يقول...

بجد الوقت ده من اجمل الاوقات في اليوم
بحس فيه بنسيم جميل وصوت العصافير يااااه منظر تحفة بحب اقف في الشباك عشان استنشق نسيم الفجر ده
بوست جميل

Maha Shahen يقول...

blue nile
اسعدنى مرورك عزيزتى طبيبة المستقبل
نورتى المدونه واتمنى متكونش اخر زياره