أفتكرت وعدى

بمناسبة السنه الهجريه الجديده اللى هتهل علينا بالخير بهديلكم الكلمات دى

وأهداء خاص للناس دى

( زوزو _ ساره _ ملك _ مى _ سها _ يويو _ نور _ اميره _ شيماء .. وكل المدونين

بحبـــــك مهما طال البعــد
بحبــــــك حـتى منغــير رد
حتى لو صوره فـى خيالى
حتــــى لو كان وهـم جالى
دا مهما تكونى يا حبـيـبتى
مفيش غيرك علـى بـــالى
بحــب عنـيـكى تـنـاديـنــى
وهمسك فى الفضا يجينى
ويخــطـفـنى مـن الدنـيــــا
يـدوبنى يـا نـــور عـينـــى
فـى كـل مكان انـا شايفـــك
بضحـك عـنيكى وشفايفــك
ولمـا اروح ازور البـحــــر
يـطمنــى عشـــان عارفــك
وابعتـــلك جـوابـى معـــــاه
ولمـا تـغـيـبــــى يـسـتـنــــا
ويـوم ما تعودى فى مكانـا
يقـول موجـه وحشـتـيـنــى
ورد جــوابــى بـيـجـيـنــــى
يـفــرحـــــنى يـهــنـيـنـــــى

ويـسـعـدنـى يا نـــور عينى

يوم التدوينه البيضاء

ساعات وساعات

معظمنا عنده المشكله ومنا اللي شاعر بخطورتها ومنا اللى مش منتبه ليها على الاطلاق , أدمان الانترنت او الكمبيوتر عامة
انا عنيت من المشكله دى كتير جدا , لكنى عارفه ومحدده انا عايزه ايه , انا بدخل للانترنت علشان اشوف ناس بحبهم , مبقدرش اتواصل معاهم بخارج الانترنت بحريه فبلجأ ليه علشان اشوفهم مده اطول , ولأنه أرخص كمان مقدرش انكر دا , وبما انى عاطله والحمدلله فعندى وقت فراغ هايل ودا اكبر سبب بيخلينى اسلى وقتى بالكمبيوتر , واخيرا توصلت للمدونه وحبيت اكتب واقرا لناس كتيره بيهمنى اعرف اخبارهم اكتر كمان ما أقرا هما كتبوا ايه او افكارهم ايه .
يعنى لو بطلت احب الناس ومش كل الناس طبعا منا مش مثاليه قوى كدا , مش هدخل للانترنت ولا اقعد علي الكمبيوتر , ولو هما كمان بطلوا يدخلوا للانترنت او بعدوا مش هيكون فى سبب يربطنى بالكمبيوتر , الا انى اكتب , لانى حاليا بستسهل اكتب علي الكمبيوتر بدل ما بكتب على الورق , بس تعرفوا انى لما رجعت امسك القلم تانى لقيت ان حتى الكتابه على الورق ليها سحر من نوع خاص , بالذات لو بتتمتع بخط جميل , هتشعر انك زى الرسام اللي بيتفنن فى أظهار جمال اللوحه اللى فى ايده .
الحكايه محتاجه اننا نقعد مع نفسنا فى حوار صريح وندور احنا عايزين ايه بالظبط وبندخل ليه وفين الهدف وهل وصلنا ليه او لا ولو لا طيب قدامنا قد ايه علشان نحققه .. فى مثل جميل عندنا بيقول كل شيء بيزيد عن حده بينقلب ضده .. مش هنقعد نعمل احصائيات علشان نفيد بعض ونعلم بعض ازاى نبطل أدمان .. عمر الاحصائيات ما بتغير لوحدها .. لازم نساعد نفسنا قبل ما نطلب مساعدة شخص تانى ..
أمبارح انا قعدت افكر مع نفسى .. بنقول معرفة الناس كنوز .. طيب لو الكنز زاد قوى وبقى اتقل من اننا نحمله معانا فى كل مكان .. هنضطر نحطه على الارض ونقعد جمبه نحرسه من الحاسدين والحراميه صح .. طيب والحل .. مش عارفه منا عقدتها بتصورى دا
محدش فاهم حاجه صح .. طيب متشغلوش بالكم بالتفكير .. كنت قريت مره لحد قال انه ندمان وحاسس بالغلط انه اظهر شخصيته قدام بعض الناس .. وامبارح كنت بتناقش مع صحبتى هل لو ظهرت نقاط ضعفنا قدام بعض الناس .. لازم نهرب ولا نواجه .. بالذات وهو بيحاول يستغل نقاط الضعف دى .. طيب مين فينا معندوش نقاط ضعف .. بتختلف من انسان للتانى .. لو حد تاه منى خلاص ميتمسكش بطوق نجاه يسيب نفسه مع التيار وزى ما تيجى وميخافش أبدا .. انا مش منتظره شيء دى بعض الفضفضات الملعبكه .. انا حتى مش متأكده انا كان المفروض هتكلم عن ايه وسرحت فكتبت إيه ....

ساعات أحس بشوق وساعات بالآهات
لكن اعرف طريقى .. يمكن ساعات وساعات
ساعات أسهر في ليلى اتآمل فلى فات
وساعات تجيلى ذكرى ممزوجه بالآهات
وأنسى بكره ايه .. يمكن ساعات وساعات
بفكر يحصل ايه لو روحت للأيمان
وأوقات تانيه افكر امشى ورا الشيطان
أفكار تقلب كيانى .. يمكن ساعات وساعات
بعينى شايفه حق والناس تقول دا باطل
واستغرب لكلامهم واسئل ايه اللي حاصل
وأوقات كتيره أسكت مهى ساعات وساعات
اوقات اكتب بقلمى واحكى عن الحاجات
واوقات اكسر قلمى وأفضل السكات
جايز ساعات وساعات
ساعات يخونى قلبى واشوف غلط ساعات
لكن لو صح فكرى تتبدل الحكايات
اهى دى ساعات وساعات

قرار تقسيم الأنترنت

أعلنت العقول الجباره لمدمنى الانترنت بالذات اللى معندهمش غير كمبيوتر واحد

او اللى الكمبيوتر التانى خرب فمضطرين لأستخدام كمبيوتر واحد أنهم لابد وان يقوموا بتقسيم الأوقات
مما أدى الى نشوب خلافات عميقه بين الاخوات وبين الأمهات والأباء والكل كليله
فأعلنوا تقسيم الانترنت لفترات تتراوح بين ساعات و أيام علي حسب المخطط المجنون
وأصبح الكل سريعوا الحركه في تأدية كافة الاعمال الوظيفيه والمنزليه , للتفرغ بالوقت المتبقى لعدد الساعات

التى تقررت لجلوسهم علي الانترنت او للالعاب
وأدى هذا الانشغال الى أهمال الصحه العامه للفرد والأسره , هذا وبخلاف الأحقاد عندما ينقطع التيار الكهربائى عن المنزل

اوالنكد عندما يضطرون أسفين للذهاب الى الرحلات بخارج المنزل ولمدة أقصاها أسبوع ( زى المصيف )
ولتلاشى بعض الكوارث التى تنتج عن الأبتعاد عن الكمبيوتر , أخترعوا طبعا اللابتوب ( علشان ميبقاش لحد حجه )

مما أدى الى تداعى الأمور أكثر حتى وصل الأمر ببعض الأسر الى اللجوء للطلاق أحيانا والعلاج النفسى أحيانا أخرى

والأن اجتاز الأختبار لتعرف ان كنت من مدمنين الانترنت ام لا ( من الأخر علشان تلحق نفسك )

الاختبار يتكون من 10 أسئلة ، و الإجابة عنها إما ب (نعم) أو (لا) ، كالتالي :

1- حينما تكون خارج النت ، هل تشعر برغبة شديده لدخول الإنترنت ؟؟

( ) نعم ( ) لا

2- هل يتملكك شعور بالنشاط و النشوه حينما تبحر فى الإنترنت ؟؟

( ) نعم ( ) لا

3-تشعر بالآلام أسفل الظهر و في مفاصل أصابع اليدين ، أو بإجهاد فى النظر بعد تركك لجهاز الحاسوب أو أثناء جلوسك عليه؟؟

( ) نعم ( ) لا

4-إذا انتهى اشتراكك في الإنترنت ، هل تشعر بالضيق و العصبية لذلك وهل مستعد للاستدانة وقتها لإعادة النت؟؟

( ) نعم ( ) لا

5-هل تفكر بما جرى معك داخل الإنترنت من أحداث أو حوارات أو دردشات على الرغم من أنك تجلس خارجها ؟؟

( ) نعم ( )لا

6-هل يحدث منك إهمال لألتزامات أخرى كواجبات الدراسة أو العمل أو حدث تضرر لعلاقتك بمحيطك
كأفراد أسرتك أو أصدقائك بسبب النت؟؟

( ) نعم ( ) لا

7-هل تشعر بالميل للعزله و الابتعاد عن مخالطة اللآخرين؟؟

( ) نعم ( ) لا

8-هل تشعر بنوع من الاكتئاب بسبب منعك من الجلوس على الإنترنت؟؟

( ) نعم ( ) لا

9-هل تشعر بأنك تعيش أحلام اليقظه ، وبأنك غير واقعى فى بعض تفكيرك؟؟

( ) نعم ( ) لا

10-هل تأكل بشكل غير منتظم بسبب الإنترنت ، أو وجدت نفسك يوماً تأكل أمام الكيبورد؟؟

( ) نعم ( ) لا

وبعد أن تجيب عن هذه الأسئلة ، اجمع مجموع الإجابات بنعم ، و اضربهم بعشرة ، لتظهر لديك النسبة المئوية

لإدمانك على الإنترنت .
وبلغنى بيها ولنلحقك لمنلحئكش هههههههههههه ... وهتعلق يعنى هتقولنا النسبه لا مفر

واى شىء تانى تحب تضيفه ... وشكراً .

خروف العيد بين القيل والقال

كلنا سمعنا طبعا عن انفلونزا الطيور بس أبدا انا بحب الفراخ عن اللحمه أذا هقضى العيد بالفراخ وليس باللحمه

وصلنى تاج من الجميله سالى صاحبة مدونه ( حاجات جوايا ) وبعتذر جدا لأنى هنزله في التوقيت دا بس أعمل ايه مشاغل قدوم العيد بقى فياريت تعذرنى

نقول بسم الله ونبدا التاج ..

ماذا يمثل لك العيد ؟ وما أكثر شئ يبهجك في مظاهر العيد ؟
العيد فرحه ماااء بيمثل ليا أجازه برغم ان كل أيامى اجازه اصلا ههههههه
أكتر شىء يسعدنى وقتها انى اسمع صلاة العيد واشوف الناس بتزور بعضها

اوصف لنا طقوسك في العيد .. من ليلة العيد لآخر يوم ؟
أحب انام بعد صلاة العيد واصحى الاقى البيت مش عايز يتروق ياااه فرحه كبيره ههههههههههه

احكي لنا أطرف موقف حصلك في العيد ؟
فى يوم قعدنا نشوى واللحمه طلعت مستويه من بره بس واتاكلت يعنى هتتساب انسو دا العيد

والموقف التانى لما سافرت اقضى العيد فى البلد ورجعت رجلى مجبسه بس دا كان موقف هباب

بتحرص على تهنئة الأهل والأقارب والأصدقاء بالعيد .. ولا مش بتهتم ؟؟
طبعا دا واجب وطنى بس فى الأونه الأخيره بقيت بستندل وابعت للى يبعتلى وبس

( الكلام طبعا على اصحابى فقط لا غير هههههههههه )

مين أول حد تزوره أو تكلمه في التليفون /الموبايل عشان تهنيه بالعيد ؟
أخواتى وبعديها أصحابى والأقرب فالأقرب وهكذا ولو خرجت يبقى جيرانى

إيه الفرق بين العيد الحالي .. وعيد (أيام الطفولة )؟
لا طبعا الفرق كبير حتى فى فرحة القلب
العيد الحالى بتدفع اما في الطفوله بتاخد ههههههه
طبعا العطاء ليه رونق جميل بس لما كنت باخد كان الرونق أجمل

كلمنا عن ذكرياتك في العيد ؟
كنت لازم وانا صغيره اول شيء اصحى عليه هو الأيس كريم والبمب وكان دا بيجبلى التهزيق طبعا
تفتكر الحياة من غير عيد .. هتفرق كتير ؟؟؟
يااه هيبقى الفرق زي بين السما والأرض العيد نبض قلب وفرحه بتضم الأمه العربيه

إيه أجمل رسالة تهنئة بالعيد وصلتك .. قلنا طبعااا بتقول إيه ؟؟ ومن مين ؟؟
أجمل رساله وصلتنى من لوله حبيبت قلبى ومرات أخويا

( مش بجاملها اصلا هى مبتدخلش للمدونه نداله بقى ههههههههه )

وانا بعتها لمعظمكم لأنى فرحانه بيها قوى اصلها مسخره بس بتظر للواقع الحالى

وكانت بتقول : كل عام وأنتم بخير .. نظرا للظروف الأقتصاديه وارتفاع الأسعار

هذه التهنئه صالحه لمدة سنه وتشمل: عيد أضحى _ تعيين _ ترقيه _ نجاح

_ سنه جديده _ مولود _ نقل _ زواج ... الخ

احم احم .. لسه بتاخد عيدية ؟؟ من مين ؟؟ وبتديها لمين ؟
والله الوحيد الذى مازال بيدينى عيديه هو أخويا وطبعا مبدهاش لحد لأنها بتكون محترمه

فبستأثر بيها لنفسى والفكه تطلع لأطفال العيله بقى هههههههههه

إيه رأيك في التاج ؟
جميل جدا بجد بس هيضيعنى ويبين جوانبى الشريره بس يلا كله بثوابه

تحب تمرره لمين من المدونين ؟ اذكر على الأقل 10
للأسف كنت هحب أمرره لناس كتيره بس مفيش وقت

نظرا لأن العيد بكره خخخخخخخخخخخخ .. كل سنه وأنتم طيبين

الدنيا ربيع فى عز الشتا

أنا سعيده جدا جدا والسبب فى تاج السعاده من أستاذ محمد سكر زياده

انا مش بعاكسه عيب لا هههههههههه انا بس مبسوطه شويه أكتر من العاده

هذا التاج وصلنى من أستاذ محمد صاحب مدونة ( هل تبحث عن السعاده )

أكيد كلكم بتقولوا زيى كل ما تدخلوا عنده ردا عن سؤاله بكلمة طبعا وبسم الله نفتتح التاج

وللعلم بالشيء اللي مش هيقدر يكمل يتفضل يشرب شاى وقهوه وكركاديه علشان اللي ضغطه يرتفع ههههههههههههه

مهو مش أرغى انا وانتم تتعبوا لا برضوا انتم أخواتى واحبابى ولا يمكن أرضى بتعبكم

وأخيرا وليس أخرا أحب اشكره علي تاج السعاده وتعالو نرغى سوا بقى ونشوف ما هى السعاده من وجهة نظر الفلفسوفه نور

السؤال الاول : ما هى السعاده من وجهة نظرك ؟
السعاده هى أنى احس بالرضا أشعر انى مبسوطه منغير سبب , ووقتها أكون لا بفكر فى شيء ولا عايزه شيء من الدنيا بس راضيه وسعيده
السؤال الثانى : كيف تصل الى السعاده؟
صعب السؤال دا أصلى معرفش هى اللي بتصل ليا مش انا اللي بسعى ليها
يمكن لما ربنا بيكرمنا بحبه ورضاه وقتها نقدر نوصل للسعاده
السؤال الثالث : هل السعاده وهم ام انها حلم صعب ؟
بالنسبه ليا السعاده شيء قريب جدا أقدر اوصله بسهوله , لأن مليون شيء بيسعدنى وهى حاجات بسيطه بس لو نرضى بيها يعنى مهياش وهم ولا حلم صعب
السؤال الرابع : هل السعاده طريق للنجاح ؟ وضح ؟
بالتأكيد هى الطريق للنجاح لأنها هتخلينا نتقن أعمالنا وبسرعه أكتر ما كنا نتوقع
لما القلوب بتشعر بالسعاده بتزيد طاقتها وتقبل على الحياه بقوه
السؤال الخامس : ما هى اكثر اللحظات التى شعرت فيها بالسعاده ؟
كتيره اللحظات دى فصعب أتذكر موقف بعينه , لكن دايما اكتر شىء بيسعدنى اول ما عينى تلمح بحر أسكندريه وقدمى ترسى على أرضها
السؤال السادس : هل ممكن ان تحقق كل شيء ؟
اذا السؤال دا خاص بحياتى فأنا مش عارفه مفيش حد عامة بيقدر يحقق كل شىء بيتمناه , لأنه دايما بيكون طموح لأمل أبعد من كل اللي حققه .. وعامة مفيش شيء بعيد عن الله سبحانه وتعالى
السؤال السابع : السعاده تجعلك تقبل على الحياة أم لا ؟
طبعا .. تجعلك تقبل على كل شيء فى الحياه
السؤال الثامن : هل أحسست يوما انك وصلت لقمة السعاده ؟
كل لحظة سعاده بتمر بيا هى بالنسبالى قمة السعاده , كفايه انى أشعر بيها بوقتها او بعدها علشان اعرف انى كنت فى قمة السعاده
السؤال التاسع : لماذا تمر اوقات السعاده بسرعه ؟
لأن كل شيء جميل وقته قليل ودا سر جماله .. ودا اللى بيجعل الروح دايما متعلقه بيه لأنها بتخاف يمر وقته القليل دون ان تتشبع منه
السؤال العاشر : هل ترا السعاده فى التدين ؟
بالتأكيد كل السعاده فى التدين والا عمرك ما هتحس بالرضا ولا تشعر بلحظة سعاده حقيقيه .. لأن السعاده بجد فى رضا ربنا سبحانه وتعالى
السؤال الحادى عشر : هل انت متفائل وعندك أمل ؟ وضح ؟
بالنسبه لمتفائل فأنا متفائله جدا ومعنديش اكتر من الأمل لأنى مؤمنه بالله ومتأكده ان بكره أحسن .. أكتر شيء يخليك مطمئن ان بكره افضل أنك متوكل على الله وعارف انه خير من يرعاك
السؤال الثانى عشر : أذا شعرت بالحزن ماذا تفعل ؟
أكتب اى شيء يخلينى اخرج كل شىء جوايا وأبكى وأشكى لله فى مكان لا يرانى فيه الا الله
السؤال الثالث عشر : هل يستمر معك الحزن فتره أم ينقضى فى الحال ؟
أكتر حزن مر عليا فى عز كوارث حياتى كان أيام لكن الأحزان العاديه مبتاخدش وقت كتير يمكن سعات او دقايق او حتى لحظات وتنقضى بس فى أحزان بتخلف جرح فى القلب ألمه عمره ما بيختفى الا برحمة ربنا
السؤال الرابع عشر : ما رأيك في الافراد المتشائمين ؟
بجد مش عارفه أزاى نتشائم وفى ربنا سبحانه وتعالى مالك زمام الأمور , لو أحنا مؤمنين كان لازم نعرف ان ربنا سبحانه وتعالى مش ظالم ولا يكلف الله نفسا الا وسعها , يعنى مبيحملش حد اكتر من طاقته لأنه هو الوحيد الذى يعلم خبايا الصدور .. مينفعش أبدا نتشائم
لما تقابل أنسان متشائم بس فكره بأوقات السعاده علمه طريق الوصول إليها وهو طريق الرجوع لله