البحث عن فضيحه

أسهل شيء لما تطلعى اتوبيس ويكون فاضى فتعملى شهمه وتقعدى حد مكانك وتقفى انتى , أكبر مفجاءه لما الاتوبيس يتملى وتلاقى نفسك واقفه بتسبى وتلعنى فى فكرة انك اتخليتى عن مكانك لحد لأنك بقيتى واقفه ولا كأنك فى علبة سردين وتقولى اكيد مفيش شيء هيحصل اسوء من كدا , وأرخم شيء لما تلاقى كل ملابسك اتكسرت من كتر ازدحام الناس فوق بعضها , والأرخم منه لو لابسه بنطلون ابيض طويل .....
ويدور الحوار التالى
حينما تحاولى الالتفاف فتتأكدى ان البنطلون هيقع , فتنظرى للأسفل علشان تشوفى شبكتى فى ايه فتلاقيها مشكلة جزمه لأن حد دايس على رجل البنطلون ...

البنت : تقول لشخص واقف بجوارها بصوت خافت يكاد يكون مسمعهوش : رجلك لو سمحت .
الرجل : بنظره حاده وقام رافع ايديه لفوق وصوت عالى يسمع الأتوبيس كله انا مجتش جمبك
البنت فى سرها : فضحتنى إلهى يفضحك .. طيب اقوله ايه وهو واقف دايس علي رجل البنطلون بتاعى اللي لونه بقى أسود من الطينه اللي فى جزمته , وبعدين بيعلى صوته قوى كدا ليه ؟!! هو انا اتهمته بشيء وحش دنا بقوله وسع رجلك شوية , امال لو كنت قولتله لو سمحت اوعى البنطلون !!! كان اللي فى الاتوبيس فهمو ايه ....
ومتمرش دقيقه وتلاقى فى شاب قام وقف من مكانه وقالك تعالى اقعدى , طبعا بما أنك خلاص نازله قريب جدا فتقولى بكل أدب : لا شكرا .
فيكرر طلبه اللى اتحول من كرم لأمر واجب تنفيذه وبصوت اعلى اكتر : بقولك اقعدى .
فتقررى تنهى مأساة فرجة الناس عليكى وتقعدى وانتى ميته من الغيظ ....
ودا درس نتعلم منه إيه ؟ ايون صح ... اننا نبطل لبس بناطيل بيضه
ونبطل ركوب أتوبيسات سواء سياحيه او عاديه لأنه كل مشوار بينتهى بمأساه أخلاقيه او فضيحه كاذبه .

و عاد للحياه

يتنفض جسده من أثر الصدام وتتدافع دمائه بخطوط متفرقه كشجرة تحزن لفراق أوراقها في فصل الخريف لتلون الأرض من حوله
ومضات تأتى وتذهب بعينه , فتاره يرا تجمع الناس حوله فيتذكر الحادث وتاره تعود به الذاكره لماضيه , والناس يلتفون من حوله يتهامسون , ترى سيعيش ؟!!
مما كان يهرب أم أنه كان متلهف للعوده لشيء ما , فى كلتا الحالتين لقد خاب سعيه وسقط الأن , بين غياهب الحياه والموت , لا تعلم أى مما ترا هى الحقيقه
تيقن فقط أنك كنت تهرول وراء شىء لا يستحق , فما هو الأن الا جسد ملقى على الطريق , ومن حوله هم من سيكملون القصه , أما بمساندته أو بأهماله
تتجرد أمام عينيه الحقيقه دون أى زيف , فيعرف قيمة حياته ومقدار ضئل حجمه أمام ضعفه , أمام من تكبر عليه وأقسم الا يلجأ إليه , ولكن ليس هناك سواه الأن , يطمئنه ويرعاه
كم أنت آثمة ايتها الروح المغروره , ولم تكونى ستعودى لرشدك الا بهذا الدرس القاسى
رحمتك يا من ليس لى سواك , يا الله
هل أنا من سعيت إليك لأجدك أم انك من وجدتنى بعد ان تهت ؟!!!
لا والله أنت من أوجدنى ووجدنى وسترنى رغم عصيانى , وهدانى بعد أن الهانى شيطانى
يا من أقسم بك , تقبلنى من التائبين

اللي ما يعرفك يجهلك

وحشتونى قولت أرجع وارخم وارغى معاكم وأصدعكم شويه وبما أنكم انصدمتوا فى كلمتين الحب اللى كتبتهم فخلاص أرجع لقواعدى سالمه وتعالو نفكر سوا فى مثل كلنا بنسمعه مره واتنين ومليون وبنعرفه وبنقوله
اول مره دلوقتى يستوقفنى المثل دا

لما كنت مع واحده صحبتى وقريبيين من بعض احنا قوى وفى قعده كدا بهزار بنتكلم لقتها بتقولى علي فكره زمان مكنتش بحبك
ولا كنت بطيقك وكنت بقول مالها البنت دى , كنت حساكى مغروره او كئيبه ( على فكره هى تبقى اخت صاحبة اختى : لفه كبيره معلش )
البنوته كانت بتيجى عندنا هى واختها فبما ان اختها صاحبة اختى بخرج من الأوضه واسبهم يتكلموا براحتهم مش هكبس علي انفاسهم بقى , كل واحد بيحب يتكلم مع اصدقائه لوحدوا برغم انى واختى نعتبر توأمين يعنى كل شيء بنحكيه لبعض ودايما سوا الا اننا بندى لبعض برضوا مساحة حريه لكل واحده فينا
طبعا البنوته كانت بتدخل مع اختها واطلع انا بره مثلا اقعد قدام الكمبيوتر بعد ما سلمت عليهم , تتغاظ هى وتقول لأختها مالها دى مش بتتكلم معانا ولا تقعد معانا ليه بس تسلم وتمشى , لكن مع الايام فيما بعد بقينا اصحاب انا وهى اصلها كانت بتخرج بغلاسه تكبس علي قلبى قدام الكمبيوتر او التليفزيون
فبقينا اصحاب وبما اننا كلنا اصحاب يبقى دا يدينى حق اقعد معاهم لما ييجوا ( وجهة نظري بسيطه مالى انا هما اللي بيفهمونى غلط )
منكرش ان كلام صحبتى شوية ضايقنى لكن الأهم انى فى نظرها احسن دلوقتى على الاقل بقت تطيقنى ههههههههههه
تانى موقف ارخم ملى فات
واحده قريبتنا هى رغايه شوية وبصراحه مبحبش اقعد معاها بتصدع رأس اجدع حد تسول له نفسه ويفكر يقعد يتكلم معاها
المهم هى بيتها بجانب بيت عمتى فكنت في زياره لبيت عمتى ولقتها واقفه علي باب بيتها قولت اروح اسلم عليها
كنت ماشيه وال mp3 في ودانى كمان والضحكه مليه وشى وبقول يا رب سلم في سرى , قربت وسلمت عليها وقالتلى ادخلى قولتلها طيب اروح لعمتى وهعدى عليكم بليل بأذن الله , وبصراحه مكنتش سمعه هى فضلت تقول ايه لأن صوت البتاع اللي في ودنى كان عالى شوية
وفضلت اهز رأسى بالموافقه علي أيه معرفش وببتسم ليها ببلاهه كدا وبصراحه الابتسامه كانت هتتقلب ضحكه على الموقف اللي انا فيه
ورخامه منها ماسكه في ايدى ومش راضيه تسيب ايدى حتى اطفى ال mp3
واسوء شيء لو جيت تسلم على حد ويفضل ماسك في ايدك وكأن ايدك لزقت في ايده
بالعافيه سابت ايدى وطلعت لعمتى وذى ما وعدتها روحت ليها ( مرغم اخاك لا بطل )
وبعد ساعتين طلعت لعمتى وانا بعانى من صداع رهيب من رغيها اللي مكنتش برد عليه كله الا بهزار علشان احاول اقفل اى موضوع هى تفتحه
فوجئت بعديها ببنتها كانت عندنا وقالتلى علي فكره ماما بتحبك قوى وبقت تقول عليكى كلام غير الأول خالص
طيب لو حد في مكانى مش هيسئل برضوا هى كانت بتقول ايه قبل ما تحبنى هههههههههه
قالتلى كانت فكراكى متكبره ومغروره ( قولت فى سرى يا رب هو ايه الحكايه ) فجاءه بقيت بضحك منغير سبب وانا بقولها بجد
قامت البنوته قالتلى ما انتى دايما ساكته ( يعنى يا ربى هو انا لازم افضل ارغى علي الفاضيه والمليانه ثم مامتها مش من سنى هتكلم معاها في ايه اصلا )
تفتكروا بعد الموقفين دول بقى ايه جوايا , تعمل ايه لما تلاقى معظم الناس مش عرفاك وبتحكم عليك من الظاهر , بس لأنك مبتتكلمش
هل ليهم حق ياخدوا بالظواهر ويحكموا وخلاص منغير ما يعرفوا الانسان كويس , مش فى حكمه جميله بتقول تحدث لأعرفك , طيب لو اللي قدامك مبيتكلمش تبقى متعرفهوش , بتحكم عليه ليه بقى ؟!!
بقيت دلوقتى بتوقع ان فيا صفة من الصفات اللي بيشفوها , اكيد هى فى مكان ما منى يمكن انا اللي مش شيفاها , على فكره دا مش ضعف في الشخصيه دى مجرد افكار بتتخبط فى عقلى
اكيد انا حكمت قبل كدا على غيرى من المظهر الخارجى بس وعلشان كدا اتردت ليا وبقى الناس يحكموا عليا بالظواهر بس او يمكن دى عادتنا نحكم على الانسان ولو فى وقت نبقى نعرفه , لكنى برغم كل دا استفادت شيء واحد انى عمرى ما احكم على حد لا بأول ولا بأخر مره اشوفه , انا بسيب كل حد يحدد ملامح شخصيته براحته ولو اخدت معرفتنا شهور وسنين طالما انا مش فهماه ولا بتكلم معاه , محكمش عليه

أفتكرت وعدى

بمناسبة السنه الهجريه الجديده اللى هتهل علينا بالخير بهديلكم الكلمات دى

وأهداء خاص للناس دى

( زوزو _ ساره _ ملك _ مى _ سها _ يويو _ نور _ اميره _ شيماء .. وكل المدونين

بحبـــــك مهما طال البعــد
بحبــــــك حـتى منغــير رد
حتى لو صوره فـى خيالى
حتــــى لو كان وهـم جالى
دا مهما تكونى يا حبـيـبتى
مفيش غيرك علـى بـــالى
بحــب عنـيـكى تـنـاديـنــى
وهمسك فى الفضا يجينى
ويخــطـفـنى مـن الدنـيــــا
يـدوبنى يـا نـــور عـينـــى
فـى كـل مكان انـا شايفـــك
بضحـك عـنيكى وشفايفــك
ولمـا اروح ازور البـحــــر
يـطمنــى عشـــان عارفــك
وابعتـــلك جـوابـى معـــــاه
ولمـا تـغـيـبــــى يـسـتـنــــا
ويـوم ما تعودى فى مكانـا
يقـول موجـه وحشـتـيـنــى
ورد جــوابــى بـيـجـيـنــــى
يـفــرحـــــنى يـهــنـيـنـــــى

ويـسـعـدنـى يا نـــور عينى

يوم التدوينه البيضاء

ساعات وساعات

معظمنا عنده المشكله ومنا اللي شاعر بخطورتها ومنا اللى مش منتبه ليها على الاطلاق , أدمان الانترنت او الكمبيوتر عامة
انا عنيت من المشكله دى كتير جدا , لكنى عارفه ومحدده انا عايزه ايه , انا بدخل للانترنت علشان اشوف ناس بحبهم , مبقدرش اتواصل معاهم بخارج الانترنت بحريه فبلجأ ليه علشان اشوفهم مده اطول , ولأنه أرخص كمان مقدرش انكر دا , وبما انى عاطله والحمدلله فعندى وقت فراغ هايل ودا اكبر سبب بيخلينى اسلى وقتى بالكمبيوتر , واخيرا توصلت للمدونه وحبيت اكتب واقرا لناس كتيره بيهمنى اعرف اخبارهم اكتر كمان ما أقرا هما كتبوا ايه او افكارهم ايه .
يعنى لو بطلت احب الناس ومش كل الناس طبعا منا مش مثاليه قوى كدا , مش هدخل للانترنت ولا اقعد علي الكمبيوتر , ولو هما كمان بطلوا يدخلوا للانترنت او بعدوا مش هيكون فى سبب يربطنى بالكمبيوتر , الا انى اكتب , لانى حاليا بستسهل اكتب علي الكمبيوتر بدل ما بكتب على الورق , بس تعرفوا انى لما رجعت امسك القلم تانى لقيت ان حتى الكتابه على الورق ليها سحر من نوع خاص , بالذات لو بتتمتع بخط جميل , هتشعر انك زى الرسام اللي بيتفنن فى أظهار جمال اللوحه اللى فى ايده .
الحكايه محتاجه اننا نقعد مع نفسنا فى حوار صريح وندور احنا عايزين ايه بالظبط وبندخل ليه وفين الهدف وهل وصلنا ليه او لا ولو لا طيب قدامنا قد ايه علشان نحققه .. فى مثل جميل عندنا بيقول كل شيء بيزيد عن حده بينقلب ضده .. مش هنقعد نعمل احصائيات علشان نفيد بعض ونعلم بعض ازاى نبطل أدمان .. عمر الاحصائيات ما بتغير لوحدها .. لازم نساعد نفسنا قبل ما نطلب مساعدة شخص تانى ..
أمبارح انا قعدت افكر مع نفسى .. بنقول معرفة الناس كنوز .. طيب لو الكنز زاد قوى وبقى اتقل من اننا نحمله معانا فى كل مكان .. هنضطر نحطه على الارض ونقعد جمبه نحرسه من الحاسدين والحراميه صح .. طيب والحل .. مش عارفه منا عقدتها بتصورى دا
محدش فاهم حاجه صح .. طيب متشغلوش بالكم بالتفكير .. كنت قريت مره لحد قال انه ندمان وحاسس بالغلط انه اظهر شخصيته قدام بعض الناس .. وامبارح كنت بتناقش مع صحبتى هل لو ظهرت نقاط ضعفنا قدام بعض الناس .. لازم نهرب ولا نواجه .. بالذات وهو بيحاول يستغل نقاط الضعف دى .. طيب مين فينا معندوش نقاط ضعف .. بتختلف من انسان للتانى .. لو حد تاه منى خلاص ميتمسكش بطوق نجاه يسيب نفسه مع التيار وزى ما تيجى وميخافش أبدا .. انا مش منتظره شيء دى بعض الفضفضات الملعبكه .. انا حتى مش متأكده انا كان المفروض هتكلم عن ايه وسرحت فكتبت إيه ....

ساعات أحس بشوق وساعات بالآهات
لكن اعرف طريقى .. يمكن ساعات وساعات
ساعات أسهر في ليلى اتآمل فلى فات
وساعات تجيلى ذكرى ممزوجه بالآهات
وأنسى بكره ايه .. يمكن ساعات وساعات
بفكر يحصل ايه لو روحت للأيمان
وأوقات تانيه افكر امشى ورا الشيطان
أفكار تقلب كيانى .. يمكن ساعات وساعات
بعينى شايفه حق والناس تقول دا باطل
واستغرب لكلامهم واسئل ايه اللي حاصل
وأوقات كتيره أسكت مهى ساعات وساعات
اوقات اكتب بقلمى واحكى عن الحاجات
واوقات اكسر قلمى وأفضل السكات
جايز ساعات وساعات
ساعات يخونى قلبى واشوف غلط ساعات
لكن لو صح فكرى تتبدل الحكايات
اهى دى ساعات وساعات

قرار تقسيم الأنترنت

أعلنت العقول الجباره لمدمنى الانترنت بالذات اللى معندهمش غير كمبيوتر واحد

او اللى الكمبيوتر التانى خرب فمضطرين لأستخدام كمبيوتر واحد أنهم لابد وان يقوموا بتقسيم الأوقات
مما أدى الى نشوب خلافات عميقه بين الاخوات وبين الأمهات والأباء والكل كليله
فأعلنوا تقسيم الانترنت لفترات تتراوح بين ساعات و أيام علي حسب المخطط المجنون
وأصبح الكل سريعوا الحركه في تأدية كافة الاعمال الوظيفيه والمنزليه , للتفرغ بالوقت المتبقى لعدد الساعات

التى تقررت لجلوسهم علي الانترنت او للالعاب
وأدى هذا الانشغال الى أهمال الصحه العامه للفرد والأسره , هذا وبخلاف الأحقاد عندما ينقطع التيار الكهربائى عن المنزل

اوالنكد عندما يضطرون أسفين للذهاب الى الرحلات بخارج المنزل ولمدة أقصاها أسبوع ( زى المصيف )
ولتلاشى بعض الكوارث التى تنتج عن الأبتعاد عن الكمبيوتر , أخترعوا طبعا اللابتوب ( علشان ميبقاش لحد حجه )

مما أدى الى تداعى الأمور أكثر حتى وصل الأمر ببعض الأسر الى اللجوء للطلاق أحيانا والعلاج النفسى أحيانا أخرى

والأن اجتاز الأختبار لتعرف ان كنت من مدمنين الانترنت ام لا ( من الأخر علشان تلحق نفسك )

الاختبار يتكون من 10 أسئلة ، و الإجابة عنها إما ب (نعم) أو (لا) ، كالتالي :

1- حينما تكون خارج النت ، هل تشعر برغبة شديده لدخول الإنترنت ؟؟

( ) نعم ( ) لا

2- هل يتملكك شعور بالنشاط و النشوه حينما تبحر فى الإنترنت ؟؟

( ) نعم ( ) لا

3-تشعر بالآلام أسفل الظهر و في مفاصل أصابع اليدين ، أو بإجهاد فى النظر بعد تركك لجهاز الحاسوب أو أثناء جلوسك عليه؟؟

( ) نعم ( ) لا

4-إذا انتهى اشتراكك في الإنترنت ، هل تشعر بالضيق و العصبية لذلك وهل مستعد للاستدانة وقتها لإعادة النت؟؟

( ) نعم ( ) لا

5-هل تفكر بما جرى معك داخل الإنترنت من أحداث أو حوارات أو دردشات على الرغم من أنك تجلس خارجها ؟؟

( ) نعم ( )لا

6-هل يحدث منك إهمال لألتزامات أخرى كواجبات الدراسة أو العمل أو حدث تضرر لعلاقتك بمحيطك
كأفراد أسرتك أو أصدقائك بسبب النت؟؟

( ) نعم ( ) لا

7-هل تشعر بالميل للعزله و الابتعاد عن مخالطة اللآخرين؟؟

( ) نعم ( ) لا

8-هل تشعر بنوع من الاكتئاب بسبب منعك من الجلوس على الإنترنت؟؟

( ) نعم ( ) لا

9-هل تشعر بأنك تعيش أحلام اليقظه ، وبأنك غير واقعى فى بعض تفكيرك؟؟

( ) نعم ( ) لا

10-هل تأكل بشكل غير منتظم بسبب الإنترنت ، أو وجدت نفسك يوماً تأكل أمام الكيبورد؟؟

( ) نعم ( ) لا

وبعد أن تجيب عن هذه الأسئلة ، اجمع مجموع الإجابات بنعم ، و اضربهم بعشرة ، لتظهر لديك النسبة المئوية

لإدمانك على الإنترنت .
وبلغنى بيها ولنلحقك لمنلحئكش هههههههههههه ... وهتعلق يعنى هتقولنا النسبه لا مفر

واى شىء تانى تحب تضيفه ... وشكراً .