2011/03/18

نعم أم لا للدستور حيرانه

بقالى فتره مش بتابع وبصراحه مش فاهمه ومحتاره اقول نعم او لا منا لازم اشارك ويبقى ليا فايده
سمعت اللي بيقول نعم وسمعت اللي بيقول لا وهقولكم وصلت لأيه
ويا ريت حد فاهم يقولى رأيه منغير انحياز علشان افهم علي الاقل
الرافضين بيقولو هنروح نصوت بـ لا علي التعديل الدستورى مطالبين بتغيير الدستور لأنه سقط ويجب تغييره ومش تعديله والمخاوف معروفه ومحترمه لكنهم مش بيذكرو ان لو قولنا نعم هيكون فى تعديل للدستور فعاليا بعد سنه وكأن الدستور الحالى هو لتسيير الوضع الراهن زى مثلا حكومة تسيير الاعمال من قبل
طيب اللي عايز يروح يستفتى بـ لا دا مش شبه أقرار منه انه ممكن يكون فى تعديلات للدستور وأنه لم يسقط فعلا وبالشكل دا مجرد انك تروح تبقى اقررت انه يجوز التعديل فيه
كمان فى رأى من الرافضين بيقول طيب نطلع ميدان التحرير من جديد ونقول لأ ودا اقتناعا منهم انه مينفعش التعديل فى دستور سقط ويجب تغييره
( علي هامش الحوار )
فى حديث للشيخ الشعراوى بيطالب فيه بالتآنى شوية ومش يبقى فى مظاهرات ورا بعضها لحد ما نشوف تحقيق للمطالب الاولى اللي طلبناها وهل اتحققت او لا
ممكن جزء كمان من الرافضين يروح يستفتى ويقول لا للتعديلات الدستوريه ودا اسلم من المظاهرات لأنها هتتقابل بكل شده وعنف فى الفتره الجايه
طيب هل صحيح اننا لو قولنا نعم للتعديلات الدستوريه هيكون فى تغيير للدستور كاملا بعد سنه
شوفت فيديو علشان افهم ليه نقول نعم او ليه نقول لا وحسيت ان الاتنين بيفرضو فكرتهم مش بيطرحو للناس بس ليه نقول نعم او ليه نقول لا ودا مش أساس طرح الفيديو الا وهو اننا نفهم فناخد خطوه صح
انا شخصيا لسه عندى أعتقاد ان اى ترويج اعلانى لفكره هي بالتاكيد فكره مشكوك فى امرها
بيطلعو اعلانات للمواد المعدله علشان تفهم ودا اقرار انه يجوز تعديل الدستور ومش لازم تغييره وفى النهايه يقولو القرار قرارك
http://www.youtube.com/watch?v=rNnYPjb1dV4
ليه نقول نعم
http://www.youtube.com/watch?v=9u9zm4RPWaY&NR=1
ليه نقول لا

هناك 5 تعليقات:

تايه يقول...

قولى اه ورزقك على الله

AHMED SAMIR يقول...

سواء نعم او لا
الفائز هي مصر

شمس النهار يقول...

شوفي موضوع التأني بتاع الشيخ الشعراوي رحمه الله واسكنه فسيح جناته

لو تم انه لو عايش هيقول لا
ليييييه؟
علشان لوتمعنا فيه كويس هنلاقي
انه بيقول رحمه الله بعد الاستجابه للطلبات
هل استجيب للطلبات
الثورة من يوم ماقامت قالت نسقط النظام كله مش افراد
نحن اسقطنا الافراد ولم نسقط النظام
والنظام هو الدستور
كيف نوافق علي تعديلات تحي دستور نظام ديكتاتوري من سنة 52 الي الان

وده ردي علي تامر علي ارجوا ان تبحثي فيه وربنا يوفقك ل نعم او لا
المهم المشاركه
========
عارفة موضوع طول المدة وباقي الكلام علي عيني وراسي
ليه احنا خايفين من الصح
من الف باء الثورات
ثورة 25 يناير ثورة بكل المقاييس ليه واحنا بنصلح عايزين نعتبرها اصلاح وتعديلات
دي ثورة وعلي فكرة لو قلنا لا المدة الانتقاليه اقصر بكتير والمهدر من الوقت والمال اقل بكتييييير
وحطي انتي سيناريو ل لو قلنا اه او لو قلنا لا وده ردي علي تامر علي في مناقشه تمت عندي علي المدونة في اخر بوست
-----
* تامر علي

ايوة الجيش مش عايز يقعد اكتر من كده
وهو قال فعلا ست اشهر
علشان كده لو قلنا نعم هتم انتخابات يسلم مصر يالرئيس جمهورية يالمجلس شعب ويمشي واحنا نكمل بقا الباقي اللي هياخد مش اقل من سنه ونص سنتين

حاول تحط انت سيناريو للي هيحصل وشوف علشان تبتدي تنتخب من اول شهر 9 القادم رئيس ثم مجلس شعب ثم مجلس شوري ثم مجالس محليه وبعدين تعمل دستور مش في اقل من 6 شهور وبعدين تستفتي عليه ثم تحل مجلسي الشعب والشوري وبعدين ترجع تنتخب تاني مجلس شعب ثم مجلس شوري وبعدين تلتفت بقا تلاقي نفسك قعدت سنتين ماورناش حاجه غير الانتخابات في ظل الوضع الامني والاقتصادي ده بجد مستغربه
ليه مافيش حد طلع علينا يقولنا الحقيقه
اللي هي سيناريو نعم
سيناريو لا
اللي هو لسه ببحث وبحدد معالمه بس هو نص الاجرائات السابق ذكرها يعني اقسم الاجرائات دي بالنص
يعني انتخابات مره واحده لمجلسي الشعب والشوري والمحليات اضف لها استفتاء الدستور الجديد
مع انتخاب اللجنة التاسيسيه او هينتخبوها ولو هيعينوها يبقا شيل الفقره دي
وانتخاب رئيس جديد
وكله كده جاي علي ميه بيضا

الجيش طبعا الله يكون في عونه بس مش لدرجة يقلبنا كده
ليها حلول مش حلو واحد
وان مصر تعمل كل ده في شهر ده انجااااز عالي جدا
بلاش استعجال

واقتصدنا الحمد لله مش للدرجة دي كل هذا الكم الهائل من السرقة وماشحتناش
علي الاقل وفرنا فلوس النهب

وفعلا انا زيك خايفة من التعصب جدا حسيت ان ده ماتش كورة وخناقه بين مشجعي الطرفين
مع ان كل الحكايه اننا شعب خايف جدا
ومن قال نعم ومن قال لا خايف
لو رديت الامر لأصلة من قال لا خايف يضحك عليه
ومن قال نعم خايف يجوع والدنيا تنهد

ربنا يستر ياتامر ويوفقنا للصالح

yasmina يقول...

هااااى ازى حضرتك
يارب تكونى لسة فاكرانى

على فكرة الموضوع دة فعلا يحير
بس
حاليا انا عرفت النتيجة وهى نعم طبعا

وانا بجد لو كنت ادليت برايى كنت قولت نعم زى ناس كتيييير اوى اعرفهم قالوا نعم

وفعلا كنت هقولها زى ما بابا اقنعنى بيها بجد

تحياتى دايما لحضرتك

nour shahen يقول...

قولت لا ورزقى علي الله
وربنا يقدم اللي فيه الخير لينا
طبعا اكيد كلنا عرفنا ان النتيجه طلعت اغلبيه بنعم
اتمنى ربنا يرزقنا الخير فى الايام الجايه
بشكر كل اللي شارك وخصوصا شموسه
بس انا مستغربه لأخر تعليق ل ياسمينا هو انتى مروحتيش ولا إيه