2010/10/29

يبقى كش ملك



اتخنقت لا زهقت من الحياه ومن اللي فيها والبيت واللي فيه
حظى زفت لا قرفت هو ليه الفقر مصاحبنى وملازمنى ليه

شكلى كدا هلبس شكاره وامشى ازقل بالحجاره
والعيال يخافو منى بس اصل غصب عنى

لما المذيع يسأل الضيف .. دى بنتك ؟
ويرد الضيف اه بنتى أن شاء الله !!!

لما يبقى كيلو الطماطم يعمل دقيقة دولى بعد الرخص
وصنية البطاطس هتتعمل بالجوافا اوفر طبعا


لما اعرف واحده علي النت لسنين وتبقى من اعز اصحابى

وتنسى تقولى ان عندها تلات عيال وابوهم

الدنيا مشاغل بقى هههههههه


لما الدكتور يكتب الروشته بالعربى علشان اللي فى صيدلية
التأمين مش صيادله يبقى العيب فى عنيا

لما البرتقان يبقى بطعم الخيار برغم ان البرتقانه قد دماغى
يبقى عصير البرتقان هيصبنا بالبرد دا لو لقينا العصير

لما دكتور الاسنان يقولك تدخل جمعيه معانا
جمعيات الحكومه اضمن اكيد

لما نضحك نقول خير اللهم اجعله خير طبعا مش مصدقين
ولما نفرح نعيط من قمة السعاده اللي احنا فيها


لما يمرو علي البيوت يعملو استفتاء للمرشحين للانتخابات
كان لازم يكون اول سؤال .. هل تسمع عنهم ؟!!
وبخمسين جنيه
يكون ردك اكيد بسمع كل خير ان شاء الله


لما طفل فى تالته ابتدائى يبكى بعد المذاكره انه مش فاهم الدراسات
وتقوله اخته بالصف السادس امال لو تشوف الدراسات بتاعتنا ؟
فيرد يقولها ... ابقى قابلينى لو طلعت للصف السادس !!

لما قلة الادب تبقى شعر علشان مش عاجبنا الحج ابو علاء
يبقى ننشر علي الفيس بوك سلامتك يا ريس وسلامة *** أحمد فؤاد نجم



ضربو الاعور علي عينه قال خسرانه خسرانه

هناك 22 تعليقًا:

الفراشة الصغيرة يقول...

اللى يعيش ياما هيشوف

اكتر من كده وربنا بيهون

وفاء بركات يقول...

انتي فين يابنوته انتي
زى مانتي خفيفة الدم وشقيه
هي صحبتك نسيت تقولك ولا نسيت إنها .
متزوجه وأم
وعايزه تسألي دكتور الأسنان هي الجمعيه كام شهر وفيها سهم فاضي
وطريقة عمل صنية البطاطس بالجوافة
وابقي تعالي قابليني لو الملك كش
سلام بقي وياريت تيجي مدونتي وتحلي لغز آنشتين..
يلاسلااااااااام

غير معرف يقول...

حبيبت قلبي نور انا هبة وعاوزة اقولك حمدلله علي السلامة واخيرا عملتي بوست ههههههه وظهرتي ههههههه البوست حلو اوي بس بجد مين الدكتور دة اصل الصراحة مزنوقة حبتين ههههههه ادخل معاه جمعية بقا ههههههه واحب اقولك جملتك المشهورة خسرانة خسرانة! يارب اشوفك دايما

غير معرف يقول...

اية السمك لبن تمر هندى دا
متأكده انك كنتى عند دكتور ولا حلاق صحة
وطبعا صحبتك اكيد عندها عزرها يمكن كانت خايفة من الحسد ولا حاجة

غير معرف يقول...

نور والله ازعل السطر التاسع والعاشر والحادى عشر بتوعى والله الدنيا مشاغل فعلا بس برضوا بادخل وانتى كنتى فين الفترة دى كلها ...مش الدنيا مشاغل برضوا ولا نحيبك على اغياب انتى كمان ههههههههههه بوست دمة خفيف بس لية معنى ؟؟؟؟؟؟؟؟؟؟

nour shahen يقول...

الفراشه:
........
اكيد اللي يعيش ياما يشوف

استحملى بقى الله المستعان بوست وهيفوت ان شاء الله

نورتى المدونه

nour shahen يقول...

وفاء بركات:
...........
انا هنا اهو عودنا بلخبطة الدماغ مش الغياب احسن من الهلوسه دى يا فوفا بالله
هى نسيت اننا اصحاب بس لكنها اكيد فاكره كل شىء تانى على ما اعتقد

اعتقد اتملت بقى دلوقتى الجمعيه الجايه وعليكى خير ههههههههه هحجزلك

لغز انشتاين بتاعك دا هبلنى يا فوفا والله ساعه ولا حل انا مالى انا عايزه تفسير مناسب اتحل ازاى من اليمين ولا من الشمال

منورانى دايما والله واسعدنى التفكير فى اللغز برغم انى محلتوش

nour shahen يقول...

هبه أحمد:
........
مينفعش اكتب غير معروف بقى بما انى عرفت والعارف لا يعرف واللي مش فاهم يتصرف

فينك يا بنتى صلحى موبايلك بقى , انا اسفه والله بحاول اتصل من وقت للتانى علشان اعذيكى بس مقفول دايما. البقاء لله حبيبتى , ربنا يسعد ايامك الجايه

شكلى هقلب علي سعد زغلول وتبقى بدل خسرانه مفيش فايده

منورانى دايما ومنوره المدونه

nour shahen يقول...

غير معروف:
.........
سوء الاحوال الجويه فى العقل الباطل عندى عمل كدا اعمل ايه انا بقى ههههههه اسفه للازعاج بالنيابه عنه

على ما اذكر كان دكتور وشاطر والله بس شكله كان مزنوق فى جمعيه ووالله ما بهزر الحكايه كانت بجد

لا دى علي وصفها فصام فى الشخصيه هههههههههههه ودا عن لسانها والله تعالى اعلى واعلم

نورت المدونه وشكرا للمتابعه

nour shahen يقول...

غير معروف :
..........

غير معروف مشكوك فى امره ههههههههه
لا اكيد مش بقصدك انتى لأن اللي بقصدها لو بتدخل حفاظا على ماء وجهها مكنتش كتبت

وميرسى علي مرورك وتشجيعك

mohamed ghalia يقول...

أنا كنت جاى اسلم
بس التوبك وجعنى بصراحة

غير معرف يقول...

كل سنة وانتى طيبة يانور

romansy يقول...

بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

عيد سعيد على كل الناس الطيبين

WhItE HeArT يقول...

لا مش يبأه كش ملك

كده يبأه جيم اوفر

جميل جدا بجد البوست ده

غير معرف يقول...

آخر جميلة حادة. ويعتقد أبدا أنه كان هذا سهلا. تحترم لكم!

شمس النهار يقول...

انا جيت هنا قبل كده وسبت تعليق راح فين

المهم

ضحكني البوست جدا

وخصوصا صحبتك اللي نسيت عيالها وجوزها

والاخ الاصغر اللي اشتغل اخوه

:))

nour shahen يقول...

محمد غاليه ..
...........
شكرا لسؤالك يا محمد منورنى دايما
اسفه لو التخاريف بتجرح بتمنى متبقاش حقيقه مؤلمه لكنها موجوده للاسف

nour shahen يقول...

غير معروف :
........
كل عام والأمه الاسلاميه كلها بخير شكرا للتهنئه الرقيقه

nour shahen يقول...

رومانسى :
........
اتمنى يكون مر العيد عليك وعلي الاهل كلهم بخير وسعاده يا رب شكرا لمرورك

nour shahen يقول...

WhItE HeArT
............
بتمنى متبقاش دى النهايه يعنى لازم الحاجات دى تتحسن بس هو انذار لازم ناخد بالنا منه ونحاول نعدل للاحسن
بجد بتمنى نتحسن للاحسن
نورتينى

nour shahen يقول...

غير معروف:
.........
بتتكلم عن جملة ضربو الاعور علي عينه
مهو هنقول ايه يعنى هى فعلا خربانه خربانه بس ادينا بنحلم ونتمنى للاحسن والله المستعان

nour shahen يقول...

شمس النهار:
.........
اطفحه يا شموسه لو اخدته ونكرته يا قلبي هههههههه والله ما شوفته
ربنا يديم عليكى الفرحه والابتسامه يا رب
دايما منورانى والله وبيكفينى مرورك منغير ولا كلمه