2009/11/21

حوار بين عقلين




عيزنى اقول الحقيقه متزعلوش منى عيزنى اقول دايما الحق يبقى لازم تتفهمو موقفى وتحاولو تسامحو لازم تفتح قلبك وتسمعلى علشان تقدر تسامحنى علي كدبتى ولولا خوفى مكنتش كدبت , مين فينا مبيكدبش ؟!! ساعات مش بنكدب حب فى الكدب لا بس بيكون هو اسهل الطرق اللي تخرجنا من موقف بشع او محرج او حتى ورطه , لو قولنا الحقيقه الطريق بيكون ميت متر لكن لما نقول كدبه بيبقى الطريق خلص بخطوه ..


زمان كنت بتكلم كتير لدرجة انى بقول كل حاجه وكانت أختى تشد فى شعرها تقولى يعنى قولتى طيب مش تقولى كل حاجه قولى شوية واسكتى وسيبى اللي قدامك يخمن الباقى ويبقى عرف لوحدو , مش لازم تندبى بكله , ولما اللي قدامى كان يزعل انى قولتله كل حاجه بصدق كنت اقوله يعنى مش عاجبك طيب اخبط راسك فى اتخن حيطه , تقولى يعنى تندبى وكمان قلة زوق , دلوقتى بقى معنديش اكتر من البكش , فى ناس مش بينفع معاهم غير كدا , اسكت وبكش تمر من قدامهم بسلام , لأن مهما قولت هيفضل اللي في قلوبهم زى ما هو , يعنى بنضحك علي بعض ومن جوانا عارفين احنا الاتنين اننا كدابين , بس مش بنواجه بعض .


حدثتنى صديقتى فقالت :

.................................

Moon: لا الناس ده متلزمنيش

Moon: انتى عارفانى

Moon: مبحبش اقرف نفسى

Moon: يعيش العقلاء بجهد الاغبياء

Moon: لولا الاغبياء لمات العقلاء

Nor: حلوه العباره بس مش فهماها

Moon: مهو العقلاء هيتفزلكوا على مين؟

Moon: اصل فكرى بجد

Moon: لو كل الناس عاقلة

Moon: هتبقى مصيبة

Nor: ليه

Nor: اخد دور الغبى شوية واتفزلكى يا عاقله

Moon: هيبقى فى منافسة

Moon: هيقتلوا فبعض

Nor: تقصدى هيملو من بعض

Nor: علشان محدش فيهم هيعرف يشتغل التانى

Moon: غير كته

Moon: مش معنى ان كلهم عاقلين

Moon: يبقى ارائهم زى بعض

Moon: ارائهم مختلفة

Moon: وصح

Moon: بس اكمن كل واحد عارف انه عاقل

Moon: هيتخانق مع التانى

Moon: لولا المغفلون لمات الاذكياء

Nor: ههههههههههههههههههه

Moon: وبعدين لو انا وانتى فضلنا نتكلم بعقل كته

Moon: وكلامنا كله جد

Moon: هنموت ناقصين عمر استغفر الله

Nor: ههههههههههههههههه

طب نكدب ولا نقول الحق !!

هنخاف ولا هننطق بالصدق !!

( اقولكم زى ما بقولها للأطفال يومياً )

خليك شجاع وقول الحق

لو جه الخطر على بابك دق

ربك ينجى المؤمنين الصادقين

والكدابين لأ



آآآآآخ نسيت أقولكم كل سنه وانتم طيبيين

وبالعيد معيدين وبرضا ربنا فرحانين ومبسوطين

هناك 13 تعليقًا:

Sweet Violet يقول...

مش كل الناس بتكون عايزة الحقيقة فى ناس بتعشق النفاق مع انها بتكون عارفة انه كده الا انها بتستمتع بده لا و عندها قدرة انها تقنع نفسها بيه

و للأسف اللى عايز يمشى على طريقتهم بيخسر نفسه قبل مايخسر اى حاجة تانية


كل سنه و انت طيبة
^_^

موناليزا يقول...

ياااه أخيرا
كنتى فين يا نور بقى لك كتير مختفية
وحشتينى جدا على فكرة
==
بصى ياستى انا كمان هرد بأغنية كنت بغنيها للأطفال

طق طق طق... لأ لأ لأ
قول الصراحة.. قول الحق
اوعى فى يوم تكذب على ماما
ولا تزعل منك بابا
اللى يقول الصدق نحبه
واللى بيكذب مالهوش حق
:)

mahasen saber يقول...

مفيش خاجه ولاا حد يستاهل نكدب ولاا ننافق عشانه

الصدق ثم الصدق على قد ما نقدر

mohamed ghalia يقول...

بصراحة تق منجاة فى كل حاجة مهما اتعرضت بقى مش هتفرق كتير
كل سنة وانتى طيبة
وحمدا لله على سلامتك
حقيقى نورتى مدونتك من جديد

*الطالبة عفو الله *زوزو يقول...

بوصي بقى لو جينا ندقق تفكيرنا في الموضوع حنتجنن فلهاذا نقول انحنا حنحاول منكذبش مهما كانت الظروف وحتى البكش نحاول منبكش لان هو كمان احيانا الظروف والموقف بيظطرك انك تبكش
يبقى نحاول نعدي الموقف بطريقة تانية غير الكذب والبكش
بعيد عن الموضوع وحشااااني اوي اوي وكل سنة ونتي طيبة والى الله قريبة
بستنى العيدية

نـــــور يقول...

كل سنه وانتى طيبه يانور وعيدك سعيد ياجميله
ولو عايزة رأيى افضل الصدق واللى يحصل يحصل
اه بنكدب وربنا يسامحنا ويغفرلنا بس الحقيقه لازم تكون هى الاصل مش البكش ها ;)
:)

اقصوصه يقول...

تدوينه ممتعه :)

الفراشة الصغيرة يقول...

كل سنة وانتم طيبين

عيد أضحى سعيد عليك

وعلى كل الامة الاسلامية

zOzO يقول...

كل سنه وانتي طيبه
ووحشاني اوي
معلش انا مقصره معاكي
بس والله مش كنت بدخل
اعذريني

الملاك يقول...

السلام عليكم ورحمة الله وبركاته

أختى فى الله نور
كل عام وأنت وأسرتك وأمتنا الإسلامية بخير حال

أعتذر على التأخر

دمت برعاية الله

نور الدين (محمد الجيزاوى) يقول...

اختنا الكريمة نور انا فرحت جدا لما شوفت بوست جديد
وقلت اولا اسلم عليكى واقولك قد ايه اننا بنفتقد قلمك المميز
ربنا يحفظك
وغدا إن شاء الله لى عودة للتعليق بقى على البوست لأنى اكتشفته وانا خارج
اعمق تحياتى
.........
نورالدين محمود

Ahmed Fawzy يقول...

السلام عليكم، هذه هى المرة الاولى التي ازور فيها هذه المدونة واكتب فيها تعليقا واسمحي لي أن أقول أن مدونتك رائعة ، وأروع ما فيها أنها هادفة وممتعة في آن واحد،وأتفق معك في أن غالبية الناس يفضلون الكذب والبكش على الصدق والصادقين ، وقد عانيت مثلك كثيرا من هذا الأمر ، وأتصور أن من تطرب أذانهم لسماع كلمات الاطراء والمديح المبالغ فيه مجرد اشخاص لديهم احساس بالنقص، ولذلك يجدون في أنفسهم رغبة لتصديق هذا البكش مع انهم يعلمون انه مجرد بكش، كما ينفر هؤلاء من الصدق والصادقين لأنهم يخشون أن يواجههم الانسان الصادق بالواقع او بالحقيقة التي لا يستطيعون مواجهتها لأن الصدق مع النفس يتطلب قدر كبير من الشجاعة يفتقدها عشاق الانصات إلى البكش، أما الانسان البكاش نفسه فهو في الغالب يكون شخص انتهازي ومعدوم الضمير،وعلى النقيض من ذلك تماما الانسان الذي يثق بالله اولا وبقدراته الشخصية ثانيا فهذا لا ينتظر مدحا من احد ولا يحاول خداع احد لأنه يثق أن الله وحده هو النافع الضار،ومع ذلكك كله لابد من مراعاة مشاعر الاخرين عند إبداء الرأي بصراحة وعدم الافصاح عن الحقيقة بشكل صادم وجارح للاخرين ومراعاة مخاطبة الناس على قدر عقولهم نظرا لاختلاف عقول الناس وثقافاتهم ، كما لا يجب فهم كل كلمة للتشجيع او للتعبير عن شئ ايجابي على انها نفاق ، فكلنا بحاجة إلى التشجيع الغير مبالغ فيه ، واظن ان شخصيتك تميل الى النقد الاقرب للصحة ، والنظر إلى الامور بنظرة عميقة وثاقبة الى حد كبير و التعبير عن رأيك بشجاعة ، وبالطبع كل هذه الصفات قد تثير غيرة الاخرين وبالتالي لن يلاقي رأيك قبولا عندهم حتى ولو كانوا مقتنعين به ، وأعتذر عن الاطالة وأسأل الله أن يثبتك على الصدق لأنه هو الطريق الصحيح.

فن المبيعات و التسويق يقول...

اية الكلام الجامد ده ياريت المزيد

.... مدونتي http://salesfromatoz.blogspot.com/