2009/03/30

أخرت المعروف كدمات على الكفوف



أجمل ضحكه ممكن تقابلها هى ضحكة طفل تخطفك وتلاقى نفسك بتضحك علي ضحكه او بتحاول تسكته لأن قلبك بيتألم مع بكائه وأشد غضب لما يعصبك طفل وتقف محتار يا رب أضربه ولا احاول اتمالك اعصابى واعديها مهو ياما هيغلط ومغلطش غلط مميت يعنى وتكتفى تطفى ثورة غضبك بتهديد ليه بالضرب
أعتقد دلوقتى وصلتلكم فكره أنا شغلى الجديد مع مين بالظبط .. ايون مع جيل المستقبل اللي على ايدى هيكونو عباقرة أكيد .. امال طبعا .. وبلاش تريقه لأنى شبعت تريقه من أول يوم شغل لحد ما بدأت اكتب البوست دا
بينى وبينكم انا كنت يوم الخميس اللى فات بقول أنا ايه جننى ونزلنى اشتغل منا كنت فضلت فى بتنا معززه مكرمه ودا لما تشابكت الأحداث واترزع باب الفصل على أيدى علشان الحق أيد طفل , أدى اخرة الشهامه كدمات وألم وغيظ متقدرش تفرغه على حد
تصدقو انى عماله استرجع الأحداث واقول يا رب هو انا منحوسه ولا دا طبيعى , خدوا مثلا تانى يوم شغل حصل فيه أيه ....
اليوم كان جميل ومفيهوش دراسه كتير وتقريبا كنا هنقضيه فى أنشطه ترفيهيه وقعدت والأطفال حوليا ورسمت ليهم ولونا سوا وانبسطوا جدا وطفل صمم الون ليه بنفسى ويادوب قام من قدامى علشان يوصل للديسك بتاعه واذا بصوت طفله بتعيط والأطفال بتقول الحقى يا مس !!!
رفعت المس عنيها من كراسة الرسم وبصت لبعيد شافت الطفل اللى لسه قايم من قدامها حالا وكان بيضحك وسعيد واقف والكراسه فى ايده وعليها شيء أبيض مش فاهمه أيه هو , فبدأت اقرب علشان استوضح هو فى ايه ويا رتنى ما قربت مع كل خطوه كانت بتوضح الصوره اكتر ان معدة الطفل قررت تتخلص من كل الأكل اللي زلطه ولكن يا ريت الموقف وقف لحد كدا لا كان ينتظرنى الأسوء لما وصلت بالفعل للديسك وشوفت الصوره واضحه وكامله ولقيت ان الطفله اللي بتبكى دى كانت جنبه وغرقانه من فوقها لتحتها ببقايا الأكل ( يــــــــــــــــــع ) , آآآه يا ربى حطيت ايدى علي وشى من سخرية الموقف وانا بحاول اهدى الطفله واخرج الأتنين لبره علشان الداده تاخدهم تتصرف فيهم بقى ويجيبوا حد ينضف المكان , بس بينى وبينكم بقيت بضحك ان الطفل عمل كدا لما بعد عنى والا كنت هبقى مكان الطفله اللي بتعيط هههههههههههه
وبعد الحاجات اللي تقلب المعده دى هوريلكم صورة سيف كرمبو ويوم تانى أحكيلكم ليه أسمه كدا وبعتذر لو النوادر هتبقى معظمها بالنمط دا هههههههههه بس دا قليل من اللي بتعرض ليه يوميا واتحملونى بقى
كان معكم المس نور من خلف كمبيوتر البيت اللي بطلت ألمسه من شدة الأجهاد والمرض اللى أصابنى مؤخراً بسبب الأطفال أصل كل يوم كان فى بوسات من مجموعة أطفال ولكن بعد ما تعبت قررت السلام يبقى بالأيد .

هناك 20 تعليقًا:

ABOALI يقول...

اخرة المعروف كدمات على الكفوف
يااااااااااااااه
على الامثال المحبطة
ايه ده

انتى بتعلمى خير وبتربى الاجيال
يعنى ان شاء الله هايكون جزاءك معقول يعنى على قد نيتك هههههههههههه

على العموم من دخل الى عالم الاطفال
وجد الكثير والكثير
فاعانك الله

وتسلحى بالصبر

تحياتى

موناليزا يقول...

نور الجميلة
ازيك ياحبيبتى
كان الله فى عونك بس من موقعى هذا بقولك ان ده فى الاول بس بعد كده هيبقى كل الى بيعملوه بالنسبة لك عادى
فنحن السابقون وانتم اللاحقون

yoyo يقول...

صباحك سكر يا أجمل مس
نحن السابقون وانتم اللاحقون هييييه دنيا
هههههههههههههه
شفتى يا قلبى بقى وجع القلب
ربنا يعينك يا قمر
شغل الحضانات دا بجد عاوز دماغ اولا لازم تتعاملى معاهم كانك طفول زيهم بالضبط وفى نفس الوقت لازم يكون فيه نوع من الاحترام بينكم
بس بجد وجودك بين الاطفال و الله احساس لذيذ بس خلى بالك الاطفال مش بقيت اطفال احنا مش كنا اطفال يا امى النسخ بتاعتنا انتهت خلاص هههههههههه

ربنا يعينك يارب ويقويك وان شاء الله تستمتعى بوقتك فى الشغل كدا

و الله انت وحشتنى جدا جدا جدا وكمان واحشنى الكلام معاك انا غبت كتييير بس ان شاء الله نتكلم قريب والحمد لله انى اطمنت عليك يا قمر
تحياتى
يويو

mohamed ghalia يقول...

المهم إنك سعيدة بشغلك
ربنا يكرمك

الطالبة عفو الله يقول...

انا مليش دعوة عايزة تحكيلي بالتفاصيل و كل المواقف
بصراااحة انا حسداكي على الشغلانة دي و ان كانت متعبة حبتين بس جميلة مفيش احلى من الاطفال و جمالهم و برائتهم
بجد يا بختك ربنا يسعدك فيها يا رب
بس طبعا لو كانت على حساب لقاءنا بلاش منها
يعني من يوم اشتغلتي محصلتش عليكي غير مرة و لا اتنين دة ظلم بقى
يعني ايه الاطفال يشوفوكي كل يوم و انا يوم في الاسبوع دة ظلم و اعتداء على حقوقي

على العموم النت معايا و اول ما تدخلي رنيلي و فضيلي نفسك يوم الاربعاء و الخميس

يلا خدي بالك من نفسك يا وحشاااني

اه على فكرة انتي شريرة اوي مبتسبليش اوف لاين كم مرة بوصيكي و باكد عليكي بس مخك الله المستعان عليه

ما علينا المهم انك وحشاااني جدا

سوري ع الاطالة

mahasen saber يقول...

مليون مبروك على الشغل يا نور

ربنا يوفقك فيه يا مس نور وتقضى وقت جميل ومفيد فيه يا قمره

سيف ده سكره ربنا يحميه لمامته عسوله

نور اعتقد انتى بتشتغلى فى الجنه
ربنا يحمى كل طفل لمامته
اللهم امين

موجة يقول...

يععععععععععععععععع
اخسسسسسسسسسسسسسسسس
انا بطنى قلبت عليا
بقرف موووووووووووت
معلش يابنتى ربنا يعينك على المناظر دى اللى كلها هتكون من هذا القبيل

نـــــــــــــور يقول...

لوان الاطفال اجمل حاجة فى الدنيا الا ان المعامله معاهم اعتقداصعب حاجه فى الدنيا

انا مش بعرف اتعامل معاهم اصلا انا حتى افل الاعب فى العيل الصغير وزى الفل واول مايعيط ارميه على مامته :)
هبقى ام فاضله انا

مبروك الشكل ومستنيين نوادر سيف كرومبو ياقمر وبالتوفيق فى الشل ربنا يسعد قلبك بيه يارب

انا حبيبه على فكره

ســـــــهــــــــــر يقول...

و سقطت لويز
يوووووووووووه قصدى نور
احدى ضحايا التدريس للاطفال
على فكره الطفل المصرى من اذكى اطفال العالم لحد ما يكمل 6 سنين
طبعا الكلام ده مفهوم مغزاه
بس على ايدك مستنيه يرفعوا السن ده شويتين
قولى يا رب و اصبرى
الصبر مفتاح الفرج
هو فيه اجمل من التعامل مع عصافير الجنه
ده كفايه الضحكه دى
مستنيه نوادر كرمبو

شمس النهار يقول...

المفروض تكتبي مذكراتك يوم بيوم
وزي ماهيكون في مواقف بايخه هيكون في كتير مواقف ظريفه ولطيفه ومؤثره
ربنا يعينك

ليكوريكا يقول...

قد ايه العمل اللي بتقومي بيه مهم

انتي اللي بتغرسي البذره في الارض وبتسقيها وبترعيها

خدي بالك اننا هنحتاج كل بذره في موسم الحصاد

نهر الحب يقول...

لقاء تدوينى يوم الجمعه 10/4
ببورسعيد اللقاء عبارة عن تجمع للتبرع للايتام المعاقين
ولقاء وتجمع تدوينى بعدها
ان شاء الله
ياريت تشرفنا
التفاصيل عندى وعند ماما امولة

لؤلؤةالرحمن .....هويتى اسلاميه يقول...

السلام عليكم ورحمه الله وبركاته

مبااااااااااااارك عليكى ياقلبى

الشغل ومعلش استحملى بئه وجع الدماغ

دى ضريبه الشغل حتى لو مع انضج

الرجال فما بالك بالاطفال

------------------------------

حياه بلا عنوان يقول...

السلام عليكم ازيك يانور البوست جميل قوى وكمان ربنا يوفقك فى الشغل ويقدرك على فعل الخير يارب وربنا يبارك فيكى يارب تحياتى

yoyo يقول...

امممممم
ايه الغيبة دى كلها يا ست مس بقى
ينفع كدا يا قمر
يارب تكونى بالف خير ياااااااااارب
وحشتنى اوى اوى اوى

الازهرى يقول...

وادى جزاء اللى ما يسمعش كلمة ازهرى يقولها

انتى اقعدى فى البيت وريحى دماغك
العباقرة كتير والحمد لله

والا اقول لك
انتى علميهم واتعلمى منهم
انا عملت كده واستفدت كتييير

مستنى يوميات مدرسة قبل الذهاب للعباسية

وفاء بركات يقول...

إزيك يانور
أنا مستبشره خير علي الجيل القادم
وبالنسبه ليك فرصه لتدخلي عالم الطفل
وتكتشفي أسراره دول حيعلموكي من
أول وجديد ..
هو انت زعلانه مني ولا آيه يعني مش بتزوريني بقالك كتير.
مستنياكي دعواتي لك بالنجاح والتوفيق ياأبله نووووووووووور

وفاء بركات يقول...

إزيك يانور
أنا مستبشره خير علي الجيل القادم
وبالنسبه ليك فرصه لتدخلي عالم الطفل
وتكتشفي أسراره دول حيعلموكي من
أول وجديد ..
هو انت زعلانه مني ولا آيه يعني مش بتزوريني بقالك كتير.
مستنياكي دعواتي لك بالنجاح والتوفيق ياأبله نووووووووووور

mohamed ghalia يقول...

أنا قولت أجى أسلم

غير معرف يقول...

hiya makeyourselfready.blogspot.com owner discovered your site via Google but it was hard to find and I see you could have more visitors because there are not so many comments yet. I have found site which offer to dramatically increase traffic to your blog http://xrumerservice.org they claim they managed to get close to 1000 visitors/day using their services you could also get lot more targeted traffic from search engines as you have now. I used their services and got significantly more visitors to my blog. Hope this helps :) They offer most cost effective backlink service Take care. Jason