2008/11/24

عروستـــــــــى


تخيل لو دق جرس الباب وأنت بتفتح بكل سرور مرحب بأى ضيف سيأتى , تفاجىء ببنت هاديه بتتكلم بكل ثقه وعقل وبتطلب مقابلة والدك او والدتك او الأتنين سوا
تحاول كرجل أبداء شوية من السيطره على الأمور وتسئلها خير ؟!! حضرتك عيزاهم فى ايه؟!!
وبكل أدب وأحترام تبادلك أبتسامه خفيفه وترد تقولك كل خير بأذن الله , وتعيد صياغة طلبها بكلمتها , ممكن أقابلهم؟
فتعود أنت لطرح سؤال أخر , طيب أقولهم مين حضرتك ؟!! وبصمتها للحظات تسطرد قائلا أنهم بالداخل تفضلى !!
تزيد علامات التعجب بوجهك حين تدخل هى وكلها يقين أنهم بالداخل بالفعل وكأنها كانت تعلم وما سؤالها الا بمجرد شكليات , وتقف متحير ماذا تقول لأسرتك ؟ من هذه الضيفه التى رفضت الأفصاح عن شخصيتها الا أمام والديك !!
وتأتى المفاجأه بما لم تتخيل ...........
بعد أن عرفت عن نفسها , ومكانتها وسبب تواجدها
أنها تطلب أن تكون زوجتك , بمعنى أوضح تطلب يدك من أهلك
بعد أن سئلت الجيران والأقارب عن أخلاق أبنهم الوحيد
وتقف مذهول وتتسائل هل أنا أحلم أم انها حقيقه !!!!!!!!!!
والسؤال الأن هل تتخيلون ما هو رد فعل ذاك الشاب
هل يثور فيطردها , أم يضحك ويسخر منها
هل يقبل الأرتباط بها , أم يستنكر فعلتها بهذه الجراءه
هل يعتبرها وقحه أهدرت أنوثتها , أم يرا أنها ايقنت انه الرجل المناسب لها
أرجو ان لا يثير موضوعى هذا استياء البعض , فلقد طرحته لأنى قرأت جمله وأعجبتنى بشده
كانت تقول : عودوا رجالا ... كى نعود نساء .

هناك 42 تعليقًا:

الرومـيصاء يقول...

ايه الهنا ده كله
اول تعليق
لولوللللولولولى
المهم ندخل فى الموضوع
احمممممممممممممممم
مش عارفه اقول ايه بصراحه
بس معتقدش ان ده موجود
يعنى حتى لو البنت هى الى تطلب الزواج
يبقى عن طريق الاهل
كما فى قصه سيدنا موسى لما قالت المرأه(ياابتى استأجره ان خير من استأجرت القوى الامين)
فهى قامت بالتلميح للابيها بأهم صفتين يجب ان يكونوا فى الزوج قوى وامين
ومفيش مانع ان الاب يطلب لبنته الزوج الصالح
لاكن بالطريقه دى انا اعتبرها اهانه للمرأه

دمتى بحفظ الله غاليتى

mohamed ghalia يقول...

هههههههههه
ياريت والله
أنا مستنى أهو
أعتقد إنى ممكن أب يختار لبنته زوج صالح زى مكان الصحابة والسلف الصالح بيعملوا أحيانا
لكن بنت تخطب لنفسها مباشرة أعتقد صعب شوية
بس عن نفسى لو حصلت وسألت عن البنت ولقيت فيها المواصفات إلى انا عايزها ليه لا صحيح هكون مصدوم شوية بس مش مشكلة
بعدها هفكر كويس وأقرر
عندك حق لابد أن نعود رجالا كى تعود الناس.
بعيدا عن الموضوع أنا كنت جاى المدونة عشان أطمن عليكى لإنك طولتى غيالك قوى
الحمد لله انك طمنتينا عليكى
دمتى بكل الود وفى سعادة
دمتى فى حفظ الله

saragebaly يقول...

نور شاهين

من اول سطرين من الموضوع وحسيت انك هتقولي كدة

بس انا ضحكت جدا
وفي نفس الوقت تخيلت قدامي الولد هيعمل ايه؟؟

لاقتها انها هتختلف من شخصية للتانية
ممكن واحد يضحك والتاني يتعصب والتالت يكون رد فعله كذا.......

يعني منقدرش نقف على رد فعل واحد

نيجي بقى للبنت اللي تعمل كدة

انا شيفاها انها جرأة شوية انها تروح وتطلب ايده من اهله
يعني ممكن تقول لاهلها انها معجبة بفلان والاهل يتصرفوا
يعني هيكون تصرف الاهل بطريقة مش هتقلل من شأنها

وفي الآخر اذا البنت او الولد اللي بادر بالخطبة كله نصيب ومكتوب

وحشتيني اوي يا نور
يا توأم الروح لاني لسة عند كلامي بشوف فيكي كتير مني

لكِ مني اجمل تحية بعطر الياسمين

كل الحب

سارة

السينيور يقول...

اكيد ممكن تطلب ايده بطريقه غير مباشرة واحسن من كده
لكن اعتقد انها كده بترخص نفسها وبتقلل من قيمتها قدامة
لكن تصرفها ده لا ترضي عنه العادات والتقاليد ولا الدين
ولو كان رجل صالح وتحب ان يكون زوجها فيمكن ان تلمح لاهلها بكده
لكن تروح خبط لزق كده لاهله تقولهم انا جايه اطلب ايد ابنكم كبيرة دي شوية
بوست حلو ويشغل الدماغ

موناليزا يقول...

حمدالله على السلامة ياقمر
البوست بقى فكرتها هتطلع بنت صينية من اللى بيبعوا الحاجات على البيوت
لكن طلعت أوت
متهيألى الشاب ده يااما هيضحك ويقضيها هزار مثلا ويسالها هتجيبلى شبكة ايه وعندك شقة ولا لا وحاجات كده بعنى
او هيعمل مكسوف ويدخل غرفته ومش هيسمع التفاصيل
او هيفرح طبعا وينزل يجيب حاجة ساقعة

من غير عنـــوان يقول...

طبعا فكرة
دينيا أعتقد أنه لا حرج في حالة الثيب... إنما الفتاه فأعتقد أن الحياء من الدين.. والإحراج وارد..
أعتقد أيضا أن الشاب المتقدم عادة ما يرسل من يستطلع الأمر
____________
تعليق صغير على أفلامك وموسيقاك دون الدخول في الحرام والحلال.. ليس كل شئ في الدنيا نافع فقط أو ضار فقط..وإنما الأعمال بالنيات..

أمنياتي

Unknown يقول...

السلام عليكم ورحمة الله وبركاتة
اولا حكاية ان بنت تعرض نفسها على رجل للزواج دا مش محرم شرعا وان كان الحياء يضع حد لكرامة المرأة فيه بشكل كبير وتلعب ايضا رغبة المرأة فى الاحساس بأنها مرغوبة وان الرجل هو من يريدها وهو من يقدم على تلك الخطوة دور كبير وحاسم 000 يعنى من الاخر دا لا حرام ولا عيب بس اكيد مش بالاسلوب دا لانه اسلوب فنتازى جدا وغريب على اعرافنا وخالى من الحياء

SHAPE YOUR LIFE (ABOALI) يقول...

فى هذا الزمن كل شيىء متاح
طبعا لنقص القيمة الدينيه والاخلاقيه
الكل يبحث عن من يكمل معه الطريق
فقط ياءخذ بيديه وهو ايضا يفعل المثل
وغابت من بينا الرجال وغابت النساء
لذا ليس من المستغرب ان يتوسم البعض الصلاح فى الاخر ويتمنى الارتباط به
ولكن لم نصل الى هذا الحد الذى تقوم فيه الفتاه بنفسها وانما الطبيعى ان تكون الام او الاب هم المبادرين بالطلب او التلميح

ولكن ما حدث فى البوست المعروض فاق التصور بعض الشيىء ولكنه غير مستغرب

فى زمن التوهان
افعل كل شيىء يا انسان
حزن وفرح وعلامات استفهام
ليه ماسئلتش امتى الرجوع
امتى تبدء طريق الرحمن
تحدد هدفك وترسم العنوان
فى زمن التوهان
افعل كل شيىء يا انسان

فى البوست جمله عجبتك وعجبتنى
بس تفتكرى مين يعود الاول وليه وكيف؟

”*°•.˜”*°•..سونه..•°*”˜.•°*”˜ يقول...

السلام عليكم وعلى اهل السلام
براحه كده وبكل هدوء انتى تتخيلى نفسك فى هذا الموقف انا لا اعتقد ابدا !!!!
ولو تريدى عودت الرجل ! لا يوجد رجل يقبل هذا الوضع واهل الرجل ايضا .
وخصوصا فى المجتمع الشرقى الذى نعيش فى
وبطلى الاحلام دى يانووووور عينى(سونه)

Ahmed Mohamed يقول...

هاقولك ايه الي هيحصل

وشي هيحمر قوي وادخل جري علي الحجره بتاعتي وانا قلبي بيدق من شعور اعتراني
بالسعاده ممكن بالتوتر جايز
وسيدق باب حجرتي بعد ان انصرفت الفتاه بعد انا قال لها أبي سوف نفكر ونسأل الولد ونرد عليك ان شاء الله
ويدخل والدي مع والدتي ويسالوني

الجميل رأيو ايه
وشي يحمر اكتر وابتسم ابتسامه خفيفه واميل بوجهي ناحية الارض
وتدخل والدتي في الموضوع بعد ان وضعت يدها علي كتفي هوه ليه رأي بعد رئيك موافق طبعا

لولولولولولولويي
هههه
****
صحيح المثل بيقول اخطب لبنتك ومتخطبش لابنك بس مش معني كده البنت تروح لحد بيت اسرة الولد وتقول انا طالبه ايد ابنكم
الموضوع بيدخل فيه تقاليد وعادات وعلي فكره العادات دي مش سلبيه علي الاطلاق واقرب كلمه ممكن تتقال

الله يرحم ما جيتي لحد بيتي وطلبتي ايدي
هوه انا كنت ضربتك علي ايدك عشان تتجوزيني
ال رضينا بالهم والهم مش راضي بينا

لا انا مش مع كده خالص

أكون أو لا أكون يقول...

هههههههه... افكارك غريبه يانور... بس ممكن... ههههه اعتقد ان الشباب حيتقبلوا الموضوع او يرفضوه حسب شكل البنت... لو حلوه اه حيفرحوا هههههههه ولو مش حلوه البنت ياويلها... تبقى جنت على حالها المسكينه هههه وتكون ده نهاية مستقبلها الزواجي هههه

ان شاء الله مايجيش يوم نشهد الحالات ده... دي تبقى كارثه ههههههههههه

وميض ابتسامة يقول...

قد اختلف معك ياعزيزتى .. فالرجل بطبيعته هو الباحث عن نصفه الاخر .. وعندما يجدها يسعى الى كسب ودها وامتلاك قلبها .. حتى ترضى ان تكون نصفه الحلو ...
ولكن عكس الايه فيه امتهان للنصف الحلو وتنازل عن المكانة الرفيعة التى حباها بها الخالق فبدون رضاها لا يكون هناك حب ولا زواج من اصله
قد تبدأ الفتاه بمشاغلة الحبيب المطلوب
ولكن الاجمل والاكرم لها ان يكون هو البادئ .. فهذا هو الطبيعى
واخيرا لو حدث معى ما تناولتيه فى البوست .. فسوف اكون على يقين ان هذه الفتاه غير طبيعية..!!
فليس هناك اجمل من ان يكون الرجل رجلا والمرأة ..مرأة.

خالص تحياتى .. مع تمنياتى بدوام التواصل

وفاء بركات يقول...

السلام عليكم
أولا الف حمد الله علي السلامه
كنت زعلانه جدا لإنقطاعك عن التدوين
الفتره اللي فاتت .
موضوعك عجيب بس بيقول حاجه
مرتبطه بالمقوله في نهاية البوست عودو رجالا كي نعود نساء
قريت كل التعليقات الكل بين رافض المبدأ أو واخد الحكايه تهريج
لكن الموضوع له مغزى بعيد المدى
الفتاه اليوم تبحث عن رجل يكون لها سند وأمان
ورجل يبحث عن زوجه تمده بالمال أوتكون
ذات جاه وسلطان
وإليك مايقال الأن
ضل حيطه ولا ضل راجل ...
الرجاله ماتو في 73
وأصبح المثل القديم قعاد الخزانه ولا الجوازه الندامه يتردد كثيرا في هذه الأيام
يجب الا ينهي هذا الموضوع عند هذا الحد أطلبي من زائريك رأيهم في تأخر سن الزواج وأسبابه
ورأى كل من الشباب والشابت في زوجة المستقبل وراح تسمعي العجب
بوست مهم وأتمني لك التوفيق
وعدم تكرار الإنقطاع عن
التدوين ليكي وحشه

وفاء بركات يقول...

أشكرك علي نعتي بالصديقهالجديده
لأنه شرف لي ....وأتمني ان
أكون عند حسن ظنك بي..
وسيعدني مرورك وتعليقك
دمت

محمد شوقي يقول...

السلام عليكم ورحمة الله وبركاته
لدي مشكلة عرضتها في مدونتي
http://la7zat200.blogspot.com/
ارجو اعاطئ رأيك

شكرا

rovy يقول...

ازيك يا نور
يارب تكونى دايما بخير
يمكن اللى بتقوليه ده صعب فعلا لكن مين عارف !!
عجبتنى جدا انا ايضا تلك المقوله
عودوا رجالا كى نعود نساءا

دمتى بكل ود

تحياتى

ahmed_k يقول...

هههههههههههههههههههههههههه
بجد موقف مهزله
حاولت أتخيل الموقف ده معرفتش
حتى تخيله أمر صعب
بس فكره مجنونه اللي خطرت على بالك دي ,,,
وفعلا نحن في زمن كثر فيه الذكور ولكن قل فيه الرجال
نسأل الله العفو والعافيه

shaimaa samir يقول...

لا اعتقد تصل الى هذة الدرجة

ربما يتملك البنت بعض من الافصاح امام الولد
_وهذا ساد فى زمن اللاحياء_
ولكن الى البيت
لا اظن

حتى ولو لم يعودوا رجالا
لم لا نكون نساءا

هل يوم القيامة متوقف احد على احد
فلماذا نستخدم نفس النهج فى الدنيا

هل لانهم لم يغضوا البصر
لا نغض
وهكذاااااااا

نور اسلا الله ان يجعلك دوما نورا
سعدت بتشريفك حبيبتى

حلم الطيور يقول...

,واللهى يا نونو قصة غريبة بس اتخيل انها ممنكن تحص فعلا ليه لا بس زى ما قالو معظم الاصدقاء قبلى انو فعلا رد الفعلا بيختلف من شب لاخر وربنا يكمل البنات بعقلهم .؟
http://hlmaltior.blogspot.com/

غير معرف يقول...

الاخت نور اتابع مدونتك منذ فترة وهى بحق جميله ومحترمه اسمحى لى بالتعليق على هذا الموضوع ده مش ممكن يحصل على الاقل فى مجتمعاتنا الشرقيه هيكون شئ مضحك وغير منطقى فالحياء شطر الايمان ان فعلت البنت ذلك فقدت حيائهاوبذلك ينقلب ميزان الدنيا وان كان قد قل بالفعل الحياء فى هذا الزمن لكن لايصل الى هذا الحد حتى اللى بيعمل غلط بيحاول اخفائه وبعدين تخيلى الولد هو اللى داخل بصنية الشربات ومتكعبل فى نفسه ده ينفع لا اعتقد ولكن الموضوع دمه خفيف وتقبلى مرورى عندك وفى حفظ الله اتركك..

قلم رصاص يقول...

صعب ده يحصل في الوقع

لكن ده ميمنعش ان الأهل ممكن يلمحوا بحاجة زي كده

من باب المثل اللي بيقول :
اخطب لبنتك .. ومتخطبش لابنك

لكن بالشكل المباشر ده اعتقد مستحيييييييييييييييييييييل

تقبلي مروري الأول على مدونتك الرائعه

تحياتي

سلوى يقول...

بصي أنا ضحكت :) وكنت متوقعه إنها رايحه تخطبه :))

بالنسبه للعريس
فرد فعله هيختلف حسب شخصيته

ممكن يتقبل .. ممكن يتناقش
ممكن يرفض ويقول إيه المجنونه دي
:)
دمتى بكل الخير

رئـــــيسـة حزب الأحلام يقول...

حكاية غريبة
بس كان ممكن تفاتح الولد فى الموضوع الاول هههههههههههههههههه
بدل ماتكلم اهله كدة من غير مايعرف ياولداه
بس عارف فى زمننا دة ربنا يستر
الموضوع اتقلب وفعلا الجملة الاخيرة عايزة كلام
لما الرجالة يبقوا رجالة اكيد الستات هيكونوا ستات
والله ولى التوفيق

انسان وبس ! يقول...

والله ممكن ساعتها اقولها ادينى فرصه افكر هههههههههه
اللى ناقص بقى ان حد عندى يسألها باستياء
انتى شفتيه فين قبل كده انطقى ؟
وانا اقول انا اول مره اشوفها
هههههههههه
بس هو موقف مستحيل على الاقل ها فى مصر
البنت هنا عندنا لو طلبت منها او حاولت انك تعرفها اكتر دماغها تروح وتيجى وممكن تفتكر انك عايو تتجوز...وفد يكون
فما بالك انها هى اللى تتقدم للراجل

وينكى يقول...

عودوا رجالا كي نعود نساءا
فكرتيني بمسرحية شفتها من كام سنه فى ورشة مركز الابداع
مجموعة من الاسكتشات الفكرة دى ذاتها كانت بتتناقش
البلد ماعادش فيها رجال ونساء
كله قلب جنس تالت

yoyo يقول...

وحشتنى جدا جدا جدا يا نور وبجد مشتاقة اوى انى ارجع اتكلم وارغى معاك مش اتكلمنا من فترة يالا حسبى الله ونعمة الوكيل فى النت بقى يا اختى انت عارفة القر بقى هنعمل ايه يالا ماعلينا

اجى بقى للبوست مع مج النسكافية التمام دا شوف يا ستى
هابدا من الاخر
عودوا رجالا ... كى نعود نساء
ايوه هى دى بقى المقولة التمام هى فين الرجالة مع احترامى يعنى اعتقد انهم اتاسروا فى الحرب وبلا رجعة ولم يبق سوى قلة قليلة ياحرام وجارى البحث عنهم ههههههههه

بس تعرفى هى الاخت اتسرعت برده مش كانت يعنى مهدت للعريس حاولت تفاتحته الاول يعنى عشان مش يتفأجا كدا يحرم ويتكسف هههههههههههه
والله العظيم فكرة تمام ويا سلام بقى العريس قاعد مكسوف كدا ووشه فى الارض وهى عاملة تقوله ياعمى احنا هنجهز كذا وكذا وبابه يقولوا موافق يا حبيبى يالا على خيرة الله السكوت علامة الرضا هههههههههه زغرتى ياأم فاروق لولولولولولولولولولى

بس فى حاجة بقى ياترى العصمة هتكون فى ايد مين ابقى اوعى تقولى فى ايد أمينة انت عارفة سى السيد حالف عليها الايام دى هههههههههههههه

والله يا بنتى ربنا يستر علينا بقى يعنى اقصر واروح انا اخطب وخلاص يالا اهو منه تجديد برده وهو كل شوية العريس هو اللى يجى خلاص نجرب نعملها احنا ماهو الوضع مش بقى نافع بقى ههههههههههههههههه

عسل والله بس مهما كان الحياء بيمنع البنت مهما كانت جريئة بس كتر الكبت بقى ممكن يعمل حاجات كتير يعنى الله هما الرجالة هترجع رجالة امته بقى ههههههههههههه

يالا اشوفك على الف خير طولت عليكى بقى انت عارفة المدونة مدونتى
تحياتى
يويو

فاتيما يقول...

الجملة حلوة قوى
عودا جال كى نعود نساء
دا حقيقى
طبعاً الفكرة مجنونة بس ممكن تحصل
يعنى ممكن بنت هيا اللى تعترف بحبها للولد و تقوله عاوزة اتجوزك
بتحصل على فكرة
بس غالباً الموضوع بيبقى فاشل لأن الراجل أتعود على منطق الصياد مش الفريسة و ميحبش يبقى هوه فى موقع اللى تم أختياره ...
تحياتى ليكى يا نو

همس يقول...

تصدقى وربنا كنت زمان ايام احلامى الهبله

كنت بقول ياااااااه لما اقابل شاب يجبرنى ان اصارحه واروح اخطبة

ما الرسول عليه افضل الصلاه والسلام حصلو كدا

كنت بقول لنفسى بطلى هبل

هو فيه راجل يستهال تروحيلوه وتعملى كدا

وكنت فاكره انى مجانينو والله

طلعتى بتفكرى زى ( بس عفوا مش مجانينو انتى )

بس تعرفى الاجمل من كدا
ان فعلا تلاقى راجل يقبل بدا ويقدره

ويحبك علشان الموقف دا

بس فينى يا حببتى تلاقى

كلهم ......

بجد احيكى على طرحك للموضوع علشان كان جه قبل كدا فى بالى

تسلمى بجد يا قمر

Kiara يقول...

عودوا رجالا ... كى نعود نساء .

جملة جاااااااااااااااامده يانور

بصي مهما كان مش لازم البنت تتخلي عن حيائها

هومش حرام اللي عملته لكن موقف منيل اوي

وفاء بركات يقول...

فينك حبيبتي وحشاني

إن شاء الله خير ...

طمنيني عليك ...

مع خالص دعواتي

بالفلاح والنجاح

وقلب راضي وبال

مرتاح

*الطالبة عفو الله *زوزو يقول...

حبيبة قلبي وحشاااااني جدا جدا و مش عارفة ازاي حستحمل بعدي عنك الفترة الجاية
اسفة اوي اتاخرت اوي في الرد انتي عارفة السبب ما تحتاجي تبرير
بوست فعلا مناسبة لعنوان المدونة تعالو نفكر سوا
قلولي بقى وصلكم التفكير لايه
هو موضوع صعب ان البنت هي الي تتقدم للشاب بس هو شيء مش حرام و جرت العادة بالعكس لا اكثر
يعني لو غضينا النظر عن كلام الناس يبقى هو شيء عادي و مفهوش حاجة
خديجة رضي الله عنها عرضت نفسها للزواج برسول الله صلى الله عليه و سلم و تم الموضوع و كانوا اسعد زوجين و كان بينهما حب كبير
لو في شاب يستاهل فعلا التضحية دي ممكن البنت تقدم نفسها بس بطريقة حلوة مش زي ما عملت البنت الي كتبتي عنها
و ربنا يرزقنا جميعا الزوج الصالح و لشباب الزوجات الصالحات

نور الدين (محمد الجيزاوى) يقول...

السلام عليكم
اولا الف حمدا لله لعودتك الكريمة الى مدونتك الرائعة وافكارك القوية كعادتك

أما عن موضوعك المميز فأنا شخصيا أراه بوجهتين كلاهما حق

الاول : يرى أن الاصل فى الفتاة الخجل فيكون من العسير جدا ان تكسر هذا الحاجز وتقحم نفسها فى لجة البحر لأن هذا قد يفقدها رصيدها الاكبر المتمثل فى خجلها

الثانى : وأنا شخصيا مع الرأى الثانى وهو تقبل الامر لأن له سند شرعى
فالسيدة خديجة هى من خطبت النبى لنفسها وذكرت السيرة المطهرة أكثر من نموذج لفتيات يعرضن انفسهن للزواج من الصالحين وكان هذا الجيل هو اعظم الاجيال خلقا وحياء

لكن هذا شريطة أن يكون العرض لأن الشخص متدين خلوق اما اذا كان لمجرد الاعجاب بشخص او شكل فساعتها ستدفع الثمن باهظا جدااااااا

تحياتى لك متواصلات ما طلعت الشمس
.....................
نور الدين محمود

Maha Shahen يقول...

الروميصاء
......... أهلا أهلا
منوره أول تعليق ومنوره الدنيا كلها
لو بيسعدك تكونى اول تعليق انا منزلش اى بوست بعد كدا الا لما اقولك الاول
بس فينك يا بنتى مختفيه مننا خالص ليه كدا , وحشانى
نرجع مرجوعنا للبوست بقى
هو بالفعل التخيل دا مش موجود حتى الأن علي ما اعتقد لكن فيما بعد الله أعلم ههههههههههه
انا موفقاكى بالرأى تماما
أسعدنى تعليقك ومرورك
_________________________

mohamed ghalia
..............
عجبنى جدا ردك الهايل اكتر ما ضحكنى طيب يا ريت ما صدقت ولا ايه يا محمد ههههههه
متشكره جدا لرأيك وردك الجميل
الله يكرمك يا محمد ودايما منور المدونه
بروحك الطيبه وقلمك صاحب السعاده
__________________________

saragebaly
..........
صديقتى الجميله وتوأم الروح
والله انا شخصيا شيفاها وقاحه مش جراءه هههههههههههه بس كان لازم اعرف كل واحد هيتخيل أيه بالظبط

بس تعرفى انا شيفاها برضوا صعب حتى لو بتحب حد جدا بوجود صفات رائعه فيه كالأخلاق الطيبه والصفات وهكذا
انها حتى تلمح لأهلها
لأن بهائها في انه هو اللي يقدم علي خطبتها ويلاحظها مش هى اللي تلاحقه

انتى كمان وحشانى جدا جدا
يا ريت أقدر أفضل عند حسن ظنك
ويسعدنى جدا اننا فى بينا تشابه
بس يا رب في الخير بس ههههههههههه علشان انا سعات بقلب شريره جدا

نورتى يا أغلى واحب الناس لقلبى ولمدونتى
__________________________

شاب مصرى مفروس
...............
انا متفقه معاك جدا بالرأى وبشكرك لأبداء رأيك وتعليقك الكريم
أتمنى يكون الموضوع بالفعل أدى غرضه
ونورت المدونه ويا رب متكونش أخر مره
__________________________

موناليزا
........
الله يسلمك يا قمر من كل شر يا رب
اهى فكرة البنت الصينيه دي جديده بس ممكن استغلها واعملها في بوست تانى ههههههههههههه سرقه علنى اهى بقى

تخيلاتك فائقة الروعه بس كلها تهلك من الضحك
أقولك تعالى انا وانتى نشرب الحاجه الساقعه دي على ما نشوف حل للبوست دا هيرسى علي ايه
نورتى يا قمرتى
__________________________

من غير عنوان
............
بالتاكيد ليس كل شيء نافع فقط او ضار فقط ممكن ينتج من خلال الشر بعض الخير والعكس
وبدون الدخول فى حلال او حرام كان المقصود عودوا رجالا كى نعود نساء
وكانت طريقى تخيل شوية بفنتازيا
لو كل منا التزم بجانبه واوفى فيه واتقن مش هنلاقى اختلال ابدا فى الموازين
دايما منور المدونه بتعليقك العقلانى الجميل
__________________________

نهر الحب
.......
وعليكم السلام ورحمة الله وبركاته
بالتاكيد لا حرام ولا عيب بس مش بالتخيل اللي وصفته أبدا بالفعل
لكن عادتنا وقفت لحد ان الراجل بس اللي يتقدم للخطبه ونادر او منعدم لو لقينا والد بنت طلب من شاب انه يرتبط ببنته فى وقتنا الحالى
بشكرك علي ابداء رأيك فى الموضوع
__________________________

aboali
.......
اولا بشكرك علي الارتجال الجميل دا
برغم انك محددش موقف معين ليك او تخيل ما الا انك بترجح ان كل شيء ممكن
اما بالنسبه لمن يعود اولا
فأنا سبق وذكرت بأحد التعليقات ان لو كل انسان التزم بما خلق له مش هيكون في اختلال في الموازين
وبما ان الرجال قوامون علي النساء
يبقى عودوا رجالا أولا كى نعود نساء
وبكدا اكون ذكرت مين يعود الاول وليه
أما كيف بقى دي لها شرح يطول
لكن اختصارا ممكن نقول الالتزام بالدين والاخلاق والاعراف التى لا تتعدى علي الدين او لا تخالف الاخلاق
فأذا عودنا للدين عاد كل شيء سليم
بشكرك لمتابعتك وتعليقك
_________________________

سونه
.....
وعليكم السلام ورحمة الله وبركاته
طبعا انتى عارفه انى متغاظه منك ههههههههههههههه
بالتأكيد لا أتخيل نفسى بموقف هكذا لأنى بختلف معاه كل الاختلاف لكنه كان مجرد تخيل لا أكثر لأعرف ماذا تخفى بعض العقول وقد كان
هذا التخيل جاء من وحى أبتعادنا عن الاخلاق والدين والتزامنا بس الاعراف التى تخالف الدين في بعض الاحيان
ونحن نسير خلفها دون أدنى شك فى عدم صحتها
بمعنى أصح لو اختلفت اعرافنا برضوا هنقوم ببعض الاعمال ونرفض بعضها ونقول كدا صح أستناد للعرف فقط
وطبعا الكلام دا مش موضوعنا دلوقتى
لكن الموضوع بيضم كتير من العناصر المختلفه
أما بالنسبه لأحلامى بقى فدا كان بالفعل تخيل لكنه مش من أحلامى
دا من الواقع المرير اللي ممكن نصبح في يوم من الايام فيه
وحسابنا بقى في موضوع غيطى منك علي الايميل , ومحدش يحوشنى هههههههههههه
__________________________

ahmed 3lam
...........
حلو قوى التخيل الساخر دا هههههههههههههه

اهو احنا ممكن نعدل المثل ونقول اخطب لأبنك ولو لقيت المعجزه اخطبه لبنتك

مش كل العادات ايجابيه جدا
اقل شيء اللي انت قولته موضوع انه يعايرها
امال هى مش بتشوف ليه قلة قيمه ليه فأن الزوج اللي سعى كتير جدا حتى ينول رضاها ويرتبط بيها
ومبيجيش يوم وتقوله له فاكر الله يرحم يوم ما حفيت ورايا علشان ترتبط بيا
ان كانوا هيقضوها كدا هتبقى حياتهم فاشله قوى والنوع دا من الكلام هو سبب رئيسى في خراب البيوت
واخيرا في المضمون احنا متفقين لكن في بعض العناصر مختلفين كل الاختلاف
بشكرك لأبداء تخيلك ورأيك في الموضوع
__________________________

أكون او لا اكون
..............
مش غريبه ولا حاجه ثم دا تخيل يا ميرو هههههههههههه يعدى يعنى
حلو قوى علي حسب شكل البنت عليه العوض فى الاخلاق بقى هههههههههههه
أمين يا رب منتمناش ابدا يجى يوم بالفعل نشوف حالات زي كدا
ربنا يصلح حال النساء والرجال
منوره يا قمر المدونه دايما
ويا رب دايما نشوفك ضحكتك منوره الدنيا
_________________________

وميض أبتسامه
............
بيعجبنى جدا ردك الرائع واكتر شيء استوقفنى جملة
فليس هناك اجمل من ان يكون الرجل رجلا والمرأه مرأة
لأنها بتطابق تمام
عودوا رجالا كى تعود النساء نساء
بشكرك جدا لأبداء رأيك وتشريفك للمدونه

Maha Shahen يقول...

وفاء بركات
..........
وعليكم السلام ورحمة الله وبركاته
الله يسلمك من كل شر يا رب
ربنا ما يجيب زعل تانى ابدا يا رب
نظرتك كانت هايله فأمسكتى بكل خيوط الموضوع برغم رقة تلك الخيوط

للاسف بالفعل بقينا نقول ضل حيطه ولا ضل راجل لأننا شايفين في الحيطه الأمان اكتر

بعتذر جدا مقدرش اكمل في الموضوع عن كدا برغم انى بالفعل كتبت بعض الافكار لكنى اتنازلت عن تلك المواجهه

بتمنى لو غيرى يحاول الموضوع فيه اكتر من اتجاه وكثيرا من العناصر
لكنه شائك جدا وهيقابل هجوم يفوق قدراتى

ولا شكر على واجب فأنتى أجدر الناس استحقاقا للصداقه بمعناها الجميل

دايما منوره المدونه وبيسعدنى دايما مرورك وتعليقك
_____________________________

الراجيه عفو الله
...............
وعليكم السلام ورحمة الله وبركاته
قبل ان اجيب رد التعليق ذهبت بالفعل وقرأت المشكله وطرحت بعض الحلول
أتمنى تكون المشكله اتحلت علي خير
____________________________

rovy
.....
العزيزه روفى
الله يسلمك من كل شر
انا بخير والحمدلله فى احسن حال
يا رب تكونى انتى بصحه وسعاده
بالفعل محدش عارف بكره هيحصل ايه بس منتمناش الحال يوصل بينا لكدا
ويا رب العباره توصل لقلوب الناس ويفهموها قبل ما تعجبهم
بشكرك لأبداء رأيك وتواصلك
نورتى المدونه ودايما مزيناها بمرورك
___________________________

ahmed_k
........
سأكتفى بأعادة تلك الاقتباسات

وفعلا نحن في زمن كثر فيه الذكور ولكن قل فيه الرجال
نسأل الله العفو والعافيه

لكن دا مش لهجوم ولا لتحيز لصف معين لا ابدا
بس محتاجين نظرة اخرى وفكر وعمل وتغيير بالله عليكم فكروا فيها بقلب مش بعصبيه وعقل متشدد

__________________________

shaimaa samir
..............
ردك خلانى أفكر من ناحيه تانيه للموضوع
وعجبتنى جدا الجزئيه دي

حتى ولو لم يعودوا رجالا
لم لا نكون نساءا

هل يوم القيامة متوقف احد على احد
فلماذا نستخدم نفس النهج فى الدنيا

وتحيرت وقولت ولما لا
لكن انا جوايا بيقول انى محتاجه مساعده
لوحدى اه هقدر وانا مبعملش معامله بالمثل , فأذا رجل غلط اغلط واقول اشمعنا انا لا
انا مبعملش كدا دا عن نفسى
لكنى محتاجه لمجتمع حولى يتغير يكون مجتمع سليم
مش محتاجه لقوانين عدم تحرش جنسى علشان اقدر امشى منغير ما حد يقولى كلمه جارحه في الشارع
محتاجه لأخلاق ترجع محتاجه لرجل يعود بالفعل رجل يتمتع بكل صفات الرجوله وليس مجرد ذكر
الرجال والنساء جزئين بيكملوا بعض
مش ندين ولا خصمين ولا ينفع أننا نقسمهم , كل واحد فيهم ليه عمله اللي لازم يتقنه علشان متختلش الموازين
مينفعش كل واحد فيهم يقول وانا مالى ولا ينفع اقول منا ماشيه كويس ومفكرش في اختلال الجزء الاخر الجزء اللي بيكملنى
لازم احاول اقومه وارجعه كما كان
لأنى في حاجه إليه لكى تكتمل الصوره

بشكرك لأبداء رأيك ولتعليقك وانا ايضا اسعدنى كثيرا تشريفك ليا
___________________________

حلم الطيور
...........
برغم انى مقتنعه تماما انك مجنونه الا انك ساعات بتقولى حكم يا قلبي
هههههههههههههههههه
وبالفعل كنتى مفجاءه ليا في عالم التدوين
ربنا يكمل الشباب والبنات بعقولهم
دايما منوره المدونه وبالتأكيد منوره حياتى وأخيرا منوره مصر برجوعك من جديد ليها
___________________________

ana.kda
.......
بشكرك علي المجامله اللطيفه بحق المدونه
ويا رب أفضل عند حسن ظنك
اجمعت ببعض النقاط المهمه بتعليقك
وانا بتفق معاك جدا
لك جزيل الشكر لأبدائك رأيك في موضوعنا
ودايما نشوفك منوره المدونه
__________________________

قلم رصاص
.........
أسعدنى مرورك الأول ويا رب ميكونش الاول والاخير ودايما نشوفك منور المدونه بتعليقك وآرائك
بشكرك لمشاركتنا برأيك
___________________________

تأملات
......
بالفعل أقرب وصف ليها هيكون الجنون
دايما نشوفك سعيده ومبسوطه
وبشكرك لتخيلك للموقف وابداء رأيك في الموضوع
___________________________

رئيسة حزب الأحلام
................
تفاتحه الأول لا كان هيرفض هههههههههههه
هو لازم تفجعه كدا علي طول مفيش تفاهم
بشكرك جدا لمرورك وابداء رأيك
ودايما منوره المدونه
____________________________

انسان وبس
.........
والله سكر يا محمود ههههههههههههههه
لذيذ تخيلك ويهلك من الضحك
ههههههههههههه وتعمل فيها بريء بقى وتقول انا اول مره اشوفها
ويتهموك انك كنت بتعرفها من زمان ومخبى
بس لو جينا للحق اهى دي نقطه كمان
أشمعنا يعنى بيحاسبوا البنت علي معرفتها للشباب ويسيبوا الولد شوية عنصرية بقى انا عارفه حدود الدين بس برضوا مش من حق الاتنين انهم يعملوا اى علاقات مع الطرف الأخر الا بحدود

لو حصل يقتلوها بقى ويخلصوا من عارها ههههههههههههههه
بشكرك لأبداء رأيك ولمرورك وأرجع بقى نور مدونتك من جديد طال غيابك
_________________________

وينكى
......
انا برىء يا بيه انا مشوفتهاش ههههههههههههههههه
مبقاش فيها رجال ولا نساء لالالالا نحن هنا معلش هههههههههههههه
بشكرك لأبداء رأيك ومشاركتنا بيه وبعتذر لو كنت بهرج كتير بس الموضوع مبقاش يتحمل اكتر من كدا
مش محتاجين لمهزلة جنس تالت كمان
خلينا نحل مشكلاتنا الاوليه ثم نلتفت لما خلفناه
دايما منوره عالم التدوين
__________________________

yoyo
....
يويو حياتى
صديقتى الصدوقه
فينك يا مختفيه
انتى كمان كنتى وحشانى جدا جدا
متحسبنيش علي النت ليتقطع تانى هههههههههههههه
ربنا يحميكى يا قلبي من شر حاسد اذا حسد
يادى النسكافيه اللي جيبنا وره ماله القصب وعلى شط الترعه ههههههههههه
فكراه يا أجمل مجنونه

ربنا يعطرك فيهم يا اختى في وسط البحث
هتجبلنا الضرب كدا يا يويو

لا كان لازم تسرعه كدا علشان تعرف رد فعله أيه هههههههههه علشان اصلا تلحق تكلفته وميقولش لا لا ولا ااااخ
ههههههههههههههههههههه
متشكرين يا ام اسماعيل علي تصورك الكوميدى هههههههههههههههههه
أكيد هتكون في ايد امينه بالفعل علشان لو اتخنقوا يرجعوا ليها تفض بينهم
لالا اوعى تتهورى لتتعورى دا بس تخيلات يا حياتى هههههههههههههه
قولى يا رب يا يويو يا اختشى ههههههههههههههههههههه ايون قوليها وسمعى الجيران وسيحى لنفسك بقى
طبعا يا قلبي المدونه مونتك والبيت بيتك والغيط غيظك علي رأيك هههههههههههه ولا طولتى ولا حاجه كنتى طولتى كمان شوية يا اختى دا حتى كدا قليل
منورانى دايما يا قمرتى ولنا لقاء أخر
___________________________

فاتيما
......
اهو احنا دايما اللي مودينا ورا أفكارنا العجيبه الصياد والفريسه والحرب اللي بنسببها
دا جواز وحياه واستقرار وسكن وموده كما يقول الرحمن
تعليقك من التعليقات اللى عجبتنى جدا
برغم انى بختلف معاكى في عبارة الصياد والفريسه لكنى مقدرش أنكر انها موجوده
بشكرك لمشاركتنا برأيك ودايما منوره المدونه
___________________________

همس
..
ليه بتسميها هابله بس دا اجمل شيء هو الاحلام
عليه افضل الصلاه والسلام
مش هنلاقى اخلاق زيه دلوقتى ابدا
لكن في ناس اخلاقها عاليه جدا وتستحق كل الاحترام طبعا
لالا متقلقيش كلنا في الهوا سوا ههههههههههههه
يا ستى ولو قولتى مجانينو يعنى هيحصل أيه قولى اللي يجى علي بالك ومتقلقيش من شيء ابدا
فالزعل مرفوع والكلام ليس بممنوع

اه يا اختى متلاقيش اللي يقدره تلاقي اللي يعايرك بيه فيما بعد ههههههههه

ربنا يرحمنا برحمته ويكملها بالستر

وانا احييكى علي رأيك الاكتر من رائع
وانتى بس تأمرى وانا عيونى اطرح ليكى كل الافكار اللي تخطر علي بالك واللي متخطرش
منوره والله المدونه واسعدنى جدا تعليقك

Maha Shahen يقول...

مولان
....
ههههههههههههههههه
عسل يا كوكى
هو مش حرام اللي عملته بس منيل قوى

لا ان رجعنا للحق فهو حرام
مينفعش تروح للبيت حتى لو أهله موجودين
ومينفعش تطلب كدا بكل براءه وتتخلى عن حيائها
ومش محتاجه اقولك منوره لانك مش منوره انتى مسكره ودايما نورك غالب
_________________________

وفاء بركات
...........
والله ما عارفه دايما حظى معاكى ليه عامل كدا
ههههههههههههههه
انا هنا اهو بخير والحمدلله فى احسن حال
كل ما بكون عندك واحاول اعلق بعد ما قريت الكمبيوتر بيرخم عليا ويوقعنى خالص مالص من علي الانترنت
واحيانا برجع احارب واقول لا هعلق تانى واوقات تانيه بستسلم للأمر الواقع واقول هعلق بوقت تانى
وقت يكون الكمبيوتر بتاعى مش واخد باله ههههههههههه

ربنا يكرمك علي دعوتك الجميله ليا
____________________________

الطالبه عفو الله
...............
اااااعععععععععععععع متفكرنيش يا زوزو
زمان المغرب منوره واسبانيا مضلمه
فرصتى بقى اخطف خوخيتو وهو مش معاكى
لقد وصل لعلمى انه مس هيسافر معاكى ههههههههههههههه اخطفه بقى فرصتى
انتى كمان وحشانى جدا وهتفضلى وحشانى لحد ما ترجعى لينا من جديد
ولا يهمك ولا اتاخرتى ولا شيء انا عارفه الظروف
ربنا يكرمك حبيبتى ويوفقك يا رب
وبشكرك لمشاركتنا رأيك وهتوحشينا وارجعى بقى يلا سفر يوم واحد كفايا هههههههههههههههه مش شوفتيها بقى ارجعى
ربنا يحفظك من كل شر يا رب
________________________

نور الدين
..........
وعليكم السلام ورحمة الله وبركاته
الله يسلمك من كل شر
متشكره جدا علي المجامله الرقيقه دي عنى وعن مدونتى
بشكرك علي تعليقك علي الموضوع بنقاطك المنظمه
ودايما منور مدونتك بمرورك وتعقيبك

saragebaly يقول...

الجميلة نور

كل عام وانتِ بألف خير يا جميل

عيد أضحى سعيد عليكِ وعلى كل اسرتك

كل عام وانتِ إلى الله اقرب واتقى

كل الحب

سارة

Maha Shahen يقول...

saragebaly
...........
صديقتى العزيزه ساره
كل عيد وانتى بألف خير وصحه وسعاده دائمه يا رب
عيد أضحى سعيد عليكى وعلى كل الأهل والأحباب يا عزيزتى

حاجات جوايا يقول...

هههههههههههههه
والله كل شئ جايز فى الزمن ده

ولو انه بعيد شوية
بس فعلا بقى فيه خلل مجتمعى
فى الجامعة مثلا تلاقى البنت جريئة وبتروح تكلم زمايلها الشباب وتبادر بالتعرف بمناسبة او من غير .. وفى الشغل كمان
البنات اتغيرت بجد
مش عارفة ليه كده ؟؟

مع انى مش شايفة الولاد اتغيروا عن زمان

بالنسبة لرد فعل الشاب انا مش هقدر اتخيله لانى مش شاب .. لكن ده هيرجع لتفكيره ودرجة تقبله للأمر

لو انا شاب .. مش هوافق بصراحة هههههههه

كل سنة وانتى طيبة يا جميل
عيد سعيد عليكى وعلى اسرتك الكريمة
ليكى تاج عندى تعالى خديه

تقبلى تحيتى
سالى

Maha Shahen يقول...

حاجات جوايا
............
يعنى انتى شايفه ان العيب في البنات هما اتغيروا والشباب لا
طيب ما زمان كانوا البنات بيلبسوا مينى جيب
مكناش بنشوف كوارث تحرش زي اليومين دول ليه
مكناش بنلاحظ بفظاعه كبت الشباب
برغم انى اعتقد انهم زمان مكنوش متدينيين قوى يعنى بس كانوا محترمين بأخلاقهم

شرفتينى ونورتينى وبكلامك أسعدتينى
وبالنسبه للتاج علم وسينفذ بأذن الله

سكة سفر يقول...

تحفه بجد اوى

و انا اقولها معك و باعلى صوت

عودوا رجالا كى نعود نساءا

أخوك يقول...

السلام عليكم ورحمة الله
الحقيقه احب اسجل اعجابي بمدونتك صراحه روعه وتصميم جميل ومرتب ماشاء الله عليك تبارك الله

جريدة الريماس للأخبار الحصرية يقول...

enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz
enjz