2008/09/12

أحسبوها صح وعيشوا ساكتين



احسبها صح من الوقفات المصريه اللي كلنا بنشوفها في التليفزيون
يا شعبى الحبيب .. احسبها صح واتعلم واوعى تشتكى الغلاء يا معلم
العيب فيكم يا شعبى الحبيب , في ايديكم وعقولكم في ولادك واحوالكم
وانا بريء من ذنبكم في الايام الكريمه ديا والاوقات الصعبه الجايه هقولهالكم
عيشوا فى صمت , لموا الفتافيت مش عايز قمص , تاكل ليه وتشرب ليه صوم يا حبيبى وصوم على طول
صبح وليل مش عايز اقول , هتاخد ثواب عظيم ومهول .. وتموت شهيد وليك الجنه
يلا نغنى ونحفظ عيالنا بدل حلو يا حلو ورمضان كريم .. أحسبوها صح وعيشوا ساكتين

بخرف انا مش كدا بس هو الوضع مش متحمل غير كدا , بيقطعوا كل دقيقه اى شيء شغال علشان يقولوا للشعب المصرى اخيرا التزم بالدين والعيب فيك كل العيب في تصرفاتك المبزره سبب الغلاء والبلاء منك لوحدك
واحنا مظلومين غير مقصرين علاوه وصرفنا بس نقول لمين
صحيح العيب فينا واحنا مبذرين !! حسبنها صح وعيشنها صح يا مصريين
ولا العيب فى مين
نقول أراء محايده منغير تعصب منغير فايده ونتكلم ونناقش ونشوف
هل احنا السبب في الغلاء


نقطة الميه اللي بنسبها سايله من الحنفيه فعلا دا تبذير لكن هل كل المصريين حنفياتهم خربانه , طيب دا فى مناطق الميه بتقطع فيها فى الايام دى فى رمضان وتيجى بس ساعتين ولا تلاته في الليل زى منطقة مكرم عبيد خير مثال اهو وفى مناطق مفيهاش اصلا ميه , وانت جاى تقول حاسبوا على نقطة الميه يا جناب المعلن ... احسبها صح ....
الادويه بنشتريها لما نمرض على حسب روشتة الدكتور ولا بمزاجنا واكتر من احتياجاتنا ونستنى لما معاد صلاحيتها تفوت ونرجع نجيب غيرها .. دا فى ناس بتفضل تستعمل فى الدواء لحد ما يخلص هو فى ناس بالعقل هتجيب دواء وتركنه سنه كامله ولا اكتر منغير ما تمرض , طيب يا ريت .. دا احنا بنمرض اكتر ما بناكل ونشرب .. الحل الأمثل يصرف فوق كل دواء دكتور يخلى المريض ياخد الدواء علي حسب احتياجه بس يا جناب المعلن .. احسبها صح ..
اسئلوا اى صيدلى الناس بتدخل تصرف مش شريط ... لا .... حبه واحده
محناش عايشين في رفاهيه وبنصرف ادويه فوق احتياجتنا بلاش نتطرق لموضوع ان الادويه الرخيصه اللي فئه منا تقدر عليها فعاليتها مفيش .. مظنش انه يقدر يجيب دواء مستورد ويرميه يا جناب المعلن .. احسبها صح ..
" أن المبذرين كانوا اخوان الشياطين " بس انا واحده من الشعب مش مبذره فمتحرقش دمى بقى بأعلاناتك أحنا اصلا مبقناش عارفين نحسبها اصلها ولا حسبة البرمه ملهاش حل لا صح ولا غلط
أن كنت عايز نتحاسب بجد ونحسب صح يبقى خد نصيبك من الحسبه يا جناب المعلن مش ترمى الحمل كله علي الشعب وتقول اقتصدوا وبلاش تبقوا مبزرين .. بتسكت مين بالكلام دا !! الغلابه اللي خربت منهم ومبقالهمش غير ربنا .. ولا بتقلبنا علي بعضنا .. ونلف وندور ونرجع نقول العيب مننا أحنا .. احنا اللي ادينا فرصه لجناب المعلن يتحجج بينا .. كسرنا كراسى المواصلات ورسمنا عليها الأهداءات ومش فى بالنا اننا كدا بنهدم فى مالنا .. رمينا الزباله فى الشوارع وقلنا وماله مهى خربانه خربانه .. لكن مهما كان دى مش افعالنا كلنا .. نيجى لجنابك ..
اديك مثال : الشوارع الجميله اللى حضرتك بترصفها وتسفلتها وتخليها تمام جدا وبعد أقل من أسبوع ترجع تهدها وتحفر قال أيه هنركب خطوط تليفونات ونقول طيب وترجع تصلح الشوارع وترصفها وتسفلت وشهر يمر وتتهد من جديد بتعمل ايه يا سيدى بركب مواسير مياه طيب .. ونعيد الكره ولا مليون مره وتهدر فلوس شعبك الحبيب لأنك مش عارف تحسبها .. طيب ما تيجى نحسبها صح

لو مكنتش حسست شعبك الحبيب انها خربانه خربانه كان خاف علي ماله لا كسر كراسى ولا رمى زباله في الشوارع .. كل أنسان فينا بيحافظ على بيته ولو أديته فرصه مره واحده يحس أن البلد دى بيته أكيد هيحافظ عليه بحياته وهيلتزم ... لو فعلا عايزنا نحسبها صح أحسبها معانا وأفضل ويانا .. وسعتها هنعيشها صح بسعاده جوانا

هناك 28 تعليقًا:

blue-wave يقول...

ممممممممممم
بصى يا نور
انا شايق انها مسئوليه كل واحد
زى ما ربنا قال
وكلوا واشربوا ولا تسرفوا
صدق الله العظيم

نـــــور يقول...

هههههههههههه
والله انتى عسل يانور
مالك يابنتى محروقه كده ليه
هى كانت بلد ابونا؟؟؟؟!!!!!!!

ويعنى يانور يوم مانبذر ونجيب زياده عن حاجتنا تبقى ادويه؟
ياحلاوة ياولاد
ليه معانا فلوس مش عارفين نوديها فين؟

بصى يانور فى حكايه نحسبها صح دى الحكايه ان الناس بتغلط لكن هما كمان بيغلطوا
لكن مشكلتهم اهم مش عايزين يعترفوا انهم مابيعرفوش يخططوا لا حاجه ف الدنيا ولو عندهم ميزانيه لبيتهم زى الغلابه اللى زيينا برضه مش هيعرفوا يخططولها برضه
فشل زرع وعاملين نفسهم معلنين ز ماانتى قلتى
الجهل واخد ومدى معاهم واخرتها العيب فى الشعب مسرف يامليجى
معلش
احسبيها انت صح ماتتنقطيش لان لو اتنقطى ومش معاكى فلوس الدوله مش هتعالجك على حسابها

فهمتينى ياحبيبتى؟
هونى عليك

سنووايت يقول...

هو فعلا الاعلانات دي مستفتزة لاغلب المشاهدين لكن في نفس الوقت هو بيخاطب فئة معينة فعلا موجودة ويمكن يكون ليها دور في الغلاء
بس المشكلة انهم مش بيتفرجوا علي الاعلانات دي غالبا

انسان وبس ! يقول...

حمد الله على سلامتك الاول

انت كنت عيانه ولا كنتى بتتفرجى على اعلانات الحكومه ؟؟
على فكره كتر الفرجه على اعلانات الحكومه ممكن يعيى لوحده

بس هى بجد الحكومه محملانه العيب كله لوحدنا ...وان كنا احنا بجد كشعب فينا عيوب كتير ....
بس الحكومه برضو هى المسئول الاول والاخير عن اى تخلف وصلنا ليه .

يعنى مثلا انتى بتتريقى على المعلن وبتقولى اننا بوظنا المواصلات ...هو بجد حصل ......بس هى دى مواصلات ادميه اصلا ؟....وهى فين ؟

وبعدين لما عملوا غرامه فى المترو للمحافظه على النظلفه فيه ....اغلب الناس التزموا والمترو مازال نضيف رغم ان الاداره بتاعته اتغيرت وجت اداره اضعف ...بس خلاص الناس اغلبهم اتعود على النضافه.

وبعدين تبزير ايه اللى هو جى يقول عليه؟

ده فيه ناس مش لاقيه تاكل

وبعد اذنك بقى لحسن انا مش اقدر كلت لما اتمليت على الاخر ...ال تبذير ال

منه لله ....هو مين المعلن ده ؟

Blue Nile يقول...

حمدالله عالسلامة يا بنتي ايه الغيبة دي

بالنسبة للموضوع انا شفت الاعلانات المستفزة دي
هما موجهين الاعلانات دي لطبقة معينة اللي هي احنا هل الشعب كله مبذر
خلاص الدنيا فل واحنا بقينا بنفتري ونبذر
ربنا يهديهم

*الطالبة عفو الله *زوزو يقول...

اولا وحشااااني يا نور اوي
تانيا نجي للموضوع
ما شاء الله عليكي احيي فيكي حرقتك على بلدك و حبه ليه
و الله اقول ايه و لا ايه اللسان يعجز عن التعبير ربنا يرحمنا و يصلح حالنا
مش عارفة مسؤولية مين و لا مين بس كل واحد ليه ايد ممكن بيها يقدم شيء مفيد و ممكن بيها يقدم العكس فكلنا راع و كل واحد مسؤول عن راعيته
ربنا يصلح حالكم و حال جميع المسلمين
بارك الله فيكي يا حبيبتي
دمتي في حفظ الله

أسير الجراح يقول...

كل سنة وانتى طيبة يا نور


انا جى اسلم عليكى



اسير الجراح

الملاك يقول...

السلام عليكم ورحمة الله وبركاته
اختى وحبيبتى فى الله نور اتمنى من الله ان تكونى فى افضل حال وكل عام وانت الى الله اقرب
صدقنى يا نور انا حاسه بيكى وبسبب غضبك لانك بتنظرى من خلال تصرفاتك انتى لكن صدقنى فى ناس غلابه برده بس مهملين مش مبذرين وفى مقوله بتقول (بيت المهمل يخرب قبل بيت الظالم ) مش معنى كده انى بحمل المسئوليه كامله على الغلابه او الناس البسيطه الى انا واحده منهم والحكومه لا .لا بس كلنا مشتركين فيها هما افتروا قوى قوى والظلم معاهم خد حده لحد ما خلوا ناس كتير كرهت بلدنا ونقمت عليها فمبقاش عندهم سبب يدفعهم للحفاظ عليها
بس صدقنى كلنا سبب فى الى وصلنا له من غلاء وانحطاط اخلاقى وغياب المبادئ والقيم الى نتج عن بعدنا التام عن الله فتركنا الله للدنيا ولانفسنا التى فضلنا اتباع اهوائها على اتباع تعاليم ديننا الاسلامى تعبث بنا كما يحلو لها لا ليعاقبنا فقط ولكن ليرينا ماذا يمكن ان تفعل بنا انفسنا الاماره بالسوء

لو احنا كنا كويسين كان ربنا اصلحهم او بدلنا بخيرا منهم ولو هما كانوا كويسين كان ربنا اصلحنا او ابدلهم خيرا منا صدقنى صعب قوى ان حد مننا يجنب نفسه تحمل المسئوليه الا من رحم ربى

نور هقولك حاجه وعن تجربه
لما الواحد بيقرب من ربنا بجد وربنا بينعم عليه بنعمة الرضاء الدنيا كلها بتختلف من حوليه وبيشوفها بعين مختلفه جميله رغم كل ما بها لان ربنا بيصلح كل حاجه من حواليه وبيخليه يقدر يشوف الدنيا على حقيقتها وبتبدا الصورة توضح ليه ويشوف كل العيوب الى ممكن يصلحها سواء جواه او داخل من حوله وربنا فعلا بيعنه وبيقدره على الاصلاح

نور صدقنى المشكله جوانا كلنا جو قلوبنا التى صدات من عدم ذكر الله والبعد عنه ولن تنصلح احوالنا مهما تكلمنا حتى نصلح ما بانفسنا فليعيننا الله عليها ويصلح قلوبنا ويرزقنا الاخلاص والصلاح حتى يمكننا اصلاح انفسنا ومن حولنا

نور احسبك على خيرا ولا اذكيك على الله وعلشان كده انتى مش قدره تشوفى الحق بتقلب باطل والباطل بيتقلب حق والادوار بتتبادل وتسكتى عليها وعلشان كده بتحولى تصلحيها ولو بقلمك او قلبك وده حاجه كويسه قوى ربنا يوفقك دايما ويرضى عنك بس صدقنى العيب فعلا فينا كلنا فى الظالم والمظلوم فى الغنى والفقير فى قلوبنا اصلحها الله لنا

نور بارك الله فيكى وجزاكى خيرا وحرك قلبك دائما بما فيه الصالح لنا وجعلك ممن يأمرون بالمعروف وينهون عن المنكر ويغيروه ولو بكلمه ورزقكى وايانا الاخلاص وعمر قلبك وقلوبنا بحبه وبالايمان به واعاننا على ذكره وشكره وحسن عبادته

نور اسالك الدعاء الصالح لنا جميعا ولوطننا وللامة الاسلاميه كلها

دمتى اختى ودام قلبك برعاية الله

Maha Shahen يقول...

blue-wave
فعلا هى مسئولية كل واحد

ولا حول ولا قوة الا بالله

بشكرك على أبداء رأيك

Maha Shahen يقول...

Habiba

يا بيبا متحرقيش دمى اكتر ما هو محروق هههههههه .. طبعا بلد ابونا وامنا وكل جدودنا واحفادنا من بعدنا

عندك حق لانهم فعلا حملونا الجمل بما حمل ورفضوا يعلنوا انهم ليهم نصيب من تحمل المسئوليه

منا مهونه اهو شيفانى بشد فى شعرى هههههههههههه

بشكرك على أبداء رايك يا قمرتى

Maha Shahen يقول...

سنو وايت

انتى عندك حق هما فعلا بيخاطبوا فئة معينه بس اللي بيشوفوا الاعلان كل فئات الشعب

وبعدين هما بيقولوا ان سبب الغلاء ان الناس تشترى اكتر من احتياجاتها علي اساس بقى ان كل ما الطلب زاد علي سلعه معينه تغلا اكتر مهو مفيش غير كدا

يلا ربنا يرحمنا برحمته

بشكرك يا عزيزتى على أبداء رأيك

Maha Shahen يقول...

انسان بلا عنوان

الله يسلمك من كل شر يا رب

بالفعل كنت عيانه وخفيت والحمدلله بس شكل الحكومه هتعيينى تانى ههههههههههه

والله انا لما بشوف المترو دلوقتى وافتكر شكله كان ايه ايام زمان بحزن جدا على حالنا واللى وصلنا ليه

وبعدين مش عارف مين جناب المعلن .. انت مش دعيت عليه والسلام , يلا بدعيلك ربنا يتقبل منك دعوتك ومتتمسكش معايا ههههههههههه
لو حصل المدونين هيجبولنا عيش وحلاوه بس لو سمحوا يمشوها جبنه علشان الحلاوه هتعطش في رمضان وهما اصلا هيتكفلوا ينفشوا ريقنا
بشكرك على مشاركتنا برأيك

Maha Shahen يقول...

blue nile

الله يسلمك حبيبتى من كل شر . خلاص ادينى رجعت اهو ازعجكم تانى , منوره انا طبعا مش كدا (حد يقدر يقول غير كدا ) ههههههههه دايما منوره انا

هل الشعب كله مبذر سؤال تطرحه بلو وتدعى علي اللى كان السبب ههههههههه

يا بنتى انتى شكلك متضايقه اكتر منى الله يكون في عونك

بشكرك جدا علي مشاركتنا بدعوتك اقصد برأيك ربنا يصلح حالنا جميعا

Maha Shahen يقول...

zizi

انتى كمان وحشانى قوى قوى , ايه يا بنتى بتدخلى امتى عرفينى مبقاش في مواعيد مظبوطه بنا خالص

عجبتنى جدا كلمتك دى
كل واحد ليه ايد ممكن بيها يقدم شيء مفيد
يا جامد انت بتقول كلام ولا الاشعار عندك حق فعلا ورأيك جميل يا قلبي ربنا يهدينا ونقدر نقدم شيء مفيد أحنا وهما

بشكرك على أبداء رأيك
ودمتى فى رعاية الله وأمنه يا اغلى صديقه

Maha Shahen يقول...

أسير الجراح

كل سنه وانت بخير وسلام

متشكره جدا على مداومة السؤال
انا بخير والحمدلله يا رب تكون انت كمان بخير
..... سلمت من كل شر

Maha Shahen يقول...

الملاك

وعليكم السلام ورحمة الله وبركاته

عجبنى جدا جدا تفصيلك في الرد بارك الله فيكى اختى واكرمك

سبب كتابتى للموضوع دا برغم ان ليه اكتر من جانب انا متكلمتش عنه واختارت جزء صغير خالص منه , انى حطيت نفسى مكان حد فقير بالكاد بيلاقى مصروف يومه وبيقول يا رب , احساسى انا بالاعلانات دى الغضب فما بال اصلا اللي مش بيلاقوا .. يا ترى غضبهم شكله ايه وهما اكتر ناس معانين من الغلاء والفقر وبرغم ذلك متحملين
وكلنا عارفين الكبت يولد الأنفجار
لازم نراعيهم
مينفعش نسكت ونفضل نعلن الكلام دا واحنا مش شايفنهم , انا عارفه ان الاعلانات بتخاطب فئه معينه بس كدا احنا بنثير سخط وغضب ناس تانيه كتير قوى
ولو حد جه فى باله للحظه زي ما جه في بالى انهم بيقولوا للشعب بدل ما تجيب زياده عن حاجتك استفيد بالمال دا ولو علي سبيل المثال يخرجه للمحتاج , هنسكت ونقول عندهم حق لكن حق الناس مش بس من الصدقه اللي هنتصدق بيها لبعض .. فين حقه في بلده , ولا هنعيشه علي الاعانات والصدقات دايما , وهو مش مقصر شغل وبيشتغل وسعى وبيسعى لكن ما باليد حيله اكثر مما يقدم وميرجعش عليه كل دا بعائد يكفيه كمان
واحنا نسيب كل دا ونقعد نقول , التبذير سبب الغلاء , ازاى انسان بالحاله دى وقتها يحسبها صح وميغضبش

بشكرك جدا على ابداء رأيك
دمتى في حفظ الله ورعايته أختى الحبيبه

ذو الوجه المبتسم يقول...

السلام عليكم
ايه ياستى اللى انتى عاملتيه ده
حضرتك بقى سياسية ومش عاجبك النظام
ياااااا .... خلاص احنا نروح النيابة وهناك تعترفى بكل حاجة
هههههههههههههه انا باضحك طبعا

بجد تحليل جميل لما يدور من حولنا من احداث .. لكن كتير اسال نفسي
ايه اللى ابيدينا نعمله ... نغير من الوضع ده ازاى .. نعمل ايه
قولى انتى نعمل ايه
اعجبنى جدا تعليق الاخت " ملاك " اللى بجد باعتبرها ملاك
هاكمل لك التعليق بس بعد ما اقول لك على حاجة
فيه جماعة بتحاول التغيير العام بفكرهم وعلمهم ايه رايك تنضمى اليهم ؟! فكرى ؟
الموضوع كبير ومش هيكفي فيه كلتين وبس
الموضوع محتاج مجهود وامكانيات علشان نقدر نغير
تحياتى

"أم أدهم المصرية" يقول...

السلام عليكم ورحمه الله وبركاته
...................
اولا حمد لله على سلامتك يانور والف مليون سلامه عليكى ياسكره
...................
يقول الله تعالى: ﴿.. إن الله لايغير مابقوم حتى يغيروا مابأنفسهم وإذا أراد الله بقومٍ سوءً فلا مرد له ومالهم من دونه من والٍ ﴾

الايه دى ملخص اللى احنا فيه يانور

احنا اللى بدلنا احوالنا وكفرنا بنعم الله علينا وارتكبنا كتير اوى مما حرم الله وظلمنا نفسنا بايدنا فسلط علينا حكومه وحكام الله المستعان عليهم
وتحول حالنا تماما
الامن الى خوف
والغنى الى فقر
والعزه الى ذل وتمكين الباطل علينا

لو بصينا كويس مع انى واثقه انه الكل شايف كويس اوى شايف انه مفيش حاجه من المحرمات منتهكنهاش من الربا اللى بقى فى كل بنك ومع كل انسان

الزنا اللى بقى تقريبا على عينك ياتاجر فى كل شارع او منطقه بيت معروف لكده وزيدوا عليه كمان انه ظهر فينا اللواط

الله المستعان

الخمره اللى بقت دلوقتى عشان نحللها نقول عليها دى ميه شعير وعلاج ومشروبات روحيه ومعرفش ايه

والغناء والطبل والذمر والالحان والمعازف
اللى بنحللها ونقول عليها غذاء الروح
ان شاله مروحنا اتغذيت لو ده غذائها

دلوقتى من اتبع كلام الله وسنه الرسول فى الزى او فى التعامل او والمعاملات
بنقول عليه انت متشدد اوى كده ليه
سبحان الله بنجادل حتى فى دينا وبنقبل منه اللى على مزاجنا وبس

يعنى والله نحمد ربنا انه احنا لسه عايشين فى الدنيا وانه ربنا معملش فينا زى اى امه من الامم السابقه

انتشر فينا كل وابشع الافعال والشنائع

سبحانه كان بيمحو امم من على وجه الارض بسبب شؤم معصيه واحده فما بالنا بمعاصينا اللى تقريبا تعتبر مجمعه لكل ذنوب ومعاصى الامم السابقه وده مش حال مصر بس
ده حال كل الدول العربيه خليج شام اى كان كله فى حضيض الا من رحم ربى من بعض الاولياء والصالحين والدعاه

وجايين نقول اصل الحكومه

الحمد لله انه ربنا بس سلط علينا الحكومه
لو ربنا هيعاقبنا بسوء عملنا فى الدنيا مكنش زمانا لسه عايشين

"الله المستعان "

اسفه حبيبتى طولت عليكى بس والله غصب عنى الواحد خايف ربنا يصيبه بسوء معصيه الاخرين

فارس بلا جواد يقول...

انتي قصدك الاعلان بتاع مدام فشخرة منظر وجوزها محسن بيه مظهر ههههههههههه
بصي هو انا معاكي في انهم مزودنها شوية في الاعلانات دي وكأننا قضينا علي كل مشاكلنا الداخلية وفاضل اننا نعلم الشعب ازاي يوفر
لكن هذا لا يمنع ان في سلوكيات غلط كتير في الشعب بتاعنا ودي بتبقي راجعه للثقافة بتاعته والبيئة اللي نشأ فيها
تحياتي

ana ga3an يقول...

قلتش انا حاجة
هي بايظة
بلد القربة المخرومة

yoyo يقول...

نوارة قلبى والله أسفة على التاخير يا قلبى انت عارفة بقى الشغل محليس محليس هههههههههه

امممممممم انت مش عاجبك الحكومة يا نور ايه ايه تانى كدا عاوزة تعملى انكلاب (انقلاب )هههههههههههه يعنى انت عارفنى يا نور الندالة عليا حق يا قلبى من اول قلم بقى هما اللى قالولى ههههههههههههههه يا بنتى انت لسه قايمة من التعب خليك على اد صحتك هههههههه دى البلد فلة بيضة مقشرة يا بنتى احنا اللى ناس وحشين بقى

امم والله يا بنتى ومش عليكى ليا حلفان بقى ونتكلم جد يعنى انا مفروسة من الاعلانات دى موت يعنى هو اصلا الشعب لاقى ياكل عشان يقتصد والنبى دا كلام ولا هما عاوزين يحرقوا فى دمنا اكتر واكتر يعنى
ماشى فى ناس بتسبهل شوية وعاملة فيها عبيطة وفاتحها على العاشر بس ياترى الكل كدا ياريت مش يطالبوا الناس بحاجة فوق طاقتهم لاحسن بجد والله كتر الضغط يولد الانفجار

هنعمل ايه بقى ادينى بنحاول نعيش فيها واهى ماشية يجوا هما بقى ويعملوا فينا كدا هى ناقصهم كمان يا عم الحاج لا كدا اوفر اوى بقى

والنبى يا نور مش تبقى تنسى العيش والحلاوة معاكى ولا اقولك خليها جنبة اصلى مش بحب الحلاوة اوى يعنى ههههههههه

اشوفك على الف خير
تحـــــــياتى
يويو

SHAPE YOUR LIFE (ABOALI) يقول...

لله الامر من قبل ومن بعد
منى ومنك
نبدء المشوار
ولا نقول حكومة
ولا نقول ظلام
بس نفكر بجد
ونمشى فى الطريق
بجد
يلا يا مصرى يلا يا مصريه
يلا يا وطنى
معاك نبنى وطن
كله وطنيه


تحياتى على شعورك المعبر المهذب

غير معرف يقول...

فى بعض الناس فعلا عايشين بطريقة غير صحيحة لكن الاغلب من الشعب فقير ومعدم
وبيفكر فى كل خطوة قبل ما بيقدم عليها *****
اللهم اكشف الغمة


حبيبتى مش عرفت ادخل بأسمى الظاهر فى مشكلة عندك ؟؟
نهر الحب

Maha Shahen يقول...

بشكر كل اللى ابدى رأيه وبعتذر عن عدم الرد لكل شخص على حدا ولكن لظروف البوست الجديد فأعزرونى ولكنى والله اقدر جدا كل انسان اضفى بتعليقه وبمروره العطر على هذا البوست
ربنا يرزقكم جميعا كل الخير
ويوفقكم لما يحبه ويرضاه
وللمره التانيه بعتزر بجد من قلبى

شمس النهار يقول...

شوفي لما يكون في غلط بيكون مشترك فيه جوانب كتيره
يجب علي كل جانب ان يحاسب نفسه
وكل واحد ربنا هيحاسبه علي فعله هو
يعني اني مش حاسه اني حره في بلدي ده مايبررش اني اتعدي علي حرية الاخرين
او امشي ابلطج علي الناس اللي هي مظلومه اصلا وازود هم علي هم
التمسك بالاسلام و بالاخلاق هو السبيل وكل واحد يبتدي بنفسه
احنا عندنا اخطاء ياريت نصلحها
اما اخطاء الحكومه هناك قنواة شرعيه لنقدها واعتقد دلوقتيالاعلام مابيسبش حاجه

Maha Shahen يقول...

شمس النهار
بشكرك جدا على مشاركتنا برأيك وشايفه انه فيه كتير صح بس للاسف مش دايما الأعلام بيتكلم عن كل شيء او دايما بيكون واقف بجانب الحق واصحاب الحقوق الا بصفه ضئيله جدا

نورتى المدونه بمرورك العطر

جريدة الريماس للأخبار الحصرية يقول...

شركة تنظيف قصور جنوب الرياض
مستودعات لتخزين وحفظ الأثاث بالرياض
شركة ديكورات فلل بالرياض
شركة تشطيبات فلل بالرياض
شركة تصاميم فلل بالرياض
شركة تنظيف عمائر بالرياض
شركة نقل وتغليف عفش بالرياض
شركات تنظيف الستائر بالرياض
شركة تنظيف مدارس بالرياض
حل ارتفاع فاتورة المياه بالرياض
شركات العزل الحراري بالرياض
شركات عزل مائي بالرياض
شركة تنظيف انتريهات بالرياض
ارخص نقل عفش بالرياض فك وتركيب

جريدة الريماس للأخبار الحصرية يقول...

تهريب الحمامات والمطابخ بالرياض
دهانات غرف نوم
التخلص من الحشرات المنزلية
شركة مكافحة الفئران بالرياض
شركة مكافحة الفئران شرق الرياض
شركة مكافحة الفئران شمال الرياض
شركة مكافحة الفئران غرب الرياض
شركة مكافحة الفئران بالمدينة المنورة
شركة مكافحة الصراصير بالمدينة المنورة
شركة مكافحة بق الفراش بالمدينة المنورة
شركة كشف تسربات المياه بالمدينة المنورة
شركة تسليك مجاري بالمدينة المنورة
شركة تنظيف مسابح بالمدينة المنورة