2010/06/11

حلم طفل كبير



سألتها الطفوله جميله صح
طيب ليه مبنقدرش نعمل اللي كنا بنعمله زمان نسيناه ؟!!
قالتلى لا بس منقدرش نعمله ..
قالت كمان يعنى انا مثلا نفسى امشى اتحنجل فى الشارع زى ما كنت بعمل زمان
فأنا ضحكت قوى تتحنجلى قالتلى اه بس مش فاهمه ايه كان حبى فى المشيه دى ..
قولتلها انا كنت بمشى عادى بس وقت ما كنت احب اجرى بجرى
دلوقتى مينفعش ابقى ماشيه بعقل كدا وبعديها اقوم جاريه
هتلاقى الناس بتبص عليك وكأنك اتجننت
انا افتكر اليوم اللي كنت باكل مصاصه فى البيت وكان لازم اروح لصحبتى وخرجت ونسيت المصاصه فى بوقى وطول الطريق الناس بتبصلى بنظرة تجبنى من فوق لتحت كدا
دا علشان المصاصه , لا وانا بقى اول ما لقيت نظرات الناس كدا قولت يا ترا بيبصو علي ايه افتكرت المصاصه اللي فى بوقى قولت طيب ماشى مهى مش عيب مسكتها بايديى وبقيت الفها فى بوقى زى الاطفال , خليهم يتفرسو بقى
يلا خليها تكمل هما هيحرمونا من الطفوله كمان او حتى الحلم بيها
امال اشمعنا لما بنبقى فى رحله مبنشعرش بجمالها الا واحنا بنجرى وبنلعب وبالذات فى الجناين المفتوحه وتلاقى الصغير بيجرى والكبير بيجرى , امال انا بحب جنينة الحيوانات من شوية , مش بس بصور فيها مناظر طبيعيه مشوفتش حد صورها قبل كدا لا وكمان محدش بيبص عليك ويعلق لما يشوفك برغم سنك الكبير بتجرى ولا بتلعب , واى العاب بقى مبتفرقش , هو احنا علشان نستمتع بحياتنا لازم نروح مكان بتتفق فيه الناس علي نفس الفكره , زى المصايف انا بحب انزل الميه بكامل الملابس الرسميه هههههههه وتلاقى البلاجات اللي فيها ناس بتنزل كدا لو نزل حد بالمايوه يقلوله معلش روح البس هدومك او متنزلش زى بعض المدن اللي كلنا بنعرفها زى شرم الشيخ يقلولك معلش روح اخلع وبعدين تعالى انزل للميه ( حرر عقلك ) اما لو فضلت كدا متنزلش ...
يعنى احنا بنخنق بعض بأفكارنا وتعليقاتنا وان مكنتش تبقى بنظراتنا , شوفت فيلم بيعملو فيه اعلان للالبان وبيقولو ان الاطفال بتكره ريحة اللبن بسبب الزفاره بس عارفين انا مكنتش من الاطفال اللي مبتحبش اللبن انا اصلا فطمونى بالعافيه هههههههه ويمكن نسيو يفطمونى , يعنى انا لحد النهارده بحب اللبن جدا , بس عارفين ان اللبن اللي موجود دلوقتى هو اللي وحش انا اصلى شربت اللبن بخيره زمان مقصدش نوع اللبن اللي اسمه بخيره لا انا قصدت انى كنت دايما بشرب اللبن فى البلد عندنا يعنى من الجاموسه علي بوقى ههههههههه
بعد الغلى طبعا برغم انه بيجى من الجاموسه دافى يتشرب بس لا انا مشربهوش الا لما يتغلى الاول , مكنش عمرى اشم ريحه وحشه فى اللبن بالعكس كنت بستمتع جدا بطعمه وريحته المميزه اللي كنت بعرف بسببها اى نوع من الالبان حلو ولا وحش مغشوش ولا لا
يااه زمان كان فى مليون حاجه جميله مرينا بيها وحبيناها , يا ترا مش كلها بنقدر نعملها دلوقتى ليه , ودايما بنقول عيب علي حاجات مش حرام اصلا , الا هو احنا جبنا كلمة عيب منين بأفكارنا الغريبه دى , ان مكنتش حرام ومهياش غلط ليه قولنا عليها عيب
تصدقو المجتمع بتاعنا دا عايز فرمته واعادة ترتيب زى الكمبيوتر , مهو اللى فيه ده افكارنا وافكار اللي سبقونا ونقدر نغيرها بس عايزه دراسه علشان يبقى تغيير محمود ومدروس ....
كل واحد بقى يحكيلى عن حاجه كان بيحبها وهو صغير ولسه معاه او سابها علشان مكسوف منها برغم انها مش غلط ,,

هناك 31 تعليقًا:

موناليزا يقول...

حمدالله على السلامة
:)
ايه الغيبة الطزيلة دى!
كنتى فيييييين؟

-----------
انا متفقة معاكى ان مش كل حاجة عيب تبقى حرام بس برضه فى حاجة اسمها عادات مجتمع ماينفعش مانلتزمش بيها
زى مثلا أكل اللبان فى الشارع هو ام مش حرام بس عيب اوى لما تلاقى بنت أو ولد بياكلوا لبان فى الشارع بطريقة مستفزة:)
وهكذا...

العادة ياستى اللى نفسى اوى ارجع اعملها انى اجرى فى الوقت والمكان اللى تطلب معايا فيه انى اجرى:)

غير معرف يقول...

هاي نور ياة اخيرة كتبتي هههههههه معلش لو دخلت متاخرة ولا حاجة انا هبة الي مش عارفين نتفق مع بعض ونتكلم علي الايميل بسبب ظروف شغلك وشغلي عجبني البوست اوي اوي اوي وانا معاكي في المصاصة لحد لدوقت والله لسة باكلها بس زي مقالت موناليزا في عادات للاسف الواحد مش بيقدر يتخطاها بس اكيد اكيد البني ادم في اوقات لازم بيعمل عمايل اطفال متفهميش ازاي بس بجد بتطلب معاة كدة للاسف عادتي مينفعش تتحقق دلوقت ههههههههه ولا حتا بعد الف سنة يلا مش مهم المهم انك بخير

yasmina يقول...

هاااااااى
ازى حضرتك سعيدة انى هنا فى المدونة بس ماعتقدشى انها اول مرة
بجد عجبنى البوست جدا جدا لانى دايما بميل للطفولة اللى مافيش احلى واجمل منها

اللى كنت بعمله وبحنله انى كنت بلعب بالعرايس واللعب وكنت بركب عجلتى وكنت عايشة من غير مسؤوليه ودى اكيد الحاجة اللى كلنا بنحن لها

تحياتى دايما
ويبقى التواصل

آخر العنقود يقول...

موضوعاتك جميلة طبعا كالعادة
موضوع المصاصة ده اعتقد انه حصل مع كتيييير مننا :)

اللى بحب اعمله واوقات كتير لسه بعمله
انى بروح الملاهي بحب المغامرات قوى :)

واللى بحبه ومش بعرف اعمله زى زمان
انى اركب عجل .. عادى بقى يعنى

مجرد إنسان يقول...

اهلين نور يانور المدونه
كلام ومنظور جميل فعلا لكن (فسيولوجيا)<<قررت تتفلسف:) حياتنا زي محنا عايشينها بصرامتها هي الطبيعيه

اما عن الحاجه الي كنت بحب اعملها اني اسوق العجل في الشارع واسيب ايديا مفرودين زي الجناحين- واحن للصراخ بصوت عالي-
احن اكتر حاجه بصراحه

النووووم في حجرة امي وابويه <<ياريتني ماكبرت

غير معرف يقول...

ايوة ياريت اقدر امشى اتحنجل زى ما كنت بعمل زمان بجد ماشية حلوة جدا ومريحة جداً جداً كمان
وانا عايزة امشى حافية فى الشارع زى ما كنت بعمل زمان لما بكون عايزة اجرى بسرعة وباحس ان الشوز مدايقانى كنت بقلعها وامشى حافية

Maha Shahen يقول...

موناليزا:
.........
الله يسلمك يا قمرتى
فى الدنيا هكون فين بس يا بنت الحلال
يا رب تكونى انتى كمان بخير

اكيد طبعا بس العادات هى حاجات احنا اخترناها مش كدا نقدر نغيرها او حتى نتأقلم مع حد مختلف طالما مش بيعمل شىء حرام
علي الاقل ننظر ليه بطريقه مريحه ودا اقل حقوقه .
ولاد او بنات بياكلو لبان بالطريقه دى يبقى فى حاجه غلط فيهم


اه والله انا كمان نفسى فى كدا تعالى نجرى سوا بقى بس بليل علشان محدش يعلق هههههههههههه

Maha Shahen يقول...

هبه احمد:
,,,,,,,,
هايات يا قمر اخيرا ظهرتى ايه يا بنتى شكلنا مش هنتقابل ولا حتى فى الاحلام انا ظروف شغلى مش منعانى قوى كدا من الدخول لكن انتى ما شاء الله وخداها فحت وردم هههههههههه
الساعه بخمسه جنيه والحسابه بتحسب اللهم لا حسد يعنى انا بنق بس

ابقى كوليها فى البيت بس وريحى نفسك من التعليقات والنظرات

ايون بس كنتى قولتى عليها علي الاقل نعرفها مليش دعوه
عندى فضول اعرف هبقى اخليكى تكتبى اعترافاتك علي الايميل لما نشوف بقى

منوره المدونه يا قمر بمرورك

Maha Shahen يقول...

yasmina
........
هايات يا قمر وبلاش حضرتك دى بتحسسنى انى عديت سن اليأس
يعنى مشيها عادى بالاسم

انا الاسعد اكيد بالزياره دى واتمنى متكونش اخر مره

اه والله عندك حق يا ريت ميكونش فى مسئوليات زى زمان يا بختهم الاطفال
علشان الواحد يقدر بس راح منه ايه وجمال الحاجات دى

يلا ربنا يسعدك طول العمر ويرجعلك حلمك فى اولادك بأذن الله بعد ما يرزقك بالزوج الصالح لو مش متزوجه

Maha Shahen يقول...

اخر العنقود:
............
الله يكرمك علي التشجيع دا

ما شاء الله شكل قلبك شديد علشان انا بخاف من الملاهى جدا
بتحتاج حد قلبه جامد ومغامر فعلا

لو ركوب العجل بس بسيطه فى القناطر ولا فى المصيف وبعدين ممكن حاليا يتركب فى اى مكان يعنى مش بيقولو عليه تعليقات كتير شغال يعنى دا يا بختك حلم فى المستطاع
المدونه منوره بوجودك

Maha Shahen يقول...

مجرد إنسان:
..........
اهلا بيك
مفهمتش يعنى ايه حياتنا زي محنا عايشينها بصرامتها هي الطبيعيه
بعيدا عن الفلسفه كل اللي موجود من احكام فى المكان المحيط بيا علي الاقل المفروض يكون من منظور الدين مش كدا ويمكن علي الاساس دا بنقول دا ينفع او دا لا . والباقى بيكون بالتقدير والاجتهادات الشخصيه كدا
بس فى حاجات غريبه فعلا لازم تتغير لأنها بتحرم الناس من ابسط حقوقها

متقولش يا رتنى ما كبرت لأن كل مرحله عمريه وليها بريق من السحر يخصها يا رب ميحرم حد من اى سعاده كانت بمرحله من المراحل دى
والاهم اعتقد مش انك تنام بقرب الام والاب ولكن الاهم تفضل شاعر بحبهم ليك للابد بأذن الله
ودا هيعوض كل شىء ممكن يكون قل من الاحلام
اما عن ركوب العجل والصراخ فالاحسن انك كبرت والحمدلله هههههههههه

بدل ما الناس كانت بتشتكى ولا كنت تعمل حادثه لا قدر الله

Maha Shahen يقول...

غير معروف ( بس قالى هو مين )
.........................

مجربتهاش اصلا قبل كدا بس انا متاكده انك بتحبيها يا عيونى متحنيش ليها ولا حاجه بكره واحنا فى المصيف بأذن الله ابقى اشوف وقت مفيهوش ناس وامشى اتحنجلى براحتك ههههههههههه

ومكنتيش بتتعورى لما تجرى حافيه والله زمن فعلا كان جميل ايام الطفوله دى تصدقى عشنا احلى طفوله فعلا


فاكره لما كنت باخد الكوره واعمل مقموصه واقولكم مش لاعبين بيها واقف فى البلكونه وبعدين ارجعلكم ههههههه
كنا عيال عيال يعنى

منوره المدونه يا حياتى يارب تتكرر

غير معرف يقول...

فاكرة لما حطيت غالية فى حاجة كدا مش هقول هى اية ودلدلتها من البلكونة
نفسى اعملها دلوقتى بس ارميها بقة مش هدلدلها وبس
بس طبعا لازم اكون صغيرة علشان يقولو لعب عيال انما وانا بغلة كدا هروح فى ابو نكله
ولما كسرت فوقك ازاز الشباك وقاعدت بعدها اربط فيكى برضو نفسى اعملها دلوقتى بس افتح راسك ومش هربط حاجة

غير معرف يقول...

زمان الناس كلها دلوقتى بتقول اية الطفولة الاجرامية دى
والله احنا كنا متشردين اوى
طبعا مش محتاج تدارى انا مين علشان اتفقصت يا حياتى
مووووووووووه

Maha Shahen يقول...

غير معروف ( اللى مجننانى علشان بعرفها
..................................
ههههههههههههههههههه
ليه الشر دا بس البنوته مبتعملش حاجه ليكى مهى فى حالها اتلهت فى كتكت ابنها ومبقناش نشوفها الا نادر ما يكون

وبعدين متقلقيش مهما عملتى انا وراكى يا معلمى ,,,,, اعملى وهقول مشوفتش ولا كانت عندنا اصلا امال هههههههه

بيعجبنى فيكى تحملك للمسئوليه جدا ههههههههههه متشكررين انك ربطتينى بعد ما خلتى مفيش مكان متعورش فيا

بعدين بطلى تشريد هنا روحى اعمليلك مدونه انتى ايه طاقة الذكريات اتفتحت عندك

Maha Shahen يقول...

غير معروف:
.........
لا مكنتش طفوله اجراميه ولا حاجه كانت طفوله لذيذه فعلا بس فيها حوادث كتيره

فاكره لما سبتونى اغرق وعملتو مش من البلد دى ولا كأنكم تعرفونى هههههههه

يلا بقى تشريد بتشريد ههههههههههه
انا هلكانه من الضحك اصلا

ربنا يخليكى ليا يا عيونى ولا يحرمنا من السعاده ونفضل علي قلب بعض كدا طول العمر

!!! عارفة ... مش عارف ليه يقول...

طبعا كل حاجة دلوقت غير زمان على الإطلاق

لا لبن ولا غيره ولا حتى خيره


وعلى رأي الست

وعايزنا نرجع زي زمان

قول للزمان ارجع يا زمان

جزائرية وافتخر يقول...

السلام عليكم مشكورة احتي على الموضوع الرائع ده وكلامك صح انو الناس مابقتش فيها البراءة ومش عايزة تكون ليها وعن جد زماننا عم نتاسف ونحزن منو لانو الاطفال واصبح مالهومش نفس في اللعب والجري دول بيكبرو قبل وقتهم وده شيء يحزن شكرا

كيكى عوووووو يقول...

اقولك زر؟؟
فى عيال بياخدوا درس فى الشقة الى فوقينا لازم وهمه ماشين يرنوا جامد ع الجرس بتاعنا ويجروااااااااااا
ماما بتزعق وانا بعمل نفسى اضيقت بس بفتح الباب واقول فى سرى ياولاد الذين لسه قادرين تضحكوا ع حاجات بسيطة
تعرفى بجد والله
انا نفسى اعمل اووووى كدة ارن الجرس واجرى
بس المشكلة انا مش هلحق اجرى هيمسكونى ع طوووووووول
!!!
عوووووو

Maha Shahen يقول...

عارفه.. مش عارف ليه:
....................
اكيد الزمن مش هيرجع بس دا ميمنعش اننا نبتسم لما نفتكر ذكريات الطفوله
ونتمنى لو يكون لينا ذكريات اكتر سعيده
وكمان نحاول نحتفظ بحلم الطفوله يمكن نقدر بيوم نحققه
نورت المدونه بتعليقك ومرورك

غير معرف يقول...

ههههههههه
انا كمان كنت باستغرب ليه الاطفال مش بتحب اللبن رغم ان انا كنت باموت فيه في الطفولة ولحد دلوقتي
عموما انا عايز اقولك كلمتين وامشي
اولا ازيك يا نور وايه اخبارك
ثانيا انتي اكيد بتسألي نفسك انا مين؟
انا شخص كنتي تعرفيه من زمان
ارجعي بالذاكرة 20 سنه لورا
ارجعي
كمان ..
اكيد انا مش حسن الهلالي
بس انا واحد من زوار مدونتك من زمان قبل ما اترك التدوين ..ولما عديت انهارده بالصدفة قلت لازم اسلم عليكي
افتكرتي انا مين؟؟
عموما اتمنالك كل خير وصحة وموفقة دايما باذن الله
أحمد ( فارس بلا جواد سابقا)

Maha Shahen يقول...

جزائريه وافتخر:
...............
وعليكم السلام ورحمة الله وبركاته
منوره المدونه يا قمر
فوقتينى من كل احلامى لأنى افتكرت فعلا ان فى اطفال انسرقت منهم الطفوله.. الله المستعان
بس حبيبتى انا مقولتش ان الناس مبقاش فيها البراءه انا كنت بدعى الناس تفكر فى احلام الطفوله ولو للذكرى علشان تخلق ابتسامه بس تساعدهم وتسعدهم

غير معرف يقول...

الكلام دة انا شفتو فى منتديات كتير عيب عليكم تستخفو بعقول الاخرين
فين الاحترام

Maha Shahen يقول...

كيكى عوووو:
...........
اولا كهربى الجرس بتاعكم وتبقى عمايل عيال بعيال بس اكتبى ورقة تحذير بتقول ممنوع الضغط لفوق ال 18 سنه
وكل واحد ونصيبه بقى ههههههههه

ولو نفسك ترنى جرس وتجرى معلش رنى واستخبى مش ترنى وتجرى بس استخبى فى مكان مش تتشافى لائما هتاخدى علقه مخدهاش حرامى فى مولد او بكل بساطه رنى ولما الباب يتفتح بصى من بير السلم او علي الاسنسير كأنك بتقولى ليهم مش انا دا مشى من هنا ههههههههههههه
واى خدمه يا كيكى

Maha Shahen يقول...

فارس بلا جواد :
..............
مقدرش اكتب عليك غير معروف لا ممكن دا انت عشرت 20 سنه ههههههههه
حمدالله علي السلامه والله زعلانه انك اتوقفت عن التدوين برغم انك كنت معقدنى من الشعر اللي بتكتبه بس كنت بحب اقراه والله
مفتقدينك جدا يا احمد فعلا
حاول ترجع ولو تكتب كل ما تلاقى وقت مهما طالت المده
اعمل زى حالاتى كدا احسن من انك تقفلها
انا بخير والحمدلله كفايه انى شوفتك واطمنت عليك
وربنا يوفقك فى شغلك يا رب ويرجعك تكتب لينا من جديد
ومفيش سابقا فى فارس بلا جواد الى الابد اصلى معتقدش هتلاقى الجواد لكن ممكن نجبلك عربيه ههههههههههه
اسعدنى والله تعليقك يا احمد وموفق دايما
وحاول ترجع فى القريب العاجل

Maha Shahen يقول...

غير معروف :
.........
طيب يا سيدى لو شوفته فى مدونه تانيه ابقى انا اتسرقت وانا مش عارفه

والاستخفاف بالناس مش من طباعى

وشكرا لتضييع وقتك وكتابة الكلام دا

طيب كنت قوله علي شعر ولا حاجه كانت تبقى كلمه نافعه

ســـــــهــــــــــر يقول...

عماله اقرا و مستمتعه باسلوبك السلس جدا
و فجاه نهيت البوست بالسؤال
و فجاه نط على بالى
العجله
كنت بموت فيها و بستمته بلحظة ما تحسى انك طايره كلك معاها ف الهوا
و للاسف من سن 14 اتقال انه عيب و البنت و ما يصحش و الى بيعاكسوا
تصدقى فعلا المجتمع عاوز فرمته
لا عاوز تربيه
نفسى اقول لكل الناس واحد واحد
من فضلكم كل واحد يخليه ف حياته و بس
و نبطل ننقد غيرنا و نبطل نضايق غيرنا و نتعلم ان حريتنا بتنتهى لما بنضيق بيها حرية الاخرين

ميرسى يا نور على لحظات الفضفضه

القمرالباكي يقول...

السلام عليكم ورحمه الله وبركاته
عامله ايه
منورانا بمواضيعك من تاني حمد لله ع السلامه
فكرتيني بايام الطفوله
كان الواحد بيعمل الي نفسه فيه وعشان طفل شئ عادي دلوقت بقي لكل شئ الف حساب
وبالذات مع البنات
ديما مظلومين احنا
موضوع اللبن ده مليش فيه لان مبشربوش من صغري الا باحكام عرفيه بالغصب
ربنا يعسدنا جميعا ونفضل بفرحه الطفوله جوه قلوبنا
دومتي بخير

Yoyo يقول...

موضوع جميل..مع انك توهتينى فالنص بحكاية اللبن ده بس انا مش بحبه خاااااااااااالث...بالنسبة بئة للحاجات اللى بنحب نعملها لا هى حرام ومش عارفة جبنا منين كلمة عيب؟؟بتهيالى انا وانتى اتناقشنا فالموضوع ده قبل كته..انا عن نفسى بعمل كل حاجة ومش بيهمنى اللى حواليا طالما مش حرام وحاجة مفهاش اخلال بالادب او الاحترام العام وبمص مصاصة عاتى جدا وبجرى فالجنينة وبلعب فالملاهى واعمل كل اللى عايزاه بس هو مينفعش اجرى فالشارع عشان العربيات الصراحة هههههههههه اللى بجد نفسى فيه اوى انى اركب عجل ولللاسف حتى فالمصايف الناس بتبصلك باستغراب شديد ومعاكثات وكلام كتير جدا انا بتضايق منه اوى بس مبيهمنيش وبركب بس ميمنعش انى ساعات بحس فعلا بالخحل من نظراتهم.. فعلا البنانيت مظلومين كتير من حاجات..بره تقريبا كل حاجة متاحة ومفيش عيب احنا اللى حتينا حاجات فخانة العيب متفهميش ليه وبناءا على ايه؟؟؟وبالنسبة لموضوع اللبانة انا عن نفسى بندغ لبان فالشارع ومحدش ليه عندى حاجة ايه العيب فيها ده بئة؟؟؟
وقلتلك نروح جنينة الحيوانات قبل ما الدنيا تحرر اديها الدنيا نار هنروح ازاى بئة؟؟؟
طبعا مش هحتاج اقول رايى فكتابتك عشان انتى عارفة..بس برده مش فاهمة ايه اللى جاب اللبن فالنص هههههههههههههههههههه

*الطالبة عفو الله *زوزو يقول...

بداية وحشاني اوي اوي يا قلبي

عايشة حياتك يا ختي و مسافرة و بتصيفي و سايبة المدونة و لا همك

ما علينا المهم يا ستي البوست هااايل طبعا من اجمل المواضيع لي بحب اقراها هي دي لي بتخلينا استرجع ذكريات جميلة و لحظات لا تنسى بجد الطفولة دي حاجة لا تتعوض ليت ايام الطفولة تعود يوما

انا من الناس لي مبهتمش اوي بكلام الناس يعني ممكن اعمل حاجة طفولية و جنونية في الشارع و لا يهمني نظارات الناس و لا كلامهم

بس برضو في حاجات بيكون نفسي اعملهم و مبقدرش

M.a.r.y.o.o.o.m يقول...

وعايزنا نرجع زي زمان قول الزمان إرجع يازمان