2010/03/29

الريس مواطن

قعدت مع نفسي كدا وفكرت وانتم عارفين طبعا ان عقلي تاعبنى شوية ومش بيبطل تفكير بعيد عن السامعين بالذات لما الموضوع يخص الريس متقال بذات نفسه , سمعت عن رحلة علاجه وزي باقي البشر كنت بتتبع الموقف بس فى لحظه جه علي بالى حاجه بتقول الريس مواطن ؟!! أه طبعا الريس مواطن زيه زيينا الفرق انه بيغنى لينا او علينا مش هتفرق , ما علينا من الفرق خلينا فى وجه التشابه اللي بينا وبينه , طيب لما يبقى الريس مواطن اكيد رحله علاجه كانت علي نفقة الدوله ؟!! مش هو مواطن برضو , تصدقو سؤال نفسى اعرف اجابته , طيب لو كان اتعالج علي نفقة الدوله ودا حقه مبقولش لا , هو برضو استنى الموافقه بعد ما قدم الاوراق وقعد فتره يا حرام مش جاله رد ولا اتمضاله بالموافقة الفورية , الا حد يقولى هو لما بنقدم طلب للعلاج علي نفقة الدوله الرد بيجى منين , مين فى ايده يقول فلان يسافر فورا وفلان لسه شوية خليه لما يستوى اقصد يموت اهو يبقى وفر , لما كبار الدوله بكل فلوسهم ونفوذهم ( اللهم لا حسد ) يتعالجو علي نفقة الدوله امال احنا نتعالج علي نفقة مين , هى الدوله هتتحمل تعالج مين ولا مين وكلنا خربانين , ما علينا من النفقه دلوقتى , فكرت فى حاجه كمان معلش تعباكم معايا ركزو شوية , هو ليه الريس متقال سافر يتعالج بره مصر هو ميقدرش يجيب اكبر دكاترة العالم لحد عنده (بفلوسي يا كلا.... ) ولا علشان جو بره يساعد علي الشفاء اسرع , نقى بقى بعيد عن السامعين لحسن حد من اخوانا البعده يقول احنا كمان سنطالب بجو نقى بعد الشر علينا منه , يلا ما علينا اصلا من كل دا المهم الحمد لله انه رجع بخير فلله الحمد علي السراء والضراء , وغنوا معايا أغنيته المفضلة .....
طويل العمر يطول عمره ويزهزه عصره فيخرب بيتنا وينصره علي مين يشتكيه هاى هئ .

هناك 30 تعليقًا:

Sameh Ezzat - (خواطر خاطر) يقول...

جراي ايه يا مواطن ..
انتا هتبص للريس علي الكام مليون اللي صرفهم في علاجه..
متمرش فيك الكوسه اللي عمال تاكل فيها ليل نهار..
لا حرام عليك

boda_love15 بودا يقول...

هاي هئ
اللهم لا حسد فيهم
اللهم حسد فينا احنا
اذا كان علي شوية الهوا فمقدور عليهم انا سمعت انهم هيوزعوه ع بطاقة التموين
واذا كان ع الكام مليون ده كلام ده بيقولوا انهم غلابه مرتبات القطاع الخاص اعلي من مرتبتهم ده احنا ظلمه قوي ياجدعان
هاي هئ

ســـهــــر يقول...

طويل العمر يطول عمره ويزهزه عصره فيخرب بيتنا وينصره علي مين يشتكيه هاى هئ .

هههههههههههه

انا ولا اعرفك

وحشيتنى يا بنوتة

القمرالباكي يقول...

السلام عليكم
سيبي الراجل فحاله عشان راجع من علاج ومش مستحمل كلام انتي عايزه يتعب ويرجع يدخل جوه دوامه العلاج دي تاني
وبعدين شاغله بالك كتير ليه احنا مش مهم المهم هو لازم يتعالج هو احنا نقدر نعيش من غيره نموت نموت ويحيا الريس

تقبلي مروري وبطلي هتودينا فداهيه مالنا بالسياسه خلينا نقشر كوسه فبيوتنا احسن

ههههههههه دونتي بخير

Tears يقول...

الفساد فى البلد وصل للاكباد


يارب الشعب يفوق و يثور لكرامته و حقه و ربنا يعنينا و نخلص من النهب و الافساد المنظم اللى بقالنا فيه تلاتين سنه

ahmed_k يقول...

هههههههه
إنتي مستغربه من علاجه بره على نفقة الدوله (طبعا) طيب خدي عندك لما يكونوا بره هو وأسرته كللها بمافيهم زوجات الأبناء والأحفاد وطبعا كله على نفقة الدوله ومرات أبنه يجي ميعاد ولادتها فتقوم تروح تسافر تولد في بريطانيا وبرضو على نفقة الدوله
طيب ده تقولي عليه أييييييه ؟؟؟؟
أبلغ رد أن دي عزبه مش دوله
حسبنا الله ونعم الوكيل

ســـــــهــــــــــر يقول...

طبعا انتى مؤذيه كده
صح
عارفه طبعا انك بتقولى اه جدا
لان الريس متقال قال ( بص على الحلاوه حلاوه) لكن ما جابش سيرة اللماضه دى
بصى و اسكتى
و ف الحالتين هيحصل زى اللى حصلى

اتفقعت مرارتى
اه و الله و لحقوها بالسكينه

قصدى بالمنظار

انا همشى باه عشان ما عنديش حاجه تانيه
قال مواطن قال

Maha Shahen يقول...

Sameh Ezzat - (خواطر خاطر):
............................
انا لا ببص ولا حاجه كان مجرد استفسار
وانا مالى انا مبحبش الكوسا ممكن نمشيها بتنجان بموت فى المسقعه
هههههههههههه

والله نورت المدونه

Maha Shahen يقول...

boda_love15 بودا :
...................

قعدت اضحك ضحك علي تعليقك اللهم لا حسد فيهم حسد فينا احنا هههههههههه

باين هما مش هيوزعوه علي بطاقة التموين انا جت ليا اخبار من مصدر غير موثوف فيه انهم هياخدو ضرايب علي الهوا خلى بالك بقى

نورت المدونه وسعيده بتعليقك

Maha Shahen يقول...

سهوره / ساسو كافيه
...................
عاش من شافك والله لك وحشه يا بنتى
الف حمدالله علي سلامتك

كدا برضو ولا تعرفينى يا خاينه هى دى الصداقه والا فلا
انا بقول برضو النداله واجب بين الاصدقاء
بس اعذرينى انا بفتكر الناس اللي بحبهم فى الازمات يعنى مع اول قلم هقول اسمك بدون تفكير ههههههههههههه

عود أحمد وسعيد ووحشانا مووت شدى حيلك واكتبى كتير بقى

Maha Shahen يقول...

القمر الباكى:
.............
وعليكم السلام ورحمة الله وبركاته

ايون طبعا عندك حق
علي رأى عادل امام
خد منا واديه
عرينا واكسيه
انفخنا وفسيه

ههههههههههههه

هو كل ما اكلم حد يقولى كوسا
منا مبحبش الكوسا اعمل ايه عالجونى بقى ملهاش حل تانى
بس شكلى قريب هاكلها عضب عن عينى

نورتى المدونه وسعيده بمعرفتى بمدونتك فعلا

Maha Shahen يقول...

Tears:
.......

يا نهار دا انتى حاسه بآسى رهيب من اللي حاصل
يا عزيزتى متخديهاش علي قلبك احنا فى مصر بنتكلم وبيسبونا نتكلم علشان مبنعملش غير الكلام والكلام مبيضرش حد علشان مبقاش فى ناس بتحس من الاخر

نورتى المدونه ولما دخلت مدونتك فكرتك حد بعرفه فى الاول قولت بدأت تدون من ورايا بس طلعت اوت والحمدلله ففرحت بيكى وفرحت اكتر انكم مش شخص واحد

Maha Shahen يقول...

ahmed_k:
...........
بتضحك يا احمد وجعت قلبى لو الكلام اللي بتقوله صح يبقى انا همنع الكوسا من دخول بتنا مش بس هقول مبحبهاش

طيب يدونا المحصول ويعيشو فيها ينهبو براحتهم علي الاقل نعيش او نعرف نعيش كويس

علي رأى صديق قالى لو امريكا فيها نص النصابين اللي فى مصر كانت خربت من زمان
ما شاء الله احنا لسه معمرين برغم ازدياد اعداد النصابين هههههههه لينا عمر . عمار يا بلادنا

Maha Shahen يقول...

ســـــــهــــــــــر :
........................
ايون عندك حق
مقدرش اقول لا

سلامت مرراتك يا بنتى
هى شوطه فى البلد ولا ايه

طيب الحق استخبى بقى اصلى لسه بمرارتى سليمه بس القلب بيفكر يغير رأيه
ههههههههههههه تعب يا حرام

مش تحدفى قنبله وتقولى وانا مالى اللي يسرا عليا يسرا عليكى مش احنا زى الاخوات برضو هجيب رجلك فى التحقيق

الأرمـوطــي يقول...

السلام عليكم ورحمة الله وبركاتة
اول تعليق ليا اقعد افكر قبل مكتبة اقول ايه وارتب افكارى لانك تركتى عندى اكتر من انطباع اولهم انك زيي لانك قولتى (أحب ُ الصالحين ولست منهم .... لعلى أن أنال بحبهم الشفاعة
وأكره من كانت تجارته المعاصى ... وإن كنا سوياً فى البضاعة)
والكلام الى كتبتية قدام كلمة من انا وقلت لنفسى انا كدة اول مرة اشوف حد زيي وانا بكتب دلوقتى مش قادر امسك نفسى من الضحك طبعا دمك زى العسل وانا قريت موضوعات تانى فى مدونتك وعجبتنى اوى والشعر بتاعك رائع اما عن صلب الموضوع بتاعك فانامش هعلق لسببين الاول انى مش معادى للنظام زيك وانا مش ثورى والتانى حتى لو كنت معادى للنظام زيك مش عندى الجراة انى اقول كدة زيك ده انا حتى خفت عليكى انتى اوعى لنفسك يا صبية وتحياتى على روحك المؤمنة الفكاهية الجريئة

سمكه واحده يقول...

ايوووووووووون
فيخرب بيتنا وينصره علي مين يشتكيه
هاي هيئ
بس دلوقتي كلنا بقت الشكوي لله رب العالمين

متستغربيش من حاجه في البلد دي
وبطلوا حقد بقي علي الناس ياعالم يامفتريه
حرام عليكوا بقي
هو الواحد ميعرفش يبرطع برحته في بلد ابوه دي

ياسااااااتر عليكوا شعب يستاهل حكمته بصحيح(وش مطلع لسانه)

بالله عليكي خلينا ساكتين
:(

تحياتي

Maha Shahen يقول...

الأرموطى:
.........
وعليكم السلام ورحمة الله وبركاته

متشكره ليك علي الكلام اللي كتبته ويسعدنى يكون فى حد زيى لو كان زيى دى حاجه كويسه هههههههههه اتمنى يعنى

بقى انا معاديه للنظام وبتقولها كدا بصوت عالى كمان يا قرموطى الحطان ليها ودان انت بتبعتى علي العلنى كدا متشكررين يا سيدى
ما انا مشيت علي الرصيف ولا نافع اعمل ايه اكتر من كدا يعنى
يلا مفيش مشكله الحافظ ربنا

نورت المدونه واسعدنى انك قريت اكتر من موضوع يا رب تكون قضيت وقت كويس بين جدران بيتى الصغير

Maha Shahen يقول...

سمكه واحده:
..........
ونعم بالله هو احنا لينا غيره

وعلي رأيك كل شعب يستاهل حكامه

يلا ربنا يعينا ونتغير يمكن الاوضاع تتغير والريس متقال يبطل يغنى علينا

وبعدين هو شكله سمع كلامى فقال يوضح موقفه وقال انه اتعالج علي نفقته الشخصيه ههههههههههههه اتارى ان فى ناس بتسمع واحنا مش عارفين

فعلا احنا لازم نسكت علشان البوكس ممكن يلمنا جمعااااااء

نورتى المدونه من جديد

غير معرف يقول...

انا مش هعلق لانك قلتى بنفسك اهو انه اتعالج على نفقة نفســـه..ابقوا اتاكدوا الاول من الكلام قبل ما تقولوه ولا القر فدمكوا كته علتول...اللى اتعالج على نفقة الدولة هو مرات شفتى هو مرات ده المهم مرات وزير الصحة اللى كل شوية يتلع يقولنا العلاج على نفقة الدولة هيتلغى لغير المحتاجين..تيب تفتكرى هو محتاج يعنى؟؟؟انا رايى انه محتاج لكل قرش فالزمن ده فعلا..المهم انا بئة اسالك سؤال..انتى دعيتى للريس ربنا يقومهولنا بالسلامة؟؟؟ولا دعيتى بايه بالزبت؟؟ولو سمحتى تقولى الحقيقة وهناخدك شاهد ملك

Yoyo يقول...

ايه غير معرف ده؟؟؟؟؟اما بلوج قليل............. صحيح

Maha Shahen يقول...

YOYO:
.....
يا حياتى كفايا تيب اللي بتكتبيها وبالزبت ولا علتول دى علشان اعرف انتى مين
بما انى عرفت بقى هبلغ عنك بعدين هو فى حد مدعاش ولا ايه
هو بس الحقيقه كل واحد دعى بلى يمليه عليه ضميره ههههههههههههه
دا اكيد عقاب علي وزير الصحه علشان يعرف قيمة العلاج علي نفقة الدوله يا بنتى اهو شاف يا حرام لما مراته تعبت باع اللي قدامه واللي وراه واستلف علشان يكمل نفقات الاقامه هههههههه, مهو مش ممكن تتعالج وترجع بسرعه لازم تاخد قد سنه كدا تسترد صحتها
قال للغلابه قال هو بقى حاجه للغلابه باقيلهم ربنا احسن من كل حاجه واى حد ( ونعم بالله )
نورتى يا قمرتى وفرحنى جدا انك عبرتينى وقريتى الموضوع

just dream يقول...

ههههههههههه لا تعليق يانور
حمد الله ع سلامه حبيب الشعب ولا تعليق ههههههههه

bastokka طهقانة يقول...

عزيزتي نور
مدونتك جميلة و منظمة و دمك شربات
ربنا يسعدك دايما
انا اسفة ان حصل غلطة مني
اني نشرت الصور بتاعة البوست قبل ما يكمل فرجعت مسحتها تاني على طول
لكن دلوقت لو جيتي حتلاقي البوست كامل ان شاء الله

يا رب يعجبك
اوروفوار

مجرد بنت يقول...

عاااااااااادى جدا
ما هما الى فوق هما الى بيتعالجوا على نفقة الدولة
لو مكنش الريس يتعالج على نفقة الدولة مين يعنى المواطن الغلبان

new-one يقول...

اغيب اغيب وانتى زى مانتى
ربنا يسترها علينا وعليكى:))

وفاء بركات يقول...

إزيك ياترى لسه فكراني
لسه شقية ومرحه الحمد الله إنك بخير
وهاى هئ

العلم نور يقول...

والله يمكن ويمكن لأ .. لو عندك معرفة يمكن .. أما لو كانت المعرفة نكرة مستحيل يرسل للعلاج على نفقة الدولة .. بس في رب كريم الله يعنا على ما ابتلانا

bastokka طهقانة يقول...

هاي هي


انا قلت اجيب نص حلاوة و رغيفين يمكن نحتاجهم

ههههه
الى الامام دائما

Maha Shahen يقول...

قول يا رب:
..........
طبعا الف حمدالله علي سلامته
ونورتى المدونه وخليكى جريئه قولى واجرى اقصد قولى ومتخافيش

...........................

طهقانه:
.......
انتى اللي دمك زى السكر والبوست دا كان هايل والحمدلله انك نشرتيه والا كنا هنعمل ايه بالساطور بس
يخليكى لينا ودايما تنشرى الاجدد ومتحرمش من زيارتك للمدونه

..............................

مجرد بنت :
.........
هو المفروض احنا اللي نتعالج علي نفقة الدوله مش الكبار ولا اللي فوق وفى ناس فعلا بتتعالج لكن قليليين جدا وبعدين الاجراءات اجارك الله بتاخد وقت كتير قوى ومن اسعده قدره تخلص اوراقه قبل ما يخلص هو
اسعدنى مرورك وتشريفك ليا

Maha Shahen يقول...

new-one:
.........
منورنا دايما والله وحمدالله علي السلامه من بعد غياب والحمدلله انى مبتغيرش ههههههه دا شىء جميل
اسعدنى مرورك وتعليقك

...............................

وفاء بركات:
...........
طبعا والله فكراكى ومش نسيتك بس انا قليت فى الزيارات او انقطعت باين انا اسفه بجد بس والله وحشنى انى اقرأ ليكى فعلا
وسعيده جدا بأنك لسه فكرانى وبتمرى من هنا وبتسلمى ربنا يبارك فيكى ويسعدك يا رب
وهتلاقينى عندك قريب

..................................

دندنة قيثارة الوجد:
...................
متفقه معاكى جدا والله المعين بس فين التغيير بس
لازم نلاقى حل ونتغير وربنا يكرمنا وهما كمان يتغيروا

..................................

طهقانه:
.......
كدا برضو بتفولى عليا جيبالى عيش وحلاوه ههههههههههههه
لا لسه والحمدلله فى بتنا ومعززه مكرمه وبشرب كاكاو زى ما انا
اتفضلى معايا