2010/02/27

ألم المشاعر

حيرنى التفكير فى احوال الناس وقلوب البشر , ايه القلوب الحجر دى ازاى قسيت كدا , طول عمرى بسأل نفسى ازاى نقسى علي حد بيحبنا , ازاى نجرح ونعذب ونقول أسفين دا قدر , بيبقى نفسى اصرخ واقول القدر مش ظالم احنا اللي بنظلم نفسنا , احنا اللي بنختار غلط , احنا اللي مبنحاربش , لأن الحكايه فى نظرنا متستاهلش , نحارب علشان مين وليه علشان مجرد صديق , وكأن سهل فى الدنيا دى تلاقى صديق ووفى , نحارب علشان حبيب , عريس مشى يجى الف غيره , الاستسلام تفكير سلبى ومحبط , دا احنا حتى مبنحافظش علي صورت الحبيب فى خيالنا وبننساه بمرور وقت قليل جدا , ازاى نكون النهارده بنحب حد ومتعلقين بيه وبكره عادى جدا مجرد انسان بيمر من جنبنا , ايه القلب دا , احنا بنهرب ولا بنتجاهل الذكريات , وبنخاف حتى تمر بعقولنا لحظات فبنختار ننساها للأبد , فى يقين جوايا بيقول اللي يخون حبيب هيندم أشد الندم , بس هل يا ترا وقت ندمه دا هيفكر دا ذنب مين ولا هيقول الدنيا جت عليا , يمكن مش شرط دايما ان الجرح يبقى تخليص ذنوب , بس اكيد فى ناس رحمة ربنا بتلحقها فى الدنيا يمكن لأنهم مكنوش وحشين قوى كدا زى ما اتصورنا , وساعات بقى بنريح عقولنا خالص ونقول مقلب القلوب هو الله النهارده بنحب فلان بكره مش حاسين اننا بنحبه يبقى من عند ربنا لا معلش معتقدش , يبقى انتم اصلا فى الاساس مكنتوش بتحبو فلان دا , واللي يحيرنى اكتر الناس اللي بتنسحب من حياتك بدون ذكر جمله لا خير ولا شر كدا بدون اسباب , ألم فراق الناس دى ملهوش مقياس علشان اقولكم مدى قسوته وعذابه من الحيره والحنين , عارفين لو شخص مات بنكون مرتاحين نفسيا اننا عارفين هو فين وعارفين بعد عنا ليه وساعتها بس بنقول قدر الكلمه وهى بتخرج من قلوبنا بتصحبها تنهيده تسليم للرحمن سبحانه وتعالى , لكن اللي بعد بدون سبب واضح لينا , بنمشى ندور بعنينا عليه فى كل طريق وكل مكان جمعنا سوا او حتى كنا بنفكر نروحه سوا بتبقى ذكرياته عذاب والتخلص منها محال , بنقول ساعات بينا وبين الناس لا خلاص احنا نسينا ومبنفكرش اللي بعد هو اللي اختار , مش عارفه بنحسن صورتنا فى عيون الناس ولا بنحاول نحسنها فى نظرنا احنا يمكن علشان نقدر نكمل قال يعنى قلوبنا قسيت خلاص وبقينا زى باقى الناس قلوب بتنبض علشان تعيش والسلام .
اعتقد مفيش غير اننا نقدم تحيه للناس اللي مشاعرها ماتت , الناس اللي اصبحت حجاره بتمشى بقدرة ربنا , الدنيا بتلف ومبتقفش عند حد وزى ما خونت هيجى يوم وتتخان هى كدا يا عزيزى يوم ليك ويوم عليك , نصيحه منى احتفظ بالذكريات ولو فى سرداب محدش يوصله ولا يتفتح يمكن الذكرى دى تصحى قلوبنا فى يوم تانى ترجع بتدق بأحساس يمكن وقتها تكون طوق نجاه لينا من تحول القلوب للاسوء , اسقى مشاعرك دايما بالطيبه وكون انسان مهما اتغير الزمن .
( انا مش هقول كالعاده اعذرونى انى مبردش علي التعليقات بس والله يا جماعه انا بفرح بيها جدا وبجد بتغير كتير فى نفسيتى كل ما احس انى قدمت شىء وعجب ولو انسان واحد , يمكن انا بطلت اعلق علشان زهقت من المجاملات والناس اللي بتمر وخلاص ويمكن بطلت اكتب كتير او اعلق فى المدونات التانيه علشان ميبقاش الرد مجرد مجاملات وبكتفى بالقرايه الا ما ندر يعنى انى اعلق , برضوا مش متأكده فعلا لكنى احيانا بحب لو ارد علي كل تعليق بس بحس انه واجب تقيل وانا طول عمرى مبحبش الواجب بقى برغم انى بكتبه ههههه بس هنا بقى فى مدونتى برخم شوية كتير عليكم لازم ارجع اقول اعذرونى *

هناك 12 تعليقًا:

Unknown يقول...

بالعكس التحية للحقيقية للبطل اللى بيجرح وبيستمر فى احياء مشاعرة وتجديدها ومازال قادر على الحب والعطاء ومازال يملك مشاعر وقلب نابض لا متحجر من لا يملك نبض لا يملك حياة ولا طعم لها يكون لحجاراة حتى لا البهائم لان البهائم تشعر وتحب وتبغض وتغضب
التحية لمن يملك ما لا يباع ولا يشترى
التحية للقادر على الحياة ومكافحة صعاب الحياة والتغلب عليها حتى وان اخذ منه فترة التحية الحقيقية لمن يجرح لكنه يقف
ليحمد الله و يستعين به ليكمل حياتة

ان اشد الناس ابتلاء هم الانبياء والصالحين فالاصلح فالاصلح
وفقك الله وسورى على الاطالة
ومتغبيش كتيررررررررررررر
وانا عذراكى يا قلبى

*الطالبة عفو الله *زوزو يقول...

اولا وحشااااني اوي اوي
الموضوع صراحة محير
بوصي يا قلبي احيانا الانسان بيمر بحالة فتور مش بس في مشاعر فتور ف كل حاجة ف حياته بصفة عامة و ما بيحسش بنفسه انه كدة بيبعد عن حبيبه و بيخلي حبيبه يسوء الظن فيه و يفتكر انه بعد بارادته و انه كدة خان حبهما
هو فعلا شعور لا يوصل بس لو حبهم حب قوي مفتكرش الطرف التاني حيقعد يتفرج في حبيبه و هو بيبعد عنه او بعد خلاص
لو الحب حقيقي فعلا يبقى حيعمل جميع المحاولات لاسترجاع حبيبه و حيديلو اعذار لبعده دة و لو مفيش فايدة وقتها مش حقلك الشعور بيكون ايه ز ما قلتي ملوش مقياس في العذاب
و مفتكرش الذكريات بتتنسى بسهولة
حتى لي بعد و بعده كان بارادته حيجي يوم عليه و يفتكر الذكريات و يبكي عليها دم مش بس دمع بعد ما حيكون ضيع كل حاجة حلوة
مش عايزة اطول اكثر من كدة بس حابة اضيف حاجة عن المقطع التاني في البوست
حياتي مش ديما التعليقات بتكون مجاملة و محد مجبر على التعليق يعني الي بيعلق بيعلق بارادته و خصوصا عندك عشان مفتكرش حد حيعلق علشان تدخلي عنده و لا تعليق عنده في ناس كدة بس قليلة
حسستيني بكلامك انك بتتهمي لي بيعلقو عندك انهم بيجملوك ونك متعلقيش برضو مش مبرر المجاملات
من زمان كنت بتعلقي يا ترى كان تعليقك مجامالات
مفتكرش يبقى ليه تخلي الناس القليلة اوي الي بتعلق للمجاملة بس تاثر عليك و تخليك لا تعلقي عند الناس و تتهمي الي بيعلقو عندك انه بيجاملو
على العموم انا اسفة ع الاطالة
و انتي عارفة اننا مش بجاملك من غير ما اقول
لنا لقاء قريب مباشرة
اعيد و اقول وحشتيني اوي و جوتاموووووووو

تحياتي

mohamed ghalia يقول...

لازم زى مبندى تلاقى الى قدانا بيبادلنا نفس المشاعر
انا الى بكون سعيد بجد لما بطمن عليكى كل فترة بمواضيعك الجديدة

غير معرف يقول...

ازيك يانور حمد للة على السلامةعايزة اقولك حاجة مين قالك انة قلبة حجر الناس بس كل واحد بيشوف الحاجة من وجهة نظرةهو وفية حاجات بتكون غلط من البداية حتغضب ربنا انا مثلا السنة دى حصلت حاجة غريبةسمعت انة حيرتبط وكدت اموت مش بس من الخبر لامن الارتباك والتوتر ومش عارفة اخبى مع انة من حقة بعد كدة لاحظت انة فية حاجة غلط وقال لا انا لاخطبت ولا حاجةوبعد كدة قالى مش عايز اشوفك ؟؟؟؟؟؟؟؟؟؟؟؟؟؟؟؟؟بعدت وقررت يروح لاحالة ويعيش حياتةويشوف مستقبلة لانى مش حتغير لو جالى ملاك من السماء انا خلاص بعيش حياتى زى ماهى كدةحلوة او مرة..

Maha Shahen يقول...

نهر الحب:
.......
كلامك عجبنى كتير وانا بغير وجهة نظرى ونقدم تحيه بجد للقلب اللي قدر يتحمل وصمد وعاش من بعد الجرح ومعاملش الناس بنفس المعامله
وبعدين كلامك مش اطاله ولا حاجه وبجد اسعدنى تواجدك بالمدونه نورتينى

Maha Shahen يقول...

الطالبه عفو الله زوزو :
......................
حمدالله علي السلامه يا قمر بجد وحشتينى وكفايا استكشافات بقى وارسى فى بلد شوية يا قلبي
انا مكنتش بتكلم عن مرحلة الفتور يا قلبي انا بتكلم عن التغير الكامل والمفاجىء وغير مبرر والابتعاد بدون اسباب , بتكلم عن انسحاب شخص عزيز من حياتك بدون ذكر سبب , وصدقينى فى ناس مبتفرقش معاها لأنها شايفه الناس عمله عاديه سهل الحصول عليها برغم ان فى انواع من البشر عمله نادره جدا صعب اننا نقابل زيهم مره تانيه , اما بالنسبه للتعليقات فأنا زى ما قولتلك انا بعدت فتره لأنى حسيت انى هبدا اجامل وارد بكلام مش من قلبى مكتبتش قبل كدا كلام مجاملات بس احيانا بتمرى بمدونه ويكون الكلام عجبك جدا ومتفقه مع الكاتب بس مش لاقيه شىء تقوليه الا ان الكلام عجبك بينى وبينك انا بحكم عليها زى ما بشعر انا يعنى لو تركت تعليق بيقول مكشوره وجهد رائع وممتاز وخلاص صدقينى الكاتب مبيحسش انك قريتى بيحسك بتجامليه او بتملى خانه علشان تقولى انا مريت من هنا وخلاص انا بشعر بكدا مش ممكن الموضوع بالكامل مفيهوش ولا فكره قدر يتوصل ليها بس احيانا بتحصل , اما بالنسبه للتعليقات اللي مستمره وبرغم انى مبردش فدول ناس انا بحترمهم جدا لأنهم بيحسسونى انى قدمت شىء ولو ضئيل يستحق القراءه بيسعدونى بجد اكمل مهما كانت احوالى العقليه ههههههههه انتى عارفه بقى
للمره التانيه اقولك حمدالله علي سلامتك ونكمل المقاله فى اللقاء بقى كفايا رغى هنا

Maha Shahen يقول...

mohamed ghalia:
................
اهلا اهلا استاذ محمد مينفعش نرفع اللقب برغم صغر سنك ودا مش تقليل من قدرك ابدا والله بس ما شاء الله عليك عقليه تحترم بجد
فكرت فى كلامك شوية وعايزه اقولك دايما مبيتوقفش العطاء فى المشاعر بالذات عند نفس الحد اللي بنحصل عليه من الطرف الاخر احيانا بننجرف بدون اراده فيزيد العطاء ولا يضاهيه مقابل لكن مش دا اللي بيألم اللي بيألم فعلا ان ميكونش فى مقابل بالمره لا قليل ولا كتير انعدم كل شىء من الطرف الاخر حتى ابسط الحقوق وهى التقدير
لو قدرنا ننفذ فكرتك ونتوقف عن حد المساواه بين الاخد والعطاء يمكن ساعتها تختلف الامور دا لو قدرنا نعمل كدا

Maha Shahen يقول...

غير معروف :
..........
الله يسلمك انا بخير والحمدلله فى احسن حال
انا عارفه ان الكلام مش ليا ولا هو بيخص حتى الموضوع المطروح بس عامة هو جزء مش بعيد قوى عن الموضوع وممكن يندرج تحت ألم المشاعر , انا اعتقد بدون زعل يعنى انك البنوته اللي دايما تكتب لشخص ما هنا بيمر يقرا الكلام يعنى انا مدونتى ما هى الا لوحه لتدوين الرسائل عامة دا مش يزعل بس نفسى افهم مشكلتك دى يمكن اقدر احلهالك او حتى افكر معاكى انا بشوف دايما ان الحاله بينكم بتوصل للاسوء واعتقد الكلام اللي شوفته من شوية بيقول ان العلاقه انقطعت خالص او انتهت
عامة لو تحبى نتكلم فى بريد الكترونى بالبروفيل ابعتيلى عليه لو لا يبقى اتمنالك التوفيق وانا مش زعلانه اكتبى تعليقات للشخص دا زى ما تحبى
عايزه اقولك ان مفيش انسان مفيهوش عيوب الكمال لله وحدو كمان حبيبتى ان التغيير مش لازم دايما بس احيانا بيكون مطلوب ولو شوية علشان نعدل شوية حاجات مش تمام سواء فى الشخصيه او فى التصرفات يمكن مش من السهل اننا نتغير بس لو كان التغيير للاحسن ليه منحاولش
نورتى المدونه

حيـــــاه يقول...
أزال المؤلف هذا التعليق.
حيـــــاه يقول...

فعلا المقوله بتاعه يوم ليك ويوم عليك ولازم اى حد يفكر فيها كويس اوى قبل ميتصرف تصرف يندم عليه او يجرح حد او يزعل حد ولو فكر انه زى مهو هيتعامل مع الشخص الى قدامه اكيد هييجى اليوم الى يتعامل هو نفسه بنفس الاسلوب واكيد لو كل واحد يتقى الله فى تعاملاته مع الناس ومشاعرهم هيلاقى الى يتقى الله فيه ولو حصل العكس فبييكون سؤ اختيار
وطرحك للموضوع جميل واسلوبك اجمل تسلم ايدك نور

rovy يقول...

السلام عليكم
أزيك يا مور وحشانى و يارب تكونى دايما بخير ..
بتغيبى كثير لكن دائما مواضيعك متميزه
لكن أنا مع نهر الحب ..ميتفعش نقدم التحيه للناس اللى مشاعرها ماتت أبدا
التحيه للناس اللى لسه باقيه على العشره و اللى بتفاكر دايما الناس اللى حبوها و وقفوا جنبها فى الشده و فرحوا لفرحها و حزنوا لحزنهم .. تخيلى أن فيه ناس بنعطيهم كل الحب ده و مع ذلك ممكن ينسحبوا من حياتنا و ينسونا و ده لأنهم ببساطه معندهمش مشاعر و لا يعرفوا يعطوا أتعودوا بس يأخذوا ..
التحيه للناس اللى بتستمر فى العطاء و الحب و بتتحدى صعوبات الحياه و ألم المشاعر ..
أسف للاطاله :)

ودى و تقديرى و أرق تحياتى لكى

فاروق سحير ( فاروق بن النيل ) يقول...

فاروق بن النيل ...
نور ... واضح جدا إنك إنسانة صريحة جدا وهذا نادر الحدوث بهذه الأيام والأندر أن يكون من فتاة أو إمرأة كلامك عن الحب والمجاملات والكذب والنفاق والنسيان والكره صحيح جدا ولكن إن الله قد أعطى نعمة النسيان وذلك لكى ننسى من أساءوا إلينا وننسى حزننا على من فقدناهم من أحبابنا سواء فقد جسدى أو روحى ولولا نعمة النسيان لأنفجرناولم نتحمل ساعة واحدة أو يوم دون أن ننسى فالحمد لله وقولى معى " نحمدك ياربى على نعمة النسيان "ونرجوا من الآخرين أن يسامحونا إذا أخطأنا فى حقهم دون قصد ودائما العفو عند المقدرة من شيم الكرماء العظماء الأقوياء.ولتعلمى أن رسول الله صلى الله عليه وسلم عندما آذاه كفار مكة وقريش حيث كانوا يخنقونه ويضعون القاذورات والتراب فوق رأسة وهو ساجد بالكعبة وإتفقوا جميعا على قتله ولولا رحمة الله وجنوده لتمكنوا منه ولكنه هاجر إلى المدينة وبعد فتح مكة قال لهم: ماتظنون أنى فاعل بكم قالو له: أخ كريم وبن أخ كريم قال لهم : إذهبوا فأنتم الطلقاء وعفى عنهم وصدق الله تعالى إذ يقول عن محمد صلى الله عليه وسلم" ولو كنت فظا غليظ القلب لأنفضوا من حولك 0 فاعف عنهم وإستغفر لهم وشاورهم فى الأمر" وقال " وماأرسلناك إلا رحمة للعالمين " وقال " لقد جاءكم رسول من أنفسكم عزيز عليه ماعنتم 0 حريص عليكم بالمؤمنين رؤوف رحيم " المعنى الذى أقصده أن العفو والرحمة والتسامح ليست من شيمة الضعفاء ولكن من شيمة الأقوياء وآسف على التطويل .أرجو أن تزورينى بمدونتى:
farouksam.blogspot.com(عصفورالجنة)