2009/01/15

اللي ما يعرفك يجهلك


وحشتونى قولت أرجع وارخم وارغى معاكم وأصدعكم شويه وبما أنكم انصدمتوا فى كلمتين الحب اللى كتبتهم فخلاص أرجع لقواعدى سالمه وتعالو نفكر سوا فى مثل كلنا بنسمعه مره واتنين ومليون وبنعرفه وبنقوله
اول مره دلوقتى يستوقفنى المثل دا


لما كنت مع واحده صحبتى وقريبيين من بعض احنا قوى وفى قعده كدا بهزار بنتكلم لقتها بتقولى علي فكره زمان مكنتش بحبك
ولا كنت بطيقك وكنت بقول مالها البنت دى , كنت حساكى مغروره او كئيبه ( على فكره هى تبقى اخت صاحبة اختى : لفه كبيره معلش )
البنوته كانت بتيجى عندنا هى واختها فبما ان اختها صاحبة اختى بخرج من الأوضه واسبهم يتكلموا براحتهم مش هكبس علي انفاسهم بقى , كل واحد بيحب يتكلم مع اصدقائه لوحدوا برغم انى واختى نعتبر توأمين يعنى كل شيء بنحكيه لبعض ودايما سوا الا اننا بندى لبعض برضوا مساحة حريه لكل واحده فينا
طبعا البنوته كانت بتدخل مع اختها واطلع انا بره مثلا اقعد قدام الكمبيوتر بعد ما سلمت عليهم , تتغاظ هى وتقول لأختها مالها دى مش بتتكلم معانا ولا تقعد معانا ليه بس تسلم وتمشى , لكن مع الايام فيما بعد بقينا اصحاب انا وهى اصلها كانت بتخرج بغلاسه تكبس علي قلبى قدام الكمبيوتر او التليفزيون
فبقينا اصحاب وبما اننا كلنا اصحاب يبقى دا يدينى حق اقعد معاهم لما ييجوا ( وجهة نظري بسيطه مالى انا هما اللي بيفهمونى غلط )
منكرش ان كلام صحبتى شوية ضايقنى لكن الأهم انى فى نظرها احسن دلوقتى على الاقل بقت تطيقنى ههههههههههه
تانى موقف ارخم ملى فات
واحده قريبتنا هى رغايه شوية وبصراحه مبحبش اقعد معاها بتصدع رأس اجدع حد تسول له نفسه ويفكر يقعد يتكلم معاها
المهم هى بيتها بجانب بيت عمتى فكنت في زياره لبيت عمتى ولقتها واقفه علي باب بيتها قولت اروح اسلم عليها
كنت ماشيه وال mp3 في ودانى كمان والضحكه مليه وشى وبقول يا رب سلم في سرى , قربت وسلمت عليها وقالتلى ادخلى قولتلها طيب اروح لعمتى وهعدى عليكم بليل بأذن الله , وبصراحه مكنتش سمعه هى فضلت تقول ايه لأن صوت البتاع اللي في ودنى كان عالى شوية
وفضلت اهز رأسى بالموافقه علي أيه معرفش وببتسم ليها ببلاهه كدا وبصراحه الابتسامه كانت هتتقلب ضحكه على الموقف اللي انا فيه
ورخامه منها ماسكه في ايدى ومش راضيه تسيب ايدى حتى اطفى ال mp3
واسوء شيء لو جيت تسلم على حد ويفضل ماسك في ايدك وكأن ايدك لزقت في ايده
بالعافيه سابت ايدى وطلعت لعمتى وذى ما وعدتها روحت ليها ( مرغم اخاك لا بطل )
وبعد ساعتين طلعت لعمتى وانا بعانى من صداع رهيب من رغيها اللي مكنتش برد عليه كله الا بهزار علشان احاول اقفل اى موضوع هى تفتحه
فوجئت بعديها ببنتها كانت عندنا وقالتلى علي فكره ماما بتحبك قوى وبقت تقول عليكى كلام غير الأول خالص
طيب لو حد في مكانى مش هيسئل برضوا هى كانت بتقول ايه قبل ما تحبنى هههههههههه
قالتلى كانت فكراكى متكبره ومغروره ( قولت فى سرى يا رب هو ايه الحكايه ) فجاءه بقيت بضحك منغير سبب وانا بقولها بجد
قامت البنوته قالتلى ما انتى دايما ساكته ( يعنى يا ربى هو انا لازم افضل ارغى علي الفاضيه والمليانه ثم مامتها مش من سنى هتكلم معاها في ايه اصلا )
تفتكروا بعد الموقفين دول بقى ايه جوايا , تعمل ايه لما تلاقى معظم الناس مش عرفاك وبتحكم عليك من الظاهر , بس لأنك مبتتكلمش
هل ليهم حق ياخدوا بالظواهر ويحكموا وخلاص منغير ما يعرفوا الانسان كويس , مش فى حكمه جميله بتقول تحدث لأعرفك , طيب لو اللي قدامك مبيتكلمش تبقى متعرفهوش , بتحكم عليه ليه بقى ؟!!
بقيت دلوقتى بتوقع ان فيا صفة من الصفات اللي بيشفوها , اكيد هى فى مكان ما منى يمكن انا اللي مش شيفاها , على فكره دا مش ضعف في الشخصيه دى مجرد افكار بتتخبط فى عقلى
اكيد انا حكمت قبل كدا على غيرى من المظهر الخارجى بس وعلشان كدا اتردت ليا وبقى الناس يحكموا عليا بالظواهر بس او يمكن دى عادتنا نحكم على الانسان ولو فى وقت نبقى نعرفه , لكنى برغم كل دا استفادت شيء واحد انى عمرى ما احكم على حد لا بأول ولا بأخر مره اشوفه , انا بسيب كل حد يحدد ملامح شخصيته براحته ولو اخدت معرفتنا شهور وسنين طالما انا مش فهماه ولا بتكلم معاه , محكمش عليه

هناك 30 تعليقًا:

Lady E يقول...

دي اول مرة ازور مدونتك والحقيقة فعلا اللي ميعرفك يجهلك لكن مشكلة اغلبية الناس انهم عايزين يثبتوا انهم بيعرفوا كل حاجة وعلشان كده بيحكموا على الناس من بره ويمكن انا نفسي احيانا بحكم على الناس من النظرة الاولى بس مش بكون فكرتي النهائية عن الشخصية الا لما اكلمها واتعامل معاها
وفي مثل بيقول

تعرف فلان ايوة
عاشرتة؟؟ (يعني اتكلمت معاه وعشت معاه وفهمت شخصيته ) لأ
يبقى معرفتوش

دمتي في حفظ الرحمان

شمس النهار يقول...

مشكله فعلا قائمه في مجتمعنا ان كل الاحكام بقت احكام مظهريه
يعني النصاب يلبس شيك ويتكلم حلو بقا باشا ينصب براحته بقا
وممكن واحد لابس بسيط وفي حاله يكون اشرف من الشرف
المفروض مانحكمش علي شخص غير لما نعرفه اكتر واكتر
والمفروض مانحكمش علي حد كده من غير فهم
موضوعي

فارس بلا جواد يقول...

ازيك يا نور
علي فكرة الكلام اللي قولتيه ده بيحصل معايا كتير .. لان انا عندي فعلا مشكلة اني مش باخد علي الناس بسرعة وبتبقي دايما ردودي بسيطة .. وباحتاج فترة لحد ما اشيل الحواجز مع اي شخص باعرفه لاول مرة .. للاسف الناس فعلا بتفهم الموقف ده غلط وبتعتبره نوع من الغرور والتعالي
عموما لما الناس بتعرفنا كويس وبتقرب مننا اكيد بتبقي الصورة اوضح ليهم
تحياتي

SHAPE YOUR LIFE (ABOALI) يقول...

الشكل الخارجى لاى انسان
عند بعض الناس ذو الخبرة من الممكن استنباط بعض الصفات منه
وده مش غريب
فى بعض الافعال اللى بنعملها ساعات كتيرة
بتتضع من يحكم علينا فى موقف لابد ان يقول على هذا الشخص ذلك الحكم
مثلا قلة الكلام
ماشى وبيكلم الناس والسماعة فى ودانه
واشياء من هذا القبيل
ان تكررت
البعض يبنى انطباعات عليها
على العموم
مافيس دخان بدون نار
وعلى حسب انتى عاوزه ايه

طبعا اتفق معك ان الحكم الحقيقى هو بعد اللقاء والتحدث
ولكن ليس كل من حولنا تتاح له الفرص
للتعمق والمعرفه

ولكننا شعب عاطفى يحكم بالظواهر
وده
جعلنا نتاءخر ولا نتبع اى اساليب علمية

وربنا يسهل ونتغير

انسان وبس ! يقول...

لااااااااا ه ده انتى شكلكك بقى متكبره ومغروره هههههههههه

rovy يقول...

السلام عليكم
ازيك يا نور وحشااااانى
اشكرك لزيارتك لى حبيبتى و تهنئتك بعيد ميلادى ربنا يبارك فيكى يارب
البوست لذيذ و دمه خفيف زى دم جارة عمتك و طبعا هى معزوره فى حكمها لأن دى طبيعة شعبنا مع الاسف دايما يتسرعوا فى الحكم على اى شخص من مظهره و من اول مره .. و بعد كده يرجعوا يقولوا بكل طيبة المصريين معلش ظلمتك اللى ما يعرفك يجهلك !!
طيب مش احسن لو مانحكمش بسرعه على الناس .. ياريت كلنا نتعلم نتأنى فى حكمنا على اى شخص ..
دمتى حبيبتى بكل ود و خير

خالص تحياتى و ودى

رئـــــيسـة حزب الأحلام يقول...

بصى ساعات بنحكم على الناس من المظهر الخارجى بس المظهر ممكن يخدع
ولازم نحكم على الانسان من خلال مواقفه وكلامه
تحياتى لكى

فارس القمر يقول...

السلام عليكم

اكثر الناس كدا بياخدوا الواحد بمظهروا لان مافيش اى عشره بينهم ومش عرفين بعض كويس

فبياخدوا باللى باين قدامهم

ومش عارفين اللى جواكى ايه وبيتغير الحال لما يعرفوكى كويس وتبقى فى وسطهم

تقوم الاعترافات فى الوقت تظهر انهم من قبل ماكنوش بيحبوكى لشئ ما ولما بقيتى فى وسطيهم عرفوكى كويسواتغيرت صورتهم فى عقلهم هيا دى طبيعه عالمنا

دمتى بخير

mahasen saber يقول...

انا عن نفسى مبحكمش على حد اى كان الا لما احتكبيهوفى كذا موقف

وعليه بحكم

عاشقه الرومانسيه يقول...

مش اول زياره لكن اول تعليق
كلامك صحيح مليون فى الميه
وللاسف انا من الناس دى باحكم على الناس من اول مقابله بس مش دايما بيطلع الراى اللى كونته غلط
وعموما ده بيرجع للخبره فى الحياه
تحياتى ياقمر

رابطة هويتي اسلامية يقول...

شارك معنا في حوارنا
غزة في قلب مدون
مع المهندس : الحسيني لزومي
الحوار موجود علي الرابطة شارك معنا في الحوار
كن إيجابيا وحاول المشاركة في إنشاء بلوجر فعال
حوارنا مستمر مع المهندس
متي دخلت سجل تعليقك بسؤالك أو إستفسارك بالنسبة للمهندس
مع تحيات
رابطة هويتي إسلامية

وميض ابتسامة يقول...

بالرغم ان مضمون الموضوع لا غبار عليه الا ان هناك بعض التحفظات ارجوا ان تتفقى معى فيها ....

انا معك ان لا حكم على انسان قبل ان تتعاملى معه بنفسك .. وقد تطول فترة التعامل أو تقصر ولا تستطيعين ان تكشفى ما بنفسه .. فهناك اناس لاتستطيعين ان تخترقى اغوارهم ولا تعرفين مكنون قلوبهم مهما حاولت ..

وهناك آخرون كالكتاب المفتوح بمجرد لقاء قصير معهم فتعرفى كل شئ عنهم

والسؤال الم يحدث بمجرد ان تتعرفى على احدهم لاول مرة ان تنفرى منه للوهلة الاولى !! او تقبلى عليه بكل حب وود ..
هذه كمياء الارواح.

فالارواح تتقابل وتستكين لبعضها البعض وايضا تتنافر ومهما حاولت فلا فكاك منها .. فقد تقابلين احد الاشخاص يتفق عليه الجميع من ناحية خفة الدم مثلا
ولكن دمه بالنسبة لك يلطش ..!!

واستكمالا لموضوعك فقد تكون احد الشخصيات مبهمة وغامضة لاى سبب من الاسباب ولكن بمجرد ان تنمحى عنها عناصر الغموض وتصبح بطبيعتها يعود اليها رونقها وتظهر على حقيقتها امام من اساؤ الظن بها من قبل

واللى ما يعرفك يجهلك .. تحياتى

”*°•.˜”*°•..سونه..•°*”˜.•°*”˜ يقول...

السلام عليكم . الله واكبر اخيرااااااااااا

هل هلالك كنتى غيبه فين ورجعه بموضوع جامد جامد وعندك حق فى كل كلمه ياقلبى الواحد بيعرف الناس ويتكلم معاهم مره واثنين ومش بيعرف يحكم عليهم .
وكل شخص بينظر بشكل مختلف الى الواحد الى امامه وبيحكم حسب تفكيره وعمومن الموضوع عاوز قعده كبيره .
ووحشتينى اوى مش تغيبى تانى وعوزه اشوفك عندى قريبن ها سلام ياجميل
(كوكى) ....تحياتى سونه.

موناليزا يقول...

اذيك يانور؟عاملة ايه ياحبيبتى
تعرفى فيه مثل تانى برضه بيقول "ما محبة الا بعد عداوة" والاتنين صح

بنوتة يقول...

الكلام ده فعلا اتكرر معايا كتييييييييير جدا وكلهم بيعتقدوا انى مغرورة و متكبرة وكلام كتير بس بنبقى اصحاب جدا بعد كده وانا عن نفسى حرمت احكم على الناس بمظهرهم لانى بنخدع كتير
تحياتى

yoyo يقول...

وحشتنى اوى اوى يا نور
ووحشنى الكلام و اللماضة معاكى
يارب تكونى بالف خير يارب

نورتى مدونتك مرة تانية يا قمر

على ستى و ستك يعنى (تعرف فلان قال أه قال عاشرته قال لا يبقى مش تعرفوه )
أنا مش هاختلف معاكى بالعكس انا بقع فى المشكلة دى كتييييييير اوى و الناس تقول أصلها مغرورة و احيانا متكبرة مع ان انت عارفنى مش بقعد ساكتة والله هههههههه مش بعرف امسك لسانى يعنى و بعدها الناس تقولك ياااااه دا انا مش كنت فاكرة انك كدا و الله امال ايه يعنى كانوا فاكرين انى عفريتة لا قدر الله ههههههه

بس برده مش اقدر اتعامل ولا اخد على حد من اول مرة جايز اقدر اكون عنه انطباع معين على اساس يعنى( ان الانطباعات الاولى تدوم) و بصراحة اول لقاء دا مش بقدر انساه لكن ممكن منه تعرفى حاجات كتير عن الشخص اللى قدامك
بس فى حاجة غريبة فيا اوى والله يا نور
مش بحب اسأل شخص عنه نفسه مهما كان الانسان مش بيعرف يوصف او حتى يتكلم عن نفسه كل واحد شايف نفسه بعينه بس لكن أنا أحب أكتشف الانسان اللى قدامى باعتبرها مغامرة فى شخصية الانسان دا

يعنى نقرب من بعض ونعرف بعض أكثر خلاص فهمنا بعض صعب اعتقد كل حاجة بتحتاج وقت و احنا دايما نتعجل الامور

مش تنسى القصب اللى عليك يا نور عشان مش اعمل لك قلق فى المدونة ماشى هههههههههه
تحياتى
يويو

وفاء بركات يقول...

ههههههههههههه
علي فكره السبب في تغير شخصيتك للأحسن
المضاد الحيوى اللي كنتي حطاه في ودنك ..
إستني شويه حتلاقي حد بيقول مالها دى
بتاخد علي الناس بسرعه ..
الناس مش بيعجبها حاجه وصعب ترضي الكل
حمد الله علي السلامه أنا في إنتظارك
تواجدك بيسعدني
سلام ياقمر

*الطالبة عفو الله *زوزو يقول...

نور حبيبتي وحشاني جدا اوي خالص

البوست موضوعه جميل فعلا

ديما بقول مع نفسي و للي حوليا ان الواحد لازم ميحكمش على الشخص من موقف و لا تصرف

و من المنطلق دة مبحبش حد يحكم عليا من موقف لان ممكن يكون الموقف دة ردت فعل على امر معين و ممكن يكون في لحظة غضب و ممكن... و ممكن ...
فمينفعش تبني صورة على موقف

ياما مرينا في حياتنا بناس احتكينا بيهم و عشنا معاهم و جمعتنا مواقف و لحظات معاهم
و بيجي الوقت الي بنكتشف فيه انحنا لسة معرفناش الناس دي كويس او انحنا معرفناهاش على حقيقتها فمابالك بموقف او تصرف

تقبلي مروري حبيبتي

و لك حبي و احترامي

Unknown يقول...

نور اللى مايعرفك يجهلك تتقال على اى شئ الا الاشياء اللى فيها مشاعر واحاسيس صادقه فيه ناس تقابليهم من اول مرة ترتاحى ليهم من غير سبب وفيه ناس ماترتاحى ليهم منغير سبب ايضا عجبنى اوى تعليق وميض ابتسامه هناك كمياء الارواح ارواح تتقابل فتتالف من غير ميعاد او ترتيب حصل عندنا ان ذهبت اختى مع جارة لنا لعيادة طبيب وقع فى غرامها من اول لحظة وهى الان مخطوبه له ..لكن المثل دة ينطبق اكثر على الاشياء الماديه وتعاملات اخرى..دة رايى ولك تحياتى...

hasona يقول...

علي رأيك
لا أستطيع الحكم علي أحد الا بعد الكلام معه
ولا وكما يقولون(تعرف فلان 0000000عشت معه (عاشرته) أقول لأ -يبقي ما تعرفهوش) لأن الانسان منا موقف وفعل ورد فعل
ـ،،،
في البداية بتكون أنطباعات اولية
قد تدوم وقد تزول ( أو تذوب ) بعد المعرفة التامة

ندعوا الله أن يزيد في رغيك وكلماتك ومن ثم موضوعاتك


تحياتي

mohamed ghalia يقول...

أنا قولت أجى أسلم على أختى الغالية بعد مخلصت إمتحانات
ربنا يسعدك دايما
بس لية متوقفة عن الكتابة؟
دمتى بكل الود

Lyssandra يقول...

فوجئت بعديها ببنتها كانت عندنا وقالتلى علي فكره ماما بتحبك قوى وبقت تقول عليكى كلام غير الأول خالص

=======

هوا موقف محرج بالفعل

خصوصا لما يتكرر أكتر من مرة

وبعدين انتي بتقولي في حكمة بتقول تكلم حتي أراك .. أو تكلم حتي أعرفك

ماتتخيليش ان كل الناس حكيمة

أو لما حد يشوفك ساكته يقول يمكن دي مفكرة وهادية ولطيفه

لأ

الناس أول أفكارهم بتروح للسئ

يعني لو ساكته تبقي مغرورة وشايفه يمكن اننا مش من مستواها الفكري

ده المنتظر من الناس في الغالب طالما مش يعرفوكي كويس

أنا كمان باتعرّض للموقف ده كتير

في الأول كان بيضايقني

لكن حاليا بقيت عادي وباقابل الكلمه دي فعلا بابتسامه

لأ وباستناها كمان

لأ والأغرب إني بقيت مش باهتم أصلا وباسيب كل حد يفكر زي ماهوا عاوز

يعني مش باحرم الناس من انها تشوف الفكرة دي
بل وتقتنع بيها كمان

:)

صديقتي الأنتيم

عشرة 12 سنه ثانوي

قالتلي علي فكرة انا ماكنتش باحب أتكلم معاكي في الأول

فابتسمت

ابتسمت هيا كمان وقالتلي حيث انك مازعلتيش : أنا ماكنتش باطيقك أصلا

:)

هههههههه

فعلا اللي مايعرفك يجهلك

-------------

بس عارفه ؟

برده في ناس كتير جدا لما بتتكلم مش بتشوفي الصورة الصح ليهم

يعني ممكن تشوفيهم ودودين ومرحين وكمان ممكن يخدعوكي انهم أصدقاء وتهمهم مصلحتك

وهما أعوذ بالله
قلوبهم كلها سوااد

يعني المشكله مش في الانطباعات بقي
دي مشكلة نباهه وأحكام
وزي ماقلتلك مش كل الناس حكيمة

=========

أعتذر إني اتكلمت كتير أوي

بس أصل أنا اتعرضت للموقف ده كتير بالفعل

:)

تقبلي مروري الأول

كل التحية

Lyssandra

الملاك يقول...

السلام عليكم ورحمة الله وبركاته
اختى وحبيبتى فى الله نور

نور احنا فى اوقات كتير قوى بنحكم على الناس غلط وده احيانا بيكون بسبب اننا بنحاول نشوفهم باعيننا وبقلوبنا نحن فنحاول حصرهم فى هذا الاطار فقط ونحكم عليهم من خلاله دون اعطائهم اى فرصه لتعبير عن انفسهم كما هى سوء كانت تنظر للامور مثلما ننظر ام عكس ذلك

بس انا بفضل دايما انى اتعامل مع الانسان على انه يحمل فى قلبه الكثير من الخير مهما بدا لى عكس ذلك حتى يثبت امامى يقينا عكسه واعتمد على حفظ الله لى وعلى الرغم من ذلك احيانا اخطئ عندما احاول الاعتماد على نفسى فقط فى حكمى على الاخرين

بس الى انا متاكده منه ان مفيش خالى من العيوب بس العيوب ده هى الى بتخلينا نتقبله او نرفضه وليست المميزات فقط كما يعتقد البعض فان كانت عيوب مقبوله لدى انفسنا قبلناه وان كانت عيوب غير مقبوله رفضناه


تقبلى اختى ودى واحترامى
دمتى برعاية الله

نور الدين (محمد الجيزاوى) يقول...

الاخت الكريمة العزيزة
نور
ارجو أن تكونى بكل خير ونعمة
أعتذر لكثرة غيابى لكن لظروف قاهرة
جئت فقط مسلما ولأطمن عليك ايتها الكريمة الفاضلة
ولى عودة ان شاء الله للتعليق على ابداعاتك
أخوكِ
نور الدين محمود

Unknown يقول...

كلام جميل بش أحب أذكرك بقولين لسيدنا على بن أبي طالب
الأول : عندما جاءه أحد الناس وجلس أمامه وسكت فقال له شيدنا علي .. تكلم حتى أراك

والثاني : قوله رضي الله عنه .. المرء مخبوء تحت لسانه

فلا شك أن كلام الشخص يعبر عن شخصيته وهويته وثقافته وفكره
ولكن .. الله يكرمك بلاش رغي

وادعوكي للمشاركة معي في نشر الوعي التربوي
واتمنى منكي وضع بنر لمدونتي عندك
وهي مدونة تهتم بتربية النشء وهي في طور الأنشاء وأرجو أن يحوز محتواها على
رضا الله ثم رضاكم
وفي حالة موافقتكم يرجى مراسلتي على الميل الموجود على المدونة لكي ارسل الكود لكم
وجزاكم الله خير

hasona يقول...

المواقف تبين الانسان

Maha Shahen يقول...

lady e
.......
نورتى المدونه واسعدتى صاحبتها
والله الناس دى لغز كبير لا يعلم خباياه الا الله سبحانه وتعالى
الاهم ان تكون فى فرصه اننا نعدل الحكم اللي اخدناه علي الشخصيه اللي قدامنا

@@@@@@@@@@@@@@@@@@@@@@@@@@

شمس النهار
..........
صدقتى يا شموسه بالفعل محتاجين شوية صبر علشان نعرف نحكم صح
نورتى المدونه يا قمرتى

@@@@@@@@@@@@@@@@@@@@@@@@@@@@

فارس بلا جواد
.............
اهلا اهلا يا احمد الله يسلمك من كل شر
انا بخير والحمدلله فى احسن حال
والله معظمنا كدا يا احمد مش بياخد علي الناس بسرعه او بيتكلم معاهم وكأنهم اعز الاصحاب
انا حاولت فى مره اعملها كانت النتيجه سيئه اتاخد عليا حكم اوحش هههههههههههه فعدت لقواعدى سالمه ارحم

اكيد عندك حق العبره بالنهايه

@@@@@@@@@@@@@@@@@@@@@@@@@@@@@@@

ابو على
........
بس دا مش دايما يا ابو على ساعات الانسان بيكون صعب يتفهم او يتقرى من النظره الأولى او بالمظهر
مهو المشكله لو تتكرر ممكن ناخد فكره غلط اما لو هى مره واخدنا الحكم علي اساسها اعتقد صعب كدا
يمكن هى بالفعل مشكلة وقت وحب التعمق فى المعرفه اصل دا لو مش موجود مش هيهتم الشخص يتعرف اكتر وهيكتفى بحكمه وخلاص
معتقدش التعامل العاطفى سبب فى اننا متأخرين

@@@@@@@@@@@@@@@@@@@@@@@@@@@@@@@@@@

انسان وبس
..........
ماشى يا محمود لما اشوفك بس ههههههههه
متشكررين يا سيدى علي المجامله بتاعتك
مردودالك يا شرير
نورت بتعليقك ومرورك
ربنا يديم عليك الابتسام يا رب

@@@@@@@@@@@@@@@@@@@@@@@@@@@@@@@@@@

rovy
.....
وعليكم السلام ورحمة الله وبركاته
الله يسلمك حبيبتى
انتى كمان وحشانى جدا جدا
لا شكر علي واجب وزيارتك واجب والتهنئه بعيد ميلادك اكبر واجب وطنى هههههههههه ربنا يباركلنا فيكى يا رب
الاهم انه عجبك وقضيتى وقت لطيف بين سطوره
دمتى اغلى واطيب الناس
نورتى المدونه بمرورك وتعليقك حبيبتى

@@@@@@@@@@@@@@@@@@@@@@@@@@@@@@@

رئيسة حزب الاحلام
...............
احيانا واحيانا لا
متفقه معاكى فى اننا نحكم بالمواقف
نورتينى بمرورك وتعليقك
ودايما ينطبق على تعليقك خير الكلام ما قل ودل

@@@@@@@@@@@@@@@@@@@@@@@@@@@@@@@@@

فارس القمر
...........
وعليكم السلام ورحمة الله وبركاته
الاهم ان الحال يتغير لما يعرفوك كويس زي ما انت قولت بالظبط
وما اسوء الاعترافات هههههههههههه
كانوا خلوها فى قلوبهم بدل ما بيصدمونا بيها

نورتنى بتعليقك ومرورك الكريم

@@@@@@@@@@@@@@@@@@@@@@@@@@@@@@

محاسن صابر
.........

اكيد انتى كدا صح وكدا احسن والله

نورتينى واسعدنى تعليقك يا عزيزتى

@@@@@@@@@@@@@@@@@@@@@@@@@@@@@@@@

عاشقه الرومانسيه
.................
منوره المدونه دايما حتى منغير اى تعليقات يا عزيزتى
كدا يبقى انتى بتتمتعى بفراسه كتير منا بيفتقدها
مش دايما بيرجع للخبره لكنها بتكون عامل مساعد كبير جدا فى مثل تلك المواقف بالتأكيد

اسعدنى تعليقك وبيكفينى مرورك حتى منغير تعليق

@@@@@@@@@@@@@@@@@@@@@@@@@@@@@@@@

رابطة هويتى اسلاميه
.................
بأذن الله اقدر اشارك معاكم ربنا كريم
ويوفقكم يا رب وجهد ربنا يباركلكم عليه
أسعدنى مرورك

Maha Shahen يقول...

وميض أبتسامه
............
قول كل اللي يجى فى بالك ومتقلقش الاختلاف فى الأراء لا يفسد للود قضيه

اكيد عندك حق الارواح جنود مجنده

واكتر جزء بجد روعه وعجبنى جدا بتعليقك هو دا

فقد تكون احد الشخصيات مبهمة وغامضة لاى سبب من الاسباب ولكن بمجرد ان تنمحى عنها عناصر الغموض وتصبح بطبيعتها يعود اليها رونقها وتظهر على حقيقتها امام من اساؤ الظن بها من قبل

ربنا يباركلنا فيك ودايما مشارنا بالافكار الرائعه والتعليقات البنائه

نورت المدونه واكيد بيسعدنى مرورك جدا

@@@@@@@@@@@@@@@@@@@@@@@@@@@@@@@@@@

سونه
....

وعليكم السلام ورحمة الله وبركاته

امال لو مكنتيش بتشوفينى كتير يا بكاشه
الموضوع جامد جامد طيب يا رب يكون نال اعجابك
ولا يهمك نقعد سوا ونشوف الموضوع من كل جوانبه واصدعك بالرغى هههههههههه
انتى كمان وحشانى جدا ربنا يوفقك وتخلص امتحاناتك علي خير وترجعى لينا
اصل مش انا اللي مختفيه انتى اللي مشغوله
منورانى دايما يا اجمل كوكى فى عمرى

@@@@@@@@@@@@@@@@@@@@@@@@@@@@@@@@

موناليزا
.........
الله يسلمك يا قمرايه من كل شر
انا بخير والحمدلله
يا رب تكونى انتى كمان بخير وصحه وسعاده
فعلا المثل دا جميل
بس الاجمل منه اننا منوصلش لدرجة العداوه
ونمشى دايما علي المقوله اللي بتقول
احبب حبيبك هونا ما عسى ان يصبح بغيضك يوما ما وابغض عدوك هونا ما عسى ان يصبح حبيبك يوما ما

نورتينى بتعليقك ومرورك الجميل

@@@@@@@@@@@@@@@@@@@@@@@@@@@@@@

بنوته
.....
ولا يهمك طالما الصفه مش فيكى حاولى بس تقربى للناس اكتر وهما من نفسهم هيغيروا الحكم وربنا كريم
والله ربنا يحفظنا مهما حاولنا بيجى وقت وبننخدع احيانا برضوا
محدش يعرف ايه جوه القلب الا ربنا سبحانه وتعالى
نورتينى بتعليقك ومرورك

@@@@@@@@@@@@@@@@@@@@@@@@@@@@@@@@@

يويو
......
انتى وحشانى اكتر يا روح قلب وعيون نور
مش تقلقى هنرجع نرغى وتتلمضى عليا تانى قريب جدا وتعلمينى بقى متنسيش
والا هحرمك من القصب انتى حره بقى ههههههههههههه
مهو لسانك اللي جايبلك الكافيه اللماضه بتطغى ومبيشفوش الرقه
ان كنت انا بعرفك من سنين وانصدمت ان فى رقه اصلا هههههههههههه فما بالك الغرب خلينا ساكتين بدل ما نشرد هنا

دا انتى قمرايه مش عفريته يا قلبي
اعتقد دا طبيعى اننا مش ناخد علي حد بسرعه الا لو تألفت الارواح بقى
والله مش دايما بتدوم اصل ممكن يكون الانطباع الاول هباب خالص هههههههههه
وخلى فى بالك الانطباع الاول يدوم دا مش عليا انا اوكى انا خارج كل حساباتك دى علشان نبقى بنتكلم علي نور بقى هههههههههههه
غامرى فى الشخصيات ولا يهمك يا قلبي هنسميكى أبن فطوطه هههههههههههه
شردينا بقى خلى القصب بعدين اما نشوف هتعلمينى ولا لا
وبعدين ليكى عليا اجبلك غيط قصب ونقعد ناكله سوا ههههههههههه

@@@@@@@@@@@@@@@@@@@@@@@@@@@@@@@@@@

وفاء بركات
..........
تعتقدى كدا يا فوفا ههههههههههه
لالا ولا يهمك محدش هيقول حاجه
او اللي هيقول هيقول فى سره ههههههه
اكيد صعب نرضى كل الناس بس علي الاقل نحاول نفهمهم صح او حتى نقرب منهم

الله يسلمك من كل شر يا رب
تواجدك بيسعدنى اكتر ودايما منوره المدونه بمرورك وتعليقك

@@@@@@@@@@@@@@@@@@@@@@@@@@@@

الطالبه عفو الله
..............
زوزو حياتى انتى وحشانى جدا جدا جدا
الله يكرمك يا قمرتى انتى الاجمل

بالفعل عندك حق طبعا
اه والله بتحصل يا قلبي فعلا وننصدم فيهم
او يمكن نشوفهم بنظره مختلفه تخلينا نحبهم اكتر
بيعجبنى فيكى دايما الأراء المختلفه اللي ليها وقع جميل وخاص فعلا
دايما منوره المدونه ومنوره حياتى يا عيونى

@@@@@@@@@@@@@@@@@@@@@@@@@@@@@@@

ana.kda3
.........
بالفعل والله وعجبنى جدا انا كمان التعليق بتاعه بالذات الجزء دا ودا مش جديد عليه دا اقل شيء عنده
ما شاء الله ربنا يباركلها يا رب
والله انا بختلف معاك صعب المثل دا يطلق على اشياء اخرى لأنه ميطلقش فى رأى الا علي الانسان وتصرفاته وكل ما يخصه
والاختلاف فى الاراء لا يفسد للود قضية عامة
أسعدنى مرورك وتعليقك

@@@@@@@@@@@@@@@@@@@@@@@@@@@@@@

hasona
.......
بالفعل المثل اللي قلته صحيح بدرجه كبيره جدا
عجبانى جدا موقف وفعل ورد فعل دى
ههههههههه الله يكرمك علي الدعوه الجميله دي
دايما منور المدوه بمرورك وتعليقك الجميل

@@@@@@@@@@@@@@@@@@@@@@@@@@@@@@@@@

محمد غاليه
...........
الله يسلمك من كل شر يا محمد يا رب
ربنا يوفقك يا رب وتظهر النتيجه بالتفوق
توقف للأنشغال ليس الا وبأذن الله أرجع ارخم عليكم قريب جدا ههههههههه

@@@@@@@@@@@@@@@@@@@@@@@@@@@@@@@@

lyssandra
.........
اه والله كان موقف محرج ويضحك فى نفس الوقت
التكرار بيعلم الشطار زي ما بيقولوا وانا بحاول ابطل سكوت وربنا كريم

طيب تقابليها بأبتسامه اوكى لكن تستنيها صعب قوى فعلا
هو سهل مش تهتمى والاصح انك مش هيجى فى بالك اصلا انطباعات الناس عنك لأنك بتعامليهم معامله طيبه وخلاص

ههههههههههههه اهو موقف صحبتك دا فعلا يهلك من الضحك
بس شكل دمها خفيف وساعات بتدوب الكوارث دى بأبتسامه وضحكه وخلاص
القلب الطيب مش بيأثر فيه الكلام دا
الاهم اللي وصلنا ليه مش عقبات الطريق الطويله

طبعا محدش يعرف خبايا القلوب الا ربنا سبحانه وتعالى
ربنا يكفينا شر الاصدقاء والاعداء ويكفينا شرور الدنيا والنفوس

لالا مش تعتزرى ولا شيء انا اسعدنى التعليق وكان من اجمل التعليقات وأروعها
يا ريتك دايما تعلقى بصفحات مش ببعض الكلمات وصدقينى مش هنمل ابدا
شكلك حد طيب وجميل ويا رب مكونش بحكم غلط ههههههههههههه
واوعى تزعلى بهزر معاكى بس
دايما منوره المدونه واسعدنى بجد مرورك

@@@@@@@@@@@@@@@@@@@@@@@@@@@@@@@@@

الملاك
.....
وعليكم السلام ورحمة الله وبركاته
القمرايه اللي مختفيه والله وحشانى جدا

بتفق معاكى طبعا فى اول جزئيه

وربنا يحفظك من كل شر يا قلبي يا رب

اكيد طبعا كلامك صح بيعجبنى جدا شيء سمعته بيقول اننا بنحب الانسان لعيوبه ويزيد اعجابنا لمزاياه

دايما منوره المدونه وحياتى ومتغبيش عنا الله يكرمك

Maha Shahen يقول...

نور الدين
..........
بخير والحمدلله
ربنا يصلح ليك الاحوال يا رب يا نور
ربنا يباركلى فيك ولا يحمرنيش من سؤالك عنى
الله يكرمك ميجيش شيء من بعد كتاباتك ذات الطابع الخاص المميز

دايما منور المدونه بمرورك وتعليقك يا رب

@@@@@@@@@@@@@@@@@@@@@@@@@@@@@@

معتز شاهين
.........
حاضر هحاول مرغيش كتير لكن ابطل رغى صعب جدا
لأنى يطول سكوتى فأتكلم كثيرا

همر لمدونة حضرتك وبـأن الله لو اقدر علي شيء مش هتأخر

أسعدنى مرورك وردك علي رغيى

@@@@@@@@@@@@@@@@@@@@@@@@@@@@@@

nisanur
.......

وعليكم السلام ورحمة الله وبركاته

اهلا ومرحبا بيك بمدونتى الصغيره
ودايما بمرورك منوره بيك

@@@@@@@@@@@@@@@@@@@@@@@@@@@@@@@

hasona
.......
اكيد طبعا
بشكرك لمرورك وتعليقك
ومنور المدونه

Unknown يقول...

mv