قصاد عينى

شايفك قصـاد عينى ومش عـارف اقولك إيه

زعــلان ليه احكيلى لـو اتكلمت خسران ايـه

عارفنى هسمعلك وهتحمـل كلامى معــاك

وكأنى برجعلك هكون جنبك واكــون ويـــاك

ولحــد مــا اشوفك بتتبســم مقولـش عتاب

لــو حتى بعديهـا رجـعـنا مــن تانى اغـــراب

انا بس كـــان نفســى اخفف عنك الاحــزان

وان ربى قدرنى تحــس بلحظه واحده امـان 

درس الحياة

الحياة ادتنى درس صبحت بعده حد تانى ..
كل حاجه فى دنيتى كنت بعملها عشانى ..
كنت اضحك كنت اهيف , كنت انا الصوت اللى يخلف 
كنت اسمج م.السماجه , كنت فعلا حاجه تكسف 
ويقولولى امتى تعقل , الحياة مش دايمه لينا
كنت اقول منا بكره اكبر 
اصلى انا لسه صغير
واما حاولو يقومونى 
كنت انا علي طول مخالف
اصلى كنت فاهم وعارف
امشى ومغمض عيونى 
اصلى عمرى ما كنت خايف
عارف ان ورايا أب ورايا أم
مهما كنت ولا عملت 
يتحملو لأنى الاهم
لحد ما العمر سرقنى
وراح أبويا وبعده أمى
فجاءه فوقت وانصدمت
مين بعدهم هيشيل فى همى
مستفدتش م.الدروس
ياما قالو عن النفوس
واتوحلت فى الصفوف
كنت كل ما أتعب اشوف
وافتكر كل الوصايا
هنا أبويا قالى حاسب وأنتبهلى
اوعى يا ابنى تعيشها جاحد أو هلهلى 
خليك وسط
واوعى تمشى فى الغلط
 ( حاضر يا أبويا )
اه صحيح امى قالتلى عامل الناس بالأمانه
بس ليه نسيت تقولى اعمل إيه وقت الخيانه
ياما قالت يا ابنى حاسب اوعى ع.الفقير تدوس
بس ليه نسيت تقولى انى احافظ على الفلوس
ايوه فاكر انتى قولتى اوعى من ضعف النفوس
( حاضر يا أمى )
هبدأ احفظ فى الدروس

مبروك لفاتيما اللى رجعتنا لأيام جميله

اول مره اكتب بفرحه , لآ واكتب وانا مش عارفه هكتب ايه , كنت دايما بفكر ان الواحد يبطل اعترافات وفضفضه نفسيه والمفروض دايما يشارك بشىء مميز شعر , قصه , حاجه تفيد الغير مش مجرد كلام بس , لكن المره دى لأ .. 

أولا ألف مبروك لفاتيما رجوع يوسف ليها .. وسعيده جدا بالتجمع اللى ان شاء الله هيحصل قريب

كل اللى يعرف فاتيما او ميعرفهاش معرفه شخصيه , كل انسان مر بصفحتها ومفهمش القصه , بس حب كلامها , كل انسان حب روحها وطيبتها , كل انسان ليه ذكرى بتجمعه معاها بمجرد ذكر اسمها استعاد وقت طويل فات عليه , رجعنا نفتكر ايام التدوين وزيارتنا لبعض ..

معظمنا ميعرفش بعض , حتى منعرفش اسماء بعض , بنميز بعض بالصفحات , قليل مننا اللى اتواصل بالفيس بوك وكلنا انتقلنا لهناك لكن مش كلنا اتجمعنا , بس جه الوقت اللى يجمعنا ..

وحشونى ناس كتير قوى . هنا اقدر اقول كلمة وحشونى منغير ما نتفهم غلط ^ـــ^ 

اخوات كلنا . مبيفرقش بنا شىء .. مبنفكرش فى السياسه اهم شىء .. فرحتنا صافيه 

ناس حبتهم بجد

فاتيما

شمس النهار

قصاقيص حبيبه ( نور )

شهرزاد 

محمد غاليه

نور الدين محمود ( محمد الجيزاوى )

وميض ابتسامه

فشكول

ساسو كافيه

موناليزا

ممكن

محمد متولى

وفاء بركات

نورهاتى

فارس بلا جواد ( احمد ) 

الفارس الملثم ( رحمة الله عليه )

سارة البحر

بنوته مفروسه

بنت مصريه

كيارا 

كيكى

نونو 

الملاك (حنان )

ذو الوجه المبتسم

الباحث عن الحب ( محمود )

لقاء الاحبه ( روفى هانم )

نهر الحب ( ايناس )

رئيسة حزب الاحلام

غنيم

بطوط حبوب

سونه ( حسناء )

شفقة هانم واحسان بك

 blue wave (عمرو )

اكون او لا اكون ( اميره )

مدينة الملائكه

Blue Nile

وطبعا مدونة زوزو حبيبتى .. الطالبه عفو الله 

وشخصيات أكتر

ناس اول ما اذكرهم الاقى لكل حد فيهم ذكرى ولو كانت كلمه صغيره قالها او موقف او مبارزه فى الخواطر 

ياااااااااه بجد كانت ايام مميزه جدا , لو كتبت ذكرى لكل اسم منهم فعلا مش هيصدقو قد ايه كلمه او موقف ممكن يسعد لسنين

هفكر اعمل بوست جديد قريب فيه ذكرى لكل اسم حبيته واتعاملت معاه , من باب الحنين للماضى اللى ممكن يتحول لمستقبل مبهج 

بيعرفونى لما بفرح

بيعرفونى لما بفرح .. يتجاهلو الدمع فى عنيا
تصرفات كتير بتجرح .. واوقات بقول دا فاض بيا
فى ناس ميهمهاش زعلك .. دول مش صحاب تبكى عليهم
وناس يهمها إنك .. تعيش سعيد وقريب ليهم
شوف لو تغيب مين يشعر بيك .. غير ناس حياتها فى وجودك
ومين لما ترجع يجرى عليك .. قال يعنى فرحان بصمودك
طب كنت فين وانا بتألم .. ممدتش ايدك ليا ليه
وجاى بتجرى وتسلم .. منتش صاحب افرح بيه
فى الفرح هجمع احبابى .. يستاهلو منى الاهتمام
اما اللى كدبو وقالو اصحابى .. ملهمش عندى غير سلام

لأنى احبك

اجتزت آلاف الأميال , وكتبت مئات القصائد , وبعثت إليك عشرات الرسائل تذف لك بشرى قدومى , وحين صرت امامك , عجزت أن انطق كلمه من أربعة حروف ..

أحبك