2008/10/20

زهقان..طهقان..متضايق



مش هقول كالعاده حاله من الأحباط صايبه المدونين ...لا
ناس من المدونين انقلبوا منافقين وزي ما بنقول عندنا في مصر ( كدابين زفه )

اللي معانا نهلل ليه واللي يفوتنا نلعن فيه
واللى بيكتب كلمه جميله نزهقه ونقضى عليه

المواضيع المهمه أصبحت تهمل لأن معليهاش تعليقات كتيره والمواضيع الغير مهمه نتهافت علي التعليق فيها
صحيح أن الانسان لما بيكون متضايق بيدور علي شيء يخرجه من شعوره بالأحباط ويقول هتفرج علي شيء كوميدى او أقرا شيء خفيف يرجعلى بسمتى من تانى يمكن أقدر أكمل
لكن مش كدا أبدا
انا دخلت للعالم دا وحبيته لأنه مكنش فى نفاق , عالم بسيط , غنى بالأفكار

أعتقدت ان كل انسان بيعلق , بيكتب تعليقه على اساس ان الموضوع عجبه او في الموضوع فكره حابب يناقشها

واتضحلى انى كنت مخدوعه في بريق العالم دا

والبريق خلانى اغمض عيونى فمقدرتش اشوف شكله كويس

لكن كل ما بنقرب للشيء ونبتعد عن وهج البريق والأنوار بنشوفه بعين تانيه
وانا شوفت العالم دا بعين ممكن تخلينى أكرهه واسيبه

يا جماعه ببساطه عايزه أقول يلا نبطل نفاق بقى في بعض

اللي عجباه الفكره او الموضوع ببساطه يقول كويس واللي مش عاجبه يقول وحش وأستمر يمكن تكتب شيء أحسن
نبطل ندخل علشان نقول كلام مجاملات مهما كانت بلاغته , فى النهايه ما هو الا كلام مبالغ فيه
وكل مدون بيشعر مين بينافقه ومين بيكلمه من القلب

انا مش بهاجم علي فكره الناس اللي بتكتب شيء بيدعو للابتسامه لا
لأنى بحاول اعمل زيهم واكتب شيء كويس يمكن مش متمكنه قوى من البلاغه لكنى بحاول ومبيأسش

أخر شيء هقولهولكم انا عن نفسى بطالب أى حد يعلق عندى يقولى رأيه بصراحه او يكتفى بمروره الكريم دون تعليق

ووالله وقسماً أحاسب عليه كل مدونه دخلتها وبحب ادخلها مش هتوقف عن زيارتها حتى لو صاحبها او صحبتها مدخلوش عندى أبدا

انا بس كان نفسى أسمع كتير من الناس كلامى دا
لأنى بجد مش عايزه أكره شيء حبيته لأن بعض الناس مش مقدره قيمته
يمكن النفاق من بعض الأسباب اللي بتزهق المدونين وتخليهم يقفلوا ابواب مدوناتهم
اللي ينافق ممكن يكون شخص جديد عايز يعلن عن مدونته لكن فى ناس أكبر من كدا مدونتها معروفه جدا طب بتعمل كدا ليه

كلمه أخيره أرجوكم راعو اللي بتكتبوه ومتعلقوش غير علي شيء حبتوه أو هتنقشوه ونبطل منفاقه او مجامله حتى
______________ وأدى البوست الجديد ____________

معقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

مع خالص أسفى وأعتذارى .... نـــــــــــور .....

هناك 44 تعليقًا:

كـــيــــــــارا يقول...

أصرخ في صمتك واتحمل .. ابعد يا قلبي اوعي تكمل

--------

بجد كلمه قاسيه اووووووووي وجعتني بجد

------

اما بالنسبه للكلام اللي في اول البوست
ففي وثيقه للتدوين هنعملها وانا هنزلها عندي بعد شويه اكون نثقتها ودي هتكون لكل المدونين

تحيااتي

Radwa يقول...


نور
كلامك جميل ومعقول
بس انا لازم اوضح لك حاجه
ان الكلام الصادق انتى اكيد بتحسيه وبتعرفه ان كان صاحبه دا فعلا حاسس بقيمة الحاجه اللى انت كاتباتها ولا لأ بس دا لا يمكنع ان موضوع النفاق بيضايق بس عادى كبرى دماغك واللى عاجبه عاجبه واللى مش عاجبه فركش
الأهم من دا كله
ان مهما كان نوع التعليق لازم تكونى واثقة فى فكرتك وكلمتك وموضونك ورسالتك
هو دا الفيصل
..........................
سندريلا

الرومـيصاء يقول...

السلام عليكم
عارفه عالم التدوين ده لو مفهوش نفاق
يسلام يبقى عالم شفاف جدااا
لان كل واحد هيكتب الى جواه بصدق
وهيعلقوا عليه برده بصدق
كلماتك معبره
مع انى بفضل الكتابه بالغه العربيه احسها مؤثره اكتر
ادينى قولت رأئى بصراحه هع
دمتى فى حفظ الله حبيبتى

ghoneem يقول...

اهلا بيكي

أخبارك ايه يارب تكوني بخير وبصحة وفي أفضل حال ياااااااااااارب انت وكل أحبابك

نخش ف الموضوع
ايه القرف اللي انت كاتباه ده
ايه يا نور مكنش العشم والله يبقي ده رأيك ف الاخوة والاخوات المدونين
أخرتها يطلعو منافقين
:)
:)
لا بجد انا متفاجأ من رأيك وتعليقك
وطبعا أكيد يعني أنا بهزر
ههههههههه

بجد كلامك مظبوط وأنا اوافقك ف كل كلمة بتقوليها وانا عشان مش بحب النفاق محدد الناس اللي بحترم كتاباتهم وآرائهم بنتظر تعليقاتهم وبنتظر كتاباتهم وبكتفي بيهم والحمد لله مش مهم العدد علي قدر ما يهمني تأثير كلامي وتأثري بتعليق الزوار ووصول الفائدة

أنا بجد معجب جدا بركلامك وممكن تحددي الزوار اللي يعلقو عندك أو تعملي مراجعة للتعليقات قبل ما تنشريها والتعليق اللي تحسي انه غير مفيد لا تضيفيه أو تكتفي بتعليق بسيط عليه

الحلول كتير والمهم انك بخير الحمد لله وبلاش تبقي طهقان زهقان متضايق

أما الشعر اللي انت كاتباه فبجد مفاجأة جامدة وياسلام لو كنتي كتبتيه بدري شوية قبل ألبوم محمد محيي ما ينزل كنا ضيفنا الكلمات دي للألبوم بتاعه
مش عارف حسيت ليه انها عايز صوت محيي يغنيها
:):)
دعواتي ليكي بالتوفيق والي الأمام دوما ان شاء الله

دمتي بخير وكل تقديري لمدونتك وأشكرك جدا جدا لتعليقك ومرورك المتميز

تحياتي

بالتوفيق................

mohamed ghalia يقول...

عندك حق فى كل كلامك لازم الكلام يخرج من القلب ميكنش مجاملة
ما خرج من القلب يصل إلى القلب
وفعلا أحيانا بتكون مجاملات متجاوز فيها.
بس أنا عايز اقول لحضرتك حاجة أحيانا بيكون الموضوع كويس قوى وشامل كل حاجة أو الأبيات الشعرية رقيقة وجميلة قوى
فمش بلاقى كلام أقوله بس الكلام أو الموضوع عاجبنى جدااااااا
فبنظر نكتب كلمات تدل على الإعجاب لكن مبيكنش فى تعليق على الموضوع مجدى.
معقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

كلماتك رائعة تقبلى تحياتى دمتى بود
اشهد الله انى ازور مدونتك لأنى معجب بها جدا وحتى ولو لم تعلقى عندى
دمتى بود
دمتى فى سعادة

romansy يقول...

ممكن اعرف ايه اللى حصل لدا كله
زى كل حاجه فى الدنيا فيها الكويس وفيها الوحش
اكيد برضه هتلاقى دا ودا
بس اقولك
خلى احساسك يحكم على اللى بيعلق عندك
وبعدين انا بشكر كل اللى ضايقوك
لسبب انك كتبتى الكلام الجميل دا

Ahmed Mohamed يقول...

طب ما تيجي نقولها بصراحه
انا هستفيد ايه لما انافق حضرتك
واقولك الله ينور ومفيش احسن من كده
غير اني عايزك تيجي عندي وتعلق والتعليقات,
او عشان انا امــعــه ومليش رأي
والناس تقول يمين اروح يمين يقولو شمال اروح شمال
حاجه تالته عانيت منهاشخصيا
اني لما بقول رأي وبصراحه وبدون نفاق بدون تجريح واعارض
اتهم(بالضمه)بالجهل والغباء
يعني لازم اقولك (آمين) عشان ابقي محترم في نظر سيدتك لاء انا مش كده وعمري ما هبقي كده انا مشكلتي الحقيقيه اني بشوف الدنيا ابض واسود
وده بيتعب جداا في عالم ارتوي من النفاق كما يرتوي من كان في مهده

Ahmed Mohamed يقول...

عارفه حضرتك
اسلوب الكلمات جميله عشان احساسها داخلي
بمعني الي حسيته انها كانت
حوار بين القلب والقلب او العقل والقلب بين الرفض والقبول
متميزه وجميله

Unknown يقول...

سلمت اناملك وسلم رايك فى اول البوست

بالنسبه للنفاق وما يدور فى عالم التدوين .. كنت متابعا جيدا لعالم التدوين منذ فترة طويلة ولطننى اصطدمت بعد فترة بالكم الهائل من اللاموضوع والكم الهائل من مرحبا بالنفاق ولكن الاخ مجنون وغيره من الاعضاء الجميلة قامت بوضع اسس يجب السير عليها وان شاء الله يوفق الجميع

اما بالنسبة ببوست الخاص بك
احييك بشدة على كل حرف
لكن لى تعليق بسيط فى اول البوست بحق كنتى رائعه مع القافيه ولكن ما طول البوست لحد ما شعرت بالتواء حقيقى اسقط الحس السمعى لها عند القراءة

بمعنى ( ان البوست كان ماشى كويس جدا مع القافيه وباحساس منفرد ) وجيتى فى النص وحسيت انك عشان تجيبى قافيه وقع منك شوية ورجعتى ليه تانى باسلوب بحسدك عليه )
انا بكلمك من صلب دراستى الادبية
وياريت متتضايقيش

اما عن احساسك فى البوست
انتى وبحق انسانه جميله امتلكت العديد من المشاعر التى عبرت بطريقة مباشرة عما يدور داخلها من انكار وغضب رغم الحزن الذى توج كلماتك

لك منى كامل الاحترام
و :)

من بعيد .. بكتبلك

Empress appy يقول...

متقريش غير اللى انتى عاوزاه انا عن نفسى بعلق عند ناس مبتجيش عندى وعارفه ان فيه ناس بتقرى ليه زى ما بقرا ليه وببقى متفاجأه انهم بيقروا ليه ويناقشونى لما نتقابل
صدقينى لو هتقرى لتلاته اربعه وتستفيدى اكتر من الف
وخليكى قويه قويه مش قولنا كلنا برعى ههههه

شمس النهار يقول...

كلام جميل
بس ليه مسوداها
فتحي لونها شويه
في فرق بين النفاق والمجامله
هنافق يعض ليه مافيش سبب اعتقد كده
وبعدين انا ممكن انقد بكلام جميل مش لازم انقد بطريقه مش لطيفه فيها هجوم عشان اكون صادقه في النقد
ممكن اوصل اللي عيزاه بلطف
الكلمه الطيبه صدقه
وبعدين لما ادخل مدونه واجد ان الموضوع لايعنيني
يجب ان القي التحيه علي من فتح لي بيته ادخله وقت مااشاء
اترك شكرا وكلمه طيبه غالبا ماتكون دعاء لصاحب المدونه
وكمان كفايه انه اقطتع من وقته ليكتب الموضوع
اما الناس اللي بلاقي تجاوز في كلامهم من الفاظ غريبه علي الاذن مابدخلش مدونتهم مره اخري والا اترك اي اثر اني دخلت عندهم اصلا

rovy يقول...

ازيك يانور

انتى فعلا عندك حق و ساعات كمان باحس من تعليق احد المدونين عندى انه لم يكلف خاطره بقرأة البوست و انه بيثبت وجوده و خلاص ..
اتمنى فعلا اننا نفهم ان تعليقنا ده مسؤليه و اننا بالكلمه الطيبه ممكن نوصل وجهة نظرنا و احساسنا لكن المهم بدون نفاق ..

اما عن كلماتك فهى حقا معبره بشده عن احساس و مشاعر صادقه ..
بجد عجبتنى و حلوه فعلا .. ربنا يوفقك

عاوزه اشكرك لاحساسك بأنك تعرفينى.. مين عارف ..
بس بجد الارواح المتشابهه دايما بتتلاقى وده اكثر شىءعجبنى فى التدوين انى حسيت بناس عمرى ما شفتهم و لا كلمتهم لكنى حسيت و كأنى اعرفهم و عاشرتهم وده لأن ارواحنا متشابهه ..
دمتى حبيبتى بالف خير ون شاء الله نتقابل فى يوم قريب على الخير ..

تحياتى

فارس بلا جواد يقول...

بصراحة يا نور المقدمة اللي في الأول شدتني أكتر من البوست
في اجابتي علي التاج الأخير انتقدت بعض الناس اللي بتدخل تبالغ في المدح وتنافق حتي لو كان الموضوع عادي ومش مستاهل كل الكلام ده .. و فاكر ساعتها في تعليقك قولتيلي بلاش تهتم بيهم .. وانا باكرر نفس الكلام ليكي
أي شخص عاقل وعنده قدره علي التمييز بيعرف يفرق بين الكلام الحقيقي اللي من القلب وكلام المجاملات .. عشان كده ساعات الاقي تعليق يوصلني مليان كلام جامد وكله مدح لكن باحس انه مش كلام حقيقي ولا من قلبه عشان كده بيكون ردي عليه مجرد شكر .. لكن باكون سعيد أكتر باللي يناقشني أو اللي يقول رأيه بصدق اذا كان الموضوع عجبه بلا أي مجاملات
أما بالنسبة للبوست فهو كشعر جيد من حيث الفكرة والأوزان لكن بصراحة انا مفيش عمار بيني وبين العامية لكن باقدر اميز الجيد من الردئ ومازلت عند رأيي اللي قولته قبل كده انك فعلا عندك موهبة كتابة الشعر بس مش مديها الفرصة بصورة اكبر
تحياتي

غير معرف يقول...

http://nomercy89.blogspot.com/
اتمنى زيارتى هنا

فارس بلا جواد

أكون أو لا أكون يقول...

نور الحبيبه... معاك حق... بس مش يمكن يكونوا مش بينافقوا... مش يمكن الكلام عاجبهم بجد؟ ههههههههههه

يله ماعلينا...

كلام جميل اللي كاتباه... هههههههههه مش مجامله والله ... كده بس بتشككي فينا...!!! هههههههههههههههه

*متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش*
البيتين دول معبرين... جداً... يعني صحيح أحيانا بنفهم غلط... وبنبني أحلام وهميه... ههههههههههههه
لأأأأأأأأأأأأ ستوووووب ...كده حتخلينا نتسرسح في الكلام من غير من حس... هههههههه...

تسلمس يانور على البوست...

اقصوصه يقول...

كلماتك جميله

حبيت اسجل اعجابي:)

*الطالبة عفو الله *زوزو يقول...

اولا و قبل كل شيء
وحشاااااني وحشاااااني وحشااااني اوي
ازيك يا قلبي احنا مبقناش نحصلك خالص لازم ناخذ موعد مع حضرتك عشان نقدر نكلمك
و بعدين مالك يا قلبي انا حسيت انك مش على بعضك من اخر مرة كلمتك فيها
يا قلبي مفيش حاجة تستاهل و الله
ومش كل شيء جميل دي الحياة

نجي بقى للبوست الاولاني
ان كان دة الي مزعلك فالله المستعان هو فعلا حاجة تحرق الدم
بجد عالم التدوين دة جميل اوي اوي بس في ناس بتفقدله جماله و رونقه
انا بضم صوتي لصوتك و اقول للناس
بلاش المجاملات و التعليق الي ملوش لازمة
احنا بنحط البوستات عشان تتقري و الناس تستفاد منها مش عشان نجمع نسبة كبيرة من التعليقات
متفكريش يا قلبي انك تسيبي العالم دة
نص الناس الي سبتو اتوقع كان دة سبب رئيسي لانسحابهم فيعني لو هما انسحبو وجينا احنا و نسحبنا حنسيب عالم التدوين لمين للمنافقين زي مسمتيهم
لا يا قلبي احنا دخلنا العالم دة و دخلناه عن حب و اعجاب فلو شفنا شيء معجبناش فيه نحاول نغيرو مش نسيبو

ومتزعليش نفسك يا قلبي في ناس بتحبك و بتابعك و بتقرالك و بتناقش افكارك حليك معاهم و سيبك من الثانيين
انتي نور عالم التدوين انتي قمره يا فلبي

بجد بجد يا قلبي بشكرك اوي على اهتمامك بعالم التدوين و غيرتك عليه

نجي بقى للبوست الثاني

شعورر صعب اوي اوي الي بتتكلمي عليه يا قلبي

متقولش خاين .. كل الحكايه انك يا قلبي مفهمتهوش

ااااااه كم هو صعب على الانسان انه يكون ماشي في طريق و فاكر انها هي الطريق الصح و بعدين يتصدم انه ماشي في طريق غلط اساسا
شعور صعب فعلا

حظك يا قلبي مشيت طريق متكملوش .. متكملوش

الطريق و طلع غلط الحياة مش حتتوقف الي لازم يتعمل انك متكملش الطريق و تدور على مخرج منها تلاقي فيه النور من جديد

ربنا يبارك فيك يا قلبي
و ربنا ميحرمنيش منك يا نور عيني
جوتاااااموووو

SHAPE YOUR LIFE (ABOALI) يقول...

دع الارض تمشى كما تشاء
فما لا ينفع الناس
يذهب جفاء
لا تشغل به بالك
فمهما قولت فهو غثاء
ارفع رايات قلمك
وقل ما تشاء
فهناك الرقيب هو يراك
حيث يشاء
دع الارض تمشى كما تشاء
فهناك من قال
نون والقلم وما يسطرون
فاءن سطرت خير
فالنور يسعى اليك اين تشاء
وان سطرت شرا
فنهاك من تلتهمك بدون رجاء
صاحب من شئت
وجامل من شئت
فهناك من يعلم السر واخفى
يعلم ما تسره النفس فى الخفاء
دع الارض تمشى كما تشاء


تحياتى واشكر لك كلماتك وصدقها

موناليزا يقول...

مابقولش قلبك باعنى ليه مابقولش ليه خدعتنى بقول لقلبى روحت ليه لقلب عمره ماحبنى
***************
مقدرش اقول احساسى كان لعبة فى ايديه عشان احساسى هو اللى كان هيموت عليه
**********
تذكرت هذه الكلمات حينما قرات كلماتك فالحالة تقريبا واحدة(حب من طرف واحد)

اما عن كلامك عن النفاق فانا متفقة معكى جدا

شهرزاد يقول...

نور الجميلة
أرى أنك بدأت تعطين للتفكير والنقاش مساحة اكبر في مدونتك وأنك بدأت تقتربين كثيرا لتطبيق أسم المدونة تعالو نفكر سوا
النفاق موجود في كل مكان.. والتدوين هو صورة مصغرة للواقع ..
فلا تستغربي من وجود نفاق أو أن من يعلق لا يكون صادقا جدا فيما يقول أو انه يجامل اكثر من اللزوم..
ولا يكون ذلك سببا لتركك التدوين طالما أنك صادقة وتنقلين فكرك بمصداقية فلا يهمك من ينافق..
وبالنسبة للبوست جميل جدا
وأظنك موهوبة في كتابة الخواطر العامية
أرجو لك التوفيق داااائما
وتقبلي تحياتي واحترامي

الملاك يقول...

السلام عليكم ورحمة الله وبركاته
أختى وحبيبتى فى الله نور اتمنى من الله ان تكونى فى افضل حال

نور انا معاكى فى رايك جدا على الرغم من انى أنظر لاى موضوع بنظره يمكن تختلف عنكم نوعا ما لانى لست على درايه كافيه بالنواحى الادبيه والفنيه للكتابة مثلكم لذلك تعود ان احكم على اى شئ أقراءه من خلال الرسالة التى يريد صاحبها ايصالها الينا وقيمتها الانسانيه بغض النظر عن قيمتها من الناحيه الادبيه والفنيه يعنى تعود ان ابحث فيما أقراءه عن اى جمله او حتى كلمة يمكن ان تغير شئ داخلنا الى الافضل فاوضحها وابرزها لنفسى اولا من خلال تعليقى ويمكن ده برده سبب انى لا اشعر بنفاق احد وان قصده لكن عموما النفاق ان استخدم فى اى مكان او على اى مستوى فهو وسيبقى صفه مذمومه حفظنا الله جميعامنها واصلح قلوبنا
اختى احب احييك على كل كلمة كتبتها يدك فى هذا الموضوع بارك الله فيك وجزاكى كل الخير وازال همك

--------------
اما البوست فبجد رائع جدا من غير نفاق هههههههه
بجد فيه معانى جميلة قوى

متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش


بجد انا بحب الى بيفكروا بالطريقه دى لانها طريقتى المفضله فى الحكم على كل ما يحدث حولى

تقبلى فائق احترامى وتقديرى واعتذارى على التاخير
دمتى برعاية الله

نـــــور يقول...

ازييييييييييك يانور
وحشتينى
اسكتى مش انا رجعت؟:)
انا قريت بوستك ف فتره غيابى
وكنت هموت واعلق
الظاهره دى بقت جباره يانور
وافقدت التدوين طعمه على رايك
انا متفقه معاكى ف حكياه الناس اللى بحبهم هفضل ازورهم دى لحتى لو مش زارونى

بس ياريت كل الناس تفكر كده
اصل تعليق زياده مجامله او مبالغ فيه لا هيقدم ولا ياخر
احنا مش بنعد عدد احنا بنعد قيمه
وبالمجاملات القيمه ضاعت خلاص

وبتكتبى شعر كمان
قشطه يانور
د انا هغيب عل طول علشان تبدعى كده
تسلم ايدك والله ده احلى من صنيه بطاطس بالفراخ :))

تسلمى دايما

mohamed ghalia يقول...

نور(مها)
نسيت أقول إنى بجد صعب قوى عالم التدوين يسيطر عليه النفاق والمجاملات
لانى التدوين ده أكتر حاجة بنطلع همومنا وأفكارنا فيها بقى لينا أصدقاء وأحباب سبحان الله من غير منعرفهم بس حبناهم لمجرد إننا قرأنا كلمتهم وقرأنا شخصيتهم من كللامهم
صعب قوى يجى الحب ده عن طريق المجاملات
إحنا بنشتكى من الصداقة الواقعية بإنها بقة معظمها صداقة مصالح
هنيجى نحول التدوين وحبنا ليه إلى مجاملات عشان يبقى عندنا تعليقات كتير
يبقى لا
إلى كلامى عاجبه أهلا وسهلا وإلى مش عاجبه برده أهلا وسهلا
ولو حسيت إنى فى يوم بكتب مش كويس والكل مش عاجبة كلامى هتوقف عن التدوين ولكنى لن أتوقف عن الكتابة
فهيا حريتى الشخصية.
موضوعك مهم قوى ياريت الناس كلها تقرأه.
تحياتى
دمتى بود أختى

Tamer Alhosiny يقول...

عزيزتي نور
للاسف في كلامك جزء كبير قوي من الحقيقة
وانا اقصد بكدة الكلام الاي قبل البوست
بس انا لية جهة نظر مختلفة معاكي شوية

هو ايه الهدف من التدوين اصلا
اننا نعمل موضوعات تعجب الناس او فيها بلاغة
احنا مش ادباء
ومش بنبيع افكارنا علي صفحات جرائد وعايزنها تتوزع

انا شايف الهدف من التدوين من وجهة نظري
هو وسيلة من وسائل التحاور مع الذات
من وسائل التعبير عن الذات
فانا اعبر ن ذاتي دون الالتفات
لتعليقات الناس واقصد بعدم الالتفات ان التعليقات اي كانت
فيها تشجيع فيها مجاملة فيها نقاش جاد فيها نفاق
لا تهمني في شيء لانها مش سبب البوست
سبب البوست مش الناس الاي بتقرئه
الفكر الاي بيعبر عنه

اطكتبي الاي جواكي باي اسلاوب مش مهم البلاغة ومش مهم انك تداركي الاخطاء
ومش مهم الناس تجامل او تقول كلام مخالف او موافق
المهم انك طلعتي الاي جواكي

وصدقيني انا بستمتع جدا لما بقراء من الناس الاي بتكتب من نفسها ومش من الاي حواليها

اما عن البوست نفسه الاي شايف انه اتظلم قوي انه اتحط مع الكلام ده
فانا سارد عليه بشكل منفصل وفي وقت اخر لكي اكون خرجت من تاثير الكلام الاي قبله

تحياتي
تامر الحسيني
انسان عاشق حر

حـــــ الــجــنــة ـــــور يقول...

السلام عليكم
بجد وحشاني ياقمر وزعلانه إني مش بفضى علشان أشوفك اليومين دول
إنت عارفه إنك السبب في دخولي لعالم التدوين و أنا جد سعيده بوجود شخص متلك في هذا العالم إلي أنا بحسو بيتي الثاني وصدقيني لو قلتلك أني ببعد على قد ما أقدر على المجاملات ولو إي بوست عاجبني تلاقي كلامي صريح وواضح ولو في مدونات كلامها فاضي فتلاقيني بخرج من سكات وربك كريم وأنا قسمت مع باقي المدونين على وثيقة التدوين وتكوين اسره تحكمها الفائده
بوستك الجديد وحش ودي مجامله ههههه
بهزر يا قلبي جميل إن الإنسان في العلاقات العاطفيه ما يجعلش الطرف التاني شماعه يعلق أخطائو عليها ويلا كل عاشق فشل في تجربتو يعرف إن ممكن يكون السبب الرئيسي الإختيار الغلط للشريك
كل سنه وإنتي بصحه وخير
سلام ياقمرتي وربنا معاكي
تقبلي خالص حبي وودي

PrInCeSS BeRy يقول...

وااااااااااااااااو بجد مش عارفة اقول اية كلامك جميل اوى وصادق واحساسك رائع

اما عن الانتقاض اللى اتكلمت فية رايك وبجد بحترمة وفعلا لازم نحس علشان نقدر نعبر

Tamer Alhosiny يقول...

للاسف اوقات بنبتدي طريق جديد في حياتنا
ونبقي عاجزين اننا نكمله
ايوة دي حقيقة صجيج الطبيعي ان كل قصة حب تكمل وتبقي سعيدة
ويبقي الارتباط ثمرتها
لكن احيانا الظروف بتبقي ضد انك تكمل طريقك ده
دي حقيقه انا نفسي عشتها في حياتي
مش معني انك تحب بجد انك تقدر تكمل لطريقك لان في قوة اعلي منك ومن كل شيء
هو قدر ربنا سبحانه وتعالي
اوقات بتلاقي نفسك ماشي في طريق وشايف فيه شخص اتمنيته شريك ليك
مع حد تاني غيرك
او حتي قاعد بيتالم لفراقك
منغير متقدر تعمل حاجة
هتعمل ايه
انا كلامي مش يعني ان الانسان يستسلم
ابدا
الانسان الاي بيحب حاجة بقوة لازم يحاول وياجهد لاجل الحاجة دي
بس المهم يحارب مين
قدر ربنا لا طبعا
لازم يرضي بقضاء الله ويشكر ربنا واكيد ربنا هيعوضه بالحب تاني وحب اجمل واقوي من الاي فات
وهي دي الحياة
وهو ده الانسان

تحياتي
تامر الحسيني
انسان عاشق حر

انسان وبس ! يقول...

ازيك يا نور
انا مقصر معاكى انا عارف
بوست فاتنى مقرتوش معلش .....هبقى اقراه باذن الله
موافقك فى كلامك ...وانا عن نفسلا لما بشوف حاجه مش عاجبانى بوست مثلا بقول ملاحظاتى او اسكت ومتكلمش ...وانا مبعرفش اسكت
او مرحش المدونه دى تانى

حظك يا قلبي مشيت طريق متكملوش .. متكملوش

هييييييييييييييييييه = بتنهد يعنى

مين يفهم معنى الكلام ده ؟

أصرخ في صمتك واتحمل .. ابعد يا قلبي اوعي تكمل

صعب اوى يا مها والله بس هنعمل ايه ..

- انا استغربت انى مجتش عندك لتانى بوست ...ازاى ده حصل ...على حسن غفله منى بجدز.انا اسف ليا انى مجتش وفاتنى بوست

yoyo يقول...

توء توء وبتقولى عليا انا شريرة يا نور د ا انا ملاك وانت اللى شريرة هههههههههه بالراحة كدا يا ريس اعصابك ههههههههه
انا معاكى والله فى كل كلمة قولتيها فى ناس على طول الخط معاهم معاهم عليهم عليهم مع احترامى للجميع هو لو حد انتقدنى وطالب منى انى اصلح شىء معين ارفض النقد دا يعنى هو لازم على طول الخط تهليل وتصفيق حار هو مين فين كامل يعنى المفروض ان دا الهدف اننا نفيد و نستفيد من بعض مش كاننا قاعدين هاى شلة باى شلة وخلاص

هو المشكلة ان كدابين الزفة موجودين فى كل مجال وكل مكان يااحبيبتى مش بس على المدونات المشكلة انك لو قلتى رايك بصراحة تلاقى هجوم عليك وخلاص انت بقى وحشة وشريرة ومن اعداء النجاح وتبقى ولو ابو لهب وشوية شوية يبقوا هيقيموا الحد عليكى
و الله انا عن نفسى فى مدونات بحبها و بعلق فيها مش لهدف رد الزيارة وخالص حتى لو اصحاب المدونات مش منتظمة عندى بس حب الشىء مش بيتمحى

تعالى بقى للبوست :
آه يا قلبى بجد يا نوارة كلماتك وجعت قلبى اوى اوى
صعب الحب من طرف واحد انك تعيشى فى دنيا وعالم كل حب ومشاعر رقيقة وفجاة تلاقى كل دا بيتحطم على ارض الواقع عشان قلب حبيبك مش ليك بس لوحدة تانية ورغم الجرح والالم الا انك حتى مش عاوزة تلومى عليه ولو بجزء بسيط الله عليك بجد

بس معليش سؤال يا نور هو الاخ نظره ضعيف ولا حاجة لو كدا يعمل نظارة ؟؟هههههههههههه

معليش بقى طولت عليك اه صحيح البيت بيتى بقى هههههههه وحشانى جدا جدا يارب تكونى بالف خير
تحياتى
يويو

نور الدين (محمد الجيزاوى) يقول...

عزيزتى نور اهلا بك
...........

موضوعك جيد جدا وواقعى ( أهوة أولها نفاق)

شوفى ياستى
أنا شخصيا أكثر الاراء التى يكون ردى عليها مطولا هى تلك الاراء التى تعمل على تحليل كلماتى سواءا بالموافقة او الرفض
اما المديح فلا اجد الا ان اقول اشكرك على ثنائك ومرورك وتحياتى
لان المديح بغير تحليل يكون قتلا للحوار
وليس معنى النقد ان يكون دائما رفضا فلا بأس ان يعجب احدهم رأى الاخر لكن يقول اعجبنى كذا وكذا لجل كذا وكذا
..

لكن الغالبية الساحقة لا تقرا النص بشكل جيد او ربما لاتقراه اصلا وتلقى حزمة من التهانى وتمضى

وهذا لن عالم التدوين مثله مثل كل شيء يحوى الغث والسمين

موضوعك هام لكل صاحب مدونة يبحث عن الابداع بحق اما من يبحث عن عدد التعليقات فتأكدى انهم هيزعلوا جدا

ااقولك على سر لو تلاحظى هتلاقينى من اقل الناس تعليقا بالمدونات لاننى وبكل صراحة لا اعلق الا على من يكتب بشكل جيد واذا لم يعجبنى لا ارهق اصابعى بالكتابة لمدح لا اعتقده
واذا رايت شيئا شاذا لا اتردد فى النقد
لكن لفت نظرى ان اكثر من مدون يحذفون تعليقى لمجرد انى نقدتهم نقدا صريحا بغير تجريح

المهم انت اخبارك ايه

تحياتى
نور الدين محمود

ahmed_k يقول...

السلام عليكم ,إزيك يا نور
بالنسبه للفقره اللي قبل البوست
أتفق معاكي فيها تماما
وقد تم الإشاره ليها في وثيقة عالم التدوين
ونسأل الله الثبات
وعلى فكره يانور أنا مدونتي الرئيسيه دردشة عربي

أشوف البوست وأرجع بإذن الله

ahmed_k يقول...

جميله الكلمات يانور
وتعبر عن واقع بالفعل (مش مجامله والله)
بس فعلا بيحصل أننا بنفسر كلام الطرف
الآخر على محمل غير حقيقته
مش بس في حالة الحب
ولكن في الكره أيضا
فقد أفسر من أسلوب وكلام شخص ما أنه
يكرهني ولكن العكس هو الصحيح

دمتي بكل خير

بنت مصريه يقول...

هههههههههههههههههه
والله انت عسل يا نور
بس عايزه اخد رأيك ف حاجه

واحد تعب فى بوست معين
وليكن شعر
وحاطه عالمدونه وهناك مكان للتعليقات

يقوم جى واحد يعلق ميعجبوش الشعر
يقوم كاتب ف تعليقه
ومين قال اصلا ان دا شعر دا عمره ما يبقى شعر انا دارس موسيقه الشعر
مش كده خالص
للاسف بوستك فى منتهى ال.........

التعليق دا جالى مره ومن واحد معروف فى التدوين
بس على بوستين

اوكى مش عاجبك انقد بس هذا ليس نقد
النقد هو النقد البناء مش معنى ان اقول لواحد تعبان ف بوست او تعبان ف حاجه انت مبتفهمش حاجه يبقى انا كده بنقضه

لو عايز انقد اقول رأيى بدون هجوم
يعنى اقول مثلا
المنطقه دى وقعت منك القافيه
لو الحته دى تبقى احسن لو اتقالت بالطريقه الفلانيه

هديكى مثال حلو قوى يا نور
واحده صاحبتك طلبت منك تخرجى معاها عشان تاخد رأيك ف جيبه هتشتريها
وهى بتاخد رأيك تقولى رأيك بصراحه
لانها ما اشتريتهاش

لكن لو اشتريتها
ولبستها وجت قالتلك ايه رايك فيها
هل ممكن عشان ما تنفقيهاش تقوليلها ايه القرف دا .......على فكره لو قولتلها جميله او حلوه بس لو كانت
لون تانى تبقى احلى مثلا
كده يعنى هى خلاص ادبست واشتريتها مش لازم اقرفها ف عيشيتها يعنى هههههه

الشعر بتاعك حلو قوى من غير نفاق ولا مجامله على فكره هههههه
اتمنى تنورينى يا نور

blue-wave يقول...

اولا
متفق معاكى تماما وبضم صوتى لصوتك فى البعد عن تعليقات المجامله وان كانت مطلوبه شئ ما
ثانبا البوست بقى
بجد والله روعه يا نور
مشاعر واحاسيس وثورة داخليه مكبوته خرجت على الورق
ثالثا ودى الأهم
بعتذر عن الغياب
وبلومك على المقاطعه
تحياتى

Maha Shahen يقول...

بعتذر جدا لجميع من شارك بتعليق او قراءه لهذا الموضوع
ومقدره جدا كل آرائكم دى وبشكر كتير جدا اللى أبدى اعجاب بكلمات الخواطر
لكنى مش هقدر أرد على كل فرد الا بالتعليق الوحيد دا
خالص تحياتى وتقديرى ل

كيارا
سندريلا
الروميصاء
غنيم
محمد غاليه
رومانسى
أحمد علام
البحث عن أنا شيء جنونى
آبى
شمس النهار
روفى
فارس بلا جواد
أكون او لا اكون
اقصوصه
الطالبه عفو الله
ابو على
موناليزا
شهرزاد
الملاك
حبيبه
تامر الحسينى
حور الجنه
برنسس بيرى
أنسان وبس
يويو
نور الدين
أحمد _k
بنت مصريه
أنا أنسان
وأخيرا دكتور عمرو

انا مش لاقيه شيء اكتبهولكم فعلا غير كلمة شكر وأعتذار

وفاء بركات يقول...

بجد موضوع النفاق ده أزعجني جدا ...
يعني ممكن أكون كاتبه حاجه في العباطه
وفي حد يقولي آيه الحلاوه دى ...
أنا لما بدخل مدونه لأول مره بخصص لها وقت كافي علشان اقدر أقرأ مواضعها بتمعن ..لكن بالنسبه للنقد انا مش متخصصه ولا دارسه وأنا لما بكتب الفكره علي الورق الكلام هو اللي بيسترسل مني علي حسب إحساسي بالموضوع

وعلي فكره كلاماتك جميله ومؤثره بجد من غير نفاق إحساسك عالي وعلي فكره كنت قلتي لي اظبط الإوزان في حياتي من غيرك أحلي كنت تقصدى آخر الأبيات لأن دى فقط اللي ظبطها ..
عشمي أن تقولي رأيك وأنا مع النقد البناء وتحيا مصر

Maha Shahen يقول...

وفاء بركات
..........
كلنا نعانى من النفاق فى شتى المواقف بحياتنا فلما لا يأتى بعضاً منه هنا

بشكرك علي كلماتك الرقيقه
نورتى المدونه واسعدنى تعليقك وبالنسبه لموضوع الاوزان بعتلك رد بمدونتك
وأعتذر فأنا لست ناقده ولا أديبه
انا مجرد أنسان يشعر ويسعى للتفكير

غير معرف يقول...

السلاام عليكم ورحمه الله وبركاته
كيفكـ؟ ان شاء الله بخير ؟ ان شاء الله تكونين بصحه وعاافيه ؟
ويسلموووو ع الكلاامم الحلوو
بس عندي سؤاااااال ودي تجاوبووني عليه بليزز بناات شبااب
اذا كنت متضاايقه ودي ابكي واصيح بدوون سبب او بسبب بس انا ماادري شنو هو او مو حاسه فيه انصحوني شسووي ؟؟

تحيااتي << سوسو

غير معرف يقول...

السلاام عليكم ورحمه الله وبركاته
كيفكـ؟ ان شاء الله بخير ؟ ان شاء الله تكونين بصحه وعاافيه ؟
ويسلموووو ع الكلاامم الحلوو
بس عندي سؤاااااال ودي تجاوبووني عليه بليزز بناات شبااب
اذا كنت متضاايقه ودي ابكي واصيح بدوون سبب او بسبب بس انا ماادري شنو هو او مو حاسه فيه انصحوني شسووي ؟؟

تحيااتي << سوسو

Maha Shahen يقول...

غير معروف )سوسو (
...................
مستغربه جدا لأن البوست قديم قوى
مستغربه ان لسه فى حد بيعلق عليه
بس والله انا شخصيا استفادت كتير بدخولى ليه من جديد
اوقات بيبقى من الروعه والله اننا نجمع جزء فقدناه من ذاتنا
ايه السبب فى خنقتك او احساسك انك عايزه تصرخى لازم تكونى عارفه كل شىء ليه سبب
اوقات بيكون ضيق نفس لظروف حاصله او بعد عن ربنا مهو للروح غذاء برضو لو محصلتش عليه بتصرخ زى المعدة تماما لكن فى صمت بيفسر فى الخنقه
فى كل الاحوال استعينى بالله فسواء كانت ظروف او هموم او حتى ابتعاد عنه فالقرب كفيل بزوال ما يضرك بأذن الله

غير معرف يقول...

معقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

غير معرف يقول...

معقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

غير معرف يقول...

minanabilمعقول يا قلبي تمشي الطريق وتكمله
آلمك عذابك بس مين يتحمله
شايف حبيبك بس قلبه معدش ليك
أسكت يا قلبي حاول تخبي دموع عنيك
أصرخ في صمتك واتحمل .. ابعد يا قلبي اوعي تكمل
ازاي هداري في الألام لما يبقي قصاد عنيك
ازاي راح اسكت والكلام عايز يقوله يبقي ليك
تشكي لمين ومفيش كلام يتقال عليه
متقولش خاين .. كل الحكايه انك يا قلبي مفهمتهوش
كلامه ليك مكنش حب .. متقولش باعك متظلموش
حظك يا قلبي مشيت طريق متكملوش .. متكملوش

غير معرف يقول...

https://www.facebook.com/profile.php?id=100002277193573&ref=tn_tnmn